新聞內容 
《早起鳥兒有蟲吃，早起的蟲兒被鳥吃》強勢出頭危機重重︱9月10號哈囉好工週刊火熱登場
- 2018-09-10
- https://mp.weixin.qq.com/s/ImIEBnq-vlDKz4LWUUMnzQ
早起的鳥兒有蟲吃，早起的蟲兒被鳥吃
導讀：電影裏經常都會見到「職場英雄」的故事，他們總會為團隊發聲、樂於幫助別人、犧牲小我完成大我。但在職場如戰場的現實生活裡，所謂「職場英雄」更多的是想出風頭而逞強的人。今期《哈囉好工週刊》會分享現實版「職場英雄」故事，你身邊有沒有以下的「職場英雄」呢？
賈汀斯
年齡：35–44歲
性別：男性
行業：批發及零售
職位：基層職員（普通職員）
有同事為咗自己嘅虛榮心，想展示自己嘅銷售能力畀同team嘅同事睇，就買咗好多健康產品再同同事講我一個月內會賣晒出去，我哋就不以為然唔理佢。一個月之後佢都變得好低調同唔再提起嗰件事，原來嗰時佢買嘅產品賣唔出去要自己食番晒佢。
給打工仔的建議：做人唔好認叻，同自己過唔去
排骨妹
年齡：25–34歲
性別：女性
行業：娛樂博彩
職位：基層職員（普通職員）
公司嚟咗個新人，但係冇人想教。喺呢個時候有一位熱心嘅同事主動去教新人，只不過佢教一半唔教一半，跟住就話「要教嘅教完，你已經可以自己獨立工作」，但係個新人都仲有好多嘢係唔知點做。有次佢要同其他同事一齊參與一個項目，好多嘢都做錯晒，我哋問教
佢嘅同事了解情況，而嗰位同事竟然話唔關佢事。
給打工仔的建議：如果真係唔想教就唔好教，教到唔鹹唔淡反而害到人。
多啦B夢
年齡：25–34歲
性別：男性
行業：資訊科技
職位：中層管理者（主管級別／經理等）
同事入職想爭取機會學習，而公司正好需要人收拾好貨倉，呢位同事就話自己好擅長做家務可以幫忙收拾貨倉，順便可以了解更多公司嘅運作。但係過程中佢不斷出錯仲整到越嚟越亂，到最後好多位同事都睇唔過眼叫佢唔洗幫手整理。
給打工仔的建議：作為新人，當未熟悉公司內部運作時，就唔好表現太出位。
阿凡達
年齡：25–34歲
性別：男性
行業：餐飲
職位：基層職員（普通職員）
有次經理放大假，我哋Senior就暫時頂替經理嘅職務，安排同事嘅食飯時間同埋檢查工作上有冇出錯。有次客人投訴，Senior出面解決但解決唔到，佢竟然將呢件事推去另一位同事身上，之後仲要離開埋現場。就因為呢件事令到好多同事都唔鐘意佢。
給打工仔的建議：想解決問題唔係唔得，但係就唔好做一半唔做一半，害己害人
Carmen
年齡：25–34歲
性別：女性
行業：批發及零售
職位：基層職員（普通職員）
同事A俾客人無理取鬧，同事B見到呢個情況就過去幫忙調停。點知佢喺調停嘅過程中接受唔到客人嘅粗言穢語最後仲鬧埋個客。經理見到呢個情況就過去了解，而B同事仲不知悔改不停喺度鬧，之後經理處理完件事就炒咗佢。
給打工仔的建議：成年人要學識管理好自己嘅情緒
Tad
年齡：35–44歲
性別：男性
行業：行政／辦公室助理
職位：中層管理者（主管級別／經理等）
某部門嘅主管為咗喺老細面前展示能力，就去另一個部門攞佢哋嘅工作做，做唔掂就畀埋下屬做，再唔得就將呢鑊粥畀返原本嘅部門。後來老細知道咗佢虛有其表又令到公司部門亂七八糟，就出咗封警告信畀佢。
給打工仔的建議：要出風頭唔使出到其他部門。
薩爾達
年齡：35–44歲
性別：男性
行業：會議展覽
職位：基層職員（普通職員）
同事A喺公司做咗幾年一直都唔上唔落；同事B喺公司做嘅時間長，而且能力比A好。有次公司有一個計劃要畀B做，A就想表現自己嘅能力於是自告奮勇，後來公司決定交畀A做呢個計劃。一開始A表現唔錯，只不過到咗後期好多嘢都做唔好，俾老板鬧仲要收返個計劃畀B做，同事A因為呢個計劃令老板對佢嘅印象差咗，而且後來B仲升埋職變咗A嘅上司。
給打工仔的建議：未有足夠嘅能力唔好硬上
無名
年齡：45–54歲
性別：女性
行業：廣告／傳媒
職位：中層管理者（主管級別／經理等）
公司有個「老屎忽」好鍾意認叻，成日話識好多人，有一次公司某項目需要人脈，個「老屎忽」當然又喺度認叻，話自己認識某某人關係仲好好。就咁樣，公司就拜託呢位「老屎忽」搭人脈關係，點知道後來⋯⋯其實大家都估到，最後所謂嘅人脈只不過係「無名小卒」，完全幫唔到忙，但又遲遲唔同公司講，搞到項目成日被延遲。
給打工仔的建議：唔好喺職場上over promise，唔好認叻，要實事求是。
路人丁
年齡：35–44歲
性別：男性
行業：交通運輸
職位：中層管理者（主管級別／經理等）
之前公司有個同事A成日畀老細鬧，無論大小事，老細唔開心就搵同事A出氣。而同事B係一個好有責任心同正義感嘅人。有一次老細又無理取鬧，搵同事A嚟鬧，同事A就向同事B哭訴。同事B睇唔過眼，就衝出嚟擋喺同事A面前，指住老細講：「你成日精神虐待同事A，我會告你，你知唔知道好多同事都睇唔過眼！」事後，同事B俾老細炒魷魚，但同事A依然喺公司屹立不倒，當冇事發生過，冇幾耐仲俾老細升埋職。
給打工仔的建議：唔好唔經大腦就衝出嚟，要時刻睇清楚形勢，如果唔係俾人利用都唔知道
Oppa
年齡：25–34歲
性別：男性
行業：餐飲
職位：基層職員（普通職員）
我哋鋪頭有前場同後場，而後場有一位同事每次見到前場同事做嘅嘢都好羨慕。有次佢就同經理講：「我可以點完餐跟住整嘢食再放好畀埋客人」，經理就喺唔繁忙嘅時段畀佢試下。結果嗰位同事幫客人點餐時已經用咗好多時間，令排隊嘅客人排到好長又等得唔耐煩，最後佢整一份餐用咗30分鐘，導致前場嘅同事不停俾客人鬧。
給打工仔的建議：安守本份，每一樣工作都唔簡單。
布丁狗
年齡：25–34歲
性別：女性
行業：行政／辦公室助理
職位：基層職員（普通職員）
公司有隻狗成日會突然亂叫，咁平時都會叫一位訓練開狗隻嘅同事去處理，但今次隻狗都仲喺度叫。唔知係唔係咁啱老細喺度，有位平時極度「扮工」嘅同事即刻上前幫忙，走去安撫隻狗，點知隻狗更加惡仲咬咗同事一啖，最後仲要麻煩老闆車佢去醫院檢查。
給打工仔的建議：小心得不償失。
勞神
年齡：45–54歲
性別：男性
行業：建築及工程
職位：基層職員（普通職員）
我哋做裝修嘅，平時有嗰句講嗰句，唔會亂答應人。但係我哋有一個包工頭對住個客就永遠乜都話得。有一次遇着一個好多意見嘅客人，佢都照單全收。但到工程完結時，有好多問題出現，客人亦當然唔收貨。包工頭喺呢個時侯咩都話唔得仲唔想改返好，仲要不斷叫個客人即刻畀錢。咁客人當然唔肯，要做好晒先畀全數，最後搞到出糧嘅時間遲咗幾個月。
給打工仔的建議：得就得，唔得就唔得，過份逞強係唔得。
結語
無論你是不是第一個發聲的人，其實都並不重要。重要的是你在做每一個決定之前，都有了解事前背景、以及清楚知道自己有能力勝任。而你亦應為你所作決定帶來的後果負責。在職場上，我們的一言一行都代表著自己和公司的形象。所以，最先發聲的人不一定就是「職場英雄」，三思而後行的人才是「真英雄」。
查閱更多《哈囉好工週刊》內容：http://weekly.hello-jobs.com/
返回 