《打腫臉充胖子》表面風光，銀包清光 | 11月09號哈囉好工週刊

喺中國社會，大部份人都非常重視「面子」，「面子」代表住個人嘅名望同聲譽，大家都努力咁去維護。今期《哈囉好工週刊》讀者分享佢哋或者同事嘅「要面」經歷，希望大家鍾意。化名：細頭妹妹
行業：金融銀行
職位：基層職員
性別：女
年齡：25 – 34歲

我覺得要喺社會上打拼，「打腫臉充胖子」係迫不得已。因為我好多時候要見客，而見客又要講派頭，有時著得隨便啲，樸素啲，上司就閙dress code唔得，所以每日返工，都要著得好好睇睇。例如啲衫要係名牌，鞋要係名牌高踭鞋，袋要奢侈品牌袋，錶要戴名錶。而日日都要返工，我冇可能只得一套衫，一個袋，一對鞋，一隻錶，所以我個個月都碌爆卡，要做卡奴，基本上每個月出糧後，找完卡數就冇錢開飯。

你覺得喺咩人面前最唔需要面子？
父母面前最可以唔要面子，因為父母陪我長大，咁多年嚟，我咩樣父母都見過，而且父母好了解我，我暫時只可以喺父母面前唔要任何面。

你覺得喺咩人面前最需要面子？
當然係客戶，因為客戶會從你一身嘅打扮同行頭去認為你係咪可靠、專業同有實力，所以喺客戶面前一定要保持良好形象，唔可以丟架。

化名：速速前，錢錢來
行業：酒店營運
職位：基層職員
性別：男
年齡：25 – 34歲

我覺得「打腫臉充胖子」只係個人嘅選擇，你有權選擇唔去做，冇人會逼你。我有個同team嘅同事A，成日返工打扮光鮮，返工開跑車，一個富家子弟嘅樣。有一日，某同事屋企出事，個小朋友有急病，急住要錢醫病。我哋同team嘅幾個同事都紛紛伸出援手，多多少少都借咗啲錢畀嗰位同事。唯獨同事A，佢居然唔借，因為佢話自己冇錢，話自己因為太鍾意買名牌，洗晒啲錢，部跑車都係租嘅，唔係自己買嘅。從嗰時開始，大家先知道原來佢係「打腫臉充胖子」，根本就係窮鬼一個，日日著名牌，開跑車，係到扮有錢人。

你覺得喺咩人面前最唔需要面子？
我覺得對住好朋友就最唔需要面子，我好朋友同我識咗好多年，有好深厚嘅感情，我哋大家有開心同唔開心嘅事都會分享，對住好朋友唔需要面子，做自己就可以。

你覺得喺咩人面前最需要面子？
我覺得喺同事面前就最要面，因為公司嘅同事好八，一旦有一件事畀一個人知道，好快就會傳到成間公司都知。好事就算啦，如果自己啲衰嘢傳千里，我就冇面見人，公司嘅同事會用好奇怪嘅目光去望你。
化名：假的真不了
行業：博彩娛樂
職位：中層管理者
性別：男
年齡：35 – 44歲

我覺得冇人想「打腫臉充胖子」嘅，因為好多時現實都會有啲因素迫壓你，你唔去做就會有負面效果，所以迫不得已要做。我以前有一個下屬，新入職冇咩朋友，所以佢就開始討好同事，成日買下午茶請同事食，又送禮物畀同事嘅小朋友，同事都話佢客氣，成個聖誕老人咁。而佢只會話小意思，好平，話自己識得蛋糕店、玩具店等等老闆，所以先有折。同事聽到之後就開始托佢買各種嘢，過咗冇耐，個同事就辭咗職。我問佢辭職理由，嗰陣佢先同我講，原來佢根本唔識咩老闆，只係一開始想同同事拉近距離先咁講，同事托佢買嘅嘢，差價係自己補，並唔存在打折。佢自己覺得收唔到科，唯有辭職。

你覺得喺咩人面前最唔需要面子？
我覺得喺老婆面前最唔需要面子，因為老夫老妻，對方咩狀況都見過，唔需要面子。

你覺得喺咩人面前最需要面子？
下屬面前啦，喺下屬面前唔可以冇面，如果唔係就會冇咗威嚴，下屬就唔驚你，就會難管理下屬。

化名：Single狗
行業：資訊科技
職位：基層職員
性別：男
年齡：25 – 34歲

搏殺方法好多種，「打腫臉充胖子」唔係必要。我覺得做人最緊要係誠實，事實係點就係點。曾經遇過一個極品同事，平時鍾意誇誇其談，講好多自己嘅威水史，雖然佢吹水唔抹嘴但唔影響到工作就算啦。後尾有次真係畀佢害死！有一個project，經理問我哋team要幾耐先可以完成，主管都未出聲，佢就衝出嚟開始誇誇其談，話咩自己好多呢方面嘅經驗，以佢自己嘅實力，可以幫到條team提高工作效率，三個星期就可以做好。但事實上，個project係好複雜，需要嘅時間遠遠超於三個星期，起碼要兩個月。就係因為佢亂咁承諾，衰多口搞到全部人晚晚OT，三個星期都住喺公司，最令人作嘔嘅係，佢居然唔識做！主管安排佢做嘅嘢樣樣都唔識！佢識嗰啲都做錯，喺度拖後腿，完全冇實力，居然敢喺經理面前「打腫臉充胖子」，仲連累大家！

你覺得喺咩人面前最唔需要面子？
同事面前本應最唔需要面子，因為大家都好熟，好似一家人咁，一齊衝鋒陷陣，幫公司打江山。本來應該係生死之交咁，大家信任大家，最慘係有老鼠屎！

你覺得喺咩人面前最需要面子？
我覺得喺自己父母面前最要面子，因為我好想喺父母面前證明自己嘅能力，所以喺父母面前都係報喜不報憂，將自己最好嘅一面表現出嚟，等佢哋放心。
化名：負二代
行業：博彩娛樂
職位：基層職員
性別：女
年齡：25 – 34歲

「打腫臉充胖子」呢種行為絕對唔係迫不得已。凡事都應量力而為，「打腫臉充胖子」只會害咗自己。其實老實面對真實嘅自己就得，其他動作都係多餘。好似我哋公司咁，部門好多女同事都鍾意靚袋，好多都用靚袋返工。不過我冇受佢哋影響，我有我自己嘅價值觀同消費觀，冇跟風。但我有另外一個同事，據我了解，經濟狀況同我都差唔多，但佢為咗埋嗰啲女同事堆，自己都開始買靚袋，投其所好。佢聽到嗰啲同事講今期流行咩袋，新出咩袋，佢即刻去買嚟用，人哋唔知仲以為佢有個有錢男友，突然富貴。其實私底下佢同我去食lunch，每次都只會叫成個menu最平嗰個食，而且一日只會食一餐，儲錢買袋。我睇見佢咁樣生活真係好辛苦。

你覺得喺咩人面前最唔需要面子？
喺屋企人面前最唔需要面子！因為屋企人對我好包容，無論我係咩人，我變成點，或者我經歷咗啲咩事，佢哋永遠都接納我，包容我，面子根本唔需要。

你覺得喺咩人面前最需要面子？
上司囉，下屬永遠都想喺上司面前表現最好嘅一面，然後就可以升職加薪，但變相會諸多顧忌咗。
化名：自hey hey人
行業：零售/批發
職位：基層職員
性別：男
年齡：25 – 34歲

我覺得「打腫臉充胖子」係按個人性格同習慣而定，有啲人習慣性會做出「打腫臉充胖子」嘅行為。公司有個同事好大隻，身材好威猛，平時習慣去做運動，好幫得手，有佢喺度，再重嘅貨，再多嘅貨都好快搬完，個個同事都對佢讚口不絕。有一次，佢做緊嘢嘅時候扭親隻手，但又冇講，又冇叫其他同事幫手，佢覺得叫人幫手好冇面，所以就繼續自己搬。雖然貨就搬完，但之後佢隻手傷得好嚴重，要休息一個月先可以恢復。雖然嗰次佢自己唔想麻煩同事，又覺得叫人幫手好冇面，但宜家因為佢手受傷要休一個月，公司人手唔夠，影響仲大。

你覺得喺咩人面前最唔需要面子？
我覺得喺幫助到自己嘅人面前就最唔需要面子，因為如果你要面子嘅話，想叫人哋幫都唔敢。

你覺得喺咩人面前最需要面子？
唔熟嘅同事面前就最要面子，因為好多人都想喺同事面前表現自己嘅能力。

化名：膠質靚女
行業：教育
職位：基層職員
性別：女
年齡：25 – 34歲

應該冇人想主動「打腫臉充胖子」，都係怕畀人睇唔起先做。有一日有個法國嘅客人嚟，但公司冇人識法文，有個同事提出，好似之前聽講公司有個接待員去過法國留學，識法文。而且問過接待員本人，佢本人都話識法文，冇問題，咁件事就咁定咗落嚟，由接待員同事負責去接待今次嘅法國客人。後來，客人投訴，話同接待員同事溝通唔到，服務好差，以後都唔再嚟。原來接待員同事只係去過法國讀過3個月基本法文，並唔係佢自己所講嘅流利，溝通完全冇問題。但因為佢嘅充大頭鬼，公司失去咗一個寶貴嘅客人。

你覺得喺咩人面前最唔需要面子？
我覺得同事面前最唔需要面子，因為大家都係做嘢啫，如果強要面，最終害到嘅係自己。

你覺得喺咩人面前最需要面子？
職場上嘅競爭對手就最要面子，因為唔可以輸畀對方，所以會將自己最強，最有勢力嘅一面表現出嚟。

化名：義氣仔女
行業：教育
職位：基層職員
性別：女
年齡：25 – 34歲

「打腫臉充胖子」呢種行為只係迫不得已。人在江湖，身不由己，身邊好多事會逼自己做，人生好多時候都冇選擇題。我自己就係例子，我為人都算和善，同好多同事都傾得埋，好多同事無論私事同公事都會揾我傾訴。後來，越嚟越多人揾我傾訴，我慢慢覺得自己應付唔嚟，但又唔好意思推搪，就硬住頭皮繼續做大家嘅傾訴對象，心靈導師自居咁款。但過多一排，我發現同同事傾訴嘅時間已經多到連我自己嘅私人時間都冇埋，自己又越嚟越多負能量，最後自己頂唔順，崩潰咗，甚至要睇心理醫生。我真係好後悔當初自己做咩最佳傾訴者，到頭來自己搞到自已承受唔到。

你覺得喺咩人面前最唔需要面子？
我覺得係真心朋友面前最唔需要面子，因為佢哋係唔會介意你喺佢面前係咩樣，如果仲要逞强，你嘅真心朋友反而會唔開心。

你覺得喺咩人面前最需要面子？
喺父母面前最要面子。因為我父母一直覺得我唔生性、覺得我忤逆唔聽話、覺得我肯定會失敗。所以我好想證明畀我父母睇我會成功。

職場越「唔要面」

越容易獲得面子

睇完讀者嘅分享，你有冇啲咩得着？

當然辦公室日常必須要有適當嘅面子，但過分要求面子只會適得其反。

如果唔識點去調節，嘗試睇吓我哋以下嘅分享，希望睇過之後大家可以有所啟發。