《畢業生好「薪」酸》搵工定搵好人工？| 09月28號哈囉好工週刊

每年夏天，畢業生們相繼踏進佢哋人生嘅下一步，踏進職場。然而，今年新冠肺炎疫情肆虐，畢業生喺搵工時候受到諸多考驗。今期《哈囉好工週刊》會分享澳門各院校畢業生歷年嘅收入報告，了解新冠肺炎點樣影響今年嘅畢業生。澳門大學
●應屆畢業生薪酬中位數
學年2017/18 MOP16,000
學年2018/19 MOP15,500
學年2016/17 MOP15,000

澳門理工學院
●應屆畢業生薪酬中位數
學年2018/19 MOP17,446
學年2017/18 MOP16,676
學年2016/17 MOP15,606

澳門旅遊學院
●應屆畢業生薪酬中位數
學年2017/18 MOP15,300
學年2016/17 MOP14,100

澳門理工學院
●應屆畢業生薪酬中位數
學年2017/18 MOP18,500
學年2016/17 MOP15,500
化名：工商校花
性別：女
年齡：18 – 24歲
畢業學校：澳門大學
專業：工商管理
工作狀態：未揾到工

作為應屆畢業生，你期望薪金有幾多？
MOP 15,001 – 16,000

你嘅期望薪金同畢業生往年嘅薪酬中位數相比有差距嗎？
冇咩差距，我嘅期望薪金同往年嘅薪酬中位數對比都係差唔多。

你覺得以上嘅畢業生薪酬數據合理嗎？
我覺得合理啊。我哋大學生辛辛苦苦讀咗咁多年書出嚟社會，已經付出咗好多時間同金錢，有返MOP 15,000 左右嘅薪酬好正常，好合理啊。

你預計今年應屆畢業生嘅薪酬中位數會有幾多？
我預計今年應屆畢業生嘅薪酬中位數都會係 MOP 15,000 左右，同以往嘅差距唔大，因為我覺得畢業生基本薪金都係差唔多，唔會有太大出入。

1

化名：宅宅
性別：男
年齡：18 – 24歲
畢業學校：澳門大學
專業：會計
工作狀態：未揾到工

作為應屆畢業生，你期望薪金有幾多？
MOP 13,001 – 14,000

你嘅期望薪金同畢業生往年嘅薪酬中位數相比有差距嗎？
我覺得今年同以往畢業生嘅薪酬對比會有差距，一定會低咗。

你覺得今年嘅薪酬會有啲咩差距？
我覺得今年大學畢業生嘅薪酬中位數起碼低 MOP 1,000。因為今年畢業遇上新冠肺炎疫情，好多公司都唔請人，就業競爭比往年大，為咗提升自己嘅優勢，我唯有降低自己嘅期望薪金，希望可以有僱主會請我。

你覺得以上嘅畢業生薪酬數據合理嗎？
我覺得數據合理。因為我之前聽我啲師兄師姐講返，都有呢個數。所以我覺得佢合理，反映到事實。

你預計今年應屆畢業生嘅薪酬中位數會有幾多？
我預計今年中位數會係 MOP 13,500 左右。因為今年經濟差，整個澳門，各行各業，都需要時間去恢復，所有企業用人方面都會比較謹慎，以致今年畢業生嘅薪酬都會比以往低。

1

化名：型男
性別：男
年齡：18 – 24歲
畢業學校：澳門科技大學
專業：酒店管理
工作狀態：未揾到工

作為應屆畢業生，你期望薪金有幾多？
MOP 12,001 – 13,000

你嘅期望薪金同畢業生往年嘅薪酬中位數相比有差距嗎？
冇對比，冇傷害。肯定有差距，相比往年中位數會低啲。

你覺得今年嘅薪酬會有啲咩差距？
我嘅期望薪金比以上各大畢業生往年嘅薪酬中位數低，低咗大概幾千。因為今年賭場酒店業大受打擊，好多招聘都暫停，自己只能夠減低期望薪金，迎合賭場酒店業嘅寒冬時期。至少自己有工做，入咗去，自己到時再努力升職。

你覺得以上嘅畢業生薪酬數據合理嗎？
我覺得個數據唔合理。因為我覺得實際畢業生薪酬比上述數據低，我聽其他人講，好多畢業生都係 MOP 15,000 以下，少數嘅畢業生先有 MOP 15,000 以上。

你預計今年應屆畢業生嘅薪酬中位數會有幾多？
我預計今年中位數會係 MOP 12,000。面對疫情，肯定好多畢業生好似我咁降低期望薪酬，只求揾到份工，不論薪酬高低。
化名：無名
性別：男
年齡：25 – 34歲
畢業學校：澳門理工學院
專業：電腦
工作狀態：未揾到工

作為應屆畢業生，你期望薪金有幾多？
MOP 15,001 – 16,000

你嘅期望薪金同畢業生往年嘅薪酬中位數相比有差距嗎？
我嘅期望薪金同往年嘅薪酬中位數對比係冇差距。

你覺得以上嘅畢業生薪酬數據合理嗎？
我覺得合理嘅。我覺得係大學畢業生嘅公價嚟，再加上通漲，所以我覺得非常合理。起碼我識嘅圈子裡面嘅學長，都係差唔多嘅薪酬。

你預計今年應屆畢業生嘅薪酬中位數會有幾多？
我預計今屆畢業生嘅薪酬中位數會係 MOP 14,000左右。我覺得今年因為疫情嘅原因，經濟唔好，所以好多僱主都手緊咗，導致畀應屆畢業生嘅薪酬會比往年下跌。

1
化名：前路漫漫
性別：女
年齡：18 – 24歲
畢業學校：澳門城市大學
專業：設計藝術
工作狀態：未揾到工

作為應屆畢業生，你期望薪金有幾多？
MOP 14,001 – 15,000

你嘅期望薪金同畢業生往年嘅薪酬中位數相比有差距嗎？
我嘅期望薪金同以上數據對比有差距，比中位數低。

你覺得今年嘅薪酬會有啲咩差距？
同我嘅期望薪金相比低咗大概有 MOP 500 – 1,000。

你覺得以上嘅畢業生薪酬數據合理嗎？
我覺得個中位數數據唔合理。我覺得有啲離地，好少畢業生一出嚟就有 MOP 15,000。我同返自己嘅學長學姐交流，佢哋都達唔到呢個中位數。就算入到大公司例如酒店賭場，如果做文職，好多一開始都只係得 MOP 14,000左右，除非要輪更嘅工作就高少少人工，而我身邊一般啱啱畢業嘅同學仔都偏向返朝九晚六，唔鍾意揾輪更工作，感覺大學生相對少人做輪更工作，人工大家應該差唔多。

你預計今年應屆畢業生嘅薪酬中位數會有幾多？
我預計今年嘅中位數會係 MOP 12,000。疫情影響下肯定好多公司減人工，如果我哋都要照入，人工肯定低咗。

1
化名：Hea得就Hea
性別：男
年齡：18 – 24歲
畢業學校：旅遊學院
專業：旅遊會展
工作狀態：未揾到工

作為應屆畢業生，你期望薪金有幾多？
MOP 12,001 – 13,000

你嘅期望薪金同畢業生往年嘅薪酬中位數相比有差距嗎？
我嘅期望薪金比往年畢業生嘅薪酬中位數低。

你覺得今年嘅薪酬會有啲咩差距？
我嘅低咗大概有 MOP 1,000 咁上下。因為今年唔好景，特別喺我嗰科，面臨前所未有嘅寒冬，我好多同學都好似我咁未揾到工，所以降低自己嘅要求，希望揾到份工先，然後等將來旅遊業回血後，再跳去更好嘅公司工作。

你覺得以上嘅畢業生薪酬數據合理嗎？
我覺得合理嘅。往年成個澳門經濟都唔錯，畢業生嘅薪酬相對高都好正常。

你預計今年應屆畢業生嘅薪酬中位數會有幾多？
我預計今年應屆畢業生嘅薪酬中位數會係 MOP 16,000，啫係恢復返之前嘅薪酬水平。因為我有信心，疫情好快會完全過去，經濟好快就會復甦，昔日嘅佳境都會好快返嚟。
化名：小可愛
性別：女
年齡：18 – 24歲
畢業學校：聖若瑟大學
專業：工商管理
工作狀態：未揾到工

作為應屆畢業生，你期望薪金有幾多？
MOP 11,001 – 12,000

你嘅期望薪金同畢業生往年嘅薪酬中位數相比有差距嗎？
有，我嘅期望薪金同往年嘅畢業生薪酬比相對低。

你覺得今年嘅薪酬會有啲咩差距？
同我嘅期望薪金相比低咗好多。我聽我屋企人講，好多公司今年都裁員，半薪，所以畀應屆畢業生嘅薪酬肯定唔會高，所以我刻意降低自己嘅期望薪酬去增強自己嘅競爭力。另外，我覺得畢業嘅第一份工純粹係攞經驗，學嘢，薪酬方面其實唔係好重要。

你覺得以上嘅畢業生薪酬數據合理嗎？
我覺得個數據唔合理。因為個數據畀好多賭場酒店嘅員工拉高晒啲數，所以覺得數據有啲離地。實際上，如果係中小企，畢業生邊度有咁高人工啊，頂多咪 MOP 13,000 左右。

你預計今年應屆畢業生嘅薪酬中位數會有幾多？
我預計今年應屆畢業生嘅薪酬中位數會係 MOP 13,000。因為今年好多賭場酒店都少咗提供合適嘅職位畀畢業生，所以應該今年會少咗加入賭場酒店嘅畢業生，所以出年應屆畢業生嘅薪酬中位數都肯定會下跌。

1
化名：伏王
性別：男
年齡：18 – 24歲
畢業學校：澳門理工學院
專業：公共行政
工作狀態：未開始揾工

作為應屆畢業生，你期望薪金有幾多？
MOP 20,000 以上

你嘅期望薪金同畢業生往年嘅薪酬中位數相比有差距嗎？
我覺得會有差距，點都比中位數高少少。

你覺得今年嘅薪酬會有啲咩差距？
我覺得會俾往年畢業生嘅薪酬中位數高 MOP 1,000 – 2,000。雖然受疫情影響，但澳門持續高通脹，每年都會高少少。人工應該唔會扣，不過可能開嘅位就少咗囉。其實我唔算好清楚，我讀公共行政係為咗入政府工，我嘅目標係做公務員，之後入到去其實都比私人企業高好多，私人企業定係中小企我都冇咩興趣知。

你覺得以上嘅畢業生薪酬數據合理嗎？
我覺得個中位數數據合理，從大圍嚟睇，我見我身邊差唔多年紀嘅親戚同朋友基本上都係數據上面嘅薪酬。

你預計今年應屆畢業生嘅薪酬中位數會有幾多？
我預計應屆畢業生嘅薪酬中位數會係 MOP 17,000。因為經歷今次新冠肺炎疫情，好多畢業生更加想做公務員，因為公務員工作穩定，唔會受到外界經濟影響而減薪或放無薪假。