News Category 
Hot Tags
News Detail
《賭場特工 – VIP Host》不為人知的秘密 | 08月03號哈囉好工週刊
- 2020-08-04
博彩業一直係推動澳門經濟嘅中流柢柱，而喺呢個行業入面，貴賓廳公關(VIP Host)係一個好重要嘅角色。佢哋係形象光鮮亮麗而且精英過人嘅年輕一族，專業嘅形象獨特出眾，好多時一眼就會被認得出係從事貴賓廳公關 (VIP Host) 呢個行業。今期《哈囉好工週刊》嘅讀者會分享佢哋喺貴賓廳公關 (VIP Host) 呢個職位遇到嘅挑戰同成就，一齊睇睇喇！
我有個同事好上進，佢唔係本地人，但勝在有幾分姿色同夠姣，佢好識利用自己嘅外貌優勢去氹客買碼，氹客買手袋。有客摸佢手仔，佢仲要特登成個身都靠埋個客度，仲認埋個客做「乾爹」。然後下一步就就暗送秋波，理所當然咁入埋「乾爹」酒店房過夜。所以佢好多「乾爹」同「乾哥哥」，只可以講覺得佢未來老公好慘，成街「襟兄弟」。
你覺得呢份工作最大嘅挑戰同犧牲係咩？
我覺得最大嘅挑戰就係抵抗誘惑，因為好多金錢誘惑，如果出賣自己嘅身體就可以得到好多錢。我覺得最大嘅犧牲係我後生嘅時候都曾經有次為咗錢出賣自己身體，到而家都覺得好後悔！
你覺得呢份工作最大收獲係咩？
我覺得最大嘅收獲係得到好多錢，我靠我自己買到樓，買到車位，買到靚車，用奢侈品牌嘅包包。
如果你情人介意你做呢份工，你會離職嗎？
我會為佢離職。因為我自己知道呢行好多潛規則，我自己都怕我自己受唔住誘惑再犯錯。
你曾經做過或體驗過最離譜的事是：
我都係畀客灌酒，幾個客揾我嚟開心，灌我飲好多酒，我聽到個客同佢同行嘅人講話想將我灌醉然後帶我上酒店房。好在我平時有鍛煉開酒量，算係酒筲箕，最後都冇穿冇爛。
你覺得呢份工作最大嘅挑戰同犧牲係咩？
最大嘅挑戰就係應對無禮嘅客人，你又要扮傻，又要對住啲客好態度；最大嘅犧牲係要成日飲酒同熬夜，對健康唔好。
你覺得呢份工作最大收獲係咩？
最大收獲就係入咗呢行而識咗我老公。
如果你情人介意你做呢份工，你會離職嗎？
就算在意我嘅工作，我都唔會為咗佢辭職。我覺得大家要互相包容同尊重對方嘅職業。都好彩我冇呢個問題，因為我老公都係公關，好理解大家嘅工作。
化名：傑仔
你曾經做過或體驗過最離譜的事是：
最離譜？衰客永遠是對的！無論顧客有理定無理，我哋都要做。而且我哋啲客特別「好」，有一次個客叫我去幫佢揾個「小姐」，要靚女，乾淨。我咪按照要求揾囉，點知道個客「體驗」完之後，投訴話個「小姐」唔夠靚女，而且唔夠乾淨。我好無奈，我鬼知道個客心目中對靚女嘅定義係點，而且乾淨呢樣嘢，更加難定義，唔通我要試下咩？所以好似我同事嘅事一樣，遇到投訴，只可以硬食！
你覺得呢份工作最大嘅挑戰同犧牲係咩？
挑戰就係要聽同達成客人嘅所有要求。最大嘅犧牲就係冇咗自己嘅尊嚴！我覺得自己好似奴隸，好卑微！
你覺得呢份工作最大收獲係咩？
錢囉。我比我同齡人賺得多錢，可以自由自在咁買買買。
如果你情人介意你做呢份工，你會離職嗎？
唔會。我做咩工作係我嘅自由，佢唔可以限制我嘅自由，如果佢因為我嘅工作就唔同我一齊，我覺得呢段感情唔值得挽留。
你曾經做過或體驗過最離譜的事是：
追唔到數，要靠屋企人親戚齊齊幫我開卡玩返幾手我已經覺得好離譜，我根本唔敢話畀同事知我帶嘅客係我屋企人同親戚。我覺得自己好失敗，工作搞唔掂，要屋企人幫手執手尾。而且好在佢哋本身唔鐘意賭，如果唔係，我就係拉佢哋落火坑嘅人。
你覺得呢份工作最大嘅挑戰同犧牲係咩？
我覺得最大嘅挑戰就係對住陌生人好外向同熱情，我本身性格內向，每次主動同陌生人講嘢，我內心都好掙扎；最大嘅犧牲就係利用咗屋企人同親戚，仲有自已犧牲嘅青春同時間，因為我覺得我其實唔合適做VIP Host，自己浪費咗自己嘅時間。
你覺得呢份工作最大收獲係咩？
最大嘅收獲就係認識多咗朋友，同事都對我好好，雖然我能力唔及佢哋，但佢哋仲對我好好，有時見到我OT，會畀個麵包我頂肚或畀支水我，同我打氣。
如果你情人介意你做呢份工，你會離職嗎？
如果佢介意我嘅工作，我會為佢離職。因為對於我嚟講，愛情大過天，我可以為咗愛情放棄一切都得！
化名：情聖
年齡：18 – 24歲
你認為做 VIP Host 最不為人知的事是：
我相信應該就係客人嘅奇怪嗜好。我哋要幫客人換碼，有好多客換碼嘅數好奇怪，其實係有佢自己嘅某啲原因，例如幸運數字，如果一個唔小心講錯數字，會搞到客人非常唔高興，tips肯定冇都算，如果輸咗更加會賴你。不過唔怪得個客，畢竟要傳達正確同清楚客人嘅說話係好基本嘅事，如果咁都換錯，可以準備換工啦。
你曾經做過或體驗過最離譜的事是：
啱啱做呢份工，覺得自已嘅普通話算係可以，但如果對方講得太快，或者帶方言嘅我就聽唔明。有日真係黑仔，畀我遇到一個好重口音嘅大陸客。個客叫我幫佢換四十七萬嘅碼，但我聽得唔係好清楚，又唔敢去問多次，喺冇請教同事嘅情況下憑自己嘅記憶去幫客換碼。點知我一換完畀個客佢就發火，話我做錯，話我將十七萬聽成四十七萬，雖然個音係好似但我確實做錯……最後我只可以即刻道歉。
你覺得呢份工作最大嘅挑戰同犧牲係咩？
作為VIP Host，我覺得最大嘅挑戰係外語問題，客人嚟自世界各哋，而且我嘅語言能力有限，好怕聽唔明個客講嘢。我覺得最大嘅犧牲係因為依份工，我同我女朋友分咗手。
你覺得呢份工作最大收獲係咩？
我可以賺夠錢買到我嘅dream car。
如果你情人介意你做呢份工，你會離職嗎？
如果我嘅情人在意我嘅工作，我會為佢離職。上一段感情就係因為我女朋友要我換工，佢屋企人覺得我嘅份工唔好，覺得我份工賺嘅唔係乾淨錢，所以阻止我同前女友拍拖。我當時堅持自己份工，失去咗自己嘅摯愛。所以下一段感情如果對方在意我嘅工作，我一定會辭職，唔想再錯過。
你認為做 VIP Host 最不為人知的事是：
我聽講某個場啲公關好亂，甚至係啲已婚同事，有啲公關同啲客嘅關係簡直一言難盡，好似畀客包養咁。有客就算唔嚟佢哋個場玩，但都會約個啲公關出嚟食飯，然後去開房。
你曾經做過或體驗過最離譜的事是：
我曾經體驗過一件好離譜嘅事，有一個客帶咗大婆同小三嚟澳門，但行程分開，而我就要幫個客嘅大婆同小三訂唔同嘅酒店，安排唔同嘅行程去錯開佢哋。其實個客畀佢哋同時出現喺澳門咁細嘅哋方已經係度玩緊命。但客人要求到，唯有照做。最後好死唔死，大婆同小三同時改行程。咁我當時帶住小三嘅，一見到大婆，我已經即刻扮睇唔到。但大婆眼利，一眼認出我，仲走埋嚟打招呼，大婆以為我帶著嗰個小三係其他客。然後佢哋一齊入咗同一間大牌名店，買咗同一款袋，真係嚇死我。我唔怕大家身份暴露，我只怕如果暴露咗我份工凍過水。
你覺得呢份工作最大嘅挑戰同犧牲係咩？
我覺得最大嘅挑戰就係要處理客人嘅私事，我真係唔擅長處理，有時我都唔知道我到底喺度做緊咩。我覺得最大嘅犧牲就係冇哂私人時間，人生得返工作。
你覺得呢份工作最大收獲係咩？
收獲就係畀我迅速成長。因為呢一行畀我見識到好多唔同嘅人，遇到好多困難同突發狀況，我覺得我因為咁成熟咗，已經被鍛煉到學識點應對。
如果你情人介意你做呢份工，你會離職嗎？
如果在意，我會為佢離職，雖然我唔認為我嘅工作有問題，但既然好在意，我會去配合。
你認為做 VIP Host 最不為人知的事是：
好多人以為做Host日日就係行行企企，以為幫手買下碼，然後就準時放工。但其實係誤解，可能有同行係咁，但我唔係。好多時候都要隨時候命。有一次陪個客喺貴賓廳賭到凌晨1點，然後個客就話要返酒店休息，咁我就放工返屋企。當我冲完涼，準備落床訓，個duty phone就響，個客打嚟話想食水蟹粥，叫我帶佢去。我頂硬上凌晨3點帶佢去食水蟹粥，呢份工真係好傷肝。
你曾經做過或體驗過最離譜的事是：
曾經體驗過最離譜嘅事就係跟到一個客，好爛賭，連續兩日，冇離開過賭檯，除咗去厠所，一直不分日夜，冇訓過，不停賭，一直持續咗48個鐘頭。我就跟住佢一直48個鐘頭冇訓過。
你覺得呢份工作最大嘅挑戰同犧牲係咩？
我覺得最大嘅挑戰係體力，因為好多時，啲客一賭開就唔願走，長時間賭都唔知道時間過，所以一定要好有體力去支撐呢份工作，時刻要同睡魔戰鬥。我覺得最大嘅犧牲係健康，因為食同訓都唔定時，搞到我身體好差，有胃病。
你覺得呢份工作最大收獲係咩？
收到好多客嘅tips。好多時啲客心情好同贏咗錢，佢哋就會比好多tips，上千上萬咁畀tips。
你會離職嗎？
當然唔會離職，因為除咗公關，我都唔知道我可以做咩工，而且我覺得我如果換咗其他工作，會揾唔返而家嘅人工。
你認為做 VIP Host 最不為人知的事是：
我哋有時會遇到啲唔好嘅客，好容易畀佢哋性騷擾。我有幾個同事試過畀客摸手，摸腰，但好多同事費事搞大件事，冇出聲，適當推一推開回避，好在嗰啲咸濕客冇再進一步。
你曾經做過或體驗過最離譜的事是：
我體驗過最離譜嘅事係曾經有個客當面開口問我幾錢陪訓。係咁嘅，嗰日我只不過化咗一個比較嫵媚嘅妝，個客就一直望住我，我其實已經感覺到，但冇理佢，繼續做自己嘢。過咗一陣，個客行埋嚟，細細聲問我一晚幾多錢，包養要幾錢，叫我開個價。我嚇到即刻去揾個男同事幫手解圍。
你覺得呢份工作最大嘅挑戰同犧牲係咩？
我覺得最大嘅挑戰係如果遇到性騷擾嘅時間唔知道點處理。最大嘅犧牲係容易被客食豆腐。
你覺得呢份工作最大收獲係咩？
錢，每個月嘅收入唔錯，可以買到自己鍾意嘅名牌袋，好多朋友都羡慕我。
你會離職嗎？
我會為對方離職，因為呢份職業，女仔好容易蝕抵，被食豆腐。
結語
每個行業，每份工作都會有高低起伏，無論表面睇起嚟有幾咁光鮮亮麗，都會有經歷光輝同受挫折嘅時候，當中亦有好多有笑有淚嘅故事。希望你可以喺今期嘅分享當中有所得著。
Back 