《上樑不正下樑歪》| 05月25號哈囉好工週刊

2020.5.11• 周一

喺職場上，工作環境嘅氛圍同文化係由領導層決定嘅，無論員工同唔同意佢哋嘅方向，除咗接受之外佢哋都冇咩其他選擇。今期《哈囉好工週刊》嘅讀者分享喺佢哋嘅經驗入面，領導層係點樣影響佢哋帶領嘅人，一齊睇吓啦~

嬴走「尚毅教育 皇牌課程套票」3套！

金融才女

行業：銀行和金融

職位：基層職員

性別：女

年齡：25 – 34歲

之前公司有個老海鮮經理，恃住自己年資耐，好鍾意開女同事玩笑，覺得人哋唔敢反駁咁。之後仲變本加厲，開始喺 office 講有色笑話，講到有聲有色，開始嘅時候男同事都會覺得尷尬。後來，其他男同事開始迎合老海鮮經理，當佢講有色笑話嘅時候仲講埋一份，而且越講越多。經理仲同男同事公開談論某某女同事身材，男同事講得越多有色笑話，經理就越開心，經理越開心，啲男同事就講得越多。其實好多女同事都覺得好唔舒服，好唔受尊重。

如遇到其身不正嘅上司，而且被要求「埋堆」，你會點做？

我會睇情況，如果無傷大雅嘅話，我會跟上司嘅說話去做。如果係涉及違反公司規定甚至違法，我一定唔會做，費事到時行差踏錯。

金手指

行業：零售/批發

職位：中層管理者

性別：男

年齡：25 – 34歲

隔離部門嘅經理對自己好寬鬆，返工好自由。佢對下屬亦好寬鬆，基本上唔會點去管束下屬。經理成日返工就入去倉訓覺、打機、上網或者同佢女朋友傾電話，盡訴心中情。咁佢自己衰就好啦，有一日經理見到冇咩客，就叫埋啲下屬一齊入倉連線打機，而鋪面一個人都冇，正當打得激烈，開緊戰，公司高層入店巡查，即刻畀高層撞破經理同幾個下屬全部人入哂去倉打機。高層見到即刻大罵，第二日有份打機嘅同事，包括埋經理一齊收警告信，另外聽聞經理好似有額外懲罰添。

如遇到其身不正嘅上司，而且被要求「埋堆」，你會點做？

我唔會聽上司嘅說話，我會對上司嘅說話同指示過濾過先會做。如果自己認為正確嘅先會去做，如果自己認為唔正確嘅，我會揾藉口推咗佢。

我想退休

行業：酒店

職位：基層職員

性別：男

年齡：18 – 24歲

我之前間公司文化超級差，收工都唔走，個個都喺公司做到好夜先走，後來我先發覺原來件事唔係我諗得咁簡單。原來之前有個經理，到咗放工時間都唔走，老闆未走就更加唔走，明明冇嘢做，喺度上網，但就點都留喺公司，為咗呃 OT，日日起碼留喺公司留到 9 點先走。佢嘅下屬見到佢留喺公司，有樣學樣，寧願喺公司冇嘢做上網都唔走住，齊齊呃 OT。我當時新入職，準時放工，但遭同事白眼，當我異類咁睇，我頂唔順，又唔想無聊留喺公司，就辭職。

如遇到其身不正嘅上司，而且被要求「埋堆」，你會點做？

我絕對唔會理佢，我唔會有樣學樣，寧願辭職唔做，離開嗰個環境，我唔想成為不正不良嘅人。

0

行業：博彩娛樂

職位：基層職員

性別：女

年齡：25 – 34歲

公司規定每次收客人嘅 tips 要歸公數，然後再統一分畀同事。我以前公司有個上司，收到客人嘅 tips 就偷偷自己袋，而且同相熟下屬合夥，自己就去掩護，指使下屬去收錢，再一齊瞞住公司收客人嘅 tips，然後兩個自己分攤。仲要幾次公司內部調查，上司都利用自己嘅職級，去隱瞞真相同自己嘅罪行，仲包庇埋下屬。最後佢哋好彩畀公司查出嚟，即刻「豉椒炒魷」。

如遇到其身不正嘅上司，而且被要求「埋堆」，你會點做？

我會遠離嗰個不正上司，因為就算埋咗堆，都會近朱者赤近墨者黑，慢慢自己都會變得不正，學壞，影響日後職場

0

行業：零售/批發

職位：基層職員

性別：女

年齡：35 – 44歲

我朋友嘅上司咩都要用名牌，衫要名牌，渣嘅車都要名牌。而且好似處處針對穿著打扮樸素嘅同事，所以我朋友嘅公司潛規則就係一定要着名牌同攞名牌手袋返工。如是者，搞到打扮樸素嘅同事畀人職場冷暴力，被孤立，鄙視，而着名牌嘅同事就係度搞小圈子。公司有啲通告，上司通知班「名牌」同事，又唔通知嗰幾個穿著樸素嘅同事，而「名牌」同事更加唔會通知佢哋。其實只不過追求同消費習慣唔同啫，搞到佢哋好似做錯咁，連年尾工作表現評價，上司都好似畀得特別低分，其他同事互評又評得低分，升職加薪冇望。

如遇到其身不正嘅上司，而且被要求「埋堆」，你會點做？

我諗我都會埋堆。對上司投其所好係職場打工仔嘅技能之一，學會投其所好，先會更容易升職，更容易生存。

-

行業：監控/保安

職位：基層職員

性別：女

年齡：18 – 24歲

我上司好鍾意食煙，日日起碼食成包煙，所以成日去後樓梯食煙順便偷懶。好多同事，特別係啲男同事成日喺度擦上司鞋，買啲靚煙畀上司討好佢，咁本身依啲擦鞋仔佢自己擦鞋自己事，唔搞到我就得啦。但係有啲擦鞋仔成日見到上司去後樓梯食煙，自己又走埋去一齊食，有啲唔食煙嘅擦鞋仔都走埋去吹水，齊齊藉著食煙嚟偷懶。嗰班人個個都去哂食煙，搞到啲嘢堆哂畀我哋唔食煙嘅人做！最誇張係有次佢哋離譜到喺某會議室開大冷氣食煙，搞到 office 烏烟瘴氣！

如遇到其身不正嘅上司，而且被要求「埋堆」，你會點做？

我拒絕！如果我上司叫我一齊去後樓梯食煙，我一定會拒絕！而且我準備要call 控煙辦！

職位：基層職員

性別：女

年齡：35 – 44歲

隔離部門有個主管，成日返工遲到，正常返工時間係 9 點，主管 10 點幾就嚟 11 點先返到公司，而佢就叫下屬幫佢打卡。而因為主管遲返， 所以佢嘅下屬都偷鷄照樣遲返，頂多比主管早返少少，然後成班同事每日輪住幫大家啪卡，所以一般 9 點 15 分，佢哋成個部門得嗰兩三個人到公司。隔離部門嘅主管簡直係帶頭帶壞下屬，縱容下屬一齊破壞公司規矩。

如遇到其身不正嘅上司，而且被要求「埋堆」，你會點做？

我會拒絕。我接受唔到破壞規矩嘅行為，就算係上司，我都會睇唔慣。我仲會向公司投訴，告發不正嘅上司，免得禍害下屬，禍害職場。

職位：基層職員

性別：男

年齡：25 – 34歲

學校有個好黑人憎嘅主任，把口衰，得罪人多，稱呼人少，但佢又有權有勢，冇人敢惹佢。而且佢份人又斤斤計較，樣樣都計到盡，絕對唔會執輸。學校最近入咗批文具，文具一到貨，主任就去攞咗袋文具私用。佢就同佢嘅下屬講「有新文具，快啲去攞啦！唔攞就執輸啦！」然後佢班下屬聽到後，貪小便宜嘅當然一支箭咁冲去攞返屋企，唔貪小便宜嘅為咗附和主任，都去攞文具。但由於主任太有勢，冇人敢報寸。

如遇到其身不正嘅上司，而且被要求「埋堆」，你會點做？

我會按照上司嘅為話去做。我好細膽，唔敢得罪上司，怕如果唔按照上司嘅為話做，我自己會惹麻煩，而且呢一行好細，好易冇哂前途。

職位：基層職員

性別：男

年齡：25 – 34歲

之前有個主管超誇張，以為自己係某高層嘅親戚，有高層關照住，就對公司嘅規矩冇到。之前有次主管同佢班下屬出去食 lunch，食得好豪，咩海鮮大餐、龍蝦、鮑魚、花膠、魚刺咁，點知主管同下屬講依餐開共數，當係同客食，同公司 claim 返錢就得，claim form 就求其寫一個客個名。有咗第一次，就有第二三次，試多幾次，就算主管冇同下屬一齊食嘢，佢啲下屬就開始沙膽，自己出去食飯大額嗰餐就 claim 公數，甚至買奢侈品或者電子產品都 claim 公數，講大話話送畀個客。

如遇到其身不正嘅上司，而且被要求「埋堆」，你會點做？

我唔會埋堆，會指正上司，舉報畀老細知！唔會同流合污，免得有一日畀上司出賣，做咗替死鬼。

職位：基層職員

性別：女

年齡：25 – 34歲

隔離 sales team 有個用鼻哥窿睇人嘅經理，以為自己 team 幫到公司賺錢就可以好似隻蟹咁打橫嚟行同睇唔起其他人，對其他部門嘅同事都好冇禮貌，仲要問都冇問過隔離 team 嘅經理，直接叫隔離 team 嘅同事做嘢，一個唔順氣唔開心就鬧。而佢嘅下屬簡直同佢一模一樣，一樣蝦蝦霸霸，以為有佢個經理睇住就可以目中無人，指埋其他 team 嘅同事做嘢，當其他

同事都係佢哋嘅下屬咁，有時仲叫人哋斟茶遞水，幫手買飯。

如遇到其身不正嘅上司，而且被要求「埋堆」，你會點做？

如果要我埋堆嘅話我都會埋嘅，點都跟住上司。正所謂槍打出頭鳥，唔跟嘅話就會變成異類，分分鐘成為上司嘅攻擊目標。

學識辨別好上司

相信睇過讀者分享，都會知道模仿其身不正嘅上司會有咩效果。上司嘅影響力同感染力係好大，下屬好容易學習到上司嘅好與壞。其實唔好嘅例子仲有好多，以下我哋會分享好壞上司嘅分別。如果你係上司，不妨睇下自己有冇犯以下問題；如果你係下屬，留意到上司有以下問題嘅話就唔好去模仿啦！