身邊有啲人睇落唔似好勁，點知原來佢….

2020.4.13• 周一

導讀：成日都有人話「人不可以貌相」，但現實社會其實就好似賣一本書咁，好睇嘅封面可以幫助提高銷量。職場上好多人都會因為自己見識少，用狹窄嘅目光去打量其他人。當遇上地位高或者能力高嘅人都懵然不知，甚至做一啲冒犯他人嘅行為。今期《哈囉好工週刊》會有讀者分享佢哋喺職場上遇過「有眼不識泰山」嘅故事，一齊睇吓啦！

為咗慶祝100期週刊我哋仲搞咗《哈囉好工週刊》「我最喜愛封面投票」即刻去投票，嬴取【任天堂Switch】1份同【小米有品紫外線殺菌消毒包】5份啦‼️

去去暗瘡走

行業：酒店營運

職位：基層職員

性別：女

年齡：25－34歲

話說有一日，公司個經理部電腦突然壞咗，作為秘書嘅我即刻打電話叫 IT 同事嚟整。隔咗一陣，有人按 office 度門，前台姐姐開門見到個女仔，好後生，問咗句「見工定送文件？見工左邊，送文件右邊。」原來個女仔係 IT 部同事。咁前台姐姐就通知我。我一見到個 IT 部女仔，上下打量咗下，心諗「得唔得㗎？派個

人過嚟，經理部電腦趕著用啊！」點都估唔到，過咗十五分鐘都冇，竟然搞返好台電腦！我驚訝到「哇！」咗一聲出嚟。個 IT 女同事話「唔好意思啊！今日我哋部門有啲忙，負責嘅同事都出哂去，所以我自己過嚟」，同經理講咗一大堆我聽唔明嘅術語之後就走咗。睇返公司電郵，佢係高級電腦工程師⋯⋯老實講我到而家都仲係好錯愕。就咁睇樣以為係啱啱畢業嘅學生。

你從上述故事中學到啲咩？

原來 IT 唔一定係戴眼鏡，宅男，而且唔一定係男性先會對電腦熟悉，女性一樣可以勝任電腦 IT 嘅工作。凡事唔好用自己固有嘅思維同角度去睇，世界好大。

你會去提醒會「有眼不識泰山」嘅同事嗎？

唔會呀，雖然好似好衰，但好多時候，外人講嘅嘢本人未必聽得入耳，只會畀人覺得多事，最後反而撞板。

心事如塵

行業：監控/保安

職位：專業人士

性別：男

年齡：35－44歲

之前隔離部門嚟咗個新同事，畀人感覺係善良嗰種蠢蠢哋嘅感覺。佢部門有個老海鮮，出咗名見高拜，見底踩，搵個鼻哥窿望人。有一日，老海鮮臨收工接到個客嘅電話，話要即刻攞份文件去客度。按照工作流程，老海鮮應該負責返佢自己啲客，但佢諗都冇諗，點咗新同事做跑腿去攞份文件畀個客。新同事有禮貌拒絕，話自己放工有事。不過老海鮮就教訓新同事，話叫佢去做嘢係因為畀機會佢學嘢，大大聲咁鬧，好似有心畀其他同事聽咁。新人唯有照做啦。後來第二日，老海鮮畀老細召咗入房。過程唔知點，淨係知老海鮮出房後黑哂面。過咗一排大家先知道發生咩事，新同事其實係老細個仔，就因為老海鮮叫佢攞文件畀個客，搞到老細成家人等新同事食飯，嗰日仲要係老細阿媽嘅生日 party，新同事要同佢阿嫲賀壽⋯⋯

你從上述故事中學到啲咩？

職場上唔好以貌取人，唔好自以為是，自己做好本分先會避免好似上面嘅醜事發生。

你會去提醒會「有眼不識泰山」嘅同事嗎？

唔會。如果老海鮮咁對我，我就算知道佢有眼不識泰山，瀨哂嘢，我都唔會提醒佢，因為嗰種人唔吃過虧係唔知道教訓，而且嗰種人平時都係度欺負人！

有眼不識泰山嘅由來

    「有眼不識泰山」呢句句子，係形容一啲人冇識人之明、有眼無珠。但又有幾多人知道，呢個成語中嘅泰山，唔係指山東省境內嗰座名山，而係指我國古代嘅一位著名竹匠泰山呢？

春秋時代嘅著名木匠魯班，經常招收徒弟。魯班非常重視自己嘅聲譽，每隔一段時期，就會淘汰「唔成器」嘅徒弟。而徒弟當中有個叫泰山嘅後生仔，技藝睇落長進不大。為咗維護聲譽，魯班辭退咗泰山。

幾年之後，魯班行經市集嘅時侯，發現有個貨攤擺咗好多做工講究嘅傢俱，技藝非凡，顧客都爭相搶購。魯班了解後當然想結識一下呢位高手，就四圍向人打聽，點知打聽到啲傢俱竟然全都都係泰山嘅作品。魯班聽到大吃一驚，回想起當初錯辭泰山，深感愧悔，嘆：「我真係有眼不識泰山啊！」

幸福肉丸

行業：批發及零售

職位：基層職員

性別：女

年齡：25－34歲

公司嚟咗個 Fresh grad 文員，有日接聽電話嘅時候，唔知因咩事心情唔好，聽電話嘅時候態度好差，冇講幾多句就收線。原來對方係我哋嘅客嚟，嗰日打嚟係有 urgent 嘅嘢需要確認。結果佢聽到對方講嘢好似奇奇怪怪以為人哋白撞，雖然個客打入嚟嗰陣真係有啲奇怪，明明件事好趕語氣都好似好平和咁，同人講嘢好似喺度吹水。但新同事冇問清楚就同人講「打錯電話啦！我同你好熟啊？要吹水揾第個啦！」然後 cup 咗人缐。最後搞到公司冇咗單生意，損失唔小，嗰期一齊負責哩個 case 嘅同事全部獎金都冇晒，即係我，我真係多謝你呀！

你從上述故事中學到啲咩？

有情緒正常，人總會有唔開心嘅時候。不過都要將情緒控制好，唔好影響工作。如果唔係就唔單只自己瀨嘢，仲累埋其他同事。同埋啲大客冇聲聽㗎，人哋有嘅係錢，咩語氣都得啦。

你會去提醒會「有眼不識泰山」嘅同事嗎？

Fresh grad 嘅話都會提點下嘅，啱啱開始唔識得點處理好正常，自己當年都係一樣。不過如果已經出嚟做嘢好幾年，就唔一定會再幫啦。有經驗仲犯啲咁嘅錯，真係要吸取教訓先得。

路人丁

行業：酒店營運

職位：基層職員

性別：男

年齡：25－34歲

之前聽聞公司總經理會走，副總經理應該收到風，最近博哂命表現，咁我哋背後都覺得副總經理十拿九穩。後來，估唔到公司喺出面搵個人返嚟坐總經理個位。呢個新嚟嘅總經理聽講行內經驗非常豐富，但學歷一般，又唔係名校畢業。呢個消息當然傳到去副總經理到，個個都睇得出佢好唔妥，連我呢啲小薯仔都聽到佢講總經理啲嘢嗰陣有骨。咁大家都明白嘅，副總經理外國名校碩士畢業，肯定覺得新總經理冇資格坐呢個位。之後有一次，公司出咗事，咩事就唔方便講，副總經理仲喺度諗緊有咩方法去處理嘅時候，總經理已經諗埋解決方法，通知埋同事安排解決方案。總經理嘅反應同決策力，幫公司渡過咗一個大劫，如果唔係，睇怕上哂新聞。經過今次，相信副總經理輸得心服口服。

你從上述故事中學到啲咩？

學歷唔代表一切。唔可以因為學歷而忽略或低估別人嘅能力。經驗往往喺職場上面先最重要！

你會去提醒會「有眼不識泰山」嘅同事嗎？

我會去提醒佢哋，因為單靠外在或唔了解對方嘅時候就對人哋下定論太主觀啦。撇開主觀意見，先可以發現到人哋嘅優點。

毛眼睇

行業：建築及工程

職位：中層管理者

性別：女

年齡：45－54歲

曾經有見過新入職嘅員工，性格較為圓滑，成日想用嬉皮笑臉去耍走解決分配畀佢處理嘅工作。佢啱啱入職冇幾耐，咩狀況都未搞清楚，就耍小聰明叫另一位同事幫佢分擔工作。而另一位同事雖然平時唔多同佢有工作上嘅來往，但其實喺職級上都係佢嘅上級，需然同事唔介意幫佢，一叫就幫手，但日子耐咗新人當然就因為哩件事畀公司好多人講閒話啦，搞到新人喺公司尷尬咗好一段時間，希望佢尷尬嘅係佢知道畀人發現到佢嘅惡行而改過，而唔係單純叫錯上級幫佢做嘢而尷尬，唔係真係有排佢捱，唉！

你從上述故事中學到啲咩？

工作中，做好自己本分，待人處事不卑不亢就可以啦。上級呢啲嘢冇樣睇㗎，勤力同有能力就可以升！

你會去提醒會「有眼不識泰山」嘅同事嗎？

一般都唔會主動講嘅，費事好心作雷劈，除非係關係比較好嘅同事或者係自己嘅下屬囉。

單名一個帥

行業：銀行和金融

職位：基層職員

性別：男

年齡：25－34歲

我之前嗰份工，發生過好尷尬嘅事。我入職嘅時候，聽同事講老細好少返office，所以喺 office 好 free。我返工返咗成個星期，都冇見過老細。後來某一日，我早咗十分鐘到公司，一到公司就去 pantry 沖杯醒晨咖啡。入到pantry，就見到一個上咗年紀嘅女人，阿姨級別的，穿得好普通，同我阿媽平時嘅衣著差唔多，好似喺度研究緊個咖啡機。我就衝口而出打招呼「早晨啊！阿姨你好，有咩可以幫到你？我係新嚟嘅同事XX⋯⋯」我點都估唔到，我眼前嘅阿姨，就係唔經常出現喺公司嘅老細！明明聽同事講老細好後生，我點估到⋯⋯「後生」嘅定義究竟係？件事發生後，我自己覺得好樣衰，而且叫老細做阿姨肯定冇前途，所以做多一排就走咗啦。

你從上述故事中學到啲咩？

自己冇了解清楚公司，唔問同事攞老細張相睇吓。而且自己講嘢太直接，以後自己要小心處事，小心講嘢！

你會去提醒會「有眼不識泰山」嘅同事嗎？

一定會提醒佢！唔想見到有人好似我咁，認唔出老細而做白癡事。其實我嗰份工幾好，可惜就係發生咗呢件事，太怕之下辭職。

蚊爛

行業：娛樂博彩

職位：基層職員

性別：女

年齡：35－44歲

公司每年都會有聖誕節晚會，會邀請一啲尊貴客戶參加聖誕節飯局。我哋 team 係負責安排座位，接待同帶位。飯局當晚，本來所有嘢好順利！直到我見到一個著西裝嘅中年女士同一個打扮得有啲老土大花裙嘅中年女士。我唔知到底邊個係老闆，所以下意識睇衣著打扮。我就好似賭博咁押西裝嘅女士係老闆，然後走去招呼佢，安排佢座位。以為一切都熬過，點知聖誕節晚會一完，經理直接過嚟搵我，話我安排錯位，西裝女士係佢下屬，着大花裙嘅女士先係老闆⋯⋯實在好尷尬。好在最後經理只係警告吓我，叫我下次注意，我以為我冇命，會被炒魷魚。

你從上述故事中學到啲咩？

我學習到咩事都好，唔好先入為主，特別係公事上。如果遇到疑惑，要即刻去確認而唔好任由事情發展，以免事情發展到無法挽回嘅地步。

你會去提醒會「有眼不識泰山」嘅同事嗎？

會。我為人比較熱心，知道嘅事一定會同其他人分享。如果見到其他人犯錯，我會好心提醒佢。我相信，如果我好心幫助人，人哋都會幫助返我。

忠粉

行業：交通運輸

職位：基層職員

性別：男

年齡：18－24歲

平時返工好攰，返到屋企想輕鬆消磨下時間，就會打下機或者睇下直播，睇人哋打機，有日唔覺意睇到一個都幾有意思嘅直播，仲要係我平時玩開嘅屠龍 game。個玩家絕對技術型，講解個game 又講得特別詳細，講到好多我都冇留意嘅細節。於是就follow 咗佢，睇佢啲片已經變成咗生活習慣。老實講繼續睇佢係因為覺得佢講嘢好親切，開頭我都唔知點解！後來聽真啲身邊嘅人嘅說話語氣，我肯定佢就係隔離部門同事！好肯定嗰隻！平時耷低頭行，我專登講起屠龍啲嘢，我留意到佢即刻豎起隻耳仔，有次仲喺直播度講番。世界真細小啊，平時非常內向，網上邊嘅佢竟然咁活躍。宜家佢嘅 channel 都好多人 follow。覺得佢可以做到自己想做嘅事並且做得特別好，真係好羨慕佢。

你從上述故事中學到啲咩？

唔好以貌取人囉，唔出聲可能係專心工作啫！而家我好欣賞你！

你會去提醒會「有眼不識泰山」嘅同事嗎？

可能會囉，要睇返具體係咩事同埋係咩人囉，如果對方係小人，咁我就無謂幫啦係咪？

死啦門

行業：旅遊服務

職位：專業人士

性別：女

年齡：25－34歲

平時偶爾會接待一啲嚟自世界各地嘅旅遊團，有次接個日本人嘅團。雖然日本嗰邊會有翻譯。但係我好懷疑嗰個人嘅能力，事關老細畀咗個翻譯嘅資料我，老實講不嬲覺得日本人外語能力好差，而且老實講佢就係嗰啲完全信唔過嘅樣，呆呆笨笨嗰啲。所以提早同公司申請多個識日文嘅同事幫手。結果帶團嗰陣發現個翻譯真係好犀利，精通粵語，咬字好清晰仲連潮語都識。最後成個 trip 當然冇溝通障礙，係畀本身叫過嚟幫手嘅同事話咗幾句，返到去畀老細鬧我浪費資源，無言。

你從上述故事中學到啲咩？

其實覺得自己怕都啱嘅，以防萬一啫。不過就唔好以貌取人囉，資料證明一切。搞到麻煩咗同事我都唔好意思。

你會去提醒會「有眼不識泰山」嘅同事嗎？

當然會啦，身邊嘅同事都好 nice，都會互相幫助。

羅記

行業：餐飲

職位：專業人士

性別：男

年齡：35－44歲

當年啱啱入公司，入世未深，有日去吸煙區食煙，結果冇火，然後我頭往外一伸睇到個阿伯喺門口，我上去遞一支煙問佢借火，佢呆咗一下，然後接過我嘅煙點上。同佢吹兩句啦，我問佢做咩部門，佢話乜都搞D咁啦。問佢入咗嚟幾耐，佢就話好耐啦。嗰陣冇諗咁多，同佢開玩笑點解做咁耐都仲係做打雜。幾個月過去之後，公司嘅 annual party，阿伯上去致詞，原來佢係大粒嘢，我喺台下震驚到飛起。後來敬酒嘅時候，佢見到我仲行過嚟，提我下次記得帶火，嗰日佢係返公司攞啲嘢就撞到我，點解迎新日我唔畀心機記住啲老大嘅樣⋯⋯

你從上述故事中學到啲咩？

一定要帶眼識人，唔好亂講嘢，咪到時得罪人自己都唔知道，分分鐘畀人燉冬菇囉。

你會去提醒會「有眼不識泰山」嘅同事嗎？

都會嘅，畢竟自己都經歷過，真係好尷尬㗎。職場上都係你幫下人，人幫下你。

廣闊視野有辦法

職場上行事粗心大意，就好容易會發生類似讀者分享嘅故事。唔想犯呢啲錯嘅話，你需要廣闊你嘅視野，留意我哋以下嘅分享，希望你會有所得着：

1拋開個人偏見

內心狹隘嘅人，永遠冇可能視野廣闊，同事之間嘅誤會其實好多時就係因為咁而發生。擴闊你嘅天地，唔好淨係沉醉喺自己內心嘅小天地。

2了解身邊嘅事物

當你有知識，但唔去了解身邊嘅事物，呢種處事方式會局限你能夠到達到嘅深度。多了解你身邊嘅人事物，你未來所睇到嘅定必更多。

3培養獨立思考

當你做事得過且過，唔嘗試思考，你只會原地踏步。遇到問題嘗試從多角度去分析，長期落去，你嘅知識、見解、技能、經驗都會隨之而增加。

4挑戰你嘅恐懼

或者你認為你嘅視野已經足夠廣闊，但建議你都不妨留意下自已唔擅長嘅部份。了解自身嘅恐懼，努力去挑戰佢，你嘅視野先可以更全面咁成長。

結語

現實生活入面，其實我哋冇必要認得哂身邊所有嘅「泰山」，畢竟要認得哂全部都唔係一件容易嘅事；其實只要抱住一個謙虛禮讓嘅心去對待職場上遇到嘅每一個人，咁自然就唔會成為一個「有眼不識泰山」嘅人啦！希望你可以喺今期嘅分享當中有所得著！