現今情侶需要麵包，定愛情多啲？即睇【麵包或愛情】故事

2020.2.3• 周一

導讀：情人節又到了！你和情人經歷過幾多秋與冬呢？今期《哈囉好工週刊》會分享打工仔認為一段愛情關係中最重要的事情，到了甚麼時候才會決定與另一半攜手步入教堂？在愛情和麵包之間，打工仔會怎樣選擇？一起看看吧！

點擊圖片，即睇今期節目。

某人選擇愛情而不是麵包時，你認為：

30% 很幸運，遇到真愛

21% 很純情，好像童話故事的愛情

19% 一定是年輕人，為愛而不顧實際

18% 為愛犧牲，很偉大

12% 遲早感情變淡，一定後悔

某人選擇麵包而不是愛情時，你認為：

30% 很理性，按現狀選擇伴侶

27% 很幸運，這輩子不用愁

23% 很正常，為了日後有良好生活

14% 沒有愛情的關係遲早會分手

6% 拜金，為了錢不顧一切

對於選擇情侶和夫妻的標準你會有不同期望嗎？

73% 會，情侶只陪伴一時，而夫妻是一輩子   

16% 不會，情侶日後都會變成夫妻

11% 沒想過

成為情侶最重要的條件是：

Top1 性格好

Top2  有共同嗜好

Top3  對感情專一，忠誠

成為夫妻最重要的條件是：

Top1 有穩定工作

Top2 身體健康

Top3 沒有不良嗜好

85% 的受訪者認為即使有比現任更好條件的人追求，也不會選擇發展

0

你為甚麼不會和這個新選擇發展？

36% 我對愛情很忠誠

29% 不敢亂改變，怕兩頭不到岸

22% 不會傷害現任

13% 永遠都有更好的，無謂做比較

你為甚麼會和這個新選擇發展？

45% 條件好對我和家人都有更多好處

28% 不會錯過任何好機會

27% 我和現任感情已經淡了

多於70%受訪打工仔在不同階段的戀愛，擇偶條件都有會所不同。而大部份受訪者即使有更好的條件選擇，他們仍會忠於自己的愛情，其實他們認為愛情還是麵包重要？在此之前，先看看讀者的故事分享。

讀者分享的麵包/愛情故事

選擇麵包或愛情，其實沒有對與錯，兩者也能成為你的選擇。以下我們會分享讀者經歷過或目睹過的故事。在心中還沒有答案的你，或者看過某些故事你會有所認同。

化名：不要問我是誰

行業：酒店營運

職位：基層職員

性別：男性

年齡：25-34歲

公司有個文員女，高高瘦瘦，身材勻稱，皮膚白白，幾靚女，可惜已經有男朋友。佢同佢男朋友一齊咗有10年，聽講佢哋學生時代就已經開始拍拖，一直拍到而家。個女仔其實好搶手，之前我唔知，但淨係喺我哋公司已經有好多狂蜂浪蝶圍住。隔離幾個主管級嘅人去追佢，佢都好似無動於衷，完全動搖唔到佢同佢男朋友嘅感情，甚至佢部門經理去追求佢，佢都堅定咁拒絕。最後因為聽佢男朋友講免得成日見住經理覺得尷尬，甚至辭埋職。個個都好奇佢男朋友到底咩來歷，可以令文員女咁死心塌地，其實佢傳說中嘅男朋友只係一間公司做普通嘅文員仔，家境一般。但佢有嘅係同文員女嘅十年感情同經歷。

如果一定要你選擇麵包或愛情，你會點樣選擇？

我會選擇愛情，我相信真愛可以戰勝一切，就算有其他物質條件，如果自己唔係真心鍾意對方，都唔會開心。

化名：畀個老公我

行業：會議展覽

職位：基層職員

性別：女性

年齡：35-44歲

有位舊男同事，佢真係算好嘢，雖然佢平時口花花，但我哋睇得出佢係超錫佢女朋友，好似冇咗佢唔得咁。老實講佢女朋友個樣係路人樣，行過好快唔記得嗰種，佢哋仲要行埋咗5年有多，但係男同事完全好似仲係熱戀期嗰隻，完全斷絕外界誘惑。甚至之前有個靚女同事，唔知點解博命發佢姣，成日都借啲意越坐越埋，男同事有咩報告都主動自薦幫手，做得超級明顯，之後唔知係咪食咗男同事檸檬，冇幾耐就走咗。老實講幾欣賞佢，個女同事都好靚，尤其是同佢女朋友比。佢都可以完全冇反應，老實講唔知佢諗咩。其實佢唔係把口衰啲真係男神，而家呢啲男仔已經好少見。由朝到晚都係女朋友乜乜乜，世界完全為咗佢而轉。

如果一定要你選擇麵包或愛情，你會點樣選擇？

如果那個人值得我選擇愛情，我希望會以愛情為主。

化名：陳大文

行業：行政/辦公室助理

職位：基層職員

性別：男性

年齡：25-34歲

公司有個「男神」，樣靚身材正，六舊腹肌，結實嘅手臂，陽光嘅笑容，迷倒好多女同事。雖則「男神」早有一位青梅竹馬嘅女朋友，「如狼似虎」嘅頂多望望，偷影下相，自己製造機會同佢工作上交流。不過「男神」嘅上司X經理就唔係咁唸，X經理單身寂寞多年。佢竟然公器私用，公司要佢去一個business trip，無端端要「男神」一齊去，而且book埋同一間酒店，房仲係隔離房。據知情人士透露，X經理夜晚乘機話工作問題穿住浴袍走過去「男神」房。但唔夠5分鐘就出返黎。business trip 結束後，「男神」畀X經理降職。好明顯，「男神」冇搭X經理依個平步青雲嘅快捷列車。

如果一定要你選擇麵包或愛情，你會點樣選擇？

麵包老實講我自己都搵到，愛情就未必啦。

化名：劉德華

行業：行政/辦公室助理

職位：基層職員

性別：男性

年齡：35-44歲

之前有一個女同事，喺公司識咗個男同事，後來發展成為男女朋友，成日係公司出雙入對，成對孖公仔咁，全公司都知道佢哋係一對。後來有一日，見到有個揸「波子」嘅男人喺公司樓下送嘢畀嗰位女同事。到第二日，依然見到嗰位女同事同佢男朋友一齊孖住食lunch。不過之後間唔中都見到揸「波子」嘅男人到公司樓下送禮物畀嗰位女同事。同事都笑而不語，女同事好似冇事發生過咁繼續同佢男朋友一齊出入，咁大家都費事戳破。後來過咗半個月，個女同事辭職，話要結婚，而且移民去英國。好多同事都諗住去恭喜佢嘅男朋友，點知…… 新郎唔係佢，搞到好尷尬。原來半個月後，個女同事同嗰個「波子男」閃婚，而且跟「波子男」返英國註冊然後移民。可憐佢嘅前男友，雖然唔係富家子弟，但日日當佢係公主咁，有求必應，但最後都輸畀一個錢字。

如果一定要你選擇麵包或愛情，你會點樣選擇？

雖然好cheap，但我都會選擇麵包，人生舒服好多。

化名：從不知

行業：批發及零售

職位：基層職員

性別：女性

年齡：25-34歲

公司有個櫃檯女同事，已經結婚兩年，佢成日show佢同佢老公各種相畀同事睇，例如去邊度貴價餐廳食飯，收到老公送嘅大扎玫瑰花，老公送咗咩首飾同戒指等等，時刻秀恩愛同佢老公幾為佢洗錢，基本個個同佢孖過更嘅同事都聽過。話說某日佢識到個大客，個大客有老婆，話買幾個袋畀佢老婆，互相留咗微信方便發新款畀個大客。點知道後嚟傾傾下，佢同個大客搭上咗，個大客就同老婆離婚，佢當然諗都唔諗，就同咗宜家嘅老公離婚，然後佢跟咗個大客返大陸做少奶奶。雖然佢以前嘅老公唔係土豪，但都叫做係富二代，有車有樓。但都唔夠個土豪大客咁犀利，係內地某上市公司老闆。個女同事返咗大陸做少奶奶後，繼續係朋友圈曬命，各種燒錢。

如果一定要你選擇麵包或愛情，你會點樣選擇？

老實講見到佢嘅生活都幾羨慕，如果外貌條件唔差，麵包囉！就算離婚都可以分佢身家。

化名：麵包大過天

行業：銀行和金融

職位：基層職員

性別：男性

年齡：25-34歲

有個舊同事，幾靚女，同咗一個男仔拍拖5年，佢男朋友個樣都唔錯，單從外表睇，佢哋兩個幾登對。依幾年間，我眼見都好幾個樣唔錯，有條件嘅男同事都追求過佢，但佢都全部拒絕曬，一心剩係諗住佢男朋友。但萬萬冇諗到，佢嘅男朋友居然背住佢偷食，而且偷食嘅對象仲係一個肥婆！望落去極衝擊視線。一啲都唔襯。之後收到風原來肥婆係個富二代，佢有能力幫佢男朋友上車上樓，仲直接喺佢老豆公司度做埋主管！雖然都明白個男仔點解咁做，但係難為咗我舊同事白白咁浪費咗五年青春！

如果一定要你選擇麵包或愛情，你會點樣選擇？

我覺得睇嚴重性，如果可以上到車上到樓，選擇麵包都唔壞。

打工仔會選擇？

47% 愛情 你會選擇愛情的原因是：

43% 不可為了金錢而賠了自己的姻緣

 20%我認為愛可以征服一切，其他都是浮

47% 愛情你會選擇麵包的原因是：

35% 另一半有「麵包」能讓我有面子

26% 「麵包」對我日後生活有保障

17% 父母要求我另一半一定要有「麵包」

12% 就算愛情也要有「麵包」才能長久

10% 我想做少奶奶/小白臉

到底要選擇麵包還是愛情？

① 不是單選題，盡力就好

其實愛情和麵包不是單選題，從來都不只是二選一。為甚麼不能兩者兼有呢？其實盡力就好，當一個人擁有麵包，可以跟另一半分享彼此麵包不同的美味。而且，你會為他的麵包著想，捨不得他付出太多，不是嗎？

② 誠實面對自己所在乎的條件

每個人在乎的都不一樣，但要去接受自己所重視的，不要自我隱瞞。不要明明很介意對方身家不夠豐厚，卻說自己只在乎個性，不坦誠面對自己，最後你只會愛情和麵包都失去。

③ 互相尊重

選擇麵包還是愛情，有的人選擇前者，有的人選擇後者。若不能兩者兼備，要作出選擇時，要尊重對方的決定。愛情是兩個人的事情，尊重雙方是基本原則，尊重對方的決定才是最重要的選擇。

結語

愛可以推動世界，而金錢同樣可以！情人節快來到了，《哈囉好工週刊》團隊希望每一對情侶都能度過一個甜蜜快樂的情人節！

查閱更多《哈囉好工週刊》內容：http://weekly.hello-jobs.com/