《親情》︱9月16號哈囉好工週刊火熱登場

2019.9.16.• 周一

導讀：裙帶關係指因關係而獲得職場上的利益，職場上可以聽到很多因為上司和下屬或同事之間有裙帶關係而發生私相授受的事情。今期《哈囉好工週刊》會有讀者分享在職場上遇到因為同事之間有血緣關係而受到不公平對待的故事，來聽聽他們受了什麼委屈吧！當然如果你正在享受裙帶關係帶來的便利可能會有不一樣的看法，一起聽聽其他人怎樣想吧！

化名：外戚專權

行業：批發及零售

職位：基層職員

性別：女性

年齡：25 – 34歲

公司嚟咗個新人，佢一開始唔清楚公司嘅運作，但運氣都唔錯，一入嚟就接到一個大客。平時同佢傾得埋嘅同事A聽到呢件事就話幫佢手同佢一齊去接洽呢位大客，咁最後都成功同個大客傾成咗單生意。我哋公司每個月就會將傾成生意嘅提成入落負責接成生意嘅同事嘅戶口，但個新同事就返嚟嘈點解佢嗰份提成冇入落佢戶口，明明就係佢同啊A一齊傾返嚟，但點解後來發現經理將提成全部入落去A個戶口度。原來因為A話新同事冇幫手，基本上冇做嘢，而且A係經理親戚，所以經理當然直接信佢。最後經理同新同事講，你應該好好向A學習，學好將會有好似呢份甚至更多嘅提成，成功敷衍新同事。好慘啊。

你怎樣看待因裙帶關係而獲利的同事？

我覺得好唔公平，因為係新人，傾成單大生意，冇理由抹殺佢嘅功勞。

若有機會，你會利用裙帶關係使自己獲利嗎？

會，著數呢樣嘢，我諗冇人會拒絕吧。

化名：從來沒我份

行業：資訊科技

職位：基層職員

性別：男性

年齡：25 – 34歲

咁我哋公司有兩位同事係老細私下安排入嚟嘅，佢哋喺各自嘅領域都做得幾好，有天份，但只限於老細在場，老細一唔係度佢哋就變得好懶散，遲到早退，又搞到個茶水間係佢哋屋企咁，佢哋真係差在未帶埋枕頭同被鋪返嚟訓，啲同事見到佢哋咁肆無忌憚，個個都估到佢哋係老細啲親戚，如果唔係佢哋都唔會咁樣嘅態度係公司做嘢。佢哋最近越嚟越嚴重，訓到打晒鼻寒。其實真係好影響我哋做嘢，更誇張嘅係居然冇一個經理或者主管會出聲去管下……

你怎樣看待因裙帶關係而獲利的同事？

咁係咁㗎啦，唔通你覺得你唔公平，向上司投訴就可以解決架啦咩……只能說無奈。

若有機會，你會利用裙帶關係使自己獲利嗎？

會，如果喺公司可以做事輕鬆啲，遲到懶散冇人管，我覺得唔錯。

化名：落黑人

行業：零售

職位：主管

性別：男性

年齡：25 – 34歲

公司有個新人S入職前，我哋已經收到風係老細個仔，咁我哋大家都求神拜佛希望S千奇唔好入自己條team。點知係冇用㗎，我就係嗰個不幸者，佢就係入咗嚟我條team。因為我哋條team上限係6個人，S入咗嚟之後就變成咗7個人，咁老細就希望我哋編排一個人出去。咁S平時做嘢就好hea，成日叫佢做嘢佢都唔會做，咁我作為team leader肯定就最想踢S出去，但都要畀面老細嘅，唯有安排另一個組員去第二條team。自從佢入嚟之後，我哋組嘅業積一落千丈，加上S又係咁得罪啲客，有啲客都唔回頭。最大問題係老細覺S係fit馬，點解生意會差咗，個原因唔係因為S而係因為我，覺得我冇好好教人哋。

你怎樣看待因裙帶關係而獲利的同事？

冇咩點睇，老細想養住佢就養啦，我哋班細嘅有咩出聲嘅機會，但係老細最好撐住，唔好搞到公司執笠。

若有機會，你會利用裙帶關係使自己獲利嗎？

如果可以食長糧咁又真係唔錯，但係咁樣真係好咩，我始終相信有實力先係最重要。

化名：我爸是我爸

行業：廣告/傳媒

職位：基層職員

性別：男性

年齡：25 – 34歲

公司有個老seafood，聽講係老細表弟，咁一開頭佢做嘢都幾快手同出錯率都幾低，又傾幾單生意返嚟，大家都以為佢好好，但一過probation升埋人工，佢成個人完全變哂，Hea到出汁！而喺最近公司競爭緊一個主管職位，本來大家同事都睇好我嘅team leader，部門有一半嘅業積都係佢傾返嚟嘅，但點知最後係個老seafood升咗。我哋個個都好愕然，但其實諗深一層都估到㗎啦，好多公司都會論資排輩，實力先排第二。到最後我team leader辭埋職，然後搞到公司嘅業績即刻少咗好多，我估老細而家應該都好頭痕！

你怎樣看待因裙帶關係而獲利的同事？

機會一定係比我哋呢啲平凡打工仔多嘅，但係咁樣其實都幾心寒，因為冇論點都睇唔到有升職嘅機會。

若有機會，你會利用裙帶關係使自己獲利嗎？

唔會，我希望我係靠我自己嘅能力去升職加人工，我覺得我唔需要靠關係。

化名：肥豬格格

行業：廣告/傳媒

職位：基層職員

性別：女性

年齡：25 – 34歲

經理同埋秘書有啲嘢，我諗盲嘅都會知，佢哋明顯到兩年前我啱啱嚟嗰陣已經以為佢哋係情侶，仲差啲講錯嘢。經理自己本身係有老婆嘅，但經理同秘書兩個嘅關係已經係公司公開但係唔講得嘅秘密。大部份同事因為見到佢哋嘅關係，都對秘書非常有禮，唔夠膽得罪，係有兩個女畢業生，鄙視兼完全無視佢嘅要求。本身都冇嘢嘅，但最精彩就係上年經理離婚，然後我諗大家都知係咩劇情，嗰兩個女仔之後畀秘書點到殘。自從佢坐正之後，基本上全部同事都好不滿，然後最近都走咗唔少人，我諗再係咁走落去，間公司遲早畀佢哋呢對夫婦玩殘，我估老細而家應該都好頭痕！

你怎樣看待因裙帶關係而獲利的同事？

冇點對待，一定有啲咁嘅人，冇得避嘅，要嚟始終會嚟。

若有機會，你會利用裙帶關係使自己獲利嗎？

唔會，因為咁樣嘅風氣我係唔會認同嘅，同埋女人唔一定要靠男人上位。

化名：萬里望

行業：地產

職位：基層職員

性別：女性

年齡：25 – 34歲

總經理安排咗佢老婆啲親戚過嚟做人事經理，點知第一日佢返工，真係新官上任三把火，一嚟就炒咗個比佢靚仔嘅同事，原因仲要講到咁直白，咁個同事走咗之後，第二日總經理直接比大老細召喚返總公司照肺，原因係走咗個個同事係大老細個細佬個仔，想佢喺分公司學下點做先，之後先調返去總公司，點知人事經理一嚟就踢咗個鐵板，平時嗰位同事都係好好學，好低調，亦幫公司創咗唔少業積，但真係估佢唔到係同大老細有關。只可以講非常好睇，好大粒花生！

你怎樣看待因裙帶關係而獲利的同事？

明白裙帶關係每間公司都會有，但係就要睇住上級有冇裙帶啦，好啦而家中晒招，哈哈。

若有機會，你會利用裙帶關係使自己獲利嗎？

本身會，入咗呢間公司之後就唔會，聽到都覺得麻煩。

化名：花花

行業：廣告/傳媒

職位：基層職員

性別：女性

年齡：25 – 34歲

公司之前有兩個新人：一個阿哥A，一個細佬B，咁啱佢哋都係同一個部門。阿A學嘢快，工作質量都好好；B佢就比較懶散，但都係交到功課嘅。咁一年後A就升咗，變成B嘅主管，咁B更加冇王管，放任自我，覺得自己個阿哥係主管，可以唔洗做咁多都可以是是但但過日神，加人工。然後佢本來約好個客，佢都推咗比人去見，傾成咗啲提成又要收埋一份，但因為主管係佢阿哥，個個都唔敢有意見。直到而家佢哋兩個都係開開心心，雖然其實唔影響到我，但係真心好睇唔過眼！

你怎樣看待因裙帶關係而獲利的同事？

無賴囉！你話少少照顧就話啫，而家食殘廢餐呀，都要當睇唔到，乜都做唔到。

若有機會，你會利用裙帶關係使自己獲利嗎？

少嘅話會，我自己都有羞恥心。

化名：受苦的總是我

行業：建築及工程

職位：基層職員

性別：男性

年齡：18 – 24歲

之前做嗰間公司下下都靠關係，雖然明白生意就係咁，但係有時見到啲貨好參差，都好對唔住自己良心。老闆要入一批材料，咁經理又同老闆好熟，所以經理話搵間相熟公司，老闆即刻話OK。嗰間咁嘅公司，係經理啲親戚開嘅，食水勁深，啲材料差到嚇死人，正當我諗住老闆會鬧經理，點知竟然乜事都冇發生，慘就慘在我哋，啲客見到仲鬧咗我哋一大餐。有親戚朋友真好。

你怎樣看待因裙帶關係而獲利的同事？

好命囉，同中六合彩一樣道理。

若有機會，你會利用裙帶關係使自己獲利嗎？

做錯嘢又唔使驚，有靠山靠住。

化名：卡拉卡拉

行業：行政/辦公室助理

職位：基層職員

性別：女性

年齡：18 – 24歲

我哋知公司有個女仔係老細個女嚟嘅，然後我哋平時都好少得罪佢，保持安全距離，喺佢面前講嘢都好小心。但有一次老細個女唔小心做錯事，搞錯咗張報價單，好在喺出去開會前一日發現，女仔個主管當然冇咩怪責個女仔，應該話係唔敢。但後來呢件事傳到去老細度，老細叫咗佢個女入去照肺照左成半個鐘，咁都明嘅。但奇怪係個女仔出到嚟係笑笑口，然後就到主管入去啦，火氣完全比啱啱大一倍，出到嚟主管眼濕濕。我哋後邊食晒花生，後來主管同我哋傾計，叫我哋小心啲，老細放個女入嚟應該係做佢隻天眼，睇到邊個錯，或者因為見到佢個女而避忌，就可以同份花紅講拜拜。恐怖……

你怎樣看待因裙帶關係而獲利的同事？

當然開心啦，完全唔驚寫CV，刷到靚一靚，要升職，搞掂我哋主管就得。不過只可以講睇你好得幾耐，升到上去都冇人服。

若有機會，你會利用裙帶關係使自己獲利嗎？

我都希望有，但係真係唔識個啲可以帶我飛嘅朋友同親戚。

化名：肥豬格格

行業：廣告/傳媒

職位：基層職員

性別：女性

年齡：25 – 34歲

我上司係一個完美嘅「外掛人」。唔係指能力方面，論能力，我自問而家已經勁過佢。佢唯一嘅能力係，身披一件皇馬掛，所以無論佢做錯啲咩，佢都會話係我做。開頭我都覺得奇怪經理點解用啲鄙視嘅眼神望住我，後期先知道上司畀晒啲死貓我食，因為咁我食咗兩封警告信。唔好問我點解咁蠢唔篤爆佢，因為我知道有機會我一篤佢，可能會直接收第三封信走人。所以我而家都辭咗職啦，只可以講希望下一間冇呢啲事情發生。

你怎樣看待因裙帶關係而獲利的同事？

冇感覺，但係我信有因果報應！

若有機會，你會利用裙帶關係使自己獲利嗎？

唔會，自己討厭嘅嘢唔會想對人做。

化名：麥當娜

行業：酒店營運

職位：基層職員

性別：女性

年齡：25 – 34歲

同你講最恐怖一定係同家族企業公司打工。有你講冇人講，明明自己冇做錯，肯定嗰隻，都可以因為曾經得罪某位同事而收警告信。仲要唔止佢一個，得罪一個你會連埋佢啲皇親國戚都激嬲埋，四面楚歌。雖然中招嘅同事唔係我，但係我一知道我準備要接手佢啲嘢嗰陣，我決定同佢一齊走，反正首先升職一定唔到你，公司有錢只會佢哋瓜分，益自己人都唔益你啦，早走早着。

你怎樣看待因裙帶關係而獲利的同事？

黑暗囉，將其他冇關係嘅人嘅努力白白浪費。

若有機會，你會利用裙帶關係使自己獲利嗎？

唔會，因為覺得好乞人憎。

結語

職場上若有裙帶關係很容易會造成不公平的現象，令公司對員工的評分不再單單基於他們努力的成果。職場內有這樣的關係可以說是「有人歡喜有人愁」。歷史上，很多曾經鼎盛繁華的王朝都因為任人唯親而衰落，公司內的裙帶關係亦同樣會助長不良風氣，令員工認為自己多努力都不及一個皇親國戚，這樣的生態會使他們沒有動力為公司打拼。當然，只要建立一個公平的體制確保所有員工都受到公平的對待，就算是有裙帶關係的人也可以在同一家公司工作，招納賢士最重要的始終是員工個人的才能喔！

查閱更多《哈囉好工週刊》內容：http://weekly.hello-jobs.com/