《平生不作虧心事，夜半敲門也不驚》︱8月12號哈囉好工週刊火熱登場

2019.8.12 • 周一

導讀：在中國民間傳說中，農曆七月是每年鬼門開的月份，魂體亦會在城內各處漫遊。今期《哈囉好工週刊》會有讀者分享他們上班時遇到的靈異經歷，如果在閱讀時感受到眼角有一抹陰影略過，不用怕，只不過是幻覺而已，哈哈。

化名：我左右眼都見到鬼

行業：餐飲      職位：基層職員

性別：男性      年齡：18 – 24歲

我做嗰間餐廳成日都有人入嚟借廁所，而好多時候我哋都唔會拒絕，只要佢唔整到好污糟就得，反正都係要抹。有一日我哋差唔多收工嗰陣，有幾個人入嚟借廁所，咁我哋出邊衛生都搞得七七八八，好得閒，冇乜嘢做，咁成班伙計咪坐低吹水等佢哋囉。點知等極都有一個人喺廁所遲遲都唔出嚟，見唔到對路我哋就敲門睇下佢有冇事，點知冇反應，就試下擰下個門把，打開竟然冇人係度，但就見到廁所洗手盆放咗幾疊冥幣，我哋當場毛管都豎起晒。

你相信上述這件事嗎？

信，因為我都係度，如果佢要喺廁所離開只可以從我哋身邊經過，點知一直都冇人出嚟，就算睇漏眼都唔會咁多個人一齊睇漏吧。

0

化名：一揼一驚心

行業：建築及工程      職位：基層職員

性別：男性                   年齡：35 – 44歲

入我呢行其實個個都迷信，因為成日都會發生一啲唔到你唔迷信嘅事。咁工程一開始就要打椿，嗰次工程嘅椿一直打唔到落去，唔知點解就有一條椿打唔落，而且一打嗰條椿，嗰一日總有工人受傷，大傷小傷都有，搞到好似樣樣都唔順，硬係有啲無形嘅嘢阻住，唔畀我哋施工。公司啲高層特別信風水，馬上請大師過嚟睇。大師就話條椿位下邊砸住三位未完成心願嘅朋友，必須馬上作法。雖然我自己唔係特別迷信，但大家都想快啲搞掂，大家都過去拜兩拜上香。大師搞掂完儀式之後，好似樣樣都順利返，真係唔到你唔信！

你相信上述這件事嗎？

信啊，大家都見到，可能真係有啲神奇嘅力量阻止我哋打椿。

化名：兆陰陰

行業：娛樂博彩      職位：基層職員

性別：女性              年齡：25 – 34歲

聽之前同事講佢遇到過好恐怖嘅事，咁佢有次收十二點打算去換衫啦，咁我哋嘅工作位置喺B2嘅，換衫嘅地方喺其他樓層，然後同事佢打算坐電梯去返換衫嗰度，點知個電梯唔係上返去，個電梯顯示係落緊，但我哋B2係最底嗰層，同事話佢好驚，因為佢feel到個電梯係的確移動緊，到最後個面板顯示-18層，然後部電梯就壞咗，連燈都冇埋。佢嚇到坐咗喺度，坐咗一陣電梯先開返去返佢嗰層，一到咗我同事即刻沖出嚟，到而家都話打死唔再用公司內部電梯。

你相信上述這件事嗎？

一半一半啦，因為信證據多，照佢咁講應該幾大件事，公司會出公告，費事同事亂諗。但同事的確講到好真實，而且睇得出佢真係好驚公司部電梯，所以都半信半疑！

0

化名：鬼睬李

行業：行政/辦公助理      職位：基層職員

性別：女性                          年齡：25 – 34歲

真係估唔到搵工除咗睇職位內容，仲要睇下邪唔邪。我對上一份工，工作內容唔算多，人工都唔錯，絕對係筍工。入去嗰陣我都喺度諗點解對上一手同事會辭職。咁呢份工其實可以話係一人公司，就係負責總公司澳門部份嘅雜務工作，所以成間公司基本上淨係得我一個。唔知係咪因為太靜關係，又或者係公司啲門縫窗縫做得唔好，一有風就會有啲好靈異嘅聲，再大風啲道門仲會吹開。所以其實份工最大壓力就係呢啲心理壓力，咁點解會係上一份工呢？最後因為嗰日明明冇風，道門都突然推開咗，我其實唔確定係咪呢啲嘢，都唔敢確定，我唯一確定係我已經頂唔順啦。

你相信上述這件事嗎？

信，自己親身經歷。明明冇風都可以有道力推開道門，我好希望有人同我講係有人玩我，可惜我連同事都冇。

0

化名：閘住你把口

行業：酒店營運      職位：基層職員

性別：女性               年齡：25 – 34歲

因為工作關係，我成日都會同某個部門嘅同事合作，而呢個部門嘅同事大部份都係某一個國家嘅，佢哋好似個個都好容易見到嗰啲嘢。但我只係想講你哋唔需要分享晒你哋見到嘅嘢出嚟嘅。咁我份工有時返通宵更，基本上冇人所以有時可以蛇王瞓一陣。有次我照舊喺度休息，見到隔離部門嗰位同事唔蛇王喺度自言自語，我就過去吹下水。我問佢點解唔休息下，佢竟然同我講身邊啲小朋友好嘈，一直扯佢衫尾話要玩，所以佢先陪佢哋傾計唔瞓覺。無言……多謝佢搞到我嗰晚間竭性起雞皮打冷震同成晚都咁精神！

你相信上述這件事嗎？

信，其實我知有嗰啲嘢，但我拜托真係唔使同我開心share，完全影響到我工作表現。

0

化名：大個女係我

行業：會計／財務      職位：基層職員

性別：女性                    年齡：25 – 34歲

好記得公司未搬地址之前好鬼恐怖。嗰陣我入咗去冇耐，係一個好奇寶寶，嗰陣見到公司其中一個角落放咗一張凳，上邊有幾封利是，見到冇乜人就行埋去開下，見到入邊有超多錢！不過嗰一下我嚇到痴線，出產間銀行唔係「人間」嘅銀行。咁啱有個同事行過，我喊住口行埋去同佢講，佢知道之後仲發火鬧多我兩錢重，之後其他同事知道咗都用埋怨嘅說話怪責我，成件事晴天霹靂！後期先知道係老細為一個賭輸錢而自殺嘅前同事放嘅嘢，希望佢下邊好好開心。聽同事講之前冇放，或者隨便搞嗰啲利是，公司都會有勁多奇怪嘢發生，小嘅可能嚇一嚇，大嘅甚至試過唔知咩原因pantry發生小火警，所以同事咁惡話我都係唔希望我有事。不過而家總算安落晒，終於換咗Office，希望前同事可以好好投胎！

你相信上述這件事嗎？

都相信，因為太多同事都有同類經歷，都諗唔到理由唔信。

化名：毛野錄

行業：廣告／傳媒      職位：基層職員

性別：男性                   年齡：25 – 34歲

咁有次我哋要去做街訪，但聽講去嘅地方係全澳最猛鬼嘅住宅，所以我哋專登揀咗最有陽氣嘅時候，唸住中午十二點去。點知一行入間大廈就已經覺得好唔舒服，成層都黑晒，一盞着嘅燈都冇，而且氣氛好陰森。同組嘅職員甚至仲問可唔可以唔係度做，覺得呢到真係太過恐怖，但係最後大家都焗住頭皮繼續做。點知我哋去到嗰層，敲門都無人應，諗住係自己記錯敲下其他門，全部都冇人應！但係明明我哋已經提早打電話約好咗！連電話都冇人應！咁我哋就諗住先離開幢大廈先，就行緊樓梯嗰陣突然間有陣風吹埋嚟我哋度，但明明後樓梯就冇窗！最後我哋離開咗幢大廈之後決定唔做走人。

你相信上述這件事嗎？

信呀。唔係你解釋下畀我聽點樣冇啦啦又陣風吹出嚟，完全唔敢想像夜晚去係會點，咪再搞我！我連個聯絡人都封埋！

0

化名：藤原文太

行業：交通運輸      職位：基層職員

性別：男性              年齡：35 – 44歲

我有次返夜喺黑沙揸返出嚟，沿路見到有人招手，但由於佢唔係喺巴士站度招手所以我都冇理佢，冇停車直接繼續行啦。咁嗰邊基本上好靜，呢個時段最多都係小貓三四隻，咁我就一連飛咗幾個站。揸揸下車，嗰附近啲路面有啲唔平，架車拋咗一下，咁循例上我都會即時望返倒後鏡，睇吓後邊啲人有冇事。但果一刻我竟然見到頭先同我招手嘅人坐咗係巴士入面，男人老狗搞到我喺架車度叫咗出嚟，嗰一刻我絕對想急煞棄車走人。過咗幾秒我再擰轉頭望多一次，見到嗰個人唔喺度我先頂得順，不過嗰日我返到去都病咗。

你相信上述這件事嗎？

其實未遇到呢件事之前我都係半信半疑嘅，但係呢件事刷新咗我對呢個世界嘅認識。

0

化名：泉哥

行業：監控／保安     職位：基層職員

性別：男性                  年齡：45 – 54歲

我係喺大廈做看更嘅，咁我係專返夜班嘅，而且我個工作位置仲要對正住部電梯，可以話有咩我都會睇到。咁我呢部電梯呢，日頭都好好哋，但一去到深夜嗰陣部電梯就開始有古怪。我唔知係我唔熟電器定點，成日無啦啦自己開門，入邊又冇人，出邊又冇人㩒。而且一閂門，仲係好有規律咁去某個樓層，不過我喺電視機度見唔到有人喺度玩嘢。其實都幾恐怖，不過好彩我男人老狗唔多驚呢啲嘢，嚇我唔到嘅！佢哋一日唔搞到我我都唔會理佢哋，河水不犯井水，各有各搵食囉！

你相信上述這件事嗎？

信嘅，不過唔怕囉，佢又唔搞我，路過都唔畀人哋路過咩！

化名：火車頭

行業：酒店營運      職位：基層職員

性別：男性               年齡：35 – 44歲

唔知其他人點諗，但我覺得每一個人都會有一段時間啲磁場會好容易見到或者遇到啲「朋友仔」。我同事上星期就咁唔好彩遇到：佢係做執房嘅，上星期佢執完一間房嗰陣，佢明明已經肯定搞掂好，但唔知點解梳妝鏡上邊多咗好多隻唔同「人」嘅手，嗰陣佢都只係怯一怯，諗住處理好就繼續做嘢，點知佢一出去準備行去電梯嗰邊嗰陣，突然之間鬼打牆，佢推住架車一直行，行極都行唔到去電梯嗰邊，好似喺度一直轉圈。嗰一刻佢就開始驚啦，佢決定合埋眼5分鐘，開眼後就馬上重新出發。最後佢都成功避過一劫。不過我都唔知咁樣算唔算係避過，好恐怖啊……

你相信上述這件事嗎？

信，我同事平時份人好真誠，同埋見到呢啲嘢根本上就唔出奇。

0

化名：零

行業：監控／保安      職位：基層職員

性別：男性                   年齡：25 – 34歲

我係做保安室監控嘅，有次喺CCTV度就見到唔係我哋賭場員工企係員工通道入面，以為有人誤闖員工通道，就Call同事帶返佢走。點知同事話冇人喎，但我喺CCTV明明就見到我同事同個客，我以為我同事整估我啦。自己八卦落埋去，點知真係得我同事一個，我當場即刻拉我同事走，返返去工作位置個嘢仲係度，我同事都嚇咗一跳，到放飯時間我哋仲專登去拜一拜CCTV影到嗰個位先再去食飯……

你相信上述這件事嗎？

信，因為我真係喺個CCTV度見到有人，冇理由我同事夾埋個客玩我㗎嘛。

0

化名：万刀甲

行業：專業人員      職位：高層管理員

性別：男性              年齡：45 – 54歲

以前大學喺黑沙度做救生員，順便曬下太陽，咁公司嗰陣都唔係特別嚴格，有時都自己走落去濕下水游兩圈。咁我以前嗰陣啲水都可以游嘅，咁嗰日我見啲水唔算太多雜物我就游兩手，嗰陣太陽開始下山，時間尚早，所以都唔會諗關於嗰啲嘢。點知游出少少，我感覺到好似有啲嘢捉住我隻腳，肯定唔係水草，係好似有隻手加啲頭髮，我個頭沉咗落去仲聽到好似有啲女人嘅慘叫聲，嗰一刻我好驚，博命去海灘掙扎，因為都唔算好遠，所以最後都冇事。最恐怖嘅係，返到去海灘有一束仔頭髮黐住係我隻腳上邊。嚇到我嗰晚返到去都病咗，之後我都因為呢件事冇再做救生員啦。

你相信上述這件事嗎？

信，而且太過相信，佢而家變成我嘅一種陰影，到而家我都好希望可以克服！

0

結語

    其實無論一個人遇上的靈異經歷是不是真實，更重要的是做人要自信磊落，只要平時不作虧心事，夜半敲門也不驚！

查閱更多《哈囉好工週刊》內容：http://weekly.hello-jobs.com/