News Category 
Hot Tags
News Detail
《千王之王》職場騙局記︱7月22號哈囉好工週刊火熱登場
- 2019-07-23
2019.7.22• 周一
導讀：完美的騙子一定是最值得信賴和最有魅力的人，不然怎會有那麼多人成為他們狡猾騙局下的犧牲品呢？今期《哈囉好工週刊》分享讀者在職場上見過或親身經歷過的騙局以及這些騙局會成功的原因。
化名：草根
行業：廣告／傳媒
職位：基層職員
性別：女性
年齡：25 – 34歲
防人之心不可無，就算個同事幾熟都唔好大意。咁本身有個幾熟嘅男同事，甚至可以話係有機會發展下一步。有一日喺茶水間度佢同我講，問我幾時畀翻啲錢佢。我一頭霧水，問佢發生咩事，佢就同我講話上個星期夜晚收到我嘅電話，話自己臨時有急事，需要即刻轉蚊5000畀我。因為大家幾熟，所以佢就諗都唔諗即刻借畀我喎。咁我冇借當然唔會還啦，點知佢就突然間大發雷霆，話同經理告狀。無奈之下我只可以由佢講。但奇怪嘅係之後呢件事好似冇發生過一樣。後期我同隔離位個女同事八卦，先知道佢已經用過呢條橋呃其他同事。只可以講好彩自己夠窮，就算我想畀5000佢都畀唔到。哈哈⋯⋯唉
你認為這場騙局成功嗎？有什麼建議避免類似騙局？
其實可以話係好成功，佢利用關係同埋我嘅內疚心，你會感覺佢係因為同你熟而畀人呃咗，跟住就畀錢佢。好彩我窮啫！要避免嘅話最好都係同公司講。佢呢招套路太深，公司同事都知道嘅話我諗佢會自動知難而退。
化名：勞蘇
行業：批發及零售
職位：基層職員
性別：男性
年齡：25 – 34歲
講起騙局我就諗起自己之前做嗰間公司，我個清純老闆因為信咗佢嘅朋友，搞到自己間公司五勞七傷。佢個朋友嗰陣同佢講搵到個廠家入貨好平，啲料都唔錯。我老闆成日同我哋講，出嚟做生意要講個信字。正因為佢呢個理念，佢一次過同佢個朋友入咗一大批貨。結果當然好似大家咁諗，批貨出咗事，品質甚至係連我哋嘅標準一半都冇。老細追問佢朋友，佢朋友話自己都係受害者。我估唔到我老細都依舊撐佢朋友，最後自己食晒批貨，公司啲錢砸住哂，貨又賣唔出，最後咪搞到公司執笠囉！雖然老細已經盡力，但始終畀人呃嘅錢太多，最後佢都只可以放棄公司。
你認為這場騙局成功嗎？有什麼建議避免類似騙局？
完美地表現咩叫做唔熟唔食。成功啊，為咗啲錢搞到自己嘅朋友成間公司都執埋。冇辦法避免，只可以講唔好亂信人。
化名：跩哥
行業：行政／辦公室助理
職位：基層職員
性別：男性
年齡：25 – 34歲
我自己就覺得，你就算真係要走去呃人，最起碼都有返少少道德。你話呃到啲好有錢嘅人，都冇咁嬲。連公司啲老人家兼職都呃，真係希望你快啲有報應！我哋公司都會請啲老一輩又有經濟需要嘅人做兼職，咁我哋都係請看更，所以請人方面都冇乜要求。但係之前就有個全職喺度呃呃騙騙，有時大家買嘢食佢找少咗錢嗰啲都算，有一次佢搵咗一個冇咁好視力嘅老看更，話益佢放啲超市現金卷畀佢，但其實入邊除咗面頭嗰張，後邊全部都係過咗期。後期係老看更同我哋呻下先發現咗呢件事，公司知道咗之後用咗個全職嗰個月嘅績效獎金，畀晒個老看更，重要出公告同晒全公司嘅人講，簡直大快人心！
你認為這場騙局成功嗎？有什麼建議避免類似騙局？
成功，老人家開頭仲幫佢解釋，可能係就快過期，咁啱佢遲咗去先用唔到，唉！對付呢啲人一定要重罰，利用人哋嘅好心做壞事！
0
化名：肥螳螂
行業：會議展覽
職位：基層職員
性別：男性
年齡：25 – 34歲
公司嘅兩個會計部同事夾埋一齊呃公司錢，佢哋兩個平時畀人感覺斯斯文文，唔係老細咁醒目自己親自發現，我諗其他同事都會同我一樣唔會懷疑佢哋，衰人真係冇樣睇！佢哋平時嘅職責就係幫公司啲同事Claim錢。佢哋竟然夠膽死冒認其他同事有錢要Claim，自己攞到錢之後就中飽私囊，簡直係無法無天！後期高層應該係覺得佢哋有可疑，搵其他同事夾口供。唔知佢哋兩個係咪自己都sense到，竟然一齊辭職。最後到佢哋走咗都有啲數追唔到，我哋部門個高層因為呢件事都畀人照咗好多次肺。
你認為這場騙局成功嗎？有什麼建議避免類似騙局？
無啦啦明明乜嘢都冇買，夾硬幫我開數都有人諗得出！其實好容易避免，全部要批准嘅嘢，最後都有email做紀錄，唔係畀啲衰同事冼一獲都唔知。
化名：嗰度咪有電話亭囉
行業：專業人員
職位：基層職員
性別：男性
年齡：25 – 34歲
勸諭大家小心啲，有咩關於錢銀都要問清楚！我自己本身都算係一個比較小心嘅人，估唔到衰喺自己前上司身上。嗰晚我收到佢WeChat短訊問我借錢，話因為家庭接二連三出現咗問題，希望我可以幫吓手。咁以前上司賞罰分明，做嘢都非常有交帶，而且咁尷尬我都冇問咁多，見到筆數唔大我就借畀佢啦。最後係點樣發現有問題？就係我見到佢IG成家人開開心心嘅遊歐相。等到佢返嚟我即刻打畀佢，佢聽完件事我feel到佢係真心一頭霧水，同埋佢冇用過嗰個帳號好耐，原來佢嘅WeChat畀人盜用了。到嗰一刻我哋兩個先知道佢嘅WeChat帳號應該畀人盜用咗，如果我一開始就打電話同佢確認就好啦⋯⋯
你認為這場騙局成功嗎？有什麼建議避免類似騙局？
平時都係有重要嘢先打電話，同佢平時都係用WeChat聯繫，真係估唔到佢個帳號畀人盜用，有關錢嘅嘢真係要確定清楚先好畀！
0
化名：澳門小姐級別靚女
行業：銀行和金融
職位：基層職員
性別：女性
年齡：25 – 34歲
自從某位女同事搞亂檔之後，公司就明文規定唔可以喺辦公室度談戀愛，唔想因為同事發展成為情侶而衍生出好多不必要嘅麻煩。咁嗰個女同事的確係生得幾靚，唔使問公司啲男同事肯定都對佢有興趣，一到中午放飯時間，因為冇乜女同事同佢friend，佢永遠都會捉我哋一兩個男同事食飯。唔知佢用咗啲咩手段，嗰班男同事個個都對佢暈晒浪，好似叫乜都聽咁。後來有一次唔知個女仔做咗啲咩事，經理直接炒咗佢，但呢件事換嚟係男同事佢哋嘅暴動，而家佢畀經理辭退咗，靚女同事就好似完全人間蒸發咁，原來好多男同事背後借咗好多錢畀靚女同事，紅顏禍水啊。
你認為這場騙局成功嗎？有什麼建議避免類似騙局？
成功，都追唔到啲錢。要避免騙案就只可以帶眼識人，靚女無啦啦咁主動，係咪真係咁好彩先？要醒啦⋯⋯
化名：高士德IU
行業：批發及零售
職位：基層職員
性別：女性
年齡：25 – 34歲
做老細其實一啲都唔易做，你以為淨係開間鋪坐喺度收錢咁只可以話你經驗尚淺。所有嘢只要睇小一眼都好容易會出問題。我朋友就係一個好好嘅例子，佢係賣手錶嘅，點知佢請返嚟嘅同事將佢啲貨品偷龍轉鳳咁拎出去賣，將啲真品換成超A嘅貨品，然後就拎啲真嘅同佢啲朋友銷售。後期有顧客發現咗啲手錶係假嘅報咗警，我朋友完全係晴天霹靂，去到最後成件事落晒案，我朋友先知道佢究竟損失左幾多錢。而且件事通咗天，我朋友仲要另外貼錢賠返畀之前買錶嘅顧客，蝕到入晒肉！
你認為這場騙局成功嗎？有什麼建議避免類似騙局？
呃人呢啲嘢冇樣睇嘅！表面望落去冇乜嘢嘅人，背後嘅手段有幾恐怖我哋唔會知！反而有啲平時把口好乞人憎嘅，佢哋做嘢或者對公司都離奇地好。呢啲事都冇得避免，只可以講每樣嘢都留心啲！
0
化名：絲絲
行業：銀行
職位：基層職員
性別：女性
年齡：55 – 64歲
呢件事發生喺我後生嗰陣，當時公司系統仲未係好完善，正常操作係啲客人打電話入嚟買股票，我哋即刻幫佢入。咁嗰陣大家都做耐咗，都會有啲固定打入嚟嘅客人。我個同事就係利用呢個漏洞攞着數。有個熟客幫佢買入之後，第二日個股票即刻下跌得好嚴重，咁個熟客就打返入嚟問我個同事可唔可以當尋日個電話冇打，然後私底下會畀一筆錢佢，希望佢好好搞掂呢件事。同事受唔住呢個誘惑，幫佢搞掂咗。但佢自己又偏偏又口疏，同咗我講。咁因為我覺得件事太嚴重，所以最後同咗經理講。
你認為這場騙局成功嗎？有什麼建議避免類似騙局？
成功。呢個年代佢想用呢種方法都做唔到，其實公司有進步往往就係因為有呢啲員工。其實好難避免，只可以發生咗馬上解決。
如何避免職場騙局
職場騙案日新月異，要完全避免可以說是非常困難的事。但其實也不難發現，這些騙案很多時候就是利用你的疏忽來犯案。以下我們將會分享一些預防職場騙徒的方法，希望大家能夠學以致用！
1 切勿透露過多私隱
犯人大多取易不取難，若同事有作案的動機，第一步他必定會去了解同事的背景，再對當中醉容易的同事下手。若不想成為受害者，保護好自己的個人背景的私隱。
2 冷靜分析別人說話
很多機會你會跟同事談一些工作以外的事情。但如果談話的內容涉及金錢上利益或個人利益，盡量選擇避而不談。若果避不開，冷靜聽清楚對方的說話，留意有沒有什麼可疑的地方。
3 找第三者作見證
如果有同事需要向你借錢，又或者建議你一起購買那些產品。我們建議你找你相熟的同事做見證，又或者讓其他同事也知道這個「着數」。若果這是騙案，犯人也不易輕舉妄動。
4 別隨意亂簽名
要留意個人簽名也是你財產的一部份，一部份騙徒就會用這種別人相對不太在意的部份來騙取金錢，如果別人要你簽名的話，多多注意吧！當然如果是別人借錢的話就另當別論，一定要他跟身分證簽下借據，別讓自己受矇騙！
0
結語
我們希望本期的分享能讓打工仔學會提前發現這些騙局以及避免成為騙局的犧牲品。 騙局就是因為人們希望以捷徑取替艱苦工作才得以存在，雖然有些人能避過公司及法律的追究，自以為能主導一切，但他們也掩蓋不了人的良知。最後，請不要忘記「人在做，天在看」
Back 