《職場閃避球》職場卸膊秘笈︱7月1號哈囉好工週刊火熱登場

2019.7.1 • 周一

導讀：在職場如戰場的世界裏，政治，是無可避免的事；而射波（卸膊），更是兵家常事。射波對各打工仔而言，可算是門高深的學問。不想被人射波？今期《哈囉好工週刊》會同大家分享打工仔遇過被人射波的故事，還會教大家如何巧妙又不失禮貌地避開同事射的波。

化名：你

行業：酒店營運

職位：基層職員

性別：女性

年齡：25 – 34歲

老細交低咗份文件畀我哋，咁我本身都冇打算話特別係邊個做，諗住如果同事比較忙自己做哂都冇所謂。咁好啦，我見另外一位同事冇出聲，咁我就自己做啦。點知過咗兩日，自己發燒唔舒服病咗，咁嗰陣份文件已經搞掂咗七成，諗住做咗咁多，而且係我哋兩個人負責嘅，同事冇可能托我手踭。點知我一send畀佢，都未開始電話同佢解釋返，佢就語音我一句：「你send畀我做乜，我印象中老細冇話交畀我做喎，麻煩你自己跟返佢。」嗰一刻我真係想吐血。大小姐，老細嗰日講到明「呢份嘢你哋搞掂佢」，咁都可以卸膊，除非我個名叫「你哋」就話啫……唉

你如何看待這種行為？你認為這是健康的工作文化嗎？

冇事唔出聲，有事即刻劃清界線，完全對公司同同事百害而無一利。一啲團結度都冇，你話大家點做嘢？

化名：神算輝

行業：財務／會計

職位：基層職員

性別：男性

年齡：35 – 44歲

隔離部門個經理好經典，因為佢同我哋部門個經理唔啱嘅，所以間唔中就見到佢走過嚟嘈。佢最鍾意嘅口頭禪就係「唔好意思呀，我唔係好識做，而且我入嚟嗰陣個Job description都冇寫要做呢樣嘢，麻煩你哋同事幫幫手。」我知道經理都覺得好對唔住我哋，因為其實一啲好簡單嘅嘢，只要有少少數字，佢都唔使佢啲下屬做，專登彈過嚟畀我哋做。佢要咁樣做我哋都阻止唔到佢，但最過分就係當我哋有少少嘢問佢，佢都會馬上拒絕，話佢自己啲同事好忙，而且語氣仲非常之差，其實佢呢啲咁嘅行為已經搞到我哋之前兩個新人都走咗。好無奈，做一份工竟然係畀隔離部門嘅上司搞走。

你如何看待這種行為？你認為這是健康的工作文化嗎？

冇品囉。絕對唔健康啦，咁辛苦先教完啲新人做嘢，就因為隔離部門啲人搞到我哋啲時間又嘥晒，最慘連做嘢嘅心機都冇

化名：T字膊

行業：酒店營運

職位：基層職員

性別：男性

年齡：25 – 34歲

公司啲上級老海鮮全部都係A字膊，我諗我哋同層嘅人全部都知道。老闆一有咩命令頒布落嚟，佢哋都會踢嚟踢去，所以其實明明係一份好細小嘅報告，唔知點解會搞到好多個人都會掂過，因為每人做嘢嘅風格都唔同，一份嘢經過咁多人手，最後搞到出嚟都唔知似乜。「大公司係咁㗎啦」，呢句嘢就係我哋平時嘅口頭禪，做樣嘢都要經好多層批准先可以做……其實我哋個心都好想幫公司，我哋一遇到問題就向上邊報，但係一去到經理級，佢哋就喺度踢波，踢到件事越嚟越嚴重先去到老闆度，最後等到件事救唔到啦，先由經理佢哋度推翻畀我哋執手尾，希望老闆你睇到可以整頓吓經理級員工，就係因為佢哋互相卸膊而搞到成間公司工作效率一啲都唔好。

你如何看待這種行為？你認為這是健康的工作文化嗎？

有破壞冇建設！我哋做嘢幾有心都冇用，經理級咁樣公司遲早只會搞到一啲冇能力嘅人繼續留喺度，有心嗰啲都會因為佢哋經常浪費時間卸膊搞到問題多多而離開公司。

化名：真係㗎點解嘅

行業：銀行和金融

職位：基層職員

性別：女性

年齡：25 – 34歲

自從見識過公司呢位同事嘅「威力」，令我成長咗唔少，估唔到一個啱啱畢業嘅人「踢波」能力已經咁勁。呢位同事一開頭入嚟，同佢溝通過覺得佢醒醒目目，諗住做嘢都冇問題。後來開始聽到啲同事背後話佢好多甩漏，話佢唔好，咁我都冇理佢咁多。直到上個月，佢都入咗嚟一年，都仲係咁多甩漏，我哋都開始懷疑佢係有心咁樣做。經過幾個同事試驗，我哋最後確認咗佢肯定係專登嘅。佢每次做晒啲最簡單同對好啲基本嘢，就會話自己做好，然後就叫我哋幫佢檢查吓。如果見到有問題佢就會扮唔識叫我幫哋吓手搞掂埋佢。只可以講人格呢樣嘢，千祈唔好用工作經驗或者外貌去判斷，否則就好似我哋咁，日日幫個新人做嘢，幫佢升職。

你如何看待這種行為？你認為這是健康的工作文化嗎？

扮冇能力射波畀同事，只可以講係非常陰濕。我哋個個同事都有幫過佢做嘢，功勞就佢攞晒，搞到我哋士氣都低埋。

化名：其實詐蠢，全為你付出的機智

行業：批發及零售

職位：基層職員

性別：男性

年齡：25 – 34歲

啱啱入到公司，啲同事就對我「非常好」。乜嘢都畀晒我做。咁我係新人，OK，都係要學嘢嘅。我自己每日都做到成隻狗咁，但係我見其他同事都可以準時收工。一開頭我會諗係咪我自己嘅速度問題，但後期當我做耐咗，開始了解運作之後，就知道其實只係佢哋將自己嘅工作量卸畀我。到後來又多一個人入嚟，我見嗰「三姊妹」又用同樣方法搞個新人。一聽到佢哋用個「教」字我就扯火。直到最近我真係頂唔順佢哋直接走咗去同老細講。好彩我平時所有嘢都記錄好，其實我都要多謝呢「三姊妹」，如果唔係佢哋我而家做嘢都唔會咁快手，希望佢哋明白咩叫善惡到頭終有報，缷哂啲嘢畀人做，的確可以輕鬆啲，但最後你只會乜都學唔到原地踏步，希望我「教」嘅嘢你哋會好好明白。

你如何看待這種行為？你認為這是健康的工作文化嗎？

「教」同「搞」其實差好遠，唔好用一啲懶係好嘅字眼去掩飾自己嘅罪行，無論係幾好嘅同事最後都會頂唔住，到最後你都係會搞到自己。

化名：呀同學

行業：餐飲

職位：基層職員

性別：男性

年齡：25 – 34歲

我身邊嗰位大忙人同事，你唔同佢有機會合作就乜事都冇，一旦要合作嘅話就只能祝你好運。佢扮工級數可以話係頂級，超卓。有一次要同呢位大忙人一齊做嘢，唔知點解佢永遠都講話自己好忙，好似成間公司淨係得佢一個忙咁。一行去佢個位度，佢就會話：「喂，呀同事，見唔見有好多嘢做緊」，佢講到咁大聲，全部同事都聽到，想叫開始一齊做都唔得。最後佢就靠咗呢句說話，推曬啲嘢畀其他同事。佢就係恃住自己喺度做得耐，同老細熟，同佢個把唔知醜嘅叫聲，一直喺度打壓其他員工。

你如何看待這種行為？你認為這是健康的工作文化嗎？

乞人憎囉，自我中心太強，乜都以為自己係最重要。絕對對公司唔好啦，不過如果佢係老細啲人，只可以祝呢間公司好運。

0

化名：卸呀卸，卸他吧

行業：餐飲

職位：基層職員

性別：男性

年齡：25 – 34歲

我哋做餐飲嘅，永遠最唔想做嘅都係洗廁所。但係為咗錢都要做啦，同埋公司本身都公平嘅，輪流洗。但係如果老細一唔喺度，我哋呢班做兼職嘅就頭痕。啲正職呀姨每逢老細早走，而嗰晚佢又要洗廁所嘅時候。佢總有唔同藉口唔洗：咩點下入邊啲貨，埋數少咗幾多，然後就去「埋頭苦幹」，叫我哋兼職幫下手。大小姐，一兩次當然冇問題，但每次都係咁，仲要畀我哋有次見到佢其實係走咗去存倉入邊坐喺度玩電話。我哋有兼職試過話佢，因為正職有幫手keep起我哋啲打卡紙，佢就大個兼職話唔洗就唔洗打卡。不過好彩有個準備辭職嘅兼職幫我哋出氣，錄晒音畀老細聽。只可以話畀你聽千祈唔好得罪準備辭職嘅人，因為佢哋乜都唔怕。

你如何看待這種行為？你認為這是健康的工作文化嗎？

卸膊我諗係任何公司嘅人都會覺得乞人憎，有邊個會鍾意不斷無條件幫人做嘢。我估唔算影響公司太大，因為我諗對老細嚟講我哋兼職根本冇價值。

0

化名：李嘉欣醫生

行業：娛樂博彩

職位：中層管理者

性別：女性

年齡：25 – 34歲

之前我差啲畀個前下屬激到爆血管。我覺得佢簡直係一個藉口寶庫。當佢做錯然後我質問佢，佢永遠都會用一個全新嘅藉口答我。佢會將佢做錯嘢嘅責任推畀其他同事，甚至我。乜嘢「同事係咁樣教我」、「上一次其他同事都係咁樣做」，我都忍。有一次佢竟然夠膽講「麻煩你下次解釋得清楚啲」，嗰一下啲火真係去到臨界點，只可以慶幸自己仲保存住理智，唔可以同佢癲。好彩佢自己平時做嘢錯誤夠晒多，過咗一排就炒咗佢啦。

你如何看待這種行為？你認為這是健康的工作文化嗎？

做錯嘢畀藉口只會令人反感。一來畀人覺得你冇心改，二來你嘅做嘢質素一定唔會好，呢種人留喺公司只會影響業績。

卸膊同事無處不在。面對著他們的明槍暗箭，你又可以怎樣做？其實同事之間最好做到守望相助，我們亦不建議你以牙還牙，下面我們將會分享一些醒目Tips，教大家正確處理卸膊招數。不得失同事關係之餘，又不怕卸膊同事以後隨便欺負。

結語

    卸膊希望今期的封面故事能助你避開戰火，如果你都有相同經歷，歡迎到https://survey.hello-jobs.com和我們分享你的故事。

查閱更多《哈囉好工週刊》內容：http://weekly.hello-jobs.com/