News Category 
Hot Tags
News Detail
《同事如果我是你》同事分享記︱6月17號哈囉好工週刊火熱登場
- 2019-06-20
2019.6.17 • 周一
導讀：在職場上，相信不少打工仔都會有「同事如果我是你」的想法。因為如果換成是你，對待一件事的思考、處事的方式都會有所不同。今期《哈囉好工週刊》會同大家分享打工仔之間「如果我是同事」的想法。同事，如果我是你，我一定會……
化名：晴天pig pig
行業：娛樂博彩
職位：基層職員
性別：女性
年齡：25 – 34歲
啱啱新入到公司乜都唔清楚，啲路又唔係好熟。由於我仲未去迎新嘅關係，我連自己Office都唔係好記得係邊。好彩我嗰陣撞到我嘅同事，我就麻煩叫佢幫手帶我返去。點知佢一句彈埋嚟，話我人頭豬腦。嗰一刻我真係唔知點答佢。我第一次請教佢，可能條問題對於佢嚟講係太無聊，但係對於未熟悉只係行過一次嘅我嚟講真係好無助㗎嘛⋯⋯
當你面對同樣的事件，你會選擇怎麼處理？
無論點都唔會鬧人囉，況且大家仲係同事，基本上每日都會見，何必要搞到大家關係咁樣⋯⋯
為什麼你會這樣選擇呢？
大家都係打份工，職場有基本禮貌係常識，除非完全得罪你，唔係都會同同事好好相處。
0
化名：三五成群
行業：資訊科技
職位：中層管理者
性別：男性
年齡：25 – 34歲
我隔離個部門成日都換人。最初我哋大家同事八卦，都會以為可能關工作量事，工作太多所以佢哋部門啲人先頂唔順走人。直到最近同佢哋部門一個同事熟咗，先知道原來係經理問題。佢話經理情商比較低，如果搞到佢唔開心，佢就會發脾氣，一係就冇原因咁博命鬧你，一係就啲email遲遲唔覆，搞到班細嘅做唔切嘢，然後就鬧佢哋慢。其實佢哋份工唔算辛苦，佢話基本上覺得啲人工就係為咗服侍經理，工作根本冇難度。我睇得出個同事真係好辛苦，佢問我部門仲請唔請人嗰個樣實在太真誠同太慘。
當你面對同樣的事件，你會選擇怎麼處理？
處事成熟啲，更何況你係經理，搞到自己神憎鬼厭，隨時畀啲下屬玩返轉頭，一係就集體辭職。
為什麼你會這樣選擇呢？
長期搞到自己部門太負面嘅話，最後麻煩到嘅只會係自己。
化名：幾時升埋我？
行業：娛樂博彩
職位：基層職員
性別：女性
年齡：35 – 44歲
我有個同事成日都喺度埋怨冇得升職，入到嚟做咗兩三年都唔升佢，日日喺度怨東怨西。其實根本就係佢自己問題，能力有啊，但唔識同同事溝通呢⋯⋯好啦，年頭老細終於升佢，咁我哋公司有習慣邊個同事升職，基本上都會請食飯或者嘢飲嘅。老細同佢推薦一間手搖店。佢竟然兜口兜面話唔請，仲話叫老細唔好乘機做佢一鑊……聽完真係冇眼睇。只可以祝佢好運。
當你面對同樣的事件，你會選擇怎麼處理？
請同事慶祝一下，唔算太貴，大家又開心，自己工作上都會順利啲。就算真係唔想請都冇問題，起碼畀個好啲嘅藉口呀⋯⋯
為什麼你會這樣選擇呢？
其實冇得解，我以為個個都會明白呢個邏輯。
0
化名：南灣平井堅
行業：銀行和金融
職位：中層管理者
性別：男性
年齡：35 – 44歲
我記得早10年做嘢嗰陣，新入職或者畢業生都係好謙虛受教，好努力去學習。但係一代不如一代，而家嗰啲簡直係離晒大譜。基本禮貌都唔識。有個啱啱係英國讀完碩士嘅女仔，可能佢認為我哋學歷唔高，佢做熟啲就可以完勝我哋，每一樣叫佢做嘅嘢佢都會問點解，完全係一個問題少女。如果佢係虛心問，當然好願意答佢，但係佢完全係一副質疑態度，而佢根本唔知道自己其實有好多嘢都唔知，我哋只不過係費事嘥時間解釋而冇講咁多。我覺得如果你係真係唔明，可以試吓聽同事意見，先唔好質疑，直到你做完之後覺得奇怪你先再問。唔係只會搞到自己神憎鬼厭。
當你面對同樣的事件，你會選擇怎麼處理？
虛心學習囉，書本知識同實際做法可能會相差好遠，確定自己了解清楚再囂張都未遲。
為什麼你會這樣選擇呢？
最主要係你虛心學習，人哋都願意教你多啲，其實都係為咗自己好。
0
化名：很想喊像幼小
行業：批發及零售
職位：基層職員
性別：女性
年齡：25 – 34歲
公司有個大喊包，經常會為咗一啲小事而喊。雖然大家唔同部門，但係有時候都會合作。有次叫佢幫手，當時我超級好態度同佢講，因為佢係第一次做，我叫佢小心啲就可以，我唔會催佢。但佢做做下佢可能覺得自己做唔掂，佢啲眼淚就不斷咁流，一邊喊一邊做。我過咗一段時間先知道呢件事，就諗住等佢冷靜啲先問佢發生咩事。點知一行返去問佢，佢可能覺得好委屈，又喊一輪。佢一喊上嚟，佢性格會變晒，明明平時幾Nice，佢一喊，我諗連經理問佢嘢佢都唔會答。細個畀人整喊就整得多，自己整喊女仔真係第一次。
當你面對同樣的事件，你會選擇怎麼處理？
做好嘢先，返工感情用事係唔得嘅。
為什麼你會這樣選擇呢？
可能自己比較男仔頭，覺得喊解決唔到問題仲好阻到其他人。
化名：安琪兒
行業：娛樂博彩
職位：基層職員
性別：女性
年齡：25 – 34歲
有個同事好怕洩底，少少嘢都唔肯幫人，仲要講埋晒啲好刻薄嘅說話。有幾次同事需要大家一齊幫手，佢即刻走出嚟講「我唔得閒，我唔會幫手。」同事都好無奈，當聽唔到繼續。之後有一次佢自己病咗，佢就麻煩其他同事幫手，大家都有幫到佢。等大家以為佢嗰次之後會受感動，改變下啲性格，原來都只係諗多咗，佢都仲係咁自私⋯⋯唉。
當你面對同樣的事件，你會選擇怎麼處理？
點都會幫忙，因為你自己總有一天都要人幫。
為什麼你會這樣選擇呢？
先唔好諗住人哋之後會幫返你，其實公司入邊，守望相助係最好嘅相處方法。
0
化名：屈員
行業：批發及零售
職位：基層職員
性別：女性
年齡：35 – 44歲
公司最難頂嘅一定係啲成日卸膊嘅同事，我個同事就係一個好例子。恃住自己喺度做得耐，明明係自己做錯就成日推落啲新人度，搞到個新人都以為係自己錯，仲打算自己拎錢出嚟填返個氹，我就同個同事講做人唔好咁低劣，叫佢唔好搵人揹鑊，到最尾個同事都係冇企出嚟，有得啲新同事食死貓，我同啲同事頂唔順佢咁過分，最後我同其他同事一齊去同老闆講，根本就唔關新人事。
當你面對同樣的事件，你會選擇怎麼處理？
首先如果係我錯我會睇吓有咩可以補教嘅方法，而唔係驚死推個新人出嚟。
為什麼你會這樣選擇呢？
因為始終都係自己錯咗，冇理由拎人出嚟祭旗。
0
化名：馬介休球迷
行業：批發及零售
職位：基層職員
性別：男性
年齡：25 – 34歲
隔離部門個經理絕對係一隻催狂魔。經常不斷要自己下屬提前好多時間準備好晒啲嘢。咁正常人都會明白啲嘢早啲做晒係好嘅，但係你都唔可以迫人哋加班做㗎嗎，平時搞好日常工作已經好攰，仲要應付你啲提早準備工作。重點就嚟啦，你搞你自己部門都算，你連其他部門都要催，你知唔知咁樣會搞到自己神憎鬼厭，你咁樣講真係以為你自己會容易升職咩？畀其他同事篤到你背脊穿窿都唔知。
當你面對同樣的事件，你會選擇怎麼處理？
如果知道有緊要事提早準備係OK嘅，但如果冇就唔好迫人囉。
為什麼你會這樣選擇呢？
大家都係打工仔，正常都應該明要有休息時間。
化名：塵罐C
行業：批發及零售
職位：基層職員
性別：男性
年齡：25 – 34歲
我個同事成日做嘢都好唔上心，好似接電話嗰陣留資料都問到甩甩漏漏，其實呢啲係一啲好基本嘅嘢。大家唔係同部門又唔好意思出聲，問一個電話號碼，用咗成個朝早都問唔到。自己又唔記得記錄，搞到全部同事都搵唔番邊個搵佢。其實做嘢好簡單，你只要設身處地，代入人哋個角色。咁樣你先可以好好做到嘢。就好似接電話咁，如果你要打番電話畀人，你需要啲咩資料，你就確保好你收線之前問好晒，咁樣就OK啦，希望你睇到我篇文章學到嘢。
當你面對同樣的事件，你會選擇怎麼處理？
咩都寫低佢，記錄得詳細啲，方便自己方便大家。
為什麼你會這樣選擇呢？
你自己做得唔好，人哋又要由頭做過。有啲甚至搵都搵唔番，咁又何必呢？
0
化名：神枱關公
行業：娛樂博彩
職位：基層職員
性別：男性
年齡：35 – 44歲
坐係我旁邊嗰位女同事真係煩到痴線。太過忌人，成日浪費精力係啲無謂事上邊。公司有新人入職，佢見人哋名牌大學，教人哋做嘢嗰陣，只會教人哋六七成，驚死新人會爬佢頭。見到新人入經理房，佢又專登喺度幫佢作謠言話佢有靠山；經常性喺度無中生有，有啲嘢我哋其實自己有眼睇，公司咁細其實其他人做緊咩唔難知，但係你見到人哋高材生名牌大學畢業就喺度搞風搞雨，我覺得你非常小家囉！咁樣畀你升到上去你都只會係一個冇實力嘅上司。
當你面對同樣的事件，你會選擇怎麼處理？
做好自己嘢囉，尤其是當你真係想升職，你只會諗點樣去改變好你自己，而唔係去搞死其他人
為什麼你會這樣選擇呢？
對得住自己良心，做人腳踏實地好。
0
結語
看完以上讀者的分享，希望大家明白同事之間最好可以做到互相提點。雖然基於不同理由，例如職級，輩分或者相熟程度，我們不能坦率地提醒同事，但同事可能就因為你這個提醒而變得更好。所以如果情況許可，多多關心和提醒你身邊的同事吧！
Back 