《官官相衛》職場包庇實錄︱1月21號哈囉好工週刊火熱登場

官官相衛_職場包庇實錄

導讀：人類自古以來都是過著群居的生活。所謂「團結就是力量，人多好辦事」，這道理在職場也不例外。但凡事做得過火都會有反效果，今期《哈囉好工週刊》會為大家揭露同事間官官相衛的事。有的人為了謀求利益，不惜互相包庇，隱瞞真相。如果你身邊也有這些同事，歡迎投稿至

info@mss-recruitment.com向我們分享。

阿泉

行業：行政／辦公室助理

職位：基層職員

性別：男性

年齡：25 – 34歲

之前經理嘅女朋友（簡稱A）透過關係入咗公司，經理就叫班下屬唔好畀咁多嘢A做，點知有唔知情嘅同事竟然向經理投訴A唔做嘢、講嘢寸、得罪人多、稱呼人少，但經理當然當冇事發生一樣，掉返轉頭話投訴嘅同事唔好製造事端，亂講同事壞話。可能天有眼，有一日大老闆返咗公司，A就同平時一樣，Hea住打機。可能因為打到決勝負，太投入見唔到大老闆，大老闆喺A面前行過都唔知。大老闆見佢仲打就企起佢個位旁邊，大叫經理出嚟。問經理A係邊個嚟，點解佢唔洗做嘢，質問經理點管理下屬。經理畀老闆問到出唔到聲。而我哋大家梗係心都涼晒啦，終於有人收拾到經理同A。

對公司帶來嘅影響：

浪費公司資源，而且影響員工士氣，敗壞公司風氣。

你同不同意此作風？

唔同意，拍拖就返屋企拍，唔好拍到返公司，阻住個地球轉。

Mic

行業：餐飲

職位：基層職員

性別：男性

年齡：25 – 34歲

經理平時見到熟客都會手寫出單，永遠都唔會入返落系統。而啲熟客食完就會畀現金佢，佢就將啲錢袋落自己袋，完全係無本生利。有一次，有個熟客訂咗40個飯盒，經理就咁手寫張單就入咗廚房，然後叫師傅起咗嗰40個飯盒先，然後塞咗500蚊畀師傅。師傅收到錢就即刻做起嗰40個飯盒先，搞到啲單亂晒，一堆客人投訴咁耐都未有嘢食。後尾唔知道邊個咁夠膽越級向上頭反應，揭發咗呢件事出嚟⋯⋯

對公司帶來嘅影響：

嚴重影響餐廳聲譽同對客人唔公平，而且對公司造成經濟上損失。

你同不同意此作風？

唔同意，咁樣同偷錢冇分別，為咗貪小便宜而敗壞自己人格，唔值得。

歡喜哥

行業：批發及零售

職位：基層職員

性別：男性

年齡：25 – 34歲

由於我哋倉庫啲CCTV有死角位，主管就同其中一個同事互相包庇偷啲貨物出去。正因為嗰個死角位唔多人留意，係公司嘅盲點位，而且公司曾經畀人夜晚入嚟偷嘢。所以主管同嗰位同事就照板煮碗同公司匯報鋪頭又畀人偷嘢，將自己偷咗嘅貨物都聲稱係畀人偷晒。主管好識安排，佢特登將自己同嗰個同事拍同一更，而且公司調查嘅時候，主管都會同嗰位同事互相扮唔知，而且仲識得幫對方互相講好說話，所以佢哋嗰次都冇畀公司捉到。但人心不足蛇吞象，佢哋偷得越嚟越多，最後畀公司發現送警辦理。

對公司帶來嘅影響：

造成公司造成金錢損失，教壞晒其他員工。

你同不同意此作風？

唔同意，造成公司損失，敗壞風氣，明人不做暗事，更何況係偷嘢。

呀程

行業：會議展覽

職位：基層職員

性別：男性

年齡：25 – 34歲

有個女仔靠經理嘅關係入咗嚟我哋公司，佢主要工作係見客跑數，但係佢一單訂單都傾唔到返嚟都算啦，仲要好幾次我同佢一齊出去見客，然後佢話要返一返屋企，之後就冇再出現過，跟著見客嘅事都係我自己一個人做晒。準備放工佢先蒲頭返公司打卡。但點都估唔到，最後佢嘅佣金居然比我多。公司內部傳佢嘅佣金係從經理嗰度賺返嚟嘅肉金。最後我都唔知結果，淨係知佢哋兩個都辭咗職。

對公司帶來嘅影響：

請一個淨係返嚟打卡嘅同事，簡直浪費公司嘅錢同時間。

你同不同意此作風？

唔同意，其實唔煩到我就覺得冇乜嘢，但要我做埋佢嗰份我就覺得好過份囉！

Joey

行業：廣告／傳媒

職位：基層職員

性別：女性

年齡：25 – 34歲

之前公司嚟咗個女同事，大家同事都對佢好好奇。咁大家同事平時相處氣氛一直都唔錯，咩事都會攞出嚟講，包括公司大小事，同事是非。有一個同事就開始議論呢位新嚟嘅女同事，從頭議論到腳。點知過幾日，嗰個同事就畀人炒咗，開頭大家都唔知點解，但有一日有同事見到新嚟嗰位六畜無害嘅女同事，坐咗喺老闆部車嘅副駕駛座，手拖手咁喺條街度行，大家就心照啦，然後搞到公司人心惶惶。

對公司帶來嘅影響：

搞到同事好大壓力，好驚得罪佢，嚴重集中唔到工作。

你同不同意此作風？

冇影響咪冇所謂囉。

Ricky

行業：行政／辦公室助理

職位：基層職員

性別：男性

年齡：35 – 44歲

公司老闆嗰姪仔嚟咗我哋公司做，一做就做主管位置，然後就大刀闊斧咁改革公司，咁啲老屎忽點會順佢意。啊姪仔話美國都係行咁嘅制度，公司請得佢返嚟就要信佢，如果有員工唔聽話佢做唔到嘢。明明係自己做唔到嘢，唔服眾就話其他人唔合作。最後佢就搞到公司一團亂，但係老細偏偏好似盲咗咁，照樣繼續有佢管理。最後我同另外幾位同事都頂唔順所以辭職。

對公司帶來嘅影響：

成間公司畀佢搞到亂七八糟，啲單成日最後限期先趕到，啲客對公司好不滿。

你同不同意此作風？

如果可以帶公司走向好嘅方向我唔介意，如果唔係我就絕對唔同意。

Max

行業：建築及工程

職位：基層職員

性別：男性

年齡：25 – 34歲

有個女仔靠經理嘅關係入咗嚟我哋公司，佢主要工作係見客跑數，但係佢一單訂單都傾唔到返嚟都算啦，仲要好幾次我同佢一齊出去見客，然後佢話要返一返屋企，之後就冇再出現過，跟著見客嘅事都係我自己一個人做晒。準備放工佢先蒲頭返公司打卡。但點都估唔到，最後佢嘅佣金居然比我多。公司內部傳佢嘅佣金係從經理嗰度賺返嚟嘅肉金。最後我都唔知結果，淨係知佢哋兩個都辭咗職。

對公司帶來嘅影響：

分黨派其實好影響公司士氣。除咗對同事唔公平之外，仲令到同事唔可以安心做嘢。

你同不同意此作風？

唔同意，無啦啦搞到我揹鍋。

Cici

行業：廣告／傳媒

職位：基層職員

性別：女性

年齡：25 – 34歲

前排經理高薪請咗個人返嚟話咩外國名牌大學，攞咗好多獎，空降過嚟做總管，後尾先知佢原來係老闆親戚，咁個個都擦佢鞋啦。咁啱我同佢同部門，有好多嘢需要大家一齊做。相處一排之後發覺佢實力好一般，佢設計啲方案好多都畀客人彈返轉頭，然後佢就叫我幫佢改，做咗咁耐我當然好明白啲客係要啲咩啦，咁我就改到個客好滿意啦，然後佢就同啲同事講啲客好鐘意佢嘅方案。經理明知我係我做，佢請槍，但經理扮晒嘢咁話，睇好我，繼續努力，遲啲升我。但係嗰位空降同事竟然連升兩級，而我依然係喺地底掙扎。

對公司帶來嘅影響：

如果做唔掂就唔好扮嘢啦，好浪費公司資源。

你同不同意此作風？

如果佢係有實力幫到我我係唔介意嘅，澳門街好多都係打關係，但係而家係搞到我所有努力都白費，真係越做越灰。

Yoyo

行業：銀行及金融

職位：基層職員

性別：女性

年齡：25 – 34歲

公司上年換咗個經理，呢個人完全係親戚黨派，最新入嚟嗰兩位同事都係佢啲親戚。佢嗰兩位親戚成日話咩都唔識做，咩都喺度卸膊，成日坐喺度唔知做乜。本身上級有個位空缺咗，按經驗按年資都應該係升我，但係經理最後就畀咗佢嗰個入嚟半年都冇嘅親戚升。

對公司帶來嘅影響：

一個唔為公司諗嘅高層，對公司嘅運作會好有問題。

你同不同意此作風？

唔同意，會有一種做極都出唔頭嘅感覺。

阿霞

行業：餐飲

職位：基層職員

性別：女性

年齡：25 – 34歲

公司有個姐姐平時好勤力咁拗小費，咁我哋公司規定小費係收集好然後再平分。但係嗰位姐姐收完之後畀1／3主管，然後就唔洗拎返出嚟平分，所以佢成日話佢收唔到小費。但其實個個都有眼，係冇人舉報啫。皆因個姐姐平時好好口，主管同佢好熟，所以好多同事就隻眼開隻眼閉。

對公司帶來嘅影響：

如果佢唔攞埋平分個份我都冇特別介意，但係佢攞埋平分嗰份咁對其他服務生好唔公平！

你同不同意此作風？

當然唔同意，都唔明白點解會有呢啲人。

Car

行業：批發及零售

職位：基層職員

性別：男性

年齡：25 – 34歲

有同事成日用啲唔正當嘅手段嚟簽單，但係經理一直都隻眼開隻眼閉，因為佢成日陪經理食飯，而且個樣生得好唔錯。有同事篤佢背脊，但經理竟然講公司簽到單就可以。呢個人除咗用不正當手段開單之外，仲係咁搶其他組員嘅單。無奈公司又唔理，搞到公司烏煙瘴氣。佢仲要倚住自己開到好多單，喺公司肆無忌憚，目中無人。

對公司帶來嘅影響：

有一次有個客嘅老婆上嚟嘈，原來嗰位同事畀正室捉到正，當面大鬧，搞到成間公司聲譽冇晒。

你同不同意此作風？

唔同意，因為用唔正當手段搶返嚟嘅客遲早賴嘢。

Milk大哥

行業：建築及工程

職位：基層職員

性別：男性

年齡：25 – 34歲

以前公司經理拎回佣拎得好多，但公司規定係唔可以，之後有同事發現咗仲走咗去同老闆舉報。老闆表面有處理呢件事，但只係口頭警告。明眼人都知道，經理係老闆嘅愛將，就算口頭警告又點，完全沒有實際阻嚇力，經理就繼續自己袋回佣，冇事發生過一樣，但係舉報畀老細聽嗰位同事就喺舉報後兩個月離開咗公司。

對公司帶來嘅影響：

當老闆都唔跟規矩做嘢，員工又點會好？成間公司都賺唔到錢。

你同不同意此作風？

唔認同，員工做嘢唔開心有壓力，做得好你都唔信。

結語

很多時候，與人合作確實比較好辦事，始終多一個人就多雙手。多與同事合作也是培養團隊默契的機會，有助公司長遠發展。但如果相方合作目的只為一己私欲，那便會損害公司利益。當然，在職場打滾的打工仔總會覓到一些真友誼，「互相幫助」等舉動總是很難避免。但在每次幫助對方時，亦緊記要問自己：「這樣做是為了公司，還是純粹為了自己？」

查閱更多《哈囉好工週刊》內容：http://weekly.hello-jobs.com/