新聞內容 
《一波未平一波又起》︱11月26號哈囉好工週刊火熱登場
- 2018-11-26
- https://mp.weixin.qq.com/s/axMyNIDJcntxehyMBK0jQw
一波未平，一波又起
導讀：你有沒有試過一整天「頭頭碰著黑」？對很多人來說，生活中總會有倒霉的時侯。有時，那「黑仔」的程度甚至會令你有甚麼都不想理會、只想一覺睡到天光的感覺。究竟一個人倒霉起來可以有多倒霉？今期《哈囉好工週刊》會和大家分享打工仔遇過最黑仔的事，看過後你可能會覺得自己原來挺幸運的～
Man Man
黑仔指數：三星
行業：娛樂博彩
職位：基層職員
性別：女性
年齡：25 – 34歲
之前喺公司要拎份文件畀個客簽，咁啱嗰日落雨，又攞住好多嘢，搞到自己好狼狽，個樣好似隻鬼咁：頭髮亂晒、件衫濕晒、個妝仲要溶咗一半。就到個客間公司嗰陣，個地下好滑，行到去大廈門口，我成個人仆咗喺度，個身仲要仆咗落個水氹度，搞到我成隻「落湯雞」咁，但好彩份文件冇事。返到公司後，發現部手機跌壞埋，救唔返。
雨愛
黑仔指數：三星
行業：行政 / 辦公室助理
職位：基層職員
性別：女性
年齡：35 – 44歲
之前返工嗰時，做咗成日嘢已經好攰，就嚟放工先畀個客拖住，搞到嗰日OT咗成四個鐘。咁我見咁攰，我就冇揸私家車，坐巴士返去啦；點知冤家路窄，見到上一份工嘈過嘅同事上巴士，我寧願行返去都唔想同佢坐埋同一架車。咁我即時係下一個站落車，點知行咗冇幾步就「中頭獎」，成督雀屎跌咗喺我對新鞋度，都唔知點解嗰日咁黑仔。
Ace
黑仔指數：四星
行業：零售
職位：基層職員
性別：男性
年齡：25 – 34
之前收貨嗰陣冇睇清楚就收咗，點數之後先發現唔啱數，然後經理就叫我打返畀個供應商話唔啱數，點知個供應商死口唔認數，咁少咗嗰啲貨就要自己出返，之後返屋企嗰時因為呢件事搞到好唔開心，越諗越嬲，冇睇到路面然後唔小心撞埋支電燈柱度，個額頭仲腫起咗，去睇醫生又用咗一筆錢。
李妹
黑仔指數：四星
行業：酒店營運
職位：基層職員
性別：女性
年齡：18 – 24歲
嗰日都唔知點解咁黑，嗰朝一起身就發現副眼鏡唔知點解斷開咗兩節，嗰陣已經有啲不祥嘅預感。好彩屋企仲有副後備眼鏡，就戴後備嗰副出門口啦。點知行到去架車度準備出發嗰陣發現架電單車開唔到，打極都打唔着火，咁唯有迫巴士返工啦。正當我以為自己已經黑完嗰陣，就係放工嗰時我差錯腳碌咗落樓梯，電話螢幕爛咗，後備眼鏡都爛埋。唔好問我打後嘅第二日點過，我都唔知道點過。
Rainbow
黑仔指數：五星
行業：資訊科技
職位：基層職員
性別：女性
年齡：25 – 34歲
之前我一個人去外國出差，嗰朝個天得幾舊雲我就以為唔會落雨啦，所以我就無拎遮。點知下午就突然落雨，當時我咁啱喺馬路邊行緊，方圓十里都冇避雨嘅地方，雨越落越大，我就加快腳步衝去目的地。點知行行下冼腳，好彩自己捉得住旁邊顆樹，但隻手傷咗。終於見到有鋪頭畀我買把遮啦，點知我落車又唔記得拎，所以成個下午一直處於淋浴狀態，第二起身就感冒同發低燒，無奈之下戴著口罩捱住病去見客。
人生議員
黑仔指數：四星
行業：行政 / 辦公室助理
職位：基層職員
性別：女性
年齡：35 – 44歲
之前返工我都唔知咩事，未返到公司就畀老闆電話轟炸，一直鬧，話我搞錯咗份合約，但其實個份合約唔係我負責，但佢唔理照鬧咗我半粒鐘，我同佢解釋又唔聽喎，咁我唯有被迫硬食咗隻死貓佢啦，就因為呢個唔係我犯嘅錯老闆話扣咗我今個月嘅獎金；佢話完我之後嗰日仲要頻頻出錯，但啲錯我都有即時改返，但老闆都覺得我成日出錯日日出錯就炒咗我。一日內，畀炒魷魚⋯⋯死得不明不白！
勝利
黑仔指數：三星
行業：廣告 / 傳媒
職位：基層職員
性別：男性
年齡：35 – 44歲
嗰一日一返到公司部電腦就壞咗，因為成朝都搞緊部電腦，所以我基本上都冇乜點做到嘢，應該係想做都做唔到。點知老細話我成朝都冇作為，咩都未交未做，就鬧咗我半個鐘，話我唔做嘢都唔好喺度作故仔……好唔容易先到收工時間，點知一落去架車就畀人抄咗牌，就係因為我遲咗10分鐘冇入錶。返到屋企冇心情諗住叫個外賣啦，點知食個飯都出事，食到一半先發現有隻小強喺度，真係唔知講咩好。
魚仔餅
黑仔指數：兩星
行業：建築及工程
職位：基層職員
性別：女性
年齡：25 – 34歲
之前就因為份標書寫漏咗啲無關痛癢嘅嘢，畀老細召咗入房照肺。咁都算啦，我認我衰仔，因為都係自己嘅錯失。唔知點解嗰日都知道自己成日一定好黑仔，諗住中午拎張公司支票去銀行入，去到銀行先發現唔見咗張支票，咁唯有返去公司出過張，焗住畀人鬧都冇辦法，又係錯在自己。就係因為呢件事我嗰日連飯都冇食就要出去見客，見完客因為自己血糖低就暈咗喺條街度。
Sally
黑仔指數：五星
行業：廣告 / 傳媒
職位：基層職員
性別：女性
年齡：25 – 34歲
明明前一晚有較好鬧鐘，點知部電話夜晚冇電熄咗，因為朝早要同老細過去香港做嘢，老細打極畀我都打唔到，最後我仲要趕唔切班船，老細自己一個去咗香港。我一起身見到自己過咗鐘即刻衝去搭車，就喺我落的士嗰陣，先發覺銀包唔見咗，連的士錢都畀唔到，搞到要叫爸爸出嚟幫我畀錢。最後因為遲得滯，老細同我講直接唔使嚟，最後返到公司鬧咗我一大餐。
琪琪
黑仔指數：五星
行業：教育
職位：基層職員
性別：男性
年齡：35 – 44歲
之前颱風時候，教青局已經講得好清楚幼稚園嗰日唔洗上堂，但係啲家長係咁打嚟問今日洗唔洗返。我哋老師冒住風雨返到學校，自己個身都未乾，就要不斷接家長電話，但即使係咁我都好有耐心咁講畀佢哋聽唔洗返，但係如果返咗都會有老師睇住，所以唔使擔心。點知嗰日有個小朋友返嚟，個家長推佢小朋友入學校嗰陣，個小朋友企唔穩仆親。點知個家長就話我哋看管不當，然後就接咗個小朋友走，仲話一定會追究。過咗一陣佢就打電話嚟鬧足一粒鐘，仲要搞到學校高層召見我，返到屋企仲要發現隻窗吹爛咗，成個廳亂晒，頭頭碰着黑。
小小
黑仔指數：五星
行業：廣告 / 傳媒
職位：基層職員
性別：女性
年齡：25 – 34歲
我返工嗰日唔小心仆親，咁嗰一刻我唔係覺得好痛，以為冇事，就繼續返工。因為我着咗長褲，所以我返到公司先發現，成個「菠蘿蓋」位都係血，我即刻衝入廁所處理，點知個客咁啱就係呢個時間打嚟，我急得濟冼手，成部電話就咁跌咗入廁所底，附近又冇器材幫手，只可以徒手撈返上嚟。搞掂部電話同個客，因為傷口開始痛，又唔想佢畀條褲長期磨擦，我就好尷尬咁問同事有冇短褲，最後我借咗男同事放工打波條短褲嚟着，無比樣衰。因為嗰日都好多嘢做，送文件嗰陣我又唔小心仆低，傷口落地，真係頂唔順之下我就叫的士入咗醫院……
Bobo
黑仔指數：四星
行業：零售
職位：基層職員
性別：女性
年齡：25 – 34歲
之前喺便利店做，咁埋數少錢或多錢都係正常嘅，咁嗰一日早更埋數就少咗500蚊，按照公司規定，要去睇返CCTV點解少錢。而我返中更一定唔關我事啦，咁我就費事阻住同事埋數同睇CCTV，繼續做自己嘢啦。點知個店長話我點解咁唔關心呢件事，就話咗我一輪；諗住就嚟放工，去搵朋友飲嘢放鬆吓，但就放工嗰陣就遇到個癲婆，話我服務態度唔好，話等我放工打我一餐，點知我放工嗰陣個癲婆真係喺門口等我喎，我用盡全力跑，唔敢望後面。嚇死我！
如何增加運氣
有些人總讓人感覺運氣特別好，家庭工作生活每一樣都稱心如意；有些人卻諸事不順，頭頭碰着黑。難道運氣差的人都只能認命？其實運氣不一定是命中注定，心理學也可解釋。想要有好的運氣，其實我們可以從習慣和心態去改善
做善事改變命運
「善有善報，惡有惡報，若然未報，時辰未到。」不要覺得吃虧，做善事正是短期看不到的運氣。多幫助別人，別人也會在你認為不幸的事後幫助你，大家互相扶持。
保持良好心境
一個人幸運不幸運，有很大的部份是在於人的心境。若經常憂慮，當不幸事情真的降臨，焦慮和抑鬱情緒會自然比其他人更大。所以我們應該保持正面態度，幸運時感恩，不幸時一笑置之，這樣在你心目中所定義的「幸運值」自然會提高。
嘗試走出舒適圈
經常接受新事物，勇敢面對自己未接觸過的事物。長時間下可讓你減少你的焦慮和緊張感，以輕鬆的態度去面對所有事。這樣的狀況可以為自己製造更多的機會，這樣就等於為自己提升運氣。
結語
人總是要經歷過更差，才知道甚麼叫好。可能你今日真的很倒霉、很難捱，但電視都有話：「凡事唔係絕對，希望在明天。」對於生活上撞的板，一笑置之就好。當然，你亦可以投稿，向我們吐苦水。雖然我們未必能幫你解決問題，但至少有人會因你的分享而找到樂趣。
返回 