【蠢是原罪？】同事講又唔明、鬧又駁咀！令人每朝想請假罪魁禍首

2018/09/20

好同事可以發展成好朋友，但衰同事嘅影響力更大，可以令你日日返工都充滿負能量、每晚都唔想天光、每朝都想Sick Leave、返到公司全日都黑口黑面反白眼。我之前寫過好多文關於應對唔同類型衰同事嘅方法，縮骨、屈人、偷懶……咩都有得搞，但有一種同事係令人充滿矛盾同掙扎，佢不斷挑戰你嘅忍耐力，但你又唔忍心鬧佢，有時唔小心發咗佢脾氣，會令你好內疚。呢種人就係——無惡意但非常蠢嘅同事。

曾幾何時，我都好有同情心

曾經遇過一位勤力同事叫Patricia，正式上班時間係九點，但Patricia每日八點就喺公司，因為佢話想九點前睇晒啲Email，同埋多啲時間準備九點半個例會。有時我唔覺意早咗返工，八點半左右食完早餐，諗住搵Patricia吹下水等九點先開工，佢都係一邊做嘢一邊傾，手同眼都唔會停。

明明佢係一個盡責嘅員工，而且已經係Manager，但每日都會畀老闆鬧，係毫不留情咁大聲呼喝：
「你究竟有無腦？」
「點解你成日都要將簡單事情複雜化？」

由於我同Patricia唔同Team，好少合作，每日見佢咁大個人要好似小學生咁企喺度畀人鬧，覺得佢好可憐，成日想叫佢啲老闆／Teammates唔好對佢咁殘忍。

別人10分鐘完成的事，蠢同事需要……

直到有一次，佢話要寄20本年報去北京，但Admin唔肯幫手，而咁啱我路過，Patricia就問我可唔可以幫佢手將20本年報搬落紙箱，我心諗，舉手之勞：「OK呀，我幫你手搬吖。個紙箱呢？」

點知咁就出事，正常人「搵紙箱、放年報入箱、封箱」，十分鐘內咩都搞掂啦。但Patricia竟然話要搵十個紙箱做比較，逐一用軟尺度下Size，要好準確咁搵出最適合放年報嘅箱，放好之後要確保無空位，即使有少少空位都要落街買報紙再搓成一舊舊塞落去，但又要控制個重量，因為太重會比Admin鬧……

我聽到一半終於明佢點解要咁早返公司，因為佢做嘢一定係好慢，結果我陪佢玩咗20分鐘，佢都仲未搵到「世上最適合放年報的紙皮箱」，仲要同我講一大堆人類聽唔明嘅邏輯，啊！我忍唔住向佢發炮了。

呢種同事純粹蠢，卻足夠害到你周身蟻

當我發脾氣鬧佢嘅時候，我好理解佢老闆點解日日都不留情面咁鬧佢，因為當你好忙，仲要對住一個完全零溝通能力嘅人真係好難有耐性，你講東佢答西，你問佢食咗飯未，佢就答你電視台套新劇好好睇……我相信佢老闆每日都好頭痛唔知可以畀咩佢做，無論件事深定淺，Patricia都有足夠能力為所有同事增添麻煩。

但當我冷靜返之後，就覺得自己好殘忍，呢個世界無人想自己蠢或者係同世界接唔到軌，Patricia身為Manager，為咗紙皮箱嘅Size而畀我鬧，我諗佢都好唔開心，結果我內疚咗一晚，第二日返工諗住向佢釋出善意，點知佢又再九唔搭八，佢啲Teammates聽住我哋對話都反晒白眼，相信佢哋每日都畀Patricia搞到徘徊於爆炸同內疚之間。

呢種同事純粹蠢，佢唔係有心害你，但單單因為蠢就足夠害到你周身蟻，對住佢哋真係嬲又晒氣，笑又笑唔出，只能無奈。

Copyright@知性女性