你老細派利是係咩風格？

大部分打工仔年初五都要開工大吉，放完假，開年第一日，點都有少少假日後症候群，呢個症最大徵狀就係「唔想做嘢。」不過，話明係放假後第一日，返到公司第一件事梗係唔係做嘢啦，最緊要嘅係同老細拎返封開工利是先。不過，人人都派利是，唔通個個老細都想派利是咩？拎唔拎到老細封利是就要睇你熟唔熟你老細嘅派利是風格喇。

1. 豪邁有錢人

老細豪唔豪，係入職頭一星期必修課題。有啲老細得閒冇嘢做就請食飯，去完旅行大大聲請大家食手信，以佢豪爽嘅風格，佢封利是一定非要不可。要拎咁豪爽嘅老細封利是一啲都唔難，不過最緊要係唔好喺佢出現嘅時候要唔小心離開咗現場。過年佢一出現，「恭喜發財」、「心想事成」、「老細你今日好靚仔/女」之聲此起彼落，只要呢個時候混入人群，豪邁利是手到拿來過肥年。

2. 人人有份，永遠得10蚊
有種老細好識做，每年開年第一日返到公司都會自動自覺派開工利是畀同事，而且仲要係人人有份永不落空。佢會親自走去大家個位逐個派，你唔喺位都會放低一封喺你枱面。呢筆錢佢都預咗洗，你嘅賀年說話都可以慳返。 不過當你打開封利是，入面無論世事變改都只會得10蚊。呢個時候你要同自己講，新年都係利利事事攞個意頭啫，算啦，放過佢啦。

3. 聲控式派利是
平時一朝早返工見到老細要講早晨，過完年返工要加多句祝賀說話是常識吧。有種老細比較傳統，要聽到祝賀說話先會派利是畀你。講幾句祝賀語就有利是，講多幾句佢聽又有乜所謂！甚至有啲大老細太多人同佢講恭喜，因為唔記得邊個恭喜過佢，分分鐘你轉頭喺走廊同佢狹路相逢，講多句恭喜發財又唔覺意可以拎多封。不過，如果佢認得你就…

4. 隱形斗蓬出動

由出門口返工一刻開始，呢位老細就會催眠自己已經披上隱形斗篷，不斷同自己講「你見我唔到！你見我唔到！」 唔知點解佢地過完年特別忙，有房嘅返到公司就全日坐喺間房入面，冇房嘅坐喺個位度足不出位。就算你主動走埋去同佢打招呼講恭喜發財，佢都好似唔記得咗今日係新年。咁嘅情況，我地都係唔好打攪佢喇。

5. 去避年，避到盡

比起穿隱形斗篷返工嘅老細，呢種老細就聰明得多。正所謂「去避年，避到盡」，每年由初一至十五你老細永遠都唔會喺公司。唔好以為佢係去旅行買手信畀你，佢可能其實只係坐喺屋企睇賀年廣告。喺呢個銀河系，冇乜幾個人拎過佢傳說中嗰封利是，除非你住喺佢附近撞到佢同呀媽飲茶啦。過咗十五佢自然會蒲頭，今年十五係星期五，你預佢放埋六、日，3月5號返工啦。

Copyright@cpjob