做「夾心階層」甚艱難…

唔好以為升咗職就唔使撈，尤其做咗夾心階層之後，夾喺老細同下屬中間，望落好正，但處理得唔好，隨時兩面不是人。

無錯，夾心階層根本唔係人。

有見呢個現象愈來愈普遍，外國職場專家分享咗做夾心做到好難頂嘅警號，如果有你份，就要小心啦。

1. 夾心好易燥底

以前做小薯仔，只係受上司氣。做咗人地上司，預咗受老闆氣外，遇著班唔聽教嘅後生仔，比以前仲要激心。一個人受兩度氣，唔燥有鬼！

2. 夾到你極度健忘

做人下屬，跟足指示做就得。做咗管理層，又要扮工，又要管人，一有事仲即刻被「照肺」。貴人事忙到咁，腦容量容易超出負荷，記憶變差，未老先衰。

3. 夾錯晒乜都例遲

同老闆報告吓情況，同個客交待吓進度，傾幾耐時間好難講。遲去開會，縱使交待咗原因，人地只係當你大牌，唔好話體諒，有骨嗰句「點都要等埋你啦」都講埋，夾到入心入肺。

4. 夾心長期有病

老闆日日追數，下屬又唔生性，夾係中間嗰吓壓力，真係不足為外人道。身心受唔住，輕則爆吓壓力瘡、頭痛感冒、甚至生蛇，重則分分鐘要睇精神料。如果你都feel到自己有被夾跡象，快快求救啦﹗

5. 成日覺好攰

星期一做到星期七，做完自己個份，仲要幫啲細執手尾，放假係咩嚟？慘過做騾仔。「夾心階層」咩嚟，食得㗎？真係食得，但係畀人食，畀殘酷嘅工作，食晒啲夢想。

來源：FC