新聞內容 
6招令同事瞬間對你有好感
- 2017-03-23
想順利扮工，比起追求天時地利，搞掂「人和」更實際。扮工室入面，唔想自己啲嬲嬲上到個鼻度，不如跟外國職場專欄學吓「同事瞬間對你有好感」6招。
就算做唔到人見人愛兼溝死仔／女，至少可以避免人見人「插」，紅都面晒。
1. 多模仿對方嘅舉動
好好應用「變色龍效應」（Chameleon Effect），傾偈嗰陣，嘗試多啲模仿對方嘅表情同舉動，令對方增加一種熟悉感，自然有好感。
2. 多在對方身邊打轉
有研究指，當一個人喺另一個人身邊出現嘅次數增加，即使彼此無乜實際互動，都可提升自己於對方心目中嘅好感度，呢種心理學現象叫「重複曝光效應」（Mere-exposure Effect）。
3. 多稱讚少鬧人
平時你把口點講人，聽者無意間會將你點形容某人嘅特質，「轉移」落你身上，呢種現象叫「自發性特質推論」（Spontaneous Trait inferences）。即係話，若你成日讚人好人，聽者覺得你都係好人；但話人呢樣嗰樣衰，聽者會覺得你骨子裏都係呢類衰人
4. 正能量帶來快樂
外國有大學研究指出，情緒都會「傳染」嘅。所以，時刻帶住正能量見同事，對方都會覺得開心啲，無咁鬱悶，就好易向你投懷送抱（打開個心扉）。
5. 偶爾出醜
善用｢出醜效應｣（Pratfall Effect），平時做事再精明，偶爾犯下一啲無心之失，反而令人覺得你都係凡人一個，並唔係高不可攀，成功拉近彼此關係。
6. 拍背脊碰手臂
同事工作有阻濟，拍拍對方嘅背脊，或者碰碰佢手臂，原來可以令人對你親切啲。不過，有身體接觸都係謹慎啲好，特別係對異性同事，小心鼓勵變成性騷擾…
Copyright@扮工男女
返回 