新聞內容 
《為五斗米折腰》職場最委屈分享︱10月22號哈囉好工週刊火熱登場
- 2018-10-22
- https://mp.weixin.qq.com/s/r9xTyAAO-1BKu6W6l2CeiQ
為五斗米折腰_職場最委屈分享
導讀：畢業後投身社會，學的不再是書本上的知識，而是做人處世的道理。每一位初來報到的「小薯仔」，總會滿腔熱誠地想要為社會帶來改變與希望。但現實總會讓人低頭，隨著時間的流逝，現實的殘酷都一步步教著人們為五斗米折腰。今期《哈囉好工週刊》會和大家分享打工仔為了「搵食」而受過的委屈。
為五斗米折腰
May豬
性別：女性
行業：餐飲
年齡：18 – 24歲
職位：基層職員
我喺台灣讀書，今個暑假我留咗喺嗰邊其中一間酒樓度做暑期工。咁酒樓老細對我哋唔錯，但係入邊啲阿姨就好難相處，成日話我哋呢班後生仔搶咗佢哋嘅飯碗。咁我費事得罪佢哋。當我知道佢哋係咁，第二日已經接咗全間酒樓最唔受歡迎嘅工作嚟做。但啲阿姨都仲係眼紅，係咁搵我麻煩，辭職前最後一日返工，仲食咗一半我寄返去澳門嘅台灣手信……
如果(不是)為了五斗米折腰，我⋯⋯
一定唔會忍受嗰班阿姨，無奈自己喺呢邊要用錢，只可以忍。
達寧
性別：女性
行業：教育
年齡：25 – 34歲
職位：基層職員
以前做補習社姐姐嗰時，有一次屋企出咗啲事，我打電話同老細講會遲到10分鐘，而老細當時都話冇問題。但係當我一返到補習社老細就當住其他人面前捉住我嚟鬧，問我點解遲咁多，我就同佢講我打咗電話同你講我會遲少少，但佢都唔理，足足鬧咗我半個鐘。
如果(不是)為了五斗米折腰，我⋯⋯
絕對會同佢當面理論！唔係自己讀緊書冇錢，真係唔會忍呢啲老細，講一套做一套！
老海鮮
性別：男性
行業：餐飲
年齡：35 – 44歲
職位：基層職員
做餐飲主要就係跟足客人嘅要求。有次個客人點咗個甜品，咁我哋本身個甜品會加上朱古力醬同埋曲奇，但係個客人冇要求咗話咩都唔使加。咁我負責傳菜嘅，我見到張單冇寫明咩都唔加，咁就照單出啦。點知個客人發惡，對住我動手動腳，經理知道咗之後仲要行埋過嚟話我。最後我畀咗張單佢睇，我經理先下咗道氣。嗰一刻我開始懷疑人生……
如果(不是)為了五斗米折腰，我⋯⋯
實叫嗰客自己諗返自己講過啲乜，自己唔記得仲要怪人！不過鬼叫我窮！死忍！
孖勁人
性別：男性
年齡：35 – 44歲
行業：資訊科技
職位：基層職員
我入咗嚟一年幾，基本上每日都唔會準時走。原因就係老細係咁畀嘢我做，啲嘢根本就做唔晒，又唔肯請人。咁都算啦！佢最衰就係成日催我幾時交文件，仲話我今朝畀咗你，你晏晝應該要做完。我心諗，如果剩係得呢份嘢要做我實做得晒，同埋樣樣講到咁簡單，好似幾分鐘就搞掂咁，不如你自己翻做啦。
如果(不是)為了五斗米折腰，我⋯⋯
絕對直接裸遲！因為籌備結婚生仔要好多錢，唔係要為咗頭家真係直接走人。
利賓納撈飯
性別：男性
行業：酒店營運
年齡：25 – 34歲
職位：基層職員
自己本身屋企冇錢，學歷又唔好。咁出到嚟做嘢，我以為只要好努力咁做好每一件工作，雖然辛苦啲，但都可以好好面對。但係入到去前公司，同事一入到嚟就用歧視目光望住我。有一次我做錯嘢，冇一個同事幫我冇所謂，但係點解要係我背後講我壞話，甚至人身攻擊。老闆雖然冇炒我，但係內心真係覺得好委屈。
如果(不是)為了五斗米折腰，我⋯⋯
會直接走人。雖然老闆話畀機會我學習，但係日日都要面對住呢啲同事真係定唔順。
瓔珞孿生妹妹
性別：女性
行業：娛樂博彩
年齡：18 – 24 歲
職位：基層職員
明明大家係同一個職位，但係因為我係新人就要我做，咁都唔緊要啦，新人係要捱吓嘅。但係直到而家我都已經做咗一年，我都仲係做緊兩個人份量嘅嘢，隔離位同事仲有時間瞓晏晝覺。上個星期我終於頂唔順，同老細呻呢種唔公平嘅待遇，點知老細仲以畀我學嘢為理由，鬧我唔上進，仲送咗封警告信畀我。
如果(不是)為了五斗米折腰，我⋯⋯
一定會直接同老細據理力爭。可惜自己喺社會經驗唔多，儲蓄都唔多，如果有多啲積蓄，最少我會大膽講出真相。
傻的嗎
性別：男性
行業：非政府組織
年齡：18 – 24歲
職位：基層職員
之前喺獸醫診所做助理，老細叫我試一個星期睇吓適唔適合自己，適合就繼續做。但係第一日開工已經忙到完全冇時間食飯。咁都算啦，其實都預咗。但係第二日佢竟然同我講如果喺度做唔夠七日，公司係唔可以出糧畀我。但其實試咗兩日已經覺得係極限，但係為咗份糧，最後我都努力頂埋嗰個星期。
如果(不是)為了五斗米折腰，我⋯⋯
絕對唔會理老細直接走人！因為真係太過份，明白新人咩都要做，但唔洗第一日返工就咁對人囉！
牛角包小姐
性別：女性
行業：批發及零售
年齡：35 – 44歲
職位：基層職員
我哋公司嘅宗旨係要以客為專。有一日我身體唔舒服，咁啱有個大客嚟咗，我嗰時點緊貨，冇即時見到佢。咁佢就走埋嚟問我，問呢衫有冇其他色，我未話幫佢睇吓，但係佢就以我笑容唔夠燦爛就投訴我，主管出到嚟知道件事後，就算佢明白我，但都只可以喺個客面前鬧我，以免得失大客。
如果(不是)為了五斗米折腰，我⋯⋯
我實會當面敬佢幾句。但因為自己冇乜學歷，好難轉行，只可以死頂，而且服務業遇到奇怪客人都唔係咩新鮮事
諗吓先
性別：女性
行業：娛樂博彩
年齡：25 – 34歲
職位：基層職員
之前做實習返工嗰陣，我係負責入資料。有一次有份資料入錯，上頭就打電話嚟問我點解入錯資料，但係我對呢筆資料完全冇印象，所以我同佢講唔係我入。點知佢竟然未確認就鬧我話一定係我入，因為另一個同事做咗好耐一定唔會錯。因為我嗰陣唔係100%肯定，亦唔敢駁嘴，所以嗰陣只可以認錯，收線之後我睇翻個日期先知原來嗰日我請咗病假。
如果(不是)為了五斗米折腰，我⋯⋯
絕對會同老細講返清楚！唔係為咗分數點都會幫自己講兩句。
露絲瑪莉
性別：女性
職位：基層職員
年齡：25 – 34 歲
行業：廣告/傳媒
平時我喺公司，大家都叫我做開心果，話我同大家都傾得埋。而且我覺得我已經好識做人，去旅行都會買好多手信比佢哋。但有一次我哋條Team出咗錯，其實責任大家都有。老闆怪罪落嚟問點解會咁嗰陣，佢哋全部都話係我錯，最後老闆勸我離職。因為屋企人年紀都大，唔可以亂咁走，最後我求咗老細好耐先畀我繼續留喺度。
如果(不是)為了五斗米折腰，我⋯⋯
一定攞晒啲證據同大家攬炒！平時大家關係都好好，但係大難臨頭各自飛，全部責任放落我度，我就點都唔會忍。
火龍
性別：男性
行業：行政/辦公室助理
年齡：18 – 24歲
職位：基層職員
有一次個經理做錯野，但就係要我呢個新人去揹鑊。明明件事係我入職前出錯嘅，就係因為老闆去咗旅行，經理就利用呢個機會亂作嘢。老闆返嚟之後，唔知經理行入去同佢講咗同加咗啲乜嘢，過咗兩日我就收到一封警告信。
如果(不是)為了五斗米折腰，我⋯⋯
絕對會直接發電郵同老細講，唔會麻木忍受。其實最緊要睇你份人工值唔值得你去受呢份委屈，如果受唔到就辭啦
出皮蛋
性別：男性
行業：建築及工程
年齡：25 – 34 歲
職位：基層職員
我入嚟呢間公司嗰陣，我接手嘅同事已經離咗職。我估佢同老細應該係不歡而散嘅，因為睇返佢最後嗰兩個月啲文件，係有心搞到亂晒。搞到我接咗手之後，好容易會有錯同埋做得好慢，佢寫低嗰啲SOP唔係錯嘅就係寫漏嘢，搞到我一入嚟就係咁畀老細鬧。
如果(不是)為了五斗米折腰，我⋯⋯
唔會理老細，直接彈畀佢睇，睇吓佢講乜。好彩有同事好心同老細講，老細都主動同我道歉，如果唔係自己都唔知仲要忍幾耐。
【故事】(不)為五斗米折腰的由來
陶淵明是東晉後期的大詩人、文學家。東晉末期，朝政日益腐敗，官場黑暗，陶淵明生性淡泊，家境貧困、入不敷出的情況下仍然堅持讀書作詩。他關心百姓疾苦，懷著「大濟蒼生」的願望，出任江州祭酒，由於看不慣官場上的那一套惡劣作風，不久就辭職回家了，隨後州裏又來召他作主簿，他也辭謝了。
後來，他陸續做過一些官職，但由於淡泊功名，為官清正，不願與腐敗官場同流合污，而過著時隱時仕的生活。陶淵明最後一次做官，是義熙元年(405年)。那一年，已過「不惑之年」(四十一歲)的陶淵明在朋友的勸說下，再次出任彭澤縣令。到任八十一天，碰到潯陽郡派遣督郵來檢查公務，潯陽郡的督郵劉雲，以凶狠貪婪聞名遠近，每年兩次以巡視為名向轄縣索要賄賂，每次都是滿載而歸，否則栽贓陷害。縣吏說：「當束帶迎之。」就是應當穿戴整齊、備好禮品、恭恭敬敬地去迎接督郵。陶淵明嘆道：「我豈能為五斗米向鄉里小兒折腰。」意思是我怎能為了縣令的五斗薪俸，就低聲下氣去向這些小人賄賂獻殷勤。說完，掛冠而去，辭職歸鄉。此後，他一面讀書為文，一面躬耕隴畝。
「(不)為五斗米折腰」比喻為人清高，有骨氣，不為利祿所動。這個詞主要是說別人有骨氣，不趨炎附勢的性格。
結語
無論現實如何使人低頭，只要我們問心無愧、盡力就好。世事變幻無常，重要的是腳踏實地、堅持做人原則。因此，各位打工仔，受委屈時不用氣餒，讓我們為自己而自豪吧！因為我們正為我們的愛人，澳門的繁榮而奮鬥。
返回 