難聽過粗口！辣慶金句

一個打工仔，一日要畀人辣慶幾多次？由你朝早搭地鐵嗰刻，不斷聽到有人叫你「請行去月台較少人位置」，喂大佬，請問邊個位係少人？係咪出口條樓梯呀？你搵畀我睇？好啦，呢啲只係頭盤，真係激氣嘅係由你踏入扮工室開始。

出嚟做嘢後發現，粗口唔可怕，因為呢個世界好多說話都難聽過粗口。

1) 威水史當定律
好多地方都有「老屎忽」，佢哋好鍾意將當年奮鬥史同你依家嘅處境比較，「我冇你哋讀咁多書，我16歲出嚟打工，跟住老細開足20個鐘頭工，跟佢返廠傾生意仲幾日幾夜唔瞓 ( 繼續吹…下刪三千字 ) 你哋啲後生諗乜？」點比較唔係重點，最重要係結論得出「你哋班後生讀咁多書都唔捱得，我上到位係我當年夠識諗」。

如果你同老闆反映唔夠人，佢又會重提當年做一間細公司，一個打十個嘅情況，將件事無限風光化，「我當年都係咁喇」。係呀，你當年朋友結婚唔使做1200蚊人情，你當年啲樓無咁貴，你當年無咁多老闆喺度嘈嘈閉。

2) 鬼同你OT
老闆係唔需要戴手錶，因為佢哋無時間觀念，成日6點後突然要你「幫我改少少嘢」，真係好少？好笑就真！其實6點放工呢件事係你知我知……

甚至有老闆會指明「6點咁早走？留多陣睇吓有乜要幫手」。

3) 訓導主任上身
十個老闆，九個鐘意無啦啦醒起要check吓你，突然訓導主任上身，突擊檢查。試過無啦啦畀老闆問，「你好得閒？」( 當你心諗，你畀我做嘅工作已經完成 ) 佢就會話：「公司咁大，你搵唔到嘢做呀？」如果我識分配好哂公司嘅工作去做，就唔使請你喇。

有朋友試過畀老闆要求，每日放工填一份表，記錄今日做過乜。其實要花時間做份表，不如多啲時間做嘢。

4) 打風照召你回朝
打風係扮工男女除咗中六合彩同加人工之外，最期待嘅事。不過唔係人人都「受惠」，明明天文台下午4點預告未來數小時會掛8號，但係老闆嘅邏輯就係，4點後未來數小時可能係7點，即使你已外出做嘢，佢都會要求你返公司，原因係「7點先掛，唔影響你喇。」

5) 「你又請假？」
呢一個，唔需要解釋。

當你放咗工之後，唔好以為地獄結束。如果你想去食飯，都要受氣，次次要排隊，當你拎咗張飛之後，你問仲要等幾耐，佢會眼尾都唔望你，淨係望住部對講機，等兩秒之後話：「答你唔到喎」。

我真係好嬲，不過我學到嘢！「答你唔到喎」呢句原來好萬用。

「你哋啲後生諗乜？」
答你唔到喎。

「你好得閒？」
答你唔到喎。

「點解6點咁早走？」
答你唔到喎。

「點解你又請假？」
答你唔到喎。

不過呢句說話唔係人人講得，你只係有權聽，返工受氣放工受氣 so sad.

「請問月台邊個位係少人？」
答你唔到喎。

Copyright@職場男女