邊做嘢邊食飯好易肥

最近網上流傳一篇「胖是工傷：越努力工作越容易發胖！」嘅文章，講到英國布里斯托大學（University of Bristol）有研究發現，邊用電腦做嘢邊食飯，好容易分心，仲會因為咁影響記憶力，令你食多咗零食，搞到肥胖收場。

呢個研究仲間接反映依家打工仔做嘢做到連飯都冇得食，唯有將飯擺喺電腦面前食，結果愈食愈肥⋯⋯所以先有人講笑形容：「肥胖係『工傷』。」

為咗研究專注力點樣影響食慾同攝取食物營養，英國布里斯托大學（University of Bristol）研究員Rose E. Oldham-Cooper將44位參與者分成2組，俾佢哋食包含9種食物營養嘅午餐，其中一組邊食邊玩電腦，另一組就專心食飯。飯後30分鐘，研究員就拎餅乾俾佢哋食，結果發現，玩電腦嘅人所食嘅餅乾，比專心食飯嘅人多出兩倍。

外國亦有研究指出，壓力大都會變肥係因為荷爾蒙會產生變化，大腦同肌肉需要醣類作為能量，所以令你食更加多嘅糖份，同累積更多脂肪。

Copyright@扮工男女