辦公室爆笑記2_你今日笑咗未？︱6月25號哈囉好工週刊火熱登場

辦公室爆笑記2

導讀：笑係最好嘅良藥，有邊個唔鍾意開懷大笑呢！尤其喺職場上，開懷大笑可以舒緩壓力同緩和職場緊張嘅氣氛，營造一個更有趣、更輕鬆嘅工作環境。喺今期嘅《哈囉好工週刊》，我們帶嚟咗一啲打工仔分享嘅職場趣聞，來獎勵、慰勞下一直辛苦同盡心工作嘅大家。

辦公室爆笑記2

化名：PP

年齡：35－44歲

行業：娛樂博彩

職位：秘書助理

公司有位新同事，係靠主管關係入嚟嘅「空降部隊」，所以平時佢為人好囂張，自己嘅工作好鍾意叫其他同事幫佢做。由於其他同事唔敢得罪主管，所以只能夠忍氣吞聲。有一日，依個同事見到有個人遊手好閒，喺度睇報紙。佢就唔理「三七廿一」，比左沓文件嗰個同事，叫佢幫手影印。嗰個同事攞住沓文件，咩都冇講，就去左幫新同事影印。影印後，嗰個同事直接將沓文件比咗主管。事後，主管狂插新同事，因為佢居然叫經理去影印。據說，經理攞沓影印文件比主管嘅時候，塊面仲黑過包公。從此，新同事就變得好乖，開口埋口對同事都「xx哥，xx姐」咁叫，特別係佢未見過嘅同事。

化名：Peter

年齡：25－34歲

行業：批發及零售

職位：服裝sales

公司要求返工要化淡妝，有一次有個兼職返工冇搽唇膏企咗喺門口，我離遠就望到佢面無血色。我就對個兼職做搽唇膏嘅動作，個兼職見到之後就開始咬唇。然後我就行過去同佢講：「如果你冇唇膏，我可以買支比你。」個兼職擰晒頭咁一邊咬唇一邊講：「唔洗啦，我咬咬嘴唇就會變紅（堅定臉）。」

化名：Wawa

年齡：25－34歲

行業：客戶服務

職位：行政／辦公室助理

有個同事喺廁所跌親，然後佢入經理房問經理有冇得賠工傷，跟住佢竟然喺經理面前由頭到尾咁演返出嚟，所有動作都表演得好生動，好似上演一場話劇咁。之後經理當場呆左⋯⋯可能，呢場話劇實在太精彩，經理差啲拍埋手鼓掌。

化名：在那遙遠的地方

年齡：25－34歲

行業：廣告

職位：設計師

有個女同事啱啱入職，老闆都未見過，有一次佢去完洗手間出返嚟，同我哋講，啱啱有個唔識嘅中年男人同佢打招呼，佢心諗明明唔識做咩笑淫淫同佢打招呼，呢層樓真係多閒雜人。啲同事就話，都係見你靚女先同你打招呼啫，跟住佢話，下次再係咁我當面就同佢講：「阿叔其實我唔識得你架！」佢話口未完，就有把男人聲喺後面響起：「你唔識我啫，但我識你喎，打個招呼都唔得？」而嗰個人，就係我哋公司嘅老闆⋯⋯之後個admin姐姐就介紹，呢個就係老闆啦，而呢個係新同事⋯⋯個新女同事當堂面都青埋，到放工嗰刻一句聲都冇出過⋯⋯

化名：黃先生

年齡：25－34歲

行業：資訊科技

職位：編程員

喺之前間公司，有位同事成日以為自己好叻，講野又好mean，得罪人多稱呼人少。有一日幾個同事趁佢未返工，倒晒啲垃圾落去佢張枱度。之後個位同事見到自己張枱就不停問係邊個做嘅，最後都無人理佢。

化名：米妮

年齡：25－34歲

行業：銷售

職位：Sales

平時我哋經理都唔多管我哋，所以比較自由，有一次A同事推薦咗「豬鼻貼三部曲」比B同事用，佢哋就直接喺鋪頭嘅茶水間敷「豬鼻貼」。好衰唔衰嗰日經理突然入嚟檢查茶水間，睇下有冇人偷偷玩手機，嗰兩位同事就比經理撞到正一正，經理望住佢地問：「做緊咩？」佢地好老實咁答：「用緊黑頭貼⋯⋯清緊黑頭⋯⋯」

化名：啊邊個1號

年齡：18－24歲

行業：會計

職位：會計文員

以前有位老細從來唔記得啲同事嘅名，就算同事入職咗成半年，日日同佢有交流，日日喺佢面前行過，老細都會唔記得。有次老細叫人嚟幫手，佢就大叫：「啊邊個邊個！」跟住出面全部同事瞬間好似軍訓集合一樣，全部企晒喺老細門口，等老細「欽點」。所以啲同事私下都自嘲自己個名叫「啊邊個1號」，「啊邊個2號」，「啊邊個3號」。

化名：Hebe

年齡：25－34歲

行業：批發及零售

職位：高級文員 有一次公司出外活動需要擺攤。一位新同事先去幫大家搵擺攤嘅位置。當大家都到場嘅時候，發現呢位同事喺度幫其他公司擺攤，而且仲好落力、好認真。大家唯有走過去同呢個新同事「相認」。呢位新同事，嚇到呆咗，原來新同事認錯咗公司logo，去咗幫其他公司「做義工」。

化名：豆腐大俠

年齡：25－34歲

行業：酒店營

職位：行李生

之前喺氹仔某五星級酒店做行李生，有一日見到有個客落的士，咁我就走埋去問佢需唔需要幫手嗰時，個客用一口流利普通話講：「又說澳門很小，但我坐的士從關閘過來，過了五條橋才到這裡，一點都不小啊。」我當下「kit」一聲笑咗出嚟，澳門真係堅大。

化名：MIEMIE

年齡：35－44歲

行業：地產

職位：經紀 有次返緊工，同事用微波爐叮蛋糕，叮左半分鐘都冇，個微波爐就出晒煙，過左一陣，OFFICE就佈滿燒焦味同濃煙，然後有位同事喺枱底攞起個逃生用嘅自救呼吸器，準備衝去走火通道。當時，有同事提醒，大家冷靜啲，唔係火燭。但呢個同事依然冇除個呼吸器落嚟，keep住戴左成個下午⋯⋯

化名：May

年齡：25－34歲

行業：醫療

職位：牙醫助理

曾經喺一日之內，唔小心令診療椅上嘅大燈撞到醫生個頭三次，好彩醫生睇症時超專注，好似世界只剩低佢同病人咁。事後我同佢道歉嗰陣，佢好似比燈撞到失憶咁，完全冇印象。

化名：大口妹

年齡：18－24歲

行業：會展

職位：活動策劃助理

有次叫個同事去會展幫手做吓公司推廣，需要逗留一日同訪者介紹公司業務。但結束咗之後，佢先發覺原來佢去錯咗攤位幫手，仲幫人哋公司做推廣，拉咗幾個客人。我問佢點解會認錯攤位，佢話以為人哋公司係我地新開嘅子公司⋯⋯

化名：Bay

年齡：25－34歲

行業：建築工程

職位：行政／辦公室助理

有一次我哋公司開招聘日，我係負責面試嘅，當時同一個應徵者好好傾，成個面試過程好愉悅同順利，而且個應徵者話對份工好有熱誠，好希望喺我哋公司度返工。我都好滿意呢個應徵者，我就同佢講：「歡迎加入XX公司，我哋公司決定請你。就喺呢個時候，個應徵者突然臉色一沉，佢問我：「呢層係咪XX樓XXX公司？」我話：「唔係⋯⋯呢層係X樓XX公司。然後個應徵者就喺咁同我講SORRY，原來佢行錯樓層面錯試。

化名：細細粒

年齡：18－24歲

行業：餐飲

職位：水吧

返工嗰陣，有個經理睇到一位靚女客人同佢男朋友嚟點餐，但佢想點嘅飲品已經賣晒。之後經理用咗差唔多嘅材料做咗一杯類似嘅飲品，專程攞去佢坐嘅嗰張枱，仲要喺人哋男朋友面前拋媚弄眼，兼且講咗啲曖昧嘅說話。之後佢男朋友面都黑晒咁睥住嗰個經理。第二日，嗰個經理即刻收到一封顧客匿名嘅投訴信。

化名：Rain

年齡：25－34歲

行業：教育

職位：秘書

有一次公司集體旅行，安排咗大巴出發。有一位報咗名嘅同事等咗好耐都未到，成車人就等佢一個。後來終於電話聯絡到嗰位同事，問佢去到邊，嗰位同事話「已經上咗車啦，咪坐緊喺車入面囉，但唔知點解路程方向唔係好啱咁。」原來，呢位同事⋯⋯上錯車，上咗人哋旅行團嘅車，而且去嘅地方根本唔同，冇人明白點解成車人都唔識，但嗰位同事都可以照上車，照坐低，照出發都冇發現自己坐錯車。

化名：Pansy

年齡：35－44歲

行業：資訊科

職位：主管

有次A同事接到個客人電話係搵鄭小姐嘅，然後嗰位同事喺OFFICE好大聲咁問邊個同事姓鄭，當時全場都好安靜，完全冇人應佢，然後老細個秘書默默咁行過去A同事個位到，同佢講：「第一日返工咩⋯⋯全公司咪得你老細姓鄭囉⋯⋯」

化名：Bob

年齡：25－34歲

行業：娛樂博彩

職位：高級文員

司機有一晚要接上司返屋企，嗰日上司應酬到好晏。大概十點左右，司機見上司仲未出嚟就打電話問上司係唔係發生咗咩事，而上司就好奇怪咁問司機：「點解仲喺度等我？我唔係已經叫咗你走先咩？」當時司機一臉驚慌咁話唔知道，原來上司嗰句「唔洗接我啦」根本冇send出去⋯⋯

結語      

如果您覺得我哋嘅故事十分有趣，而您亦有啲有趣嘅故事想同我哋分享， 歡迎將您嘅故事發到 info@mss-recruitment.com。

查閱更多《哈囉好工週刊》內容：http://weekly.hello-jobs.com/