肺炎疫情下老闆如何大受打擊？打工仔點樣保住飯碗？

2020.3.16• 周一

導讀：自從2020年1月22號澳門有第一單「新型冠狀病毒」確診個案，疫情正式喺澳門爆發！今次疫情對澳門唔同層面都有無可避免嘅影響，而且係影響緊每一個澳門市民。多個關口限制入境，學校同教育機構、娛樂場、大大小小嘅企業都曾經暫停營業。每個人都盡最大嘅努力去預防疫情擴散。多得大家嘅配合，疫情好快就控制落嚟！另一方面，疫情亦為澳門嘅經濟帶嚟負面嘅影響，原本生意同利潤最多嘅旺季變成咗淡季，唔少公司都蝕咗好多，而打工仔同老闆就首當其衝咁受到直接嘅影響。今期《哈囉好工週刊》嘅主題係「後遺症 - 新冠肺炎來勢洶洶」，會有讀者分享今次嘅疫情對佢哋有咩影響，佢哋對疫情後嘅生活有咩期望呢？一齊睇吓啦！

打工仔留言板

化名：肺炎退散

行業：行政/辦公室助理

職位：基層職員

性別：女

年齡：25 - 34歲

今次疫情對你同你家人有咩影響？

今次新冠肺炎疫情，因爲公司要求清年假，宜家我已經將舊年儲落同今年嘅年假清曬。如果之後要請假就要請無薪。而對於我家人，佢哋年紀已經好大，但都要周圍去買消毒水，兒童口罩等防疫用品。

目前你公司嘅狀況係？

目前我公司依然正常營業，冇停工。

你公司計劃點樣渡過難關？

員工就輪著返工，冇輪到嘅員工就清年假，營業時間都縮短咗。

面對疫情，你抱著咩心情同有咩展望？

而家呢個狀況，其實我好擔心，唔知疫情幾時先可以結束。唔想再戴口罩，出入心驚膽跳。

就目前狀況，你有冇轉工嘅打算？

而家呢個狀況，完全唔敢諗轉工，因爲宜家澳門百業蕭條，行行都唔好做，就算轉咗第二間公司相信情況都會係一樣。

化名：孤兒仔

行業：旅遊服務

職位：基層職員

性別：男

年齡：18 - 24歲

今次疫情對你同你家人有咩影響？

疫情為我帶嚟左屋企嘅財政危機，我同呀媽都係做旅遊業嘅，依家旅遊業基本上係整體停業，乜生意都冇。兩個都停薪留職。諗住搵兼職做下，但係而家連兼職都搵唔到，冇公司要人，所以我冇晒收入。可以點……

目前你公司嘅狀況係？

目前公司依然係停工狀態，我已經有個半月停薪留職。

你公司計劃點樣渡過難關？

停業囉，全部員工停薪留職，都唔知停到幾時。

面對疫情，你抱著咩心情同有咩展望？

心情只可以係唔開心，我自己畢業冇幾耐，本身就冇咩積蓄。同埋平時都幾大洗，冇咩儲錢習慣，而家停薪留職簡直係攞我條命！而家要靠屋企人養，咁大個仔仲要問屋企人攞錢其實我都覺得好羞家。而家做咩工都得，希望可以快啲返工啫。

就目前狀況，你有冇轉工嘅打算？

我有轉工嘅打算，依家都搵緊工，但係未有回音。可能而家嘅公司大部份都係唔缺人，缺嘅係生意，唉。

（續）打工仔留言板

化名：大吉大利

行業：零售/批發

職位：基層職員

性別：男

年齡：25 - 34歲

今次疫情對你同你家人有咩影響？

今次疫情對我嚟講，簡直晴天霹靂！本來新年係旺季，諗住爆數過個肥年，點知個新年搞成咁，基本上冇人消費。呢兩個月都係食底薪，完全追唔到數，零佣金，人工直接打折；對於屋企人，其實都唔會得閒，日日係咁清潔，有幾日見啲人亂搶一通，怕樓下啲超市冇晒資源預備畀屋企啲老人家，焗住搶埋一份，唔係搞老人家係屋企提心吊膽，驚慌程度仲嚴重過之前打風！

目前你公司嘅狀況係？

新年都未過完就停業，最近3月先開始開返。

你公司計劃點樣渡過難關？

新年期間畀員工放有薪假。但過完年返嚟，公司開始扣年假。

面對疫情，你抱著咩心情同有咩展望？

我面對現在這種情況，我好擔憂，憂愁。因爲零售業重創，唔知道幾時先可以過完這個寒冬，而且少咗好多游客，而澳門人本土嘅消費力有限，個個都留家中，唔敢想象接下來嘅日子。希望下半隨著疫情退卻，可以重振零售業。

就目前狀況，你有冇轉工嘅打算？

就目前嘅狀況，我有轉工嘅打算，因爲我對依個行業嘅前景感到擔憂，覺得短時間内難以回復，個個月得底薪過日子撐唔落去。

化名：悲哀傷風素

行業：娛樂博彩

職位：中層管理者

性別：女

年齡：35 - 44歲

今次疫情對你同你家人有咩影響？

賭場雖然閂咗，但其實有啲部門依舊要返工，每日商討同應對疫情對企業同員工嘅影響同埋要推出相關措施等，日日係屋企做嘢忙到鬼咁。而且我個小朋友又唔使返學，我日日除咗處理公事，我仲要睇住我個小朋友，照顧起居飲食。

目前你公司嘅狀況係？

之前根據政府嘅指引閂門，後來又營業返。

你公司計劃點樣渡過難關？

當時新年同停業期間，公司係安排home office。後來恢復營業後，公司鼓勵員工清年假，放一送一，或者選擇no pay。另外好多外包嘅項目嘅預算都cut哂，要自己員工做返。

面對疫情，你抱著咩心情同有咩展望？

隨遇而安吧，對未來都係有信心嘅。公司咁大，一定可以撐過依段時期。

就目前狀況，你有冇轉工嘅打算？

未有轉工打算，因為對自己嘅工作都幾滿意，而且做生不如做熟。

化名：中佬

行業：酒店營運

職位：基層職員

性別：男

年齡：35 - 44歲

今次疫情對你同你家人有咩影響？

今次疫情，真係搞到我準備抑鬱成病。公司暫時停業，我就日日屈喺屋企，無論睇任何媒體，日日就係睇住啲疫情新聞，望住個感染個案日日上升，邊個國家有新個案，邊度有人搶物資。自己有少少熱氣喉嚨痛，甚至打一個乞嗤都搞到成家人都驚。唯一慶幸係屋企本身有好多廁紙同公仔麵，基本上冇乜外出，而且自己都好怕去搶，睇到搶嘢啲畫面真係唔好受，真係好似世界末日咁⋯⋯

目前你公司嘅狀況係？

之前賭場閂門嘅時候，我哋公司都暫停營業。到最近先開返，不過依家就算開返，公司都有縮減人手，部份同事都未有安排返工。

你公司計劃點樣渡過難關？

公司之前暫停營業咗大概三個星期，依三個星期，公司都好好咁當有薪假，同員工同渡難關。宜家開返後，就要開始鼓勵員工清假同請無薪假。另外上頭落咗通告，要每個部門都要縮減預算。

面對疫情，你抱著咩心情同有咩展望？

睇住呢個情況，好擔心自己會冇咗份工，自己因為供緊樓，又有小朋友同老人家要養，每個月本身已經儲唔到錢，諗起自己如果一冇咗份工，我諗好快會負資產……

就目前狀況，你有冇轉工嘅打算？

當然冇啦，冇畀人炒已經偷笑，都唔會諗任何轉工嘅嘢。如果不幸畀公司炒咗，而家嘅時勢相信好難搵工。

老闆留言板

化名：眉姨

行業：廣告/傳媒

性別：女

年齡：35 - 44歲

今次疫情對你公司有咩影響？

冇生意，疫情對客戶公司嘅生意造成大影響，所以對廣告宣傳嘅預算就緊張咗，有部分客戶話自己做返唔outsource畀出面公司做。所以我公司無疑係少咗生意。而且為咗避免人員接觸，我公司已經開始online同員工同客戶開會。而且員工盡量home office。

作為老闆，公司實施咗啲咩措施嚟應對疫情？

自從疫情爆發後，公司就開始home office，所有員工冇咩必要唔好喺公司聚集。而且喺員工嘅同意下，實行咗by project 出糧，做幾多，出幾多糧。

公司面對呢個情況，你抱著咩心情同有咩展望？

自己做老闆一定擔心，唔知道啲生意額可以幾時恢復正常。不過我對未來抱有希望，覺得下半年一定好，因爲應該好多公司需要廣告宣傳做推廣。

有冇攞政府資助？

我冇攞政府資助，雖然生意額少咗，但怕麻煩冇申請到，畢竟公司又唔係到生死存亡嘅時候。

化名：根叔

行業：監控/保安

性別：男

年齡：55 - 64歲

今次疫情對你公司有咩影響？

疫情對我公司好大影響，好多客戶公司一係直接停業，好啲就縮短營業時間，所以客戶公司對我哋嘅保安服務需求減少，導致生意額急降。但公司仲要養著啲員工，寫字樓租金等等開支，公司入不敷支。

作為老闆，公司實施咗啲咩措施嚟應對疫情？

自從疫情發生以後，公司安排員工輪著放有薪年假，放哂冇年假嘅員工，就放無薪假。

公司面對呢個情況，你抱著咩心情同有咩展望？

好無助，而家係成個澳門大環境面對嘅問題，唔知幾時先可以返去以前正常嘅生活，除低口罩見人。雖然疫情肯定會過去，但唔知道幾時，唔知道公司可唔可以撐到去嗰日。

有冇攞政府資助？

我有攞政府資助，申請貸款，暫時用嚟撐住日常開支、人工同外勞嘅房租先。

化名：傑叔

行業：零售/批發

性別：男

年齡：55 - 64歲

今次疫情對你公司有咩影響？

我喺遊客區做藥房生意，平時算好生意，但肺炎爆發後，新年嗰陣人影都冇隻，好靜，除咗有人入嚟問有冇消毒酒精、探熱器、口罩等防疫用品之外，一日得幾單生意。初四後，一開始係縮短營業時間，後來我甚至閂舖，暫時停業一個月。到三月一先開返。但開返之後，一樣冇生意。

作為老闆，公司實施咗啲咩措施嚟應對疫情？

肺炎發生之後，公司就安排員工放年假，可以畀員工預支年假。有幾個員工唔想清年假嘅話，同佢哋商量放無薪假。

公司面對呢個情況，你抱著咩心情同有咩展望？

我心情比較擔憂，因爲唔知道幾時大陸嘅疫情可以完結，幾時先可以開返大陸自由行。希望大陸嘅疫情可以控制，可以恢復遊客人數。

有冇攞政府資助？

我冇攞政府資助，自己年紀大，唔識搞。而且如果向政府貸款，都係要還，唔想負債，冇咩信心可以喺限期内還到。

化名：趙太

行業：餐飲

性別：女

年齡：45 - 54歲

今次疫情對你公司有咩影響？

疫情對公司影響嚴重，公司已經結業。本來我公司就係小本經營，好難得先有兩間店，但個病一嚟到，冇客人會入嚟食嘢，外賣單又唔夠多。一開始縮短營業時間，但發覺生意額連燈油火蠟、租金、人工都唔夠畀。無奈之下，兩間餐廳都結業。

作為老闆，公司實施咗啲咩措施嚟應對疫情？

一開始公司縮短營業時間，減少員工更數，後來頂唔順，無奈之下開始裁員，最後都做唔掂，唯有結業。

公司面對呢個情況，你抱著咩心情同有咩展望？

當然係心痛，畢竟自己辛苦咗咁耐先開咗兩間餐廳，估唔多突如其來嘅肺炎，令我之前嘅心血都冇哂。而家冇咩特別嘅展望，可能等疫情過去後，自己再東山再來開新嘅餐廳。

有冇攞政府資助？

我冇攞政府資助，因爲我怕我借貸後，疫情仲未緩解，一直冇生意，借咗都冇能力還，所以乾脆結業，儘早止血，費事有更多嘅虧損。

（續）老闆留言板

化名：阿劉

行業：建築及工程

性別：男

年齡：35 - 44歲

今次疫情對你公司有咩影響？

疫情爆發後，好多項目都停咗落嚟。有啲項目要去客屋企，有啲項目喺出面，就算自己敢去啲細嘅都唔敢去，邊個都承擔唔起風險。基本上有成個月冇開工，之後又收到好多客話推遲工程，唔做住。因爲客戶都受疫情影響，生意唔好，要cut預算。雖然公司仲有少少生意，但生意大不如前。再加上而家要租房畀公司啲勞工，支出仲多咗，大陸廠房供應商都搞咗好耐先開返啲，大陸有好多地方封路，反正樣樣都貴咗啦！

作為老闆，公司實施咗啲咩措施嚟應對疫情？

我哋公司安排咗部分冇安排工作嘅本地僱員同勞工放有薪年假。因爲目前生意唔多，但人手又過剩，自己又唔捨得炒咗佢哋，佢哋有家庭，而且個個都係好員工。

公司面對呢個情況，你抱著咩心情同有咩展望？

當然係憂慮。唔知道幾時先可以經濟復蘇，因爲經濟差，會令到我啲客減少預算，我就賺少咗。不過對下半年有信心嘅，我覺得澳門政府會進步一復蘇經濟嘅，深信澳門政府做到嘢。

有冇攞政府資助？

我公司有攞政府資助。有得攞埂係攞，可以補貼營運開支。

心靈加油站

面對疫情影響，相信打工仔喺各方面都非常擔憂，負面情緒氾濫。其實呢啲負面情緒完全幫助唔到我哋解決現時問題，反而影響你嘅正確決定，惡性循環。希望你睇吓我哋以下嘅分享，認清自己需要做啲咩！打工仔加油！

1

了解真實同可靠嘅消息

相信疫情期間大家都了解到假消息有幾討厭，增加市民恐慌，亂搶物資，增加前線人員嘅工作量。唔好再相信同隨便轉發未經證實嘅消息，由自己做起！

2

學習同壓力和平共處

基於種種壓力，我哋嘅心理狀態都會隨之而改變。壓力伴隨着嘅緊張、煩躁、多疑、抑鬱令我哋感到痛苦同難受。我哋要慢慢學習吸收正面訊息，保持思想正面，減低壓力帶嚟嘅影響，學識同壓力共處！

3

投身於建設性嘅事情

疫情底下，畀自己嘅空閒時間越多，腦入邊嘅恐懼念頭就越多。做一啲有建設性嘅嘢，例如睇吓書，溫故知新一啲之前未解決嘅自身問題，可以幫自己保持思想正面，同時間增強自己嘅競爭力。

4

維持免疫力

有效抵抗病毒，除咗藥物之外，仲要靠我哋自身嘅免疫力。保持最好嘅精神狀態，穩定嘅情緒係非常關鍵！學習過後想休息，就搵啲自己鍾意睇嘅嘢，或者音樂去舒緩放鬆自己嘅心情。積極利用免費資源去鞏固自己的精神狀態！

5

激活身邊嘅人

當你保持到思想正面，希望你可以用你自身嘅力量感染身邊嘅人。我哋有家人、有朋友、有政府嘅支援，要記住疫情會散去，遇到身邊情緒太負面嘅人，不妨了解同幫助佢，一齊走出困境！

結語

正所謂「世事無常」，冇人可以預計到將來會唔會有更強嘅病毒或者其它突發情況。其實最重要係大家可以喺今次疫情中吸取寶貴經驗，做好預防措施同準備。今次「新型冠狀病毒」嘅經歷話畀我哋知，世界各國雖然劃分咗領土界線，但事實上我哋都係一個大家庭，係一體嘅。只有互相幫忙同照顧，我哋先可以同心協力咁衝破萬難。喺呢到祝咁多位身體健康、百毒不侵、一切順利，希望大家都可以盡快從經濟低潮走出嚟！

查閱更多《哈囉好工週刊》內容：http://weekly.hello-jobs.com/