無端端做咗「謠言主角」好委屈？面對謠言你可以咁樣做！

2020.4.27• 周一

導讀：只要有人嘅地方就會有流言蜚語，職場有好多唔同渠道去流傳一啲惡意或者係對於個人利益有好處嘅謠言，今期《哈囉好工週刊》會有讀者分享佢哋喺職場上遇到利用流言蜚語去傷害同事，而令人明白到「人言可畏」嘅故事，仲會探討看待謠言嘅正確態度，一齊睇吓啦~

看誰笑到最後

行業：專業人員

職位：基層職員

性別：女性

年齡：25－34歲

某一年春節，幾個護士值班嘅時候傾計。傾計嘅內容無非係八卦，估吓醫院邊位醫生最有可能花心出軌。言者無心，聽者有意。呢種八卦喺醫院裡面嘅傳播速度仲快過細菌，而且每個傳播者都鐘意喺原來版本上添油加醋，令劇情更加勁爆。最可怕嘅係，唔知幾時全都變咗做事實，仲要連年月日地點都講到有板有眼。一群好事之徒根據醫院排班表，推理出當日值班嘅一個男醫生係罪魁禍首。可憐嗰位男醫生，直到而家佢都唔知點解有啲同事對佢非常冷淡。

你會因某啲理由而去用流言蜚語傷害同事嗎？

唔會。雖然今次源頭都好冤枉，我都有份聽，其實同事佢哋冇心嘅，但係我相信改變故事嘅人就肯定係有意。其實我哋落班之後已經好攰，有時間陪下屋企人仲好啦。

遇到流言蜚語你會點樣處理？

雖然自己唔會做散佈流言蜚語嘅人，不過如果被人踩到上心口，我都唔會輕易就咁算數。錯誤嘅事一定要據理力爭，否則以後呢種人會得寸進尺，我唔會害人，但都唔願意做被人害嘅人！

六畜無害

行業：交通運輸

職位：基層職員

性別：男性

年齡：25－34歲

自從升咗職之後，先更加見識到流言蜚語嘅恐怖。大家都知道隔離部門嘅主管經常唔做嘢，但佢持住同老細熟，冇人夠膽得罪佢，橫行無忌。有次因為跨部門合作同佢嘈咗，自此之後佢就不斷用謠言中傷我部門同事，不斷作我哋部門啲人遲到啊，得罪客人啊，反正有少少位佢都會入手中傷我哋。咁我作為主管，我都頂得順嘅，但最唔妥就係佢傳謠言中傷埋我下屬。有個下屬供樓已經好大壓力，仲要日日畀佢疲勞轟炸，搞到頂唔順走埋。其實我都差唔多啦，但我信有因果報應嘅！我係覺得老細好慘啫，真心為公司做嘢嘅人走哂，留住啲專心搞事嘅人。

你會因某啲理由而去用流言蜚語傷害同事嗎？

唔會。我自己係啲好正直嘅人，我做唔出啲咁嘅事。你可以用你嘅智慧去做嘢，而唔係諗點去害人，而且總有一日會有報應！

遇到流言蜚語你會點樣處理？

以前會選擇唔出聲，而家一定會將所有嘢記錄好，有咩事將所有記錄畀晒公司睇。

受到謠言攻擊亦能強大

相信好多人都受過流言蜚語嘅攻擊或影響，而且當你認真對待呢啲謠言，期間會為自己添上唔少壓力。有效對抗謠言，最直接方法就係運用自己嘅情商和情緒避免情況惡化，希望你睇完以下慨分享可以有所改善：

調節你嘅情緒

好多人面對謠言嘅時候，反應都係憤怒、焦慮或者無奈，呢啲負面情緒好容易令你失去工作動力。退一步、深呼吸，先令自己冷靜落嚟，你先可以冷靜看待問題。

探索問題成因

冷靜落嚟之後，嘗試搵出問題嘅真相。究竟係咩原因導致事件發生。誠實面對自己，了解導致事情發生嘅所有原因。要緊記探討問題真實性係非常重要。

思考點樣回應

或者你真係冇做過謠言所提及嘅內容，但面對同事嘅質問嗰陣，避免講多錯多，先模擬一下對答內容，以免誤會擴大。

專注喺啱嘅事

好多謠言其實都經唔起時間嘅考驗，集中精神，避免鑽牛角尖喺無謂嘅事物上面。謠言相信一定可以喺工作日子中不攻自破，同事都會對你嘅效率同誠信度有所提升。

建立苦主聯盟

散播謠言嘅人，就係靠同事以訛傳訛，長期落嚟苦主就會越嚟越多。呢到唔係勸你反擊同事，而是聚集同你經歷相同嘅同事，建立潛在嘅聯盟，令散播謠言嘅人勢孤力薄，佢要繼續生事就會困難。

我路過咋
行業：教育

職位：基層職員

性別：女性

年齡：25－34歲

我除咗工作，副業仲有賣衫嘅，所以相對其他同事嚟講，我嘅衫會比較多。但其實我著嘅都唔係啲咩貴衫，仲要我係批發價，所以真係唔會好貴。而且睇我手袋都知啦，都唔係大牌子，有啲同事個手袋價錢，夠我入一堆衫。但無奈估唔到有同事用啲咁難聽嘅說話中傷我，話我「有價」同畀人包養緊。除咗抹煞我嘅人格，最重要係我嘅努力！你哋放工去玩，我就喺度入衫，經常要忙到八九點先食晚飯。你哋放假出去玩，我就喺外面曬太陽影相入貨。我嘅錢全部都喺血汗錢，佢哋嘅謠言搞到我要去睇心理醫生！

你會因某啲理由而去用流言蜚語傷害同事嗎？

唔會。畢竟自己曾經被傷害過，體驗過呢種難過嘅情緒，唔希望人哋都要經歷呢啲事。

遇到流言蜚語你會點樣處理？

好似今次咁，其實都係只可以忍，你越唔開心，傷害你嘅人就越開心。攻擊完你，你平常心處理嘅話，人哋攻擊你都冇癮。

我係大王

行業：資訊科技

職位：基層職員

性別：男性

年齡：25－34歲

有位前女同事，平時比較情緒化，對身邊事物都好敏感，基本上所有同事都離佢三尺，費時同佢有任何交流。點知後來嚟咗個新男同事，世界仔，一得閒就去同所有同事傾計。唔知佢係咪講啲乜嘢觸動到嗰位女同事，女同事就開始不斷搵機會中傷佢，喺度傳個男仔好濫、扮好人，有次仲要畀我見到女同事收埋咗兩盒 A4 紙然後傳係男同事偷，真係「有心」。其實大家都知道個男仔係咩人，就係一個好傻好天真嘅新仔。最後不出我哋其他人所料，個男仔聽得多呢啲謠言，雖然都知大家唔信，但係個心太唔好受，辭職走人。

你會因某啲理由而去用流言蜚語傷害同事嗎？

唔會，應該話冇原因令到我去傷害同事。

遇到流言蜚語你會點樣處理？

其實最好係搵幫手，先搵同事，唔掂檔搵上司。自己一個孤立無援好難解決。

只有我正常
行業：行政/辦公室助理

職位：基層職員

性別：女性

年齡：35－44歲

我以前舊公司明文規定唔可以搞職場戀愛，員工之間禁止拍拖。咁之前有一對男女同事，外表幾登對，男高大靚仔，女身材好又靚，佢哋仲要係同部門同 team。漸漸公司越嚟越多人傳佢哋拍拖，又話有人見到佢哋拍拖，出雙入對，又話見到佢哋一齊返工放工。傳傳下傳到去高層度，高層之後召見呢兩位同事「照肺」。不過聽講佢哋都否認「戀情」，只係大家同期同 team，公事上大家照應，只有公事接觸。但公司唔信，流言亦都冇減少，後嚟公司用其佢原因勸退咗佢哋。無奈我知佢哋真係唔算熟，女方本身係有男友，我向咗上級講係謠言，都係阻止唔到……

你會因某啲理由而去用流言蜚語傷害同事嗎？

唔會。唔做啲傷害其他人嘅事，咁做好冇品。

遇到流言蜚語你會點樣處理？

只能夠唔理佢，謠言止於智者。繼續做好自己，謠言唔係一時三刻內可以消除。

傷口上灑硫酸

行業：餐飲

職位：基層職員

性別：女性

年齡：18－24歲

同事造謠生事可以話每一個地方都會遇到，但係接受呢種，甚至鍾意呢種事發生嘅老闆真係唔多見。自己仲八卦過啲同事，得閒就向啲心腹問八卦，見到冇事就開始傳啲謠言出嚟，搞到同事關係變差。有次開會佢同同事 A 話同事 B 中傷佢，同事 B 面前就話返同事 A。然而佢唔知道同事 A 同 B 其實好熟，一早踢爆咗佢嘅詭計。都唔知搞事為乜，可能想同事專心做嘢掛。我都覺得奇怪，公司人工唔錯，工作唔辛苦，啲同事都走得咁快。老實講如果上邊帶頭做謠言生事，間公司遲早玩完。希望老闆收手啦，大家做嘢都係為經驗為錢，用啲時間諗吓我哋可以點樣幫公司賺錢好過。

你會因某啲理由而去用流言蜚語傷害同事嗎？

唔會，嘥時間！咁得閒早啲返去休息下好過！

遇到流言蜚語你會點樣處理？

我只諗到同公司反映，不過如果公司上頭都係唔好嘅，早走早着。

相由心生
行業：廣告/傳媒

職位：基層職員

性別：女性

年齡：35－44歲

喺工資保密制度嘅公司入邊，曾經有女同事偶然得知另一位同事嘅高薪資，從而心生嫉妒。於是佢就四處散播關於呢位高薪同事工作處事狂妄自大，生活作風混亂嘅謠言。而且用各種手段拉攏身邊其他人一齊孤立排擠嗰位同事，最終導致嗰位同事工作上諸多阻礙，迫住跳槽離職。而嗰位同事亦從此冇同舊公司嘅同事有任何嘅聯絡。不得不佩服女同事嘅所作所為，人哋從來都冇傷害過你，而你就要置人於死地⋯⋯

你會因某啲理由而去用流言蜚語傷害同事嗎？

唔會啦，唔關我事嘅話，我一般都唔參與，工作能力最重要，做好自己需要做嘅，避開三姑六婆就好啦，有句話叫「出淤污泥而不染」啊嘛。

遇到流言蜚語你會點樣處理？

據理力爭，強勢反擊，流言都係暗處散播嘅，最怕見光。身邊都有好多善良嘅人，我相信抱善意嘅人一定多過造謠搞事嘅人。邪不能勝正啦，我唔可以畀支持我嘅人失望。

風吹兩邊倒

行業：酒店營運

職位：基層職員

性別：男性

年齡：18－24歲

公司有個同事好黑人憎。咁我叫佢做 A 啦，原因係 A成日為咗自己嘅利益，不惜將是非當人情，喺老細面前講佢其他同事嘅壞話。人哋同事有做衰嘢就話啫，問題係，呢位同事無中生有，喺老細同其他主管面前亂講嘢。有一次，有一個同事遲咗返工，其實係去咗見客，見完客先返公司，可能 A 眼紅人哋多客，佢即刻走去同老細同主管反映話嗰位同事遲到，仲話佢多次遲到。老細又係衰嘅唔查清楚，好似畀同事 A 落咗降頭咁信哂佢。可憐嗰位被冤枉同督背脊嘅同事，收到人事部嘅警告信。收信嘅時候仲「黑人問號」，完全唔知道發生咩事。

你會因某啲理由而去用流言蜚語傷害同事嗎？

唔會！我道德底線話我知，亂講嘢傷害人係唔道德！理性競爭！

遇到流言蜚語你會點樣處理？

我會抗爭到底，唔會向流言蜚語低頭。唔屬實嘅流言蜚語，我一定會澄清，如果唔係，其他人就會信以爲真。

槍打出頭鳥
行業：行政/辦公室助理

職位：基層職員

性別：男性

年齡：25－34歲

又到公司内部評核嘅時候。公佈之前，有聽到 HR 聲氣話今次會升啊信哥，信哥份人好好，對我哋啲小薯仔好好。如果信哥有得升，我哋都開心，而且信哥一個人養住個女同長期病患嘅阿媽，我哋同事都覺得佢唔簡單，有得升職加薪就可以幫佢減輕壓力。點知，唔知道邊度嚟嘅傳聞，話信哥畀其他公司睇中，仲同人哋 HR 見咗面，簽埋約。我哋同信哥熟，就直接問信哥咩回事，原來從來冇其他公司聯絡信哥，更加冇簽約啦。信哥話自己行得正企得正，唔使理會啲傳聞。人算不如天算，最後信哥竟然冇被升職。HR 話老闆都聽到傳聞，所以難啲升信哥。唉，而家大家都喺度講，傳聞嘅威力真係恐怖，信哥因爲咁樣，冇得升職，好唔抵！

你會因某啲理由而去用流言蜚語傷害同事嗎？

我唔會因為自己利益去用流言蜚語去傷害同事。唔想見到有第二個信哥出現。好慘，好唔抵。

遇到流言蜚語你會點樣處理？

首先第一時間澄清，然後匯報公司有咁嘅傳言，等公司唔好信。如果唔係，真係會因爲傳言害到連份工都冇埋。

單身廿二年

行業：批發及零售

職位：基層職員

性別：女性

年齡：25－34歲

我以前公司有個女同事，樣靚，笑容同把聲都好甜，而且佢係我以前公司嘅 Top Sales。之前聽到好多同事偷偷話佢同啲客有特別關係，利用自己嘅外在優勢，去賺生意，女同事個個月爆數就係因爲「床單」換返嚟。雖然佢已經嘗試同大家否認，但公司入邊依然繼續流傳，冇停止過，搞到佢情緒好差，好低落。後來有幾次，我咁啱同女同事一齊孖更，發覺原來佢好勤力，好賣力 sell 客，冇客嘅時候，佢仲會自己去倉度執貨，檢查下使唔使補貨。同佢接觸幾更後，開始覺得其實佢嘅業績，真係靠實力，而且佢係個好乖嘅女仔。明明外貌係優點，但就畀啲流言蜚語抹殺咗佢一直以嚟嘅努力。都唔知佢係咪因為咁先冇得升職⋯⋯

你會因某啲理由而去用流言蜚語傷害同事嗎？

我後來有同佢傾計，佢話自己過得好唔開心，因爲同事傳嘅謠言，搞到佢好大壓力，仲搞到有情緒病。我知道之後，真係好登佢難過，雖然我冇傳開去，但係我怕變成下一個而冇去阻止，Sorry ⋯⋯真係覺得流言蜚語猛如虎，可以摧毀一個人，所以我肯定唔會做呢啲嘢。

遇到流言蜚語你會點樣處理？

遇到流言蜚語，要自强，呢啲嘢就係人多蝦人少，一定要挨過去。同埋要向公司反映，好嘅公司一定會處理散播流言蜚語嘅人。

結語

有冇覺得呢啲分享聽落好似好熟悉咁？言語可以變成正面或反面嘅工具，有啲人會為咗達到自己嘅利益而不擇手段咁利用呢啲「工具」。既然我哋好難知道呢啲謠言嘅真相，為咗避免喺職場上製造充滿流言蜚語嘅負面氣氛，我哋都唔應該太沉醉喺呢啲傳聞入面，所謂「謠言止於智者」，做到呢點就可以令職場嘅氛圍更專注喺有意義嘅事同工作上面。希望你可以喺今期嘅分享當中有所得著！