新官上任三把火︱7月9號哈囉好工週刊火熱登場

新官上任三把火

導讀：剛開始新工作或新職位的打工仔總會想把自己的最好一面表現給僱主看，告訴他們「你冇揀錯人」。因此，很多新晉的管理者便會嘗試改變舊有的管理模式，從而告訴下屬，自己比舊上司更好，帶出「革舊鼎新」的風氣。但是，打工仔往往求安穩，突如其來的變化可能會造成負面的影響，例如會使計劃無法順利執行、員工士氣低落、甚至集體辭職……難道真的是「新官上任三把火」？今期《哈囉好工週刊》會帶大家深切了解這個問題。

新官上任三把火

年齡: 25 – 34 歲

性別: 男性

行業: 博彩娛樂

職位: 人力資源助理

一個新嚟嘅HR一入職就來勢洶洶，對同事好嚴格，樣樣都捉到好正。而且老細都冇叫做嘅一啲流程，個HR自己加咗好多自己構思嘅想法，搞到底下嘅同事多左嘢做，工作效率大大降低。而個新流程好無聊，冇人知道個啲流程嘅好處喺邊度，只係喺度麻煩同事仲搞到下面嘅人好鬼忙。

影響：搞到同事嘅工作量大咗，因為無意義兼繁雜嘅流程，只會令到工作效率降低。

對打工仔嘅建議：只能默默承受，除非你唔想撈。

年齡: 25 – 34歲

性別: 女性

行業: 酒店營運

職位: 前台

新上司第一日返工，好明顯感覺到佢好嚴格，講野都提高八度，特別係點同事做野嗰時。仲好鍾意開會嘅時候鬧同事，明明好小事都要當眾俾佢照肺，氣場逼到人透唔到氣嘅感覺。

影響：影響同事同上司之間嘅關係，同事越來越唔想服從上司嘅指示。

對打工仔嘅建議：保持常態，因為大多數新上司只會威得一兩月。

年齡: 35 – 44歲

性別: 女性

行業: 酒店營運

職位: 市場推廣主任

部門有個新經理，佢啱啱上任嗰陣，為咗好好鎮壓下屬，佢安排好多工作比佢哋，個個聽到都覺得大難臨頭，根本就係冇可能完成嘅任務，到最後冇人可以如期完成佢比嗰啲任務，經理就開會將全部同事鬧左一餐，大家到最後都只能夠“硬食”。

影響：影響員工工作嘅積極性，確實個個同事都怕左呢個經理。

對打工仔嘅建議：邊個打工仔唔會遇到不可理喻嘅上司，接受現實，專注自己工作同業績最緊要。

年齡: 35 – 44歲

性別: 女性

行業: 教育

職位: 行政助理

新上司開始嗰陣喺下屬面前表示自己好隨和同會比機會下屬做嘢，但後來到真正比你做嗰時就諸多挑剔，仲要大肆宣揚同我哋講自己要OT做埋你哋果份，又話我哋做嘅報告好差。最後我哋對比返份報告書，只不過係比我哋嗰份字形唔同左，唔明點解佢會話份報告書做得咁差。

影響: 大家同事都要去迎合佢嘅標準，壓力好大。

對打工仔嘅建議：做好自己本份，盡量唔好比“位”人哋入到。

年齡: 35 – 44歲

性別: 男性

行業: 交通運輸業

職位: 行政文員

之前公司新嚟嘅行政主管喺老細面前就好恭敬，好低聲下氣咁，博得老細好評。但對住下屬同同事塊面就黑過“包青天”，高傲過人，樣樣事都要理，樣樣事都要管，樣樣事都要話SOP，樣樣事都問責，連同事去廁所去太耐都有意見，佢好似成身刺咁，冇同事敢接近佢。

影響：好多行政部嘅基層員工紛紛辭職，因為承受唔到呢位行政主管嘅“高壓統治”。

對打工仔嘅建議：跟個好上司，返工好輕鬆；跟個衰上司，返工似行刑。大家好自為之。

年齡: 18 – 24歲

性別: 男性

行業: 餐飲

職位: 水吧

新上司一開始形象好好，工作有咩事都會樂意解答你，幫助你；同老細就報喜不報憂，當大家都以為佢係一個好上司時，大家對新上司的戒心少左，無意間平時會談論公司嘅事。點知道我哋同新上司講嘅野無論大小事，佢就係老細面前指鹿為馬，篤背脊，實行大換血，唔少同事因此“中槍”。

影響：令到我哋嘅工作壓力增加，想辭職嘅慾望增加，人心惶惶。

對打工仔嘅建議：千萬唔可以同上司甚至新嚟嘅同事太熟絡，要睇清楚係咩底細先。

年齡: 25 – 34歲

性別: 男性

行業: 會展

職位: 協調員

公司新嚟咗一個高層。佢一上任就要睇部門開支，而且叫齊部門經理開會，話要削減預算同開支，開源節流。部門連紙巾、文具、清潔用品，全部都減減減！搞到同事要帶“私家紙巾”返公司用，去廁所都唔敢用公司太多紙巾，怕某條TEAM嗰層嘅廁所廁紙用太多，被“問責”。而種種削減開支同預算下，個高層自然獲得大老闆嘅讚許！因為佢利用呢種削減開支形式做到會計條數好靚，入職冇幾耐，大老闆仲因此升佢職。

影響：大大影響員工士氣，削減員工應有嘅基本福利，公司失人心。

對打工仔嘅建議：要麼忍，要麼走！

年齡: 35 – 44歲

性別: 男性

行業: 博彩娛樂

職位: 審計師

之前公司嗰個會計總經理好好人，好多同事都鍾意佢，後來總經理退休，換左新嘅會計總經理。呢個新總經理好似同舊嘅總經理唔同“幫派”，所以當新總經理上任後，之前舊總經理啲“親信”逐個因為各種原因“被消失”了⋯⋯

影響：公司好多老員工因為新總經理的“手段”，辭職和“被辭職”了。

對打工仔嘅建議：不要捲入職場政治，也盡量不要被捲入職場政治。

【故事】新官上任三把火由來

俗語說「新官上任三把火」，是講剛上任的官員，開始履新有些勁頭，必先做兩三件事於百姓有益之事。其含意是指事後是否還會不斷做好事則難說了，此乃人們的經驗之談。這裡的「三把火」是比喻，是說開頭前三件事，要像燒起大火那麼引人注目，而且要轟轟烈烈，有聲有色。但這三把火是哪來的呢？

正解：

是據《三國演義》所述，改編而成的。

取自演義裡的：

第三十九回：荊州城公子三求計，博望坡軍師初用兵

第四十回：蔡夫人議獻荊州，諸葛亮火燒新野

第四十九回：七星壇諸葛祭風，三江口周瑜縱火

指諸葛亮當了劉備的軍師後，在短短時期內，連續三次用火攻曹操，大展手腳的故事。

第一次火燒博望坡，使夏侯惇統領的十萬曹兵所剩無幾。

第二次在新野，火攻，水淹使曹仁，曹洪的十萬兵馬，幾乎全部覆沒。

第三次火燒赤壁，百萬曹兵慘敗，最後跟隨曹操逃出去的，只剩廿七人。 當時，人們把這三把火稱為「諸葛亮上任三把火」。傳到後來便成為人們常說的「新官上任三把火」了。

【故事】新官上任三把火由來

另外這也是從古代縣令上任常做之事，而編出來的俗語。

縣官們上任接班，必做之事很多：

1.要拜廟上香，地方的孔廟、關帝廟、文昌廟、城隍廟必拜，以顯示自己尊儒崇道，連地方神都十分恭敬；

2.要清倉盤庫、糧庫、物料庫核對清楚；

3.要巡查監獄，要視察城防；

4.要對簿點卯，即對照簿冊記載的官員侍從等花名冊一一查對；

5.要傳考生童，就是將本地的學生集中，做一次自己親自出題的考試，瞭解情況；

6.要拜訪鄉紳，當然依次是本縣的皇親國戚、與自己同級的卸任官員直至豪門大戶了。

7.最後，則是新縣貼出告示，說明自己從何月何日開始接受訴訟。

做上邊這一系列事情時，新官必然會選擇出某兩三件事情，別出心裁地大展手腳一番，敢做敢為就是燒出「三把火」。

常見的如廟宇殘破要撥款大修、城防不堅固要為防盜修城牆建苑壘、學生質素不高要請外地名師等等。

看到這些不是誰都會燒的「三把火」後，才見新官有否真功夫。

年齡: 45 – 54歲

性別: 男性

行業: 編程員

職位: 資訊科技

之前新嚟左一個高層，佢為咗鞏固自己嘅地位同權威，成日對有能力嘅同事百般刁難同雞蛋裡挑骨頭，有時亦不動聲色咁漠視有能力嘅同事啲努力成果，對嗰位同事嘅計劃書嘅不足之處視而不見，而直接呈上大老闆到，披露有能力同事嘅缺點。

影響：導致有能力嘅同事被降職，冇幾耐就辭職了。

對打工仔嘅建議：職場上，應該虛心，避免鋒芒太露，以免遭人嫉妒。

年齡: 35 – 44歲

性別: 女性

行業: 旅遊

職位: 銷售專員

最近公司嚟咗個新經理，佢將之前舊經理定落嘅公司政策同規定，改得嘅就改，刪得嘅就刪，自己全部搞過曬啲SOP，好似將公司內部運作作一番整頓。

影響：公司好多流程同政策都改變，好壞參半，對於同事嚟講，工作量多咗好多。

對打工仔嘅建議：一朝天子一朝臣，習慣就好。

年齡: 18 – 24歲

性別: 男性

行業: 銷售

職位: 奢飾品牌銷售員

之前換左個新主管。個新主管超級好人，好關心同事工作情況，仲成日自己比錢請大家食下午餐，而且放假請大家去旅遊，大家都好服佢。個新主管仲要向經理溝通為我哋員工要求更多員工福利同改善工作環境以及改進工作流程。大家都非常擁戴呢位主管，簡直係“再生父母”！

影響：公司嘅基層員工福利同工作環境改善咗，而且改進咗工作流程，提高咗工作效率。而且員工返工都好有鬥志，令到我哋區域嘅業績越嚟越好。

對打工仔嘅建議：有個好上司，可遇不可求，要珍惜。

結語     

給新晉管理者的建議：不論新舊，總有些東西可以學習。一位明智的管理者會懂得善用現有資源，並加以利用，協助自己建立及完成目標。想要順利改變管理模式，便要贏得民心。只要得員工的歡心，做事起來便會事半功倍。     給安於現狀的打工仔：謹記，世上並沒有恆久不變的東西。隨著時間流逝，事物總有改變。只要不是違法或違背道德的事，否則我們都應嘗試去接受新的改變。每位上司都有其需要學習的地方，面對改變，更要抱著「我會助新上司一臂之力」的態度去克服困難。只要你能懷著這樣的理念，就能成為職場上的贏家。當日後再遇上新上司，你都能夠遊刃有餘、有所收穫。

查閱更多《哈囉好工週刊》內容：http://weekly.hello-jobs.com/