唔試唔係人﹗4招提神踢走睡魔

每朝一起身，大多數扮工友都會自動進入「一返工就無精神」Mode。尤其係冷冰冰嘅扮工室裏面，無論飯前飯後，都極易犯睏，狂隊咖啡都未必頂唔住，被老細當場「人贓並獲」，真係有排「洗底」。

有外國網站分享咗一啲提神小貼士，係時候學返兩招。

1. 亂畫一通：好似啲學生上堂係本書度亂畫一樣，做法睇落好天真好傻，但有研究指出，咁做可以提升到集中力。下次開會恰眼瞓，試吓拎張紙出嚟畫幾筆啦。

2. 整Not To-Do List：有人鍾意整To-Do List嚟安排自己嘅工作，不過有外國研究話，整「Not To-Do List」可以幫人提升集中力。其實係想叫人自我反省，列出一啲容易令自己分心嘅壞習慣，張貼係當眼位置，嚟提醒自己「不可一，不可再」。

3. 做啲同工作無關嘅事：一旦分咗心，講真好難一時三刻集中返。呢個時候，不妨將錯就錯，做啲同手頭上工作完全無關嘅事，例如聽吓音樂、去轉Pantry飲杯水咁，畀大腦放空幾分鐘充充電，再搏殺過。

4. 噍香口膠：前幾年the Cardiff University有項研究話，噍香口膠有持續提神效果。假如你需要長時間工作，OT嗰陣想飲少杯咖啡的話，可以換吓噍香口膠，唯一風險係你塊面可能愈噍愈圓潤。

來源：Lifehack