新聞內容 
來自星星的你_騎呢同事數不清︱8月6號哈囉好工週刊火熱登場
- 2018-08-06
- https://mp.weixin.qq.com/s/l5k7Fim5NdVeGFXKjxHnSA
來自星星的你_騎呢同事數不清
導讀：在今期《哈囉好工週刊》，我們的忠實讀者將與大家分享他們在職場上遇到的各種“騎呢”同事。這些同事“騎呢”的行為和獨特的交流方式，時常會讓大家覺得驚訝。希望你們會喜歡以下的“騎呢”故事。
來自星星的你
正義聯盟的騎呢同事
性別：男性
年齡：35 – 44歲
行業：銀行金融
職位：主管
佢係全公司嘅「食物焚化爐」，而且佢張檯係「食物堆填區」。佢成日喺公司周圍行，目的係為咗「捕獵」各個同事嘅零食。無論同事座位上有冇人，只要佢見到檯有零食，佢都會問都唔問就自己攞嚟食。最搞笑係，無論同事嘅零食有冇過期，佢睇都唔會睇，食咗先講。有一次，佢食咗一位同事嘅零食，可能擺太耐，擺到過期，但佢唔介意照食。第二日佢就肚屙請咗假。佢肚屙完返嚟，又一條好漢，繼續食。
小編：睇嚟騎呢同事個胃係個宇宙黑洞。
Mat的騎呢同事
性別：男性
年齡：25 – 34歲
行業：酒店營運
職位：客戶服務專員
本來作為客服嘅人講嘢應該好好聽，態度好好，但呢位同事講嘢嘅語氣好粗魯直接，成日講嘢好低級、好粗俗，令你嚇一跳。好難想像客人同佢溝通嘅情況。有一次，偶爾聽到佢接公司電話，完美聲線，完美禮儀，對客人「唔該」前，「唔該」後，電話裡面仲同客人有講有笑，好似換咗第二個人一樣。但當放低電話嘅瞬間，佢臉色一變，又開始講返頭先客人嘅壞話，粗口問候。
小編：騎呢同事可能識國粹－川劇變臉。
Mia的騎呢同事
性別：女性
年齡：25 – 34歲
行業：旅遊服務
職位：高級文員
每日著唔一樣嘅衫，而且從來冇人見過佢啲衫有重複過，畀人感覺佢衣櫃係無底黑洞，無限空間。其實呢啲都冇咩嘢，最勁係搭配真係唔係人人都識欣賞，好佩服佢嘅「時尚」觸覺和勇氣。
小編：可能騎呢同事屋企開服裝舖，所以有無限嘅衫更換。或者佢著過嘅衫，仲可以打折賣畀你。呢啲叫見機行事！
Tony的騎呢同事
性別：女性
年齡：35 – 44歲
行業：行政/辦公室助理
職位：秘書
公司有位同事每日都會發脾氣，無論大小事都係咁。有次公司茶水間嘅雪櫃壞咗，搞到佢雪櫃入面杯酸奶臭晒，之後佢就發晒脾氣打個雪櫃……
小編：會不會騎呢同事係個拳擊手，只係你哋唔知道佢有呢個副業。
VIVI的騎呢同事
性別：男性
年齡：18 – 24歲
行業：廣告
職位：文員
公司有位男性同事，成日喺我地好忙做緊嘢嘅時候，佢竟然用兩個一蚊大餅喺到掹鬍鬚。而且仲要坐喺自己個位度一邊照鏡一邊掹。有時見到老細未返，仲會敷埋面膜同修指甲，用到一啲唔錯嘅面膜仲會同人分享邊隻好用邊隻唔好用。時下啲男同事，比女同事更識扮靚。
小編：騎呢同事一定係典型嘅韓國美男。如果男士都咁識打扮，咁美容業嘅營業額一定可以翻一倍！
Lian的騎呢同事
性別：女性
年齡：35 – 44歲
行業：行政/辦公室助理
職位：秘書
公司有位同事每日都會發脾氣，無論大小事都係咁。有次公司茶水間嘅雪櫃壞咗，搞到佢雪櫃入面杯酸奶臭晒，之後佢就發晒脾氣打個雪櫃……
小編：會不會騎呢同事係個拳擊手，只係你哋唔知道佢有呢個副業。
Bip bip的騎呢同事
性別：女性
年齡：25 – 34歲
行業：資訊科技
職位：維修員
佢從來唔同人講早晨，就算當口當面同佢講，佢都只會望住你點一點頭就走開，就算係老闆都唔例外，但佢平時都會同人講嘢，就係唔會同人打招呼。
小編：可能騎呢同事早上比較不方便，口臭所以先會咁。我們應該多善解人意，你可以試試買牙膏牙刷送畀佢。
死肥仔的騎呢同事
性別：女性
年齡：18 – 24歲
行業：餐飲
職位：服務員
有一次鋪頭冇嘢做嘅時候，佢搵到一盒啤牌就搵人同佢玩，點知佢問極都冇人同佢玩。之後佢一個人自己同自己玩，仲越玩越興奮喺度大聲講「三邊四邊」，好似當隔離努力趕deadline嘅同事係空氣，玩完之後仲同我哋講「唔玩啦，一直輸」，冇人知道佢到底做緊乜……
小編：喺靈界，呢啲喺叫陰陽眼。
An的騎呢同事
性別：女性
年齡：18 – 24歲
行業：金融
職位：行政文員
每日固定時間做嘢，但做嘅都係啲唔重要嘅事，例如每日都會喺同一時間食下午茶，風雨不改。就算大家都好忙嘅時候佢都唔會變，亦復如是。
小編：有原則嘅人其實唔多。佢嘅行為畀大家知道已經到下晝三點，比睇鐘仲準！凡事有利有弊。
Joseph的騎呢同事
性別：女性
年齡：18 – 24歲
行業：公務員
職位：文員
萬年辭職王。由我入職第一日開始，佢已經成日同我講，話呢間公司點唔好，話佢而家做得幾咁唔開心想另謀高就，但到咗最近我辭職唔做，佢都依然「屹立不倒」！佢前幾日又同新同事抱怨話唔想做啦，我估佢十成十都會喺呢間公司做到退休。
小編：會叫的狗不咬人。明白呢個道理未？會行動嘅人唔使多講就去做。講仲多過做嘅人一定有問題。
Ra的騎呢同事
性別：女性
年齡：25 – 34歲
行業：廣告傳媒
職位：文員
公司有個女同事感覺佢陰氣好重，會成日對住空氣冷笑，佢平時都係獨來獨往，所以全公司嘅人都同佢唔熟，對住人唔識笑但對住空氣就成日冷笑。
小編：唔通騎呢同事修煉寒冰掌又要話你知咩。
Ivy的騎呢同事
性別：男性
年齡：25 – 34歲
行業：地產
職位：高級文員
佢好鍾意帶生果返公司食。本來係好正常，但係佢鍾意坐喺自己個位度食，最深刻印象有一次係公司食提子，將啲提子皮用一層薄薄嘅紙巾墊住，跟住好似無人境界咁食到成檯都係提子皮。
小編：騎呢同事已經進入另一個境界，犀利。呢種境界一般需要修行大師先做得到，估唔到佢食提子就得。果然臥虎藏龍，高手在民間 。
Jack的騎呢同事
性別：女性
年齡：18 – 24歲
行業：批發及零售
職位：銷售員
有一次佢做錯事，畀老細照肺，跟住老細話佢幾句，佢就當住老細面話：「我唔係嚟幫你打工嘅，我只係嚟學嘢嘅，學完我就即閃 ! 」。然後，呢個同事咩都無講就默默行出老細房。
小編：可能黃子華嘅talk show 睇得多。
Christine的騎呢同事
性別：男性
年齡：25 – 34歲
行業：娛樂博彩
職位：文員
公司雖然冇講明指定嘅dress code同儀容要求，但佢衣著永遠好潮，髮型好似韓國明星。聽講每次去廁所都要去好耐，因為要整理每一條頭髮。一次無意中發覺佢居然喺公司一條僻靜嘅長走廊喺度行cat walk，來回行咗好多次。雖然佢覺得自己打扮好潮，髮型好型，但其實我地同事私下覺得佢好「非主流」「MK」。
小編：騎呢同事可能心中有個明星夢。
約能人的騎呢同事
性別：女性
年齡：25 – 34歲
行業：酒店營運
職位：文員
有位同事經常都鐘意著同一件素色T番工，可能佢同款買N件吧。其實都唔緊要，最勁嘅係佢慣性兼間歇性反轉件衫著，好多次佢都係咁，可能佢無所謂啦。又或者可能反轉嚟著可以著多日先洗，夠環保！
小編：呢位騎呢同事比Facebook的創始人Mark Z厲害。Mark Z只係著同一件T不過冇反轉嚟著。一山還有一山高，或者有朝一日佢會係上到雜誌封面嘅人物。
Fanny的騎呢同事
性別：女性
年齡：45 – 54歲
行業：建築及工程
職位：文員
佢貌似人緣唔好，冇咩同事會同佢有過多的交流。有一次開會，老細隨口講咗句：「你有咩需要幫忙就同我講啦。」點知道佢週末無論大小事，都同老細匯報，包括同老細分享佢同屋企人食飯、食咗咩、同屋企人shopping買咗咩，佢將自己週末嘅全部行程從頭到尾同老細分享一次。全公司都好好奇佢嘅內心世界，然而，佢當咗老細係佢嘅好朋友。
小編：好同情呢位老細，多咗個騎呢「朋友」；好同情呢位騎呢同事，唔通佢真係一個朋友都冇咩？除咗老細……
Nakita的騎呢同事
性別：女性
年齡：35 – 44歲
行業：資訊科技
職位：人力資源部文員
以前公司請咗一個人力資源部文員，佢成日都話自己好忙，日日都要OT。咁我地平時叫外賣都會預埋佢。有一次叫外賣，又比較多人叫，咁我就搵支筆同紙去寫低同事要食嘅嘢，佢突然攞一張表格畀我，張表格睇落去好明顯係特登去打同搞啲特效，寫住xxx（名）、xxx（要食既嘢）、１份。同事呀！你咁忙就唔好搞咁多嘢啦，難怪日日要OT。
小編：所以喺企業入邊，同事OT未必代表工作多，個人效率同個人做事方法都有直接嘅影響。
結語
一個多元化的工作場所，可以讓擁有不同能力的同事互相學習和分享。由於每個人都是獨一無二，我們更應該學習別人的優點和改善自己的弱點，而且改變自身，比改變別人更容易。因此，當你覺得同事奇怪的時候，同事亦會覺得你奇怪。無論你有甚麼專長或知識，都應該尊重、禮貌和友善對待別人。
溫馨提示：建立良好職場，由你做起！
查閱更多《哈囉好工週刊》內容：http://weekly.hello-jobs.com/
返回 