新聞內容 
【Home office全功略】5招幫你保持工作效率
- 2020-02-06
面對武漢肺炎，政府都宣布各部門同只會維持緊急基本對外服務，相信好多公司都安排員工在家工作，但係屋企咁舒服，要點先可以集中工作保持效率呢？
0
【⭐️5招保持在家工作嘅效率⭐️】
0
→ 梳洗好 換套衫
雖然係屋企唔駛見人，唔駛換哂正裝化哂妝咁，但係一定要保持日常嘅梳洗程序保持個人衛生，特別喺呢個抗疫時期！刷個牙洗個臉個人都精神啲啦！如果覺得睡衣太舒服，可以換一套簡單嘅出街衫，換個心情進入狀態專心工作！
→ 搵個舒適工作區
喺office都有一個自己工作嘅位置，畀你專心工作，home office又點可以無呢？如果你無書房，可以搵一個開陽啲嘅地方，飯桌又好睡房入面都好，換一個用電腦坐得舒服嘅地方，最好有啲陽光沖杯咖啡飲，仲可以播啲幫助集中精神嘅音樂，個人都無咁眼瞓！如果屋企有其他人喺到，記得一早同佢地夾定時間，避免佢地打擾到你！
→ 暫時遠離手機同Social Media
手機同Social Media應該係最易令人分心，所以在家時嘗試放下手機，可以用線上通訊軟件同公司聯繫，因為只要拎起電話，你總會忍唔住開Facebook、Instagram「碌一碌」！
→ 保持與同事聯絡
唔係office見唔到同事都要同佢地保持溝通，緊貼工作嘅進度！最好就係用一啲實時溝通嘅工具，例如WeChat, WhatsApp, Skype等等，要及時回覆同事嘅訊息，如果有事要離線記得要通知同事，適時告知上司你嘅工作進度，唔係一陣畀人誤會咗你偷懶無做嘢就唔好啦！另外就係千祈唔好唔記得定時check email 啊！
→ 自訂時間表同待辦清單
喺屋企自己一個做嘢有2種人，一係集中唔到而降低工作效率，另一種就係太專心，無同事嘅飯香提醒你食飯，就做到唔知時間連飯都唔記得食。無論你係邊種人都好，先寫好工作時間表都係一個好嘅方法。先列哂今日要處理嘅工作項目，再按重要程度排好工作次序，咁就可以善用時間同提高工作效率。仲可以善用手機嘅鬧鐘提醒你時間，令自己有規律咁休息同工作！ 記得仲要mark底有咩係喺屋企處理唔到要返office先做到嘅野，咁到時返到去就唔會唔記得啦！
返回 