新聞內容 
《面試搞笑記》︱2月25號哈囉好工週刊火熱登場
- 2019-02-25
- https://mp.weixin.qq.com/s/fVxBkYGkmXaAPZUBKCGiig
面試搞笑記
導讀：相信每個人都試過見工面試（除非你是富二代／一出來就做老闆），今期《哈囉好工週刊》就和大家分享打工仔及HR遇過的搞笑面試經歷。回想自己見工時，又有沒有做過這些滑稽的事？如果你都有類似經歷，歡迎投稿至info@mss-recruitment.com 讓更多人知道。
CV有寫，自己睇。
化名：Rita
行業：人力資源
職位：中層管理者
性別：女性
年齡：25 – 34歲
有個男仔過嚟面試公關，咁問佢點解會想嚟我哋公司做，佢話唔知㗎，之前Send CV嗰時邊間回我我未入邊間囉，咁我再問佢你知呢份工係做咩，佢話應該都係見客啫。咁我請佢自我介紹啦，佢話CV有寫，可以自己睇，我問多幾個問題，佢都話睇我CV⋯⋯我又問咗幾個關於之前幾份工嘅離職原因，佢答我無可奉告⋯⋯咁我再問佢你覺得自己適合呢份工作?佢話人工適合就得。我聽完佢一系列對答後，令我有心塞嘅感覺⋯⋯
冇誠意！！
化名：Mr. Ho
行業：人力資源
職位：基層職員
性別：男性
年齡：25 – 34歲
有一次公司面試，因為嗰時有件急事要處理，令應徵者等咗15分鐘咁上下啦，我都有好聲好氣同佢講唔好意思，仲叫茶水姐姐倒咗杯水畀佢飲。點知後來我去面試室嘅時候，裡面竟然冇人！淨係留咗一張紙話我哋效率好低，毫無誠意，叫佢上嚟又要令佢等咁耐，浪費時間，佢上落都幾廿萬⋯⋯但其實佢見嘅職位係初級文員，咁公司確實係冇能力請一位每下都幾廿萬上落嘅文員。（曲線）
有冇好男人先？
化名：Jay
行業：人力資源
職位：基層職員
性別：女性
年齡：25 – 34歲
有一個女仔上嚟面試，咁開頭都傾得好哋哋，覺得係個唔錯嘅應徵者。咁我將CV放低畀老闆嗰陣都有幫佢講好說話，引薦去畀老闆second in，叫老闆去請佢啦。點知老闆In完佢，我送佢去出返去嘅時候，佢問我間Office 有幾多個單身同事，特別係男同事。我話點解咁問？佢話要睇吓呢間公司有冇可能搵到男朋友，冇可能就唔嚟做啦。果然，戀愛係大過天嘅。搞到我呢個單身狗都要反省吓要唔要轉換環境……
唔係XXX公司咩！？
化名：馮太
行業：人力資源
職位：中層管理者
性別：女性
年齡：35 – 44歲
好深刻一次，個日約咗個人上嚟面試，循例問佢係咪叫XXX。確認咗就照常開始面試，發覺唔錯，覺得呢個人有機，咁之後傾到幾時可以返工，我仲介紹埋職位工作內容，佢點頭話冇問題。面試完畢後，我送佢去搭電梯嘅時候，佢突然問呢間係咩公司同埋幾多樓，先發現自己原來去錯公司面試，而咁啱我約咗嘅人no show。但我實在唔明白嘅事就係點解我問佢個名係唔係XXX嗰陣佢會答係，而且聽完職位內容都冇發覺自己行錯公司面試先係經典！
企喺度講唔得咩？
化名：Mett
行業：人力資源
職位：基層職員
性別：男性
年齡：35 – 44歲
之前面試過一個人，我入房前就已經見到佢不斷咁行嚟行去，咁入到房我自我介紹完就同佢講你坐底先，佢話佢企係度就得。然後我就叫佢自我介紹先，佢就一路行一路講，之後嘅問題佢都係行住咁講，我問佢你要一路行先講到嘢？佢仲質疑我問我有咩問題。冇⋯⋯其實係冇咩問題，可能我見識少（哭笑）第一次見到有應徵者咁堅持企起身喺度行嚟行去好似做presentation咁，睇到我眼花。後來佢走咗冇幾耐，打電話過嚟問有冇見到有支藥膏留低咗，清潔姐姐就喺間房入邊執到支痔瘡膏。我瞬間好同情佢！同時佩服佢打電話畀我搵痔瘡膏嘅勇氣，睇得出支膏一定對佢好重要⋯⋯
即係點先？呀大佬！
化名：珍妮花
行業：交通運輸
職位：基層職員
性別：女性
年齡：25 – 34歲
我之前遇到一個好誠實嘅應徵者，我問佢點解會選擇我哋公司，佢話都係亂send CV，邊間叫佢見工佢就去見。我問佢點解想做呢份工，佢話梗係因為窮啦！我接著問多幾個問題，應徵者話：「呀姐姐仔呀！妳到底請唔請呀？而家查家宅呀？係咪信我唔過先？！妳家吓算點先？！」雖然我哋係運輸行業啫，但都會好有禮貌嘅。好似黑社會要脅人咁，我都係第一次遇到，嗰刻我真係唔知講咩好，我仲下意識叫咗佢一聲大佬。
O唔OK啫？
化名：沙律
行業：人力資源
職位：基層職員
性別：女性
年齡：35 – 44歲
之前有個女仔上嚟面試，同我一齊面試佢嘅仲有一位男同事。咁佢面試嘅係秘書位啦，點知佢著低胸超短褲，濃妝，超高高跟鞋，瞬間好似去咗夜場咁。面試過程中，佢一直對住我同事係咁放電，我問佢問題又唔多點答咁，基本上當我透明。而且聽得出佢而家講嘢把聲唔係佢原本把聲，佢特登發出一啲好嗲嘅聲線講嘢，最得人驚係佢講講吓胸壓張檯⋯⋯實在頂唔順，但為表尊重，都用咗10分鐘in個女仔。其實我估個女仔大概去錯地方面試，或者理解錯職位工作內容⋯⋯不過最好彩係我位男同事好專業，幾驚佢話OK！
CV係抄嘅⋯⋯
化名：Helena
行業：人力資源
職位：基層職員
性別：女性
年齡：25 – 34歲
有次公司想請一個外勤，咁睇佢嘅CV都唔錯，就叫佢過嚟面試下啦，一開始當然叫佢自我介紹吓，佢講咗兩句就完咗，咁我就問佢你自我評價係樂於助人，我問佢可唔可以舉幾個例子聽吓。點知佢竟然坦白到直接同我講份CV係上網直接抄嘅。我真係唔知畀咩反應，抄唔係問題，你見到入邊寫乜你起碼都作一個故仔呀⋯⋯
n我！！
化名：吳生
行業：人力資源
職位：基層職員
性別：男性
年齡：25 – 34歲
之前有個人Send咗份CV過嚟，咁我哋係收6點嘅，咁佢6點半Send過嚟咁我哋當然就睇唔到啦，然後佢就第二日朝頭早打過嚟問我哋有冇睇到佢份CV，大佬！我啱啱先到公司，電腦都未開，佢繼續問幾時請佢，然後佢話佢已經係出面不如而家面試我啦⋯⋯Fresh grad絕對冇問題，問題係你冇common sense。
冇話唔得即係得！
化名：彬仔
行業：旅遊服務
職位：基層職員
性別：男性
年齡：25 – 34歲
有一次有個男仔打上嚟公司問我哋佢幾時可以返工，我就好奇怪點解佢會咁問，然後我就問佢幾時send過CV同見過工，佢答我1個月前send過CV但未Interview，我就check到其實佢份CV我哋係唔錄用，咁咪講返你唔多適合我哋公司，佢就竟然發脾氣話你唔打電話嚟話我唔得唔係就即係默認錄用我咩？最後我超級無奈咁同佢解釋返，而家啲Fresh Grad⋯⋯
揾個男朋友比我先⋯⋯
化名：Nica
行業：批發及零售
職位：中層管理者
性別：女性
年齡：25 – 34歲
有一次in一個女仔（大約27歲），一開始問完啲基本工作經驗就問下佢啲個人興趣，咁開頭傾嘅時候都好哋哋，但越講越唔對路，佢突然捉住我隻手喊，一路喊一路講佢好辛苦，生活好艱辛，單身壓力好大，屋企人催結婚，唔知道點算，我都唔知可以點安慰佢。咁我都識做人，我OT安慰咗佢成個鐘。睇嚟佢而家最迫切唔係轉工而係搵到男朋友先。
冇2萬我唔做㗎！
化名：吹尚宮
行業：人力資源
職位：中層管理者
性別：女性
年齡：35 – 44歲
有個啱啱大學畢業嘅人上嚟見工，然後一開口就問人工可以畀幾多，低過2萬就唔洗浪費大家時間啦。我見佢咁冇禮貌，我就直接同佢講，咁我哋公司都唔浪費小姐你嘅時間啦，因為我哋畀唔起咁高人工請你，咁小姐我而家帶你出去出口嗰邊。點知道個應徵者話：「哎呀！一係咁啦萬八，萬八我都可以委屈試試嘅。」笑死，見工見到好似街市買餸咁。
計埋OT咪4年囉！
化名：呀橙
行業：廣告/傳媒
職位：中層管理者
性別：女性
年齡：25 – 34歲
之前約咗個人上嚟面試，我循例問佢啲基本問題，然後見到佢唯一工作經驗係做咗設計師四年，但係佢只係畢咗業兩年，咁我問佢你未畢業就係上一間公司度做？佢答我唔係，佢係畢咗業先喺上一間公司度做，然後我問佢點解會寫四年?係提早畢業定係咩原因?佢話真實工作係兩年，但計埋OT就係四年啦。雖然係好無稽，但係我完全明白佢咩感受，好想拍一拍佢膊頭，I know that feel，哈哈。
不想面試失分，做足120分準備！
大部份人在求職面試的過程中，要麼不準備或準備不足，或犯無謂的錯誤，包括沒帶履歷、穿著隨便等，這樣就令面試者白白錯失寶貴機會。為了大家都能找到好工作，以下我們將會為大家提供準備面試工作時所需要注意的事項：
1
了解公司資訊
盡可能了解清楚有關公司的任何資訊：公司背景、成立年份、文化理念、工作範疇。為了確定面試的工作是否適合自己，你可以瀏覽該公司是否有自己的官方網站、Facebook專頁，甚至可以在論壇搜查有沒有關於這間公司的討論話題。
2
家中模擬演練
面試最重要是雙方的溝通過程，大部分面試人員同管理層都非常重視求職者是否有積極和正面的工作態度。如果對方感覺到你態度積極，你便可以為自己爭取到一定的分數。想與面試人員有良好溝通，最重要是有信心，先在家中準備好，預想面試人員的問題，細心思考答案，在面試時自然會有信心，不會有冷場的狀況。
以下係面試人員最常問嘅問題：
1. 請你自我介紹一下。
2. 你認為你的優／缺點是？
3. 你能為公司作出什麼貢獻？
4. 請你描述一下你未來五年的工作目標。
5. 為什麼你選擇這份工作/這間公司？
6. 是什麼原因讓你辭去上一份工作？
3
確認面試細節
準備好問題的你應該自信滿滿，但仍要留意不要犯以下這10件事項，為自己爭取最高的分數：
✘ 衣着不整潔
✘ 面試遲到
✘ 欠缺禮儀
✘ 沒帶履歷
✘ 缺乏眼神接觸
✘ 說前上司不是
✘ 說前公司不是
✘ 對被發問的問題不懂裝懂
✘ 沒有為工作計劃將來
✘ 所提出的薪金要求不切實際
結語
笑聲笑聲，滿載溫馨。只要學會不執著，幽默地面對生活，日子定會過得更愉快。除了分享快樂，《哈囉好工週刊》也希望各位讀者小心面試的低級錯誤，以免成為上述故事中的主人翁。
返回 