2019.7.8 • 周一
導讀：每一位打工仔在他們的打工生涯都會遇過瓶頸。此時，當你們遇到同事們的熱心幫助，相信你們都會非常感恩同事的俠義相助。然而，不是每一位打工仔都能敢於表達他們的感恩之心，今期「哈囉好工週刊」分享讀者們對同事的感恩之情，或許就是你身旁的同事在這裏留下了他們的謝意！
小薯女
年齡：25 – 34歲好想多謝公司兩位老員工。我知道好多人對老員工嘅印象都唔好：覺得佢哋恃老賣老，又唔聽人講嘢。但我公司呢兩位就肯定唔係，感覺佢哋希望將自己有生以嚟嘅知識都教晒我哋。因為好多對於我嚟講嘅大難題，對佢哋嚟講已經係司空見慣。其實年紀相差大，溝通更加重要。我諗其實只要大家肯溝通，其實好多老員工都好好人。多謝兩位嘅教導，呢份工我雖然只做咗半年，但係覺得學到嘅嘢仲多過前兩份工加埋。
同事有需要的時候，你又會不會雪中送炭？
咁平時同事有咩問題我都會幫手解決，唔會因為自己就嚟收工就見死不救嘅。
從上述經驗中你學到什麼？
平時佢哋做嘢唔突出，唔代表佢哋冇能力，因為永遠有突發情況佢哋做嘢都好可靠，薑真心係老嘅辣。
年齡：25 – 34歲屋企人成日都同我講職場冇深交，但自從識咗我呢個同事之後，我又覺得呢句說話唔係完全啱晒。雖然大家都會想升職升人工，但係我同事唔會因為咩利益而陷害同事，大家同甘共苦，要加班齊齊加，做完放工就去食宵夜。其實我覺得一間公司好定壞，唔可以單純用公司理念嚟決定，好嘅同事都佔咗好大嘅部份。我好感恩自己有啲咁好嘅同事，共享樂嘅同事唔難搵，共患難冇機心嘅同事真係非常難得，多謝你有咩都選擇同我講同進退，大家繼續OT直落！
同事有需要的時候，你又會不會雪中送炭？
一定會，人哋幫你，先唔理你自己想唔想，回禮係基本禮貌。
從上述經驗中你學到什麼？
珍惜好同事，對佢好啲，唔係佢走咗嘅話我都冇心機繼續做。
網絡英雄
年齡：25 – 34歲我想用呢個機會多謝我前上司。仲記得啱啱嚟到呢間公司，返咗幾日工，已經見到經理問同事幾次啲嘢點做，當時我唔熟悉經理，心諗點解公司連呢啲咁嘅人都會請，仲要做高層。其後先知道佢係因為公司唔夠人先叫佢管埋呢個部門，所以佢當然唔會好清楚知道我哋啲嘢要點做。後嚟因為公司收入唔好，大老闆覺得係我哋部門錯，搵我哋開刀。平時臉冇表情嘅經理竟然因為擔心我哋而喊。佢一直都係我心目中嘅女強人，佢就算一個人管兩個部門，日日都免費加班佢都冇怨言，但係就因為擔心我哋而喊，仲好努力咁幫我哋推薦去佢朋友做緊嘅公司。對唔住，之前一直都冇體諒過你嘅壓力，背後仲講你壞話，到我哋有難嘅時候，我哋未出聲你已經幫我哋做咗咁多……多謝你背後嘅默默付出！
同事有需要的時候，你又會不會雪中送炭？
以前唔會，只會掛住諗自己。而家我想嘗試效法前經理，幫下其他人。
從上述經驗中你學到什麼？
小說話多做事。好似前經理咁，真心佩服佢嘅做事手法。平時唔理員工點講，不過只要有事就會全力幫！
年齡：25 – 34歲自己差唔多33歲，事業上同同年同學相比差好遠，有啲甚至已經靠自己上咗樓，但自己仲係做緊低下層員工，一次都未升過。自己變得越嚟越內向，同啲朋友都疏遠晒。有一排自己成日放工坐係員工餐廳，連屋企人都唔想面對，每日放工坐到晏一晏先返屋企。就喺嗰陣有個同事見到我，就坐過嚟同我吹水。佢好有自己一套，唔會諗埋一邊，雖然佢仲細我三四年，思想上卻比我成熟好多。就喺嗰晚佢陪我傾咗四個鐘，有鬧嘅有勸嘅。我睇得出佢好用力去幫我。多謝，喺我心靈最脆弱嘅時候，多謝你開解我，呢幾個鐘嘅對話比起任何人喺工作內容上幫助都有效更多。其實比着係我，我只會噓寒幾句就算，唔會認真，多謝你嘅開解，多謝！我最近開始發憤工作都係因為你嗰晚嘅說話。
同事有需要的時候，你又會不會雪中送炭？
基本上唔會，自己已經夠煩，但而家自己都開始想感染其他人。
從上述經驗中你學到什麼？
除咗諗自己之外，嘗試都諗下其他同事嘅感受。
談育嬰
年齡：25 – 34歲雖然現時嘅法例係可以保障到孕婦嘅權益，可以話係越嚟越好，但其實呢啲法例越做越好嘅時候，我哋要受嘅冷言冷語都會越嚟越多，因為你放假嘅時候啲工作都會畀晒同事做。所以我覺得同事唔祝福你其實冇乜嘢，但你絕對要預咗實有好多人背後怪你，我班朋友大肚嗰陣都同我吐過唔少苦水。所以當我知道自己大肚嗰陣，第一時間係驚班同事背後唔知講咩。但當我經歷完之後，只可以講對唔住，係我太小人之心，擔心太多。班同事冇怪責我準時放工又準備請好多假之餘，有時仲主動幫我買中午，咩粗重嘢都主動幫我做。我覺得要明白同事嘅困難好容易，但你選擇做或者唔做又係另外一件事，好多謝我呢班同事喺我大肚嗰陣默默付出！養好身體返嚟請你哋食一餐好嘅！
同事有需要的時候，你又會不會雪中送炭？
自己能力範圍內又得閒嘅都會幫。
從上述經驗中你學到什麼？
公司同事真係好好，人哋未做任何嘢害你唔好亂咁懷疑人。
年齡：25 – 34歲由細到大自己最大嘅興趣就係睇動畫，細個嗰陣咩卡通都睇，而平時最大嘅娛樂就係畫卡通人物，所以去到大學自己都冇諗其他，揀咗覺得最接近嘅設計讀。咁我嘅大學生涯都好開心，都好好彩仲有機會可以畫下自己鐘意嘅嘢。但自從畢咗業入第一間公司，所有做嘅嘢都好唔鍾意，甚至覺得只係自己鍾意睇動畫，根本對設計冇興趣。考慮完之後，去咗同經理講咗呢個問題，佢竟然冇話我，仲同我傾咗幾個鐘頭，教咗我好多人生道理。多謝經理你嘅指導，就算因為公司隨時唔夠人手，你都唔想我浪費咗自己嘅人生，多謝你嘅建議同擔心，你當我好似家人咁教導我非常感激！
同事有需要的時候，你又會不會雪中送炭？
一直都會，幫人自己都會學到嘢。
從上述經驗中你學到什麼？
其實要做到經理咁樣真係好難，我會嘗試學習佢嘅模式同埋佢對人嘅容量，多謝你！
傷天鵝
年齡：35 – 44歲我哋係做搬運公司嘅，其實間唔中就有啲好麻煩嘅客人，用盡各種手段麻煩你。目的就係要公司賠錢，有啲甚至可以話係無中生有添。有一次我跟嗰張單，咁我將啲貨物送到去佢屋企，第二日屋主打電話嚟投訴，話佢唔見咗一盒重要財物，未確定就話肯定係我偷或者我整唔見，要求我賠償，唔係就直接報警。咁我同主管一齊上去屋主嗰度解釋，無論我點講，佢都唔肯信，仲叫主管叫我賠返錢之後就炒咗我。我估唔到嘅係，主管竟然好唔友善咁話返個屋主，話肯定我唔會偷嘢，未有證據唔好亂咁屈人，仲叫屋主直接報警。最後屋主話佢自己搵多次先，第二日就好唔憤氣咁打返嚟話搵返啦。好多謝主管肯信我，因為正常好多人都係保障公司聲譽，會懷疑自己公司同事先。平時自己擔屎唔偷食，淨係想努力賺錢，可能主管默默留意到，幫我處理咗呢舊生豬肉。多謝主管你嘅幫助同信任！
同事有需要的時候，你又會不會雪中送炭？
當然會，人就得咁多，大家唔幫大家肯定一鑊熟。
從上述經驗中你學到什麼？
有個信任人嘅主管真係好重要，特別係我哋呢啲職業。
年齡：18 – 24歲我屋企隻象龜由細陪住我大，佢係阿爺生前已經養緊，送畀我嘅禮物，佢絕對係我哋屋企嘅一份子。年頭佢因為急性腸胃炎過咗身。喺公司知道嗰一刻真係頂唔住喊咗出嚟。雖然自己係啱啱出嚟做嘢，但係都會明白上司冇可能因為屋企一隻動物過咗身而畀你請假，更何況係一隻龜。上司行過見到我隻眼紅晒，就靜靜哋叫我入房問發生咩事。我同佢講完之後，佢仲即刻話我，「屋企人」有事點解仲唔唔即刻通知完就走？男人老狗係公司眼濕濕好咩？上司直接放咗一個有薪假期畀我，返去處理我嘅事。上司，多謝你，有一個可以明白你嘅上司真係好好。多謝你明白佢係我屋企人而唔係單單一隻龜。連我父母知道都好開心，話我跟咗一個好上司。
同事有需要的時候，你又會不會雪中送炭？
將來我都會有機會做上司，我好希望可以仿效上司去幫助同了解同事。
從上述經驗中你學到什麼？
呢個社會冇人哋講到咁差，做好自己，感染其他人。
如何營造良好辦公室氣氛？
看過讀者們的感恩故事，其實當中想讓大家領會到的，是要營造良好的辦公室氣氛。這是同事之間融合相處的結果，所以如果公司仍欠缺良好氣氛，希望看過週刊的你能踏出第一步，運用我們以下的建議，為公司的良好氣氛踏出第一步！
「保持適當距離」
當你以為同事之間越親密越好，那你就錯了。太過親密反而容易因個性上的差異而發生磨擦，傷害彼此之間的關係。適當的距離反而能保障好自己的個人利益，減少大家不必要的磨擦，對同事關係反而有幫助。
「避免多疑過敏」
同事之間興趣各有不同，避忌的東西也是。有時候你的角色未必適合某種話題。所以當你去接近時，同事可能會緘口不談。這時候你千萬不要神經過敏，不要以為同事一定是在討論你。若你如此多疑，同事關係定必不好！
「切勿口沒遮攔」
同事之間交際最怕「禍從口出」。彼此信任對方，多說一點也可以。但若果關係比較疏遠，交談時候就必須謹慎小心。避免因為一句說話，而破壞你們長時間的合作關係。
「適當幫助同事」
當以上三點都做到時，最後一步就是貫徹我們這次的主題：幫助同事。在自己有能力的情況下，多出手幫助身邊的人，不論是多雞毛蒜皮的小事，在同事眼中相信已經是很好的良藥。如果以上四點都能達到，相信公司的氣氛定必很好！
結語
有時候你認為的舉手之勞，其實對於同事來說已經是很大的幫助。同事們各有所長，如果大家能守望相助，相信沒有什麼事是處理不了的。當你對同事伸出援手，也許有一天當你需要幫助時，雪中送炭的同事也會出現在你的身邊。希望打工仔們都可以用這種心態多多幫助身邊的同事！
返回 