《隱形人》︱8月19號哈囉好工週刊火熱登場

2019.8.19 • 周一

導讀：公司中每個角色都同樣重要，成功往往是由團體內每一個人的努力造就而成的。有些人的努力未必是十分顯著的，今期《哈囉好工週刊》會表揚這些「隱形人」的付出，希望更多人了解他們的工作，感恩他們的付出。

想感謝/稱讚的人

化名：阿叔

性別：男          職位：侍應

年齡：40         職責：服務客人

我之前係K場度做，平時啲客飲到好癲就會嘔到成個廁所都係。咁好多時候個個都唔想去清理，但阿叔都會默默幫我哋手，幫手清理灘嘔吐物。而我最感恩嘅係，一旦遇到啲冇禮貌手多多嘅客人話佢會幫我哋手擋住。雖然佢年紀比我哋大，平時好似同大家有代溝，冇咩兩句傾，但其實佢做事好認真，又好照顧我哋依啲後生。我好希望老細你會睇到，唔好成日忽視阿叔嘅重要性，如果冇咗佢，我諗好多女同事已經走晒。阿叔絕對係做緊比佢工作範圍內更多嘅嘢！阿叔多謝你！

上述的人對你或公司有什麼影響？

幫手洗廁所已經好多謝佢，最多謝阿叔幫助我哋擋住咗好多飲大咗抽水嘅客！其實好唔甘心老細咁刻薄佢。

化名：靚女

行業：餐飲      職位：基層職員

性別：女性      年齡：18-24歲

想感謝/稱讚的人

化名：小蜜蜂

性別：女        職位：行政文員

年齡：24       職責：行政

之前颱風山竹將要吹襲澳門嘅時候，咁啱嗰時我離開咗澳門，但老細又交代話要貼窗，咁我冇計就問公司啲同事邊個可以返去貼，但因為颱風仲有5個鐘就到，好多同事都住得離公司好遠，所以嗰陣時都唔知點算。當我喺公司群組入邊問，有個新入職一個星期嘅文員主動私訊我話佢可以返去貼，話自己離公司都算近。估唔到佢咁主動，因為見佢平時都幾內向，唔多講嘢，返到嚟就對住電腦做嘢，諗唔到喺危機關頭佢係第一個企出嚟話返去幫手，都慶幸嗰時颱風對公司冇做成咩損失，同埋嗰位文員同事都平安返到屋企。

上述的人對你或公司有什麼影響？

其實公司啲玻璃窗都幾多，佢一定係貼咗好耐先貼完，仲要係個颱風準備到先返去幫手，降低咗公司玻璃畀颱風吹爆破嘅風險。

化名：素拉

行業：行政/辦公室助理   職位：中層管理者

性別：女性                     年齡：35 – 44歲

想感謝/稱讚的人

化名：Echo

性別：女    職位：行政助理

年齡：60   職責：處理各項雜務

公司有個好資深嘅前輩，佢唔會因為自己做得比較耐就周圍指揮人做嘢。咩事佢都會親力親為，而且佢係一個好細心嘅人，我哋個Office有好多位老細，佢哋全部鍾意食咩飲咩，只要佢聽過嘅佢都記得，仲要冇記錯。有時老細心情唔靚，大家仲諗緊點補救嗰陣，全靠前輩帶一杯醒神咖啡入去，啲怒火都減咁一半。其實前輩嘅工作好簡單，應該話佢其實真係負責指揮我哋就得，完全可以做到坐喺度又過一日嘅感覺，但係佢就會攞呢啲時間幫助其他同事。佢可以話攞到所有同事嘅愛戴，上個月佢退休，每一位老闆都封咗一封大利是比佢，聽聞真係好大封添。好開心大家都睇到佢嘅貢獻，前輩你嘅努力其實真係幫到好多人，你走咗我哋而家每日好似做乜都唔順利咁！唉！Anyway，前輩祝你退休快樂！

上述的人對你或公司有什麼影響？

想自己可以變成佢咁樣，佢成為我嘅職場目標，從佢身上學習。。

化名：Joyce

行業：娛樂博彩       職位：基層職員     

性別：女性              年齡：25 – 34歲

想感謝/稱讚的人

化名：石森

性別：男    職位：保安專員

年齡：46   職責：大廈安全管理

我哋公司個貨倉長期都有好多貨物出入，有時一次過入太多貨入嚟我哋點唔切就要自己OT去搞掂。咁保安部有個同事好好人，佢搞掂完自己啲嘢，本來可以直接返屋企，但見到我哋趕緊工，走過嚟同我哋一齊搬貨同點貨，好在有佢幫手，大大提高效率，最後做到夜晚12點啱啱好搞掂，非常多謝佢嘅救命之恩。其實我哋同事都冇諗過佢會幫，因為平時大家都冇兩句，甚至連招呼都冇同佢打，嗰晚佢竟然落手落腳主動問我哋有咩要幫，而且冇問過我哋咩回報嗰啲，應該話成程基本上都冇出聲。幫完手就講咗句bye就走咗。認真，作為男人都覺得佢好有型！

上述的人對你或公司有什麼影響？

咁我希望我都好似佢咁，無私奉獻，唔係睇住其他同事有難都唔幫。

化名：伊唷

行業：批發及零售      職位：基層職員

性別：男性                年齡：25-34歲

想感謝/稱讚的人

化名：清潔姐姐

性別：女     職位：清潔

年齡：56    職責：Office清潔

公司嘅清潔姐姐好好人，其實公司有啲同事會好唔尊重佢，講嘢命令式咁。其實大家都只不過係同事關係。其實大家整到啲嘢咁邋遢，成枱都係「雲吞」，其實大家諗下如果清潔姐姐唔喺度幾日，我諗大家都肯定唔敢返工。最感激就係清潔姐姐幫我哋頂咗幾次爆屎渠。其實佢唔識整係好正常，但每次有嘢，佢都係諗都冇諗即刻衝入去！其實唔係佢嘅職責！我一直都好睇唔過眼，其實同事之間互相尊重係基本，或者你只係覺得佢係應份，但你諗返其實好多嘢都唔會應該係清潔姐姐做，佢哋只係負責清潔而唔係工人！多謝你清潔姐姐！

上述的人對你或公司有什麼影響？

想學習清潔姐姐嘅EQ，習慣變成「老馮」，其實大家應該多謝佢都嚟唔切！超級接受唔到啲冇禮貌嘅人！

化名：棉花咀

行業：資訊科技    職位：基層職員       

性別：女性           年齡：25 – 34歲

想感謝/稱讚的人

化名：蕭生

性別：男      職位：司機

年齡：45     職責：載運貨件

喺有能力範圍嘅情況下幫助人已經好好，但係我同事甚至幫我做一啲佢唔擅長嘅嘢。所以好想喺呢度多謝你。之前老闆出咗去公幹一個星期，咁嗰時我親戚過咗身，因為一直聯絡唔到老闆都唔係辦法，所以嗰陣直接離開。公司司機見我情況危急，竟然主動話幫我做晒啲嘢，佢平時幫我哋送貨已經夠辛苦，仲要幫我哋執倉。啲編號同埋英文佢本身係完全唔識，嗰陣時只可以靠公司看門口嘅兼職幫手教佢，就咁諗嗰個畫面都覺得佢好辛苦。返到嚟兼職都同我講，佢真係撞咗好多次板最後搞到夜晚三點幾先搞掂⋯⋯我唔知可以用咩多謝你，請你食飯你都唔使，畀錢你都唔要。我喺呢度好多謝你嘅好心，之前我甚至有時對你態度差，你都冇怪我，自己雖然高級過佢，但係對於公司嘅貢獻，我基本上係佢一半都冇，自愧不如。

上述的人對你或公司有什麼影響？

佢對於我嘅工作心態上改變好多，能力有時係次要，心態決定高度！

化名：紅玫瑰

行業：批發及零售      職位：基層職員

性別：女性                年齡：25-34歲

想感謝/稱讚的人

化名：好好先生

性別：男      職位：設計師

年齡：30     職責：設計Logo

咁有個設計部嘅男同事佢IT都好叻嘅，但佢平時做人好低調，平時其他team同事好多時候有咩電腦問題都可以搵佢幫手，佢又唔會托你手掙。有次老細部電腦死咗機開唔返，但老細又趕住出去見客，咁啱IT部門嗰兩個同事都出咗去做嘢，好在設計部嘅同事喺度，如果唔係都唔知邊個可以幫老細搞返掂部電腦。

上述的人對你或公司有什麼影響？

最起碼老細啲文件唔會冇晒先。我好欣賞佢嘅默默付出，唔要求回報嘅性格，同埋有難嘅時候佢真係好幫得手。

化名：南灣張無忌

行業：南灣張無忌    職位：基層職員       

性別：男性              年齡：25 – 34歲

想感謝/稱讚的人

化名：神奇女俠

性別：女      職位：櫃台服務員

年齡：30     職責：櫃台服務

我哋公司係比較少男同事嘅。雖然大家係文職，但職場上難免會需要搬搬抬抬嘅時候，但係有時，啲男同事行開咗做嘢，實在冇辦法，大家坐晒喺度乜都做唔到。但我發現最近呢位新同事從來都唔會叫男同事幫手，無論搬一大箱文件甚至係搬枱都係自己嚟。其實都勸過佢等男同事返嚟再算，但係佢就同我哋講「如果自己盡力就做到嘅事，我會想自己做」，而且只要佢幫手，大家啲工作都唔使再拖。可能你哋會認為呢啲事好濕碎，但係忙起上嚟嘅時候，佢的確已經減輕左男同事好多嘅工作量，其實佢嘅職位冇要求過佢做呢啲嘢，所以佢嘅行俠仗義嘅態度我好欣賞！

上述的人對你或公司有什麼影響？

現今社會提倡男女平等，但事實係永遠都達成唔到。其實好多時啲女同事係拎到，一個唔得咪兩個一齊囉，但佢哋都係會等男同事做。有能力就自己做呢個概念我好欣賞，買少見少！希望大家都可以學吓！

化名：Timgo紙巾

行業：銀行和金融      職位：基層職員

性別：男性                年齡：25-34歲

想感謝/稱讚的人

化名：Katie

性別：女      職位：兼職問卷調查員

年齡：25     職責：執行各種問卷調查

其實真係好睇唔過公司職場文化有一種睇唔起兼職員工或者低級員工。其實佢哋缺乏嘅只係經驗，但唔代表知識或者貢獻比其他人少。老細設計好唔同嘅問卷，我哋叫兼職去執行，其實咁樣係存在着好大嘅漏洞：可能會錯過咗一啲應該要問嘅嘢。兼職Katie係一個幾敢言嘅女仔，每次佢返工做新嘅問卷，佢都會好認真幫我哋問，如果問題有打錯字或者邏輯錯誤，甚至佢覺得可以加嘅問題，佢都會主動向我哋提出，其實做咗協調員咁耐，知道好多數都可能係假嘅，但偏偏畀我遇到一個咁好嘅兼職同事，多謝你對我哋部門嘅強大貢獻！

上述的人對你或公司有什麼影響？

老細嘅心情因為佢變好咗，而且我哋同事工作都順利咗好多。

化名：周瘦拿

行業：娛樂博彩    職位：基層職員       

性別：女性           年齡：25 – 34歲

結語

    我們希望藉著以上的分享，令大家明白公司中的每一位同事都是互相依賴，不論他們的付出對一件事的成功有沒有直接的影響，大家都是同樣重要的。所以請各位讀者們對每一位同事都表達一點感恩之心，創造更美好的工作環境。

 查閱更多《哈囉好工週刊》內容：http://weekly.hello-jobs.com/