《陪伴是最長情的告白》最忠心員工分享︱4月22號哈囉好工週刊火熱登場

2019.4.22 • 周一

導讀：說到忠心二字，是否所有老闆對忠心的員工都能像古董收藏家一樣對古物珍而重之？還是這些忠心員工會因時間流逝而越來越不被重用？今期《哈囉好工週刊》將和大家分享忠心員工及其老闆在工作上的點滴，究竟他們對份工有多長情？我們一起來看看。

老闆幾好人

行業：酒店營運

職位：基層職員

性別：女性

年齡：25-34歲

我哋公司規模唔算係行業入邊最大，都係中中等等。咁之前有間公司想挖我哋個經理過去幫手，因為佢真係太做得嘢啦，同埋公司喺佢帶領之下年年都搵到錢。搞到我哋啲對手公司都好眼紅，打算高薪挖佢過去。我哋以為對方會成功，因為間公司開嘅條件太吸引啦。但點知經理冇走到，話公司對佢有知遇之恩，而且喺自己最困難嘅時候公司幫咗佢好多，聽講嗰時經理屋企人需要好大筆錢醫病，公司無條件借咗筆錢幫佢解決燃眉之急。

你認為是甚麼令到你／同事對公司忠心耿耿？

公司喺佢最狼狽嘅時候接納咗佢，幫助佢，所以佢都唔會忘記呢個恩情，唔會放棄公司。

你覺得對公司忠心會得到回報嗎？是值得這樣做嗎？

有！老闆知道佢對公司忠心耿耿，每年都加佢人工，我諗老闆都唔會希望自己員工係牆頭草，所以我認為忠心係值得嘅！

欣欣杯

行業：行政/辦公室助理

職位：基層職員

性別：女性

年齡：35-44歲

前年個颱風好勁，相信大家都仲記得，嗰陣老闆都叫我哋唔好返工，但係有個同事竟然自己一個人返嚟貼膠紙。嗰個同事本身住公司附近，打算落街補充糧食嗰陣，見到公司有開燈，就上去睇吓，點知見到老闆自己一個人喺度貼膠紙，就即刻放低啲嘢同佢一齊貼，怕佢老人家唔小心整親。點知嗰風嚟得好快，佢同老闆都唔敢走住，驚有意外發生，好彩佢哋有足夠食糧，然後我哋第二日返公司幫手先知原來佢哋成晚都喺辦公室訓，個同事仲聽老闆講佢以前公司嘅故事，同老闆留守咗喺公司一晚。

你認為是甚麼令到你／同事對公司忠心耿耿？

老闆平時太辛苦嘅嘢都會同我哋分擔，同甘共苦。我相信大部份同事見到呢個畫面都會衝過去幫手，唔係因為要擦鞋，只係想報答老闆。

你覺得對公司忠心會得到回報嗎？是值得這樣做嗎？

有啊，大家都搞掂好自己屋企之後，老闆放咗大家兩日假，等大家可以休息一下，之後仲請咗大家食中午，嗰位同事仲收咗封大利是。不過其實冇得話值唔值，反正係呢個老細嘅就一定會幫！

佛地魔

行業：建築及工程

職位：基層職員

性別：男性

年齡：35-44歲

上年市道好差，公司生意跌咗好多好多，個個都喺度傳話公司會裁員。點知經理竟然自願提出減自己人工，希望公司唔好裁員。我覺得真係好好，因為而家邊有人會願意為班下屬去減人工，但係佢就覺得公司唔應該因為市道差而損失一班好嘅員工，因為大家都好努力咁去提高公司嘅業績。其實公司好有氣氛，大家同事好似一個大家庭。而且好多員工做咗好多年，喺呢個行業裡面算係經驗豐富嘅達人。如果公司將佢哋炒晒，會係好大嘅損失。所以佢寧願自己減人工，都唔想任何一個人走。

你認為是甚麼令到你／同事對公司忠心耿耿？

大家做咁耐，對公司，對同事都有感情。邊個走都唔好，所以佢先咁做。

你覺得對公司忠心會得到回報嗎？是值得這樣做嗎？

會有回報。公司最後都冇裁員。最近公司業績好轉，經理馬上被升職加薪。至於值唔值就要睇經理佢自己覺得啦。

肥屍

行業：批發及零售

職位：基層職員

性別：男性

年齡：35-44歲

我記得我哋有一次批貨出咗問題，有好多貨都有瑕疵，老闆急call我哋返嚟幫手，其實我知道有啲同事已經瞓咗。件事過咗半個鐘之後，我哋全部員工，一個都冇少，全部返到公司，大家夾手夾腳一齊幫老細，因為知道得老細一個人一定搞唔掂，趕唔切，而大家同老細一齊做通宵都冇出過一句聲，最後老細請我哋飲返個早茶，返去瞓咗三個鐘，大家就照常返工。然後我哋批貨最後都好順利咁送咗出去。件事過咗幾個星期後，老細就唔開舖幾日，請晒我哋全部人去日本玩。

你認為是甚麼令到你／同事對公司忠心耿耿？

呢啲嘢雙向嘅，老細對員工好，我哋一定都會對佢好好！

你覺得對公司忠心會得到回報嗎？是值得這樣做嗎？

就算冇旅行都好，都係為咗公司好啫，公司冇咗個大客，到時損失慘重，最後點都會搞到自己。更何況老細本身就好好，去日本餐餐大魚大肉！爽！哈哈！

經理其實都好好

行業：批發及零售

職位：基層職員

性別：女性

年齡：25-34歲

之前有個資深經理突然辭職，公司好想留住佢，因為佢做咗好耐又好熟悉公司。而且佢條team幾乎冇出過問題，每次都落力管理新分店嘅事務。但佢因為身體原因都堅決辭職。公司話會幫佢保留個位，如果身體好返啲就可以返返嚟。然後因為暫時未有人交接佢個位，所以我哋有咩事都會詢問佢，而佢都會好耐心咁解答我哋嘅問題，到最後佢做完手術，身體好返抖咗兩日就即刻返工，老闆都叫佢可以休養多一段時間先返嚟。

你認為是甚麼令到你／同事對公司忠心耿耿？

可能佢真係好鐘意呢間公司，或者覺得自己跟啱老細。所以唔係必要都唔會離開。

你覺得對公司忠心會得到回報嗎？是值得這樣做嗎？

值！因為公司都比較鐘意忠心嘅員工，如果唔係公司都唔會係咁挽留佢啦。

大喊包

行業：廣告行業

職位：基層職員

性別：男性

年齡：35-44歲

我哋公司有個女同事，經常會見到佢喺老闆間房出嚟之後隻眼紅晒腫晒，好似喊完咁。我哋聽到老闆啲語氣都幾惡吓，但係老闆次次鬧到佢喊，佢最後都仲喺度做，冇辭職。我哋一班同事都喺度諗點解，點解仲要繼續忍呢，後來我忍唔住問佢點解要咁忍老闆，直接炒咗老闆佢啦！佢話老闆冇亂咁鬧人，佢每次雖然好惡，但係其實真係教咗佢好多嘢，如果係其他公司，佢可能一早已經畀老闆炒咗兼黑名單。老闆雖然語氣唔好，但絕對算係一個好老闆，至少唔會吝嗇咁教你嘢。

你認為是甚麼令到你／同事對公司忠心耿耿？

佢真係覺得老闆教識佢好多嘢，同埋都會原諒佢做錯嘅事

你覺得對公司忠心會得到回報嗎？是值得這樣做嗎？

唔知呢，不過事後老闆都有開解返佢，同問我哋係唔係對佢太惡。同埋照佢咁講，係有回報嘅，最少我覺得佢做嘢錯少咗。

真。師傅

行業：行政／辦公室助理

職位：基層職員

性別：男性

年齡：25-34歲

公司入邊有一位資深老員工，由佢啱啱入行做到最近退休，每一位入公司嘅新同事都係由佢帶出嚟。佢離職嗰陣我哋都問佢點解可以喺一間公司做咁耐，而中途冇轉過任何工。佢話當初入嚟公司，公司規模好細，老闆加埋員工十隻手指數得晒。因為老闆本身冇咩親人，所以老闆嗰時對我哋好似對自己親人咁對待，大家一齊努力打拼。後尾公司越做越大；加上老闆教識我好多嘢，呢份恩情都唔會忘記，所以做做吓就做到退休啦。

你認為是甚麼令到你／同事對公司忠心耿耿？

老闆嘅真心；同埋老一輩會更加識得尊重呢樣嘢。

你覺得對公司忠心會得到回報嗎？是值得這樣做嗎？

就有啊！聽講佢臨走之前老闆畀咗一筆大獎金畀佢。

剛才大家已經看到好多關於忠心打工仔嘅故事。不幸遇到壞老闆的你，或者你會不明白這些忠心打工仔的心情。但我們呼籲千萬不要隨便認為老闆是看不到你們的努力，在公司努力都是白費。「放長線，釣大魚。」因為老闆們都不會隨便用一兩個月的努力來評定員工。以下我們會分享老闆們的故事，看看老闆如何學對待忠心打工仔。

粒粒雪糕

行業：酒店營運

職位：中層管理者

性別：女性

年齡：35-44歲

上年年尾嗰陣，基本上好多同事都仲有好多假剩低，咁我就叫佢哋快啲清咗啲假去玩啦。點知公司臨時接咗個大型EVENT需要好多人幫手，咁我見佢哋個個都PLAN好咗去旅行，有啲就同屋企人，有啲就同男女朋友，仲要訂好晒機票酒店，都唔好意思開口叫佢哋取消假期。點知佢哋個個都取消晒返嚟幫手，話最多大家一齊努力完再一齊放假。喺我煩緊人手不足嘅時候，大家都自願留低幫我手日日OT去準備，成件事其實都幾窩心同埋團結嘅。

你對這次經歷有什麼感覺？之後你有什麼行動嗎？

非常感動，因為大難臨頭各自飛係好正常。咁首先我認為非必要時絕對要畀佢哋攞假。你平時都唔肯批，佢哋覺得你差，到有事都唔會幫你。今次呢件事我都識做人嘅，花紅嗰度我都落足晒口，大家最後一齊笑笑口。

壓力山大

行業：餐飲

職位：高層管理者

性別：男性

年齡：25-34歲

我老豆係公司老闆，咁我最近開始接手管理，繼承家業。咁我老豆係個好念舊情嘅人，好多老員工都一直跟住佢。當中有個同我老豆差唔多去到出生入死嘅師傅，都準備計劃退休。但佢見我仲係唔多熟悉公司嘅運作，佢就有日行過嚟同我講，叫我唔使咁驚，慢慢適應，佢會遲多幾年先去退休。佢打算喺我搵到好嘅師傅，再教到佢哋熟落啲先再退休，我聽完眼濕濕，喺我最擔心嘅時候幫我打咗支強心針。其實我知佢計畫退休計畫咗好耐，諗住退休之後享兒孫福，但因為要留低幫我先唔咁早退休。

你對這次經歷有什麼感覺？之後你有什麼行動嗎？

對住恩人，我會盡力對佢好，退休大利是一定唔會少，同埋之後一定會定期抽時間約佢出嚟食飯，好好孝敬佢！

陳總

結語

    忠誠的源頭在於一個人懂得感恩，這些人懂得感恩工作上的伯樂、生命中的導師，明白一分一毫均得來不易。感恩和忠心息息相關，因為感恩能有助提升人與人之間的關係，你今天有甚麼值得感恩的事嗎？

查閱更多《哈囉好工週刊》內容：http://weekly.hello-jobs.com/