《貴人vs小人》︱8月5號哈囉好工週刊火熱登場

2019.8.5• 周一

導讀：人的一生，會遇到很多人，有些貴人，有些小人。貴人會為你人生帶來幫助，而小人則會背後捅你一刀，防不勝防。我們當然希望身邊都是貴人，今期《哈囉好工週刊》會分享讀者遇過的貴人和小人，而我們也會分享一些小人和貴人的正確定義，希望你能有所收穫。

太妃兒

行業：銀行和金融

職位：中層管理者

性別：女性

年齡：35 – 44歲

之前我喺澳門一間細公司做嘅，咁身邊有好多同事都話我喺呢間公司係大材小用，成日都同我講話我值得有更加好嘅待遇。老實講嗰陣聽得多佢哋讚自己，嗰段時間自己都心思思。咁後來我喺一個項目到遇到我而家嘅老細，同佢合作咗一陣已經覺得佢幾睇好我，大家相處愉快，後來項目完嗰陣佢就叫我，入到去佢仲出錢畀我出國進修，我當然好珍惜呢個機會，自己都冇令佢失望，最後我都幫公司帶嚟當初佢投資喺我身上嘅數百倍，我好多謝我老細當初畀我機會我。

你覺得這種行為是真心還是虛情假意？

真心，因為真係好少咁肯為員工付出嘅老細，平時我 哋成班同事同佢都係亦師亦友嘅關係。

你在職場上會不會有如此行為？

會，其實我都希望我可以成為我老細咁嘅人，所以我按佢平時咁同下屬相處。

青島男人

行業：廣告/傳媒

職位：基層職員

性別：男性

年齡：25 – 34歲

由啱啱入嚟呢間公司直到我做咗一年，每一份我交嘅提案，基本上我上司都彈返轉頭。一開頭我其實好嬲，覺得係上司玩針對，我唔明點解我每次提嘅案佢都唔接受，後期我真係接受唔到，開始加班檢查返晒所有佢退返嚟嘅提案，先發現佢用心良苦，佢都係想教我點樣做一個提案，但係佢又唔係好得閒，所以先冇同我講我錯啲咩，咁我唯有從佢退返黎嘅提案中從中學習，亦係佢身上學到好多平時唔會留意到嘅嘢。

你覺得這種行為是真心還是虛情假意？

真心，雖然我上司好忙，但佢一靜落嚟就會教我好多嘢。

你在職場上會不會有如此行為？

會，但我應該會講清楚啲問題係邊度或者邊個方向先。

布甸妹

行業：酒店營運

職位：基層職員

性別：女性

年齡：25 – 34歲

而家諗返起都覺得自己好幼稚，之前為咗一啲好少嘅事直接遞信封。點知離開咗公司之後，一直都好難搵到工。嗰陣時自己都開始慌，甚至開始諗住放棄現時嘅職級，降低自己嘅底線，從頭開始，由低做起。但係因為我有頭家要養，驚真係降底之後，生活費用真係會變得好逼緊，自己唔食小朋友都要食。咁呢段期間只可以周圍八下有冇地方招人，當我搵我其中一個舊同事，我諗佢知我難處，佢見我仲未搵到工就向佢老細推薦我，最後我係入咗佢間公司度做，再次同佢成為同事。好多謝佢係我有難時候幫忙，而家係呢間公司都做得好開心！

你覺得這種行為是真心還是虛情假意？

真心，佢都係想我快啲搵到工作，先向佢老細推薦我啫。

你在職場上會不會有如此行為？

相信有能力但係冇機會嘅人好多，幫到嘅話點都幫下。

安娜貝拉

行業：行政/辦公室助理

職位：基層職員

性別：女性

年齡：25 – 34歲

我有個同事，一直都覺得佢冇嘢，淨係平時把口衰咗少少，但因為今年年中有升職機會，佢完全表露咗佢嘅本性！咁平時同事之間講八卦好正常，咁佢係公認同事入邊最八嗰個，平時大家啲八卦源頭都係佢到嚟，佢把口雖然衰但係好中point，所以同事食花生都食得好開心。去到5月尾大家都收到風老細會升人，呢個同事就開始出手啦。佢好醒目，食飯嗰陣同我哋講八卦，自己偷偷錄音，自己帶頭話老細孤寒，討論完嗰陣就將自己講嗰啲嘢Cut走，再畀老細聽。佢將我哋嗰期所有講壞話嘅對話都記錄起晒，上個星期老細同我開完會之後就播畀我聽然後問我有咩睇法。嗰一刻我真係嬲同尷尬到癲！！！機關算盡啊！

你覺得這種行為是真心還是虛情假意？

虛情假意！想升職都唔係咁！你如果係有實力，老細升你我會覺得係實至名歸。

你在職場上會不會有如此行為？

唔會，踩人哋嚟升職，升咗都冇人服你，人哋辭職嗰陣搞破壞你就知味道！

Alan

行業：資訊科技

職位：基層職員

性別：男性

年齡：25 – 34歲

咁公司最近嚟咗一個好勁嘅人，佢好似十項全能咁，其實我真心唔服氣嘅，因為公司最近打算升一個人做經理，佢咁樣突然空降過嚟，好多覺得自己有機會做經理嘅人，包括我自己都覺得佢係敵人。而我自認實力同佢差唔多，但的確有樣技能佢係比我強好多：有時工作上難免會遇到問題，我會請教佢，佢就唔會吝惜話唔教，或者刻意教少你一啲嘢。咁最後當然係佢升咗上去，但呢次我服，因為我冇佢咁嘅胸襟，如果人哋問我嘢，可能呢個時候我會收收埋埋話唔教囉，而且講真，平時解答我咁多問題，真係幫咗我唔少。

你覺得這種行為是真心還是虛情假意？

真心，因為佢想係大家共同競爭，並唔係好似我咁小人之心。

你在職場上會不會有如此行為？

我希望我會，但係感覺我去唔到佢咁嘅level，我做唔到咁冇私。

菠蘿油王子

行業：餐飲

職位：基層職員

性別：男性

年齡：25 – 34歲

我哋做餐飲經常都會有啲食物剩低，咁其實遇到呢啲準備過期嘅食品，我哋係要倒咗佢嘅。但係新嚟嘅主管既然網開一面，話其實食物浪費咗好晒，與其送去垃圾桶，不如畀同事，所以當時我哋都覺得主管好好，感覺佢會幫員工謀福利。後來老闆唔知咩原因發現咗，有次放工突擊檢查我哋，大部份同事都中晒招，過分嘅嘢就嚟啦，老闆呢次出動，係主管車佢過嚟，老闆鬧我地嗰陣，佢仲撟住隻手係後邊倔住我哋，見人講人話，見鬼講鬼話！好嘢！你自己平時都有份攞，人在做，天在看！

你覺得這種行為是真心還是虛情假意？

虛情假意！見人講人話，見鬼講鬼話！成個套路都係你自己做出嚟！

你在職場上會不會有如此行為？

就算做到佢個位都唔會，我會直接唔畀，而唔係做個故事出嚟搞自己啲下屬！

啫喱龜

行業：批發及零售

職位：基層職員

性別：女性

年齡：25 – 34歲

嗰位「小人」係同我同一日入職嘅，由於嗰陣大家都對工作有好多疑惑，開始互相交流心得，所以大家都friend咗。但後期經理升咗我職，我哋嘅關係就開始變啦。一開始我都唔發覺，只係覺得佢比以前靜咗，中期開始覺得佢講嘅說話有骨，後期仲畀我撞破佢周圍同同事講我用美色嚟升職，嗰一刻嘅心情非常複雜！又嬲又失望，明明開頭關係好好嘅同事點解會變成咁。咁我仲想念舊情，就當冇事發生。但係佢仲係越嚟越過分，所以最後我選擇同經理講，出咗一封警告信畀佢。

你覺得這種行為是真心還是虛情假意？

虛情假意，我開始諗緊究竟我哋點解會friend，佢侮辱咗我係呢間公司一直付出嘅額外努力！默默加班變咗美人計，無奈。

你在職場上會不會有如此行為？

唔會囉，返工已經夠攰，用多啲時間休息好過。

可愛教宗

行業：批發及零售

職位：基層職員

性別：女性

年齡：25 – 34歲

職場同事大難臨頭各自飛，呢個道理我由做part-time嗰陣已經明白。大家又唔係死黨，保住自己利益係人之常情。但我覺得你唔使歪曲事實再落井下石囉。話說我同同事A一齊跟一份報告，最後有問題出咗，老闆叫我入房問原因，咁我和盤托出，照直講出發生咗咩事。老闆了解完之後就直接打電話問另外一位同事，老闆問番佢咩事，佢竟然話我完全冇同佢合作過，所以佢乜都唔知。我即場係老闆面前崩潰喊咗出嚟，邊有得咁㗎，我自問全部嘢都同你傾得好好，唯一後悔冇做到嘅，就係應該用電郵同你講，唔係咁信你直接口頭同你講完就算，搞到我想畀證據老闆都畀唔到。好彩老闆都知道我哋兩個係咩人，佢冇特別怪我，都係叫我所有嘢記錄好，不過呢件事對於我職場經驗來講增加咗好多，防人之心不可無，憑空作個故事出嚟陷害同事，仲要落井下石掛「新人係咁㗎啦」，的確，嗰陣作為新人嘅我的確係好無知，完全睇唔清楚你會咁樣陷害我……

你覺得這種行為是真心還是虛情假意？

虛情假意，同佢講嘢都知佢唔簡單，不過嗰一刻我同自己講唔好咁樣諗人，結果佢真係咁……

你在職場上會不會有如此行為？

唔會，大家互相幫助唔係最好咩？

貴人？小人？

看過剛才讀者們的分享，相信你們定必有很多你們認為的「貴人」和「小人」浮現在你的腦海。但我們希望你能看看我們以下分享的文章，也許之後你對這些人的想法會大有不同：

貴人助力多一點 貴人變小人

慈母多敗兒這句說話相信很多打工仔都會聽過，在職場中也不例外。一些你認為經常幫助你的人，慢慢他們就會成為你的依靠。一旦你失去這些依靠，不是每個人都可以馬上撐起來的。有貴人相助是好事，但緊記切勿過分依賴。

小人傷害多一點 小人變貴人

小人往往喜歡陷害你，對你的行為加鹽加醋。普遍打工仔都會很討厭這些人，因為他們讓你的工作量百上加斤。但你有沒有想過，當你在想方法跟避免他們陷害；或者言行舉止更恰當，避免他們說三道四，這時候的你已經是在進步了。如果是剛入職場的新人，也許你們不太明白這個道理，但職場老手們想必你們一定明白多少！

成功靠貴人 成就靠小人

其實把貴人和小人畫分成兩個對立的概念未嘗不可，但也許你會因為這份執着而放棄了你進步的空間。有些人表面看起來像在阻礙你，但結果他反而能推動你前進。「貴人」「小人」其實都是自己創造出來的，若果你心目中已經有貴人和小人的人選，嘗試學習貴人的工作模式，他會讓你邁向成功；如果想在職捱中有着大成就，那你定必接近小人，當你能成功擊退不同小人的不同招數，你的成就定必非凡！

結語

    我第一次相識便定奪一個人的好壞，這樣有些言之過早，因為人與人之間的關係會隨著時間而改變。正因為地球是圓的，不會有永遠的敵人，我們在日常生活應常常建善緣，成為別人生活中的貴人。因此，我們應該建立一個良好的人際網絡，讓我們在有需要時可以互相幫助。

查閱更多《哈囉好工週刊》內容：http://weekly.hello-jobs.com/