News Category 
Hot Tags
News Detail
《花言巧語》擦鞋定係識做人？ | 07月06號哈囉好工週刊
- 2020-07-07
喺職場上，「花言巧語」係一個絕佳嘅技能。今期《哈囉好工週刊》會有讀者分享佢哋對有口才同識得花言巧語嘅同事有咩睇法，呢個天賦又為佢哋嘅職業生涯帶嚟啲咩呢？一齊睇吓~！
行業：酒店營運
職位：基層職員
性別：女
年齡：25 – 34歲
我上司最近生咗 BB，佢完全係一個曬 B 狂人，每日不停咁喺各大社交平臺哂佢個 BB 嘅相，我嘅社交平臺就每日係咁畀佢狂刷屏。有個同事，好識做人，次次都會喺社交平臺下面留言點贊，成個頭號粉絲咁。返到公司就日日圍住上司，不停咁讚佢個 BB 可愛，好乖。其實個個同事都好怕上司攞啲BB 相出嚟喺 office 繞場一周，個個都想避得就避。已經多嘢做，唔想浪費時間喺度應酬上司，一答佢好得意就好似幫佢開咗話題咁，肯定唔使準時收工。我講嗰位同事利害，仲要主動要求睇相，仲勁到唔知喺邊度搵啲育兒資訊同上司分享，又喺度學人講BB 經，明明佢連拖都未拍，唔好話有 BB 啦。所以日日掛住講 BB 嘢，就唔做嘢，衰得佢上司又由得佢，仲要專門安排啲簡單嘅工作畀佢，日日準時放工。
你覺得人們喜不喜歡聽花言巧語？
我覺得一般人鍾意聽花言巧語。因為好話個個都鍾意聽，特別鍾意人哋讚美佢鍾意嘅嘢，好似我上司咁。
你會用花言巧語來達到目的嗎？
唔會，我為人好直接，唔會為咗達到目的就講違心嘅說話。我接受唔到，我覺得用花言巧語去達求目的，好虛僞啊！
年齡：35 – 44歲
有件事，講起嚟就唔開心，覺得自己好傻。上一份工，經理同我講話覺得我工作能力幾好，又勤力，叫我努力啲做，睇好我，遲啲升職加人工。當時我聽到好開心，覺得自己嘅努力有回報，終於出人頭哋兼加人工。我就更加努力去做嘢，個個月都爆數。過咗幾個月，好似我升職嘅消息冇咩聲氣咁，我就去問吓經理，我升職嘅申請如何，經理就話快啦，叫我繼續保持業績。又過咗半年，依然未升職，經理又一樣 hea答「叻仔啊，我努力向上頭申請，就快啦，畀心機。」跟住等多半年，我依然未升職，但經理升咗職，做咗區域經理。我嘅努力，換嚟得個零，經理剩係識氹我做，努力幫佢打江山，但江山打下之後，自己坐享其成。我實在覺得條氣唔順，搵朋友呻。佢哋竟然話係我錯，明知係氹我，話我掛住享受美言。真係咩……
你覺得人們喜不喜歡聽花言巧語？
我覺得一般人會對花言巧語反感。雖然一開始覺得花言巧語好好聽，好順耳，但時間耐咗，日久見人心，太多嘅花言巧語都會變成廢話。一個唔好彩，好似我咁，就係信咗依啲花言巧語，害咗自己，我而家好鄙視依啲講花言巧語嘅人。
你會用花言巧語來達到目的嗎？
唔會，我唔想有人好似我咁慘，畀人氹幾氹就撲心撲命咁幫人打江山。到頭來，自己一無所有，功就人哋領哂。我而家只會對其他人講真誠嘅說話。
化名：最憎擦鞋仔
年齡：25 – 34歲
公司有個擦鞋仔真係擦鞋擦得極緻！主管係個單身嘅中年女性，好多同事都知道佢「重男輕女」，對男同事就輕手啲，對女同事就嚴厲啲。有個男同事，成日叫主管 X 姐前，X 姐後，每日朝早見到主管就好浮誇讚主管，有日就讚主管今日件衫好靚，第日就讚主管個髮型好好睇（其實主管一直都係一樣嘅髮型）。仲有咩氣息好好呀，皮膚狀態好咗，好似瘦咗呀，總之每日都可以諗到一個 point 去讚主管，真係佩服佢！主管又好似真係信，覺得嗰位同事係真心話，越嚟越自我感覺良好，而且越嚟越偏心嗰位男同事。最記得問同一條問題，我答主管佢就話再諗過，個男同事答佢就話 excellent！係咩意思⋯⋯嚟緊準備會有升職機會，大家都冇期望，因為大家知道主管肯定推薦邊個。
你覺得人們喜不喜歡聽花言巧語？
我覺得一般人反感聽花言巧語，因為花言巧語未必真誠，真話雖然唔一定好聽，但係真話真誠，如果太沉迷花言巧語，就會睇唔清自己。
你會用花言巧語來達到目的嗎？
我唔會為咗達到目的去用花言巧語。因為我唔識講嘢，只能夠用實力去達到目的，特別係職場上，我覺得多做事，少說話先係真理，講幾多花言巧語都好，實力唔夠得把口係冇用。我相信仲有好多上司同老闆都係眼睛雪亮嘅人。
年齡：18 – 24歲
公司有個 sales，真係好犀利，冇客可以走得出佢手指罅。有一次同佢返同一更，終於畀我見識到。我哋公司嘅衫同鞋嘅目標客人係20-40歲，有次見到個目測年紀已經去到50歲嘅客入嚟，明明佢着起件衫唔襯佢嘅氣質同風格，但我同事就話好合適，着到好後生，睇落去好似成個20歲妹妹咁；有個有啲肉哋嘅女仔入嚟，明明件衫太窄，搞到個女仔本來係少少肉哋，但視覺效果好似好腫脹，理應穿大一碼，但由於咁啱嗰款衫斷碼，我同事就夾硬話好啱身，貼身先顯得瘦……又有個女仔入嚟買鞋，又係咁啱嗰款鞋冇個女仔想要嘅碼數，得大一碼，我同事就同個女仔講穿大一碼好啊，而家冬天覺得鬆，到夏天隻腳會熱脹冷縮，到時就啱啱好，如果唔係，反而到夏天會夾腳。講你都唔信，個個客都信哂佢，買買買！
你覺得人們喜不喜歡聽花言巧語？
我覺得一般人都鐘意聽花言巧語吧，因為忠言逆耳，唔係人人都接受到。我覺得好多人好享受別人嘅花言巧語，覺得會開心。
你會用花言巧語來達到目的嗎？
我會。因為如果可以利用花言巧語去增加業績，何樂而不為。有時花言巧語都係一種職場技能，唔係人人都識，唔係人人都運用得恰當。學識用花言巧語可以令自己喺職場上如魚得水。
年齡：18 – 24歲
公司有個女同事，公然收兵，成日氹啲男同事幫佢買飯。佢成日同幫佢買飯嘅男同事講「如果我係你嘅女朋友就幸福啦！」，「我都好想有你依種咁嘅男朋友啊！」啲男同事聽到霖到爆，日日爭住幫個女同事買飯。有時工作上有問題，又叫啲兵幫佢做，做完有講「哇！你好犀利啊！好彩有你咋，冇咗你都唔知道點算啊，我下次都一定記得你啊！」 我同其他女同事次次聽到都反晒白眼，想嘔。
你覺得人們喜不喜歡聽花言巧語？
我覺得一般人對花言巧語反感。因為講親花言巧語，都係帶著目的同陰謀。人哋嘅花言巧語，信咗後分分鐘會落入人哋嘅圈套。
你會用花言巧語來達到目的嗎？
唔會。我覺得用花言巧語嘅人都係有機心嘅人，我最討厭啲有機心嘅，例如綠茶婊。公司有唔少依啲同事！
年齡：35 – 44歲
隔離組有個同事 A，好識氹客，自愧不如。我聽過最勁爆嘅一個故事係有一次有一個大陸有錢佬過嚟賭錢，同事 A 負責跟進。循例同事 A 會帶個客周圍行澳門，各種桑拿推銷，話冇去過澳門桑拿，等於冇嚟過澳門，當然實際上佢拉客去某間桑拿會有回佣。然後又去帶個客食貴價海鮮，又話冇嚟過某間海鮮酒樓等於冇嚟過澳門，當然事實又係為咗回佣，其實本地嘅好少去嗰間海鮮酒樓。個客喺度賭錢，開頭好謹慎，同事 A 就氹個客玩大啲，話回報大，但個客好似冇咩運，鋪鋪輸。同事 A 繼續「鼓勵」個客，玩多啲，好快回到本，個客越玩越大，最後佢戴緊個隻「撈」都當埋，輸清光。同事 A 仲話要介紹啲睇相佬畀個客識，下次執下啲髮形衣着馬上贏……
你覺得人們喜不喜歡聽花言巧語？
我覺得一般人都鍾意聽花言巧語。因為花言巧語會令人開心，特別係虛榮心強嘅人更鍾意聽花言巧語。
你會用花言巧語來達到目的嗎？
會。我哋依行一定要嘴甜，識得講好說話，識得氹客人。但太過火就唔好，好似我嘅同事咁，為咗自己嘅回佣，真係唔理個客，當個客係水魚，冇良心可言。
年齡：18 – 24歲
我遇人不淑，啱啱入職而家間公司嘅時候，覺得第一個對我好，主動同我傾計嘅人就係好人，仲成日同嗰位同事一齊去員工餐廳食中午飯，對佢放下戒心，當佢係自己好朋友。直到有一次，簡直顛覆咗我對佢嘅印象。事緣我同佢負責同一個企劃，老細叫我哋自己諗吓有咩諗法可以提出。我成日都同個位同事一齊，好似朋友咁，自然會傾閑計嘅時候夾雜公事，我隨口講咗我個諗法出嚟，佢就評論我嘅方法話唔係咁好，老細應該唔 ok，跟住就教我不如同老細提出另外一個方法，又教我老細鍾意啲咩方向，仲鼓勵我肯定掂，肯定獲得老細嘅認可。又話自己諗住幫新仔，留個機會畀我，等我可以喺老細面前表現吓。點知隔咗一日，老細話佢已經決定咗個企劃交畀嗰位同事，又讚佢個方法好好。我一聽，即時唔出聲，因為我係度鬧緊自己，點解自己咁傻仔，嗰位同事居然搶先同老細提出我個計劃，我食飯嘅時候同佢講，佢仲話個諗法唔好，叫我千奇唔好用！嬲呀！
你覺得人們喜不喜歡聽花言巧語？
一般人會鐘意聽花言巧語吧，因為花言巧語易入耳。冇人鍾意聽難聽嘅真話。
你會用花言巧語來達到目的嗎？
會！經過之前嘅經歷後，我覺得自己唔可以咁傻，我要利用花言巧語去保護自己！人人都用花言巧語去達到目的，我唔用嘅話，我就會畀人傷害。
年齡：45- 54歲
我之前間公司，好冇人性，所以頂唔順就走。我自己自認好做得嘢，對公司勞心勞力，係公司嘅時間仲多過喺屋企。之前嘅老闆好睇得起我，成日讚我，後來同我講，佢要退休啦，想將公司交畀我接手，成日話公司以後靠哂我。我起初聽到後真係好開心，覺得得到老闆嘅認同同以後有更好嘅發展，我就更加為工作賣命，真係當公司係我屋企，差唔多要訓埋喺公司。但5年過去，老闆依然喺度，未退休。我就忍唔住，旁敲側擊問老闆退休打算，佢竟然話「冇啊，之前諗下啫，身體健康做多5年都仲得。」我當時真係眼火爆，即刻話唔做，補錢畀公司就走人，接受唔到前老闆白白欺騙咗我感情！
你覺得人們喜不喜歡聽花言巧語？
我覺得一般人鍾意聽花言巧語，如果唔係，又點會咁多好似我咁嘅人畀人欺騙感情！
你會用花言巧語來達到目的嗎？
我係唔會用花言巧語嘅技巧，因為我做人話一就一，二就二。唔會拐彎抹角，唔會用花言巧語去欺騙同隱瞞某啲事去達到自己目的。
年齡：18 – 24歲
我個女上司有幾分姿色，但目前聽講單身。有個男同事，係女上司嘅下屬，大家叫佢兵長。因為個男同事同女上司好曖昧，好似女上司隻兵咁。女上司成日有咩事就揾男同事幫手，而個男同事咩都應承。有次聽到個女上司同個男同事講，你真係好人啫！如果冇咗你真係唔得，我都知道點算！個男同事就好似男性荷爾蒙突然飆升咁，越嚟越落力，連女上司嘅私事，例如去攞衫乾洗，幫女上司泊車，佢都去做，換嚟女上司派「軍糧」，女上司又同佢講覺得佢好可愛，好可靠，全公司最鍾意佢，曖曖昧昧咁！個男同事又好似信哂，對女上司搖頭擺尾，咩都聽曬佢話。但公司好多老前輩都知道，其實女上司係收兵，慣用講幾句曖昧嘅說話，讚吓異性下屬，等人哋為佢賣命，做埋私人助理。
你覺得人們喜不喜歡聽花言巧語？
我就覺得一般人鍾意聽花言巧語，因為花言巧語好甜，聽完又開心，某種程度上嚟講，係某啲人嘅精神支柱。
你會用花言巧語來達到目的嗎？
我會。因為花言巧語可以拉近人與人之間嘅距離，我覺得有時候花言巧語可以當作善意的謊言，為咗件事好，都要去做。有時候，用花言巧語可以令成件事容易解決。
結語
好嘅溝通能力可以幫自己達成到好多事。雖然說話同行動都一樣可以打動到人，但係說話比行動更容易同可以即時影響到人。我哋有兩隻耳但得一個口嘅原因，就係因為我哋應該多聆聽少說話，但現實卻好多人都係講多過聽。說話可以令人振作亦可以令人傷心，結果會係點都係睇一個人點利用「說話」呢個工具。除此之外，我哋仲要保持內心有積極嘅想法，從而令我哋嘅說話都可以正面啲。
Back 