新聞內容 
《老虎唔發威，你當我係病貓？》︱4月29號哈囉好工週刊火熱登場
- 2019-04-30
- https://mp.weixin.qq.com/s/0K7Pb-j2Z2_cguBViLS1IA
2019.4.29 • 周一
導讀：忍一時風平浪靜，退一步海闊天空這句話在現今社會還有用嗎？今期《哈囖好工週刊》會分享打工仔忍到忍無可忍，終於要爆的事！
化名：以後唔飲奶茶
行業：娛樂博彩
性別：女性
職位：基層職員
年齡：25 – 34歲
有個男同事好鐘意喺落雨嘅時候除鞋，然後放佢對臭襪喺茶水間。其實公司同事都話咗佢好多次，我見大家同事都話咗佢，我就費事出聲。點知佢越嚟越過份，我返到公司見到佢對襪掛喺OFFICE 嘅冷氣口度，等於迫啲同事強制聞佢分享出嚟嘅臭襪味，完全係困獸鬥！我就忍唔住同佢講有啲公德心好唔好！夾喺冷氣口，成間公司都聞到佢對襪有幾幾幾咁……香！點知佢夠膽死無視我，不過好鬼正，半個鐘頭後有同事頂唔順，嬲得濟攞住佢對襪掉落佢杯奶茶度，當堂變成「臭襪奶茶」，開心晒！
從這次經歷中，你最深體會是甚麼？
真係唔可以縱容啲人，平時我見唔到或者小事都算啦，但掛喺大家做嘢嘅地方就真係唔得囉。
0
化名：靚女2號
行業：娛樂博彩
性別：女性
職位：基層職員
年齡：25 – 34歲
我個部門有個女仔好靚女，講嘢又斯文而且性格都好好，我自己係女人都心心眼。半個月前第一次見佢發火。事源就係有個男同事成日借啲意抽佢水。一開始只係扮唔小心摸到手，點知男同事越嚟越過份，由手去到膊頭，靚女同事已經同佢私底下講過唔好行咁埋，保持返適當距離。但係男同事仲同我哋講話女同事咁樣講係欲擒故縱，實質同佢非常曖昧。點知就係上兩個星期，我哋行去開會嗰陣，佢竟然夠膽死當住我哋面攬靚女同事條腰，靚女同事忍唔住鬧佢兩句然後超大力一巴星落個男同事度，大家開會嗰陣都見到男同事塊面個手掌印，抵死！
從這次經歷中，你最深體會是甚麼？
其實真係零容忍，如果真係覺得佢非禮自己真係唔好忍，直接爆佢最好，等啲同事知佢係啲咩人！
化名：火爆猴
行業：餐飲
性別：男性
職位：基層職員
年齡：25 – 34歲
平時我個同事EQ好高，不論係一啲不斷刁難嘅客人，定係我哋嗰位平時成日鬧人嘅主管，佢畀人鬧完都係笑笑口。甚至有次聽到明明唔係佢錯，主管唔確定係邊個做就搵佢開齋，佢都係硬食，同個衰人主管道歉。但有一日，主管因為一啲小事，鬧咗嗰個同事一餐。但係個同事竟然駁嘴，同主管對鬧。大家聽到都好驚訝！平時EQ超高嘅佢居然會同主管開戰。後來我哋知道原來係主管人身攻擊，連人哋阿媽阿爸都攞出嚟講，而屋企人係嗰個同事嘅底線。最後，個同事一氣之下，辭職走人。
從這次經歷中，你最深體會是甚麼？
得勢要饒人，公私要分明，職場上涉及人身攻擊真係唔恰當，搞到公司白白流失咗位好員工。
化名：大青
行業：資訊科技
性別：男性
職位：基層職員
年齡：25 – 34歲
公司有同事好鐘意一打完卡就去廁所hea，每次都係等到我哋頂唔順叫佢出嚟佢先出嚟。有一日我就同佢講唔好咁做嘢，其實一直咁樣對大家都唔好，但係佢完全冇理我，依舊日日都係咁。佢咁樣其實嚴重影響我哋收工時間，一直拖住啲嘢唔做，我哋其他同事又要等佢手頭上啲嘢，搞到幾個同事晚晚OT。有日我哋成班同事真係頂唔順，等佢入咗廁所一陣，開咗幾罐啤酒再掉入去佢廁格，再報串畀老細聽懷疑公司有人返工時間飲酒，做佢一鑊大嘅！飲勝！
從這次經歷中，你最深體會是甚麼？
真係唔可以唔理，佢搵咁多我又係搵咁多，點可以佢日日匿埋唔做嘢都得！玩完佢一個開心晒！
化名：維他奶
行業：行政/辦公室助理
性別：女性
職位：基層職員
年齡：25 – 34歲
我哋公司好慳，唔會提供文具嘅，所以都係啲同事自己帶文具返嚟。其實一開頭都冇咩問題嘅，直到有個新員工入職，日日都話唔記得帶文具，咁佢就係咁問人借啦，借都唔緊要仲要整爛咗放返喺我張枱度當還咗，有時仲要唔還，咁有一次佢整爛我新買嘅文具仲打算扮冇事嗰陣，日日咁忍，最後忍唔住我就鬧咗佢一鑊，再開張單畀佢。其他同事見狀都一齊開單畀佢。
從這次經歷中，你最深體會是甚麼？
其實少少嘢就可以睇清一個人嘅人品，唔係我小氣，但係借完可以完整咁還返畀我嗎？
化名：收聲啦
行業：酒店營運
性別：女性
職位：基層職員
年齡：18 – 24歲
我哋條Team有個同事返工好鬼死Hea，一齊開會嗰時阿頭同佢講完，佢點完頭之後就唔理，次次都要問返我轉頭，問我頭先阿頭交低咗啲咩畀佢做？講咗啲咩？我之前見大家一場同事，就好有耐心咁同佢講返阿頭交低咗啲咩同要佢點做。之後我同佢講話，你下次阿頭講咩你留心啲啦，我又唔係你工人。之後佢有次做錯事嚟怨我，話我同佢講得唔清楚。然後今日阿頭講重點講分工嗰陣佢又唔聽，散會之後又問我要做啲咩。我當場火滾，當住咁多人面前同佢講我冇義務幫你聽，以後啲嘢聽唔清楚自己問返阿頭，你係咁叻就用你個最強大腦記住佢！佢當場啞口無言。
從這次經歷中，你最深體會是甚麼？
對住啲冇心返工嘅人真係唔好幫咁多，因為佢唔會感激你幫佢，只會怨你講得唔清唔楚。
在這個急速發展的社會，幾乎人人都被壓力所困，「你有壓力，我都有壓力」，做事不顧別人感受，碰觸別人底線，爭執自然發生。但如果爭執真的發生了，我們該如何處理？以下我們將會分享三個打工仔必學的應對方法：
1. 看清時勢，顧全大局
如果有同事表達出他的不滿，將要發生爭執。這時你千萬不能意氣用事，先退後一步，因為大家爭執起來，這只會浪費你的工作時間，影響雙方進度。這是上司最不想見到的，自己先冷靜下來，別影響自己的工作。
2. 找出問題根源
事出必有因，退後一步冷靜下來之後，嘗試找出問題所在，徹底解決問題。等同事冷靜下來後嘗試跟他交流，解決他不滿的原因，以防下次再發生。
3. 千萬不可有報復之心
雖然大家都經常會說「你點對人，人點對你」，但其實這是只會是惡性循環。為了自己個人的形象和聲譽，嘗試減少問題惡化。
化名：何必呢
行業：資訊科技
性別：女性
職位：基層職員
年齡：25 – 34歲
以前公司有嗰新人好鐘意同人講關於我不實嘅流言，講是講非。咁我見佢啱啱出社會，我就冇打算要對佢做啲咩，就提醒吓佢唔好再周圍講是非，因為嗰啲都唔係真嘅，不如攞多啲時間做好自己嘢。當然佢表面上就係咁點頭啦。點知佢冇改都算，仲要變本加厲，而且到處話畀人知我恐嚇佢，話啲流言如果係不實嘅話，就唔需要特登同佢講啦，所以一定係真嘅！呢啲係咩神羅輯，之後有一次畀我撞正佢又喺度講我，我就超大聲咁直接同佢講，有咩就當面同我講！有咩講漏我再幫你補充埋！個新仔當堂嚇到眼濕濕。
從這次經歷中，你最深體會是甚麼？
有啲人真係唔鬧唔舒服，叫咗佢唔好做，就係都要做！
0
化名：大隻仔
行業：批發及零售
性別：男性
職位：基層職員
年齡：35 – 44歲
有個同事好鐘意欺善怕惡，平時就鐘意蝦啲新人，咩都叫佢哋搬，已經講咗好多次叫佢唔好咁，但佢係都要咁做。仲要經理經過嘅時候又扮晒嘢咁走嚟走去，喺度扮忙；得閒嗰陣又去經理面前搏表現，但經理一走佢就坐喺度咩都唔做，只會做「指揮官」。我真係忍唔住咁爆咗佢一鑊，叫佢唔好只係坐喺度做「指揮官」，大家同工同酬㗎，佢以為自己係邊個？唔知係咪我鬧得太大聲，鬧到興起經理都行出嚟睇埋一份，繞埋雙手睇我鬧佢鬧到成隻狗咁。
從這次經歷中，你最深體會是甚麼？
有啲人份人太賤格，你唔出聲佢只會得寸進尺，今次經歷只可以用個「爽」字嚟形容，唯一不足嘅地方就係鬧得佢太遲。
0
化名：腐女
行業：銀行和金融
性別：女性
職位：基層職員
年齡：25 – 34歲
有個女同事成日都好鐘意用娃娃音同男同事傾計，佢一出聲總會有同事起雞皮，真係唔係個個同事都頂得順佢嗰把聲。重點係佢一對住我哋啲女同事，講嘢即刻粗聲粗氣。我哋有同事其實已經同佢講過，叫佢用返正常嘅聲同男同事講嘢同埋唔好乘機推晒啲嘢畀佢哋做。點知佢竟然用一個假笑嚟回答。好啦，佢激嬲嘅人越嚟越多，成班同事就諗住玩佢一鑊。有一次佢要趕報告，我哋趁佢去廁所嗰陣掹咗佢條電腦螢幕缐，等佢以為死機。當佢返嚟發現到，知道係整蠱之後，超大聲喺個Office用真聲爆咗十幾句粗口，當佢講完之後我可以形容公司嗰一刻靜到連膠擦跌落地下都聽到！
從這次經歷中，你最深體會是甚麼？
我覺得玩輕咗啦，淨係用把聲，就要其他人幫你做晒你啲嘢，你以為自己係做緊邊行？
結語
「忍」並不代表要一直啞忍及無條件受氣。「忍」的意義在於，當一方火遮眼時，較平靜的另一個方會退一步評估情況，避免決策失誤。發脾氣是本能，控制脾氣才是本事。如果想成為決策者，關鍵在於學會溫和對人對事，不隨意發脾氣。
返回 