《知人口面不知心》人心難測︱8月27號哈囉好工週刊火熱登場

知人口面不知心_人心難測

導讀：知人口面不知心，指的是要認識一個人容易，但要了解一個人的內心卻很困難。很多時候，人們都會因為害怕給人留下負面印象，而避免讓別人覺得其表裡不一。但亦有些人的思想與言行不一，卻是出於好意，例如為了不傷害對方而說善意的謊言、為了友善婉拒別人而找的藉口、為了有效地與不同的人溝通、或是為了傳播正能量等等，都可以說是思想與行為不一致。所以，「知人口面不知心」這句說話是褒是貶，並不在於判斷一個人的思想言行是否一致，而是在於辨別一個人的意圖是好還是壞。今期《哈囉好工週刊》為大家分享一些澳門打工仔「知人口面不知心」的親身經歷。

知人口面不知心

在職場上，你有沒有親身經歷過

「知人口面不知心」的事？

70% 表示有；

17% 表示沒有；

13% 表示不清楚。

你認為職場上哪些人會出現較多

「知人口面不知心」的行為？

86% 表示內地人較多；

81% 表示澳門人較多；

75% 表示香港人較多；

30% 表示台灣人較多；

10% 表示新加坡人較多。

你認為職場上做出「知人口面不知心」的行為…

男性還是女性比較多？

46% 表示女性較多；

29% 表示男性較多；

25% 表示一樣多。

哪個年齡層比較多？

61% 表示31-40歲的較多；

20% 表示41-50歲的較多；

17% 表示21-30歲的較多；

1% 表示51-60歲的較多；

1% 表示20歲或以下的較多；

61歲或以上的沒有。

誰做得比較多？

44% 表示自己部門的同事做得較多；

25% 表示做得一樣多；

16% 表示老闆做得比較多；

15% 表示不同部門的同事做的比較多。

在職場上，你遇過哪種情況的

「知人口面不知心」行為？

52% 在老闆面前顯得很樂意幫忙，但背後卻把工作推給別人

41% 在老闆面前總是表現得好隨和，滿足老闆所有要求，但在背後卻抱怨很多甚至影響其他同事

26% 表面對同事很友好，但背後卻會說同事的壞話

11% 表面對同事很兇，但其實是個善良誠實的人，待人也很真誠

你對職場上出現

「知人口面不知心」有甚麼看法？

29% 可取，是一種很有用的技能，因為不成熟的人才會用一張臉去面對所有的人和事

25% 很平常，職場上難免會有這種人，自己做好自己本分就算

17% 可取，只要能達到目的，就不論對與錯

16% 可取， 這是自我保護的行為，你對人坦誠，別人未必對你坦誠

13% 不可取，等於欺騙別人，令職場氛圍人心惶惶

你覺得你是一個表裡如一的人嗎？

74% 不是

26% 是

你覺得表裡如一還是表裡不一的人，

比較容易在職場上取得成功？

70% 表裡不一的人

16% 表裡如一的人

14% 沒有看法

Honey

性別：女性

年齡：25 – 34歲

行業：資訊科技

職位：文員

有次我哋成team人一齊去飲酒，跟住我哋阿頭飲醉咗喺到亂講嘢仲瞓埋喺酒吧，我哋以為佢瞓咗就算喇，點知佢仲講咗啲公司機密嘢出嚟。我冇留意佢講咩但有個同事就記喺心到，之後仲加鹽加醋同老細講，導致我哋阿頭畀人炒咗而佢自己就上咗位。

睇法：防人之心不可無。

給打工仔的建議：有同事一齊飲酒嘅場合，唔好飲太多，小心被有心人做文章。

Victor

性別：男性

年齡：25 – 34歲

行業：酒店營運

職位：公關

有一日老細要我哋諗策略出嚟，我地部會就喺開會前開一個小會議，而我就喺小會議上講咗我嘅策略。之後同老細開會嗰時竟然畀咗平日同佢關係好好嘅同事講咗出嚟。

睇法：未到最後一刻都唔好講自己條橋出嚟。

給打工仔的建議：唔好咁蠢。

Will

性別：男性

年齡：35 – 44歲

行業：地產

職位：文員

有次A同事畀咗一份報告我話呢份係好嘢，又輕鬆又容易。咁我就接嚟做啦！點知原來係一份豬頭骨，之後仲畀我聽到A同事同人哋講：「哈哈！有個傻仔接咗我嘅豬頭骨！」

睇法：職場如戰場。

給打工仔的建議：做任何事都要先睇清楚。

Kathy

性別：女性

年齡：25 – 34歲

行業：零售

職位：銷售員

有次A同事同我講要將袋衫送上去客人酒店房門口，然後話如果個客人唔開心，就要記住道歉。當我交到去客人手上嗰陣佢打開袋見到件衫之後一直鬧件衫穿咗窿都係冇換到新嘅畀佢。我番到鋪頭同經理講先知，原來開頭係要A同事上門同客人親自道歉，但A同事就卸搏叫咗我去搵個客人捱鬧。

睇法：好難避免畀人陰嘅情況，但出咗事要同上級講來龍去脈，唔好自己硬食。

給打工仔的建議：其他同事交帶畀你做嘅事最好問清楚來龍去脈，幫自己戴定個頭盔。

Bob

性別：男性

年齡：18 – 24歲

行業：娛樂博彩

職位：行政文員

本身有份報告係A部門要做嘅，但個A部門同事同經理講佢冇時間做然後建議另一個部門去做。咁另一個部門咪接手咗囉。跟住嗰個同事仲要成日係經理面前彈另一個部門做得有幾差，但自己又唔肯接手做番。

睇法：呢個世界上只有你估唔到嘅人，而職場上有呢種人亦理所當然。

給打工仔的建議：凡事留個心眼，因為人心隔肚皮，遇到呢種事嘅時候要迎難而上。

Tina

性別：女性

年齡：18 – 24歲

行業：監控

職位：機房監控員

有個兼職平時好守規矩，係兼職入邊嘅模範生。點知有次畀我發現原來佢一直都呃緊我哋，係每次食飯時間都係佢帶頭提早走，搞到有次畀人捉到正累到我都要寫報告解釋。

睇法：就算平時點好都唔可以相信。

給打工仔的建議：有規則就應該跟規則做事，做事唔可以太鬆散。

Bean

性別：男性

年齡：35 – 44歲

行業：廣告

職位：編輯

我有個好兄弟，由細到大都一齊玩，到而家返工嘅公司都係我介紹佢入去做。點知有年公司要開源節流，我個好兄弟同埋其他同事一齊令到我俾人炒咗，個兄弟事後同我講話佢都唔想，但佢仔細老婆嫩，原諒佢喎！當下我真係覺得日久見人心。

睇法：就算係好兄弟，經過職場嘅洗禮都可能會變成另一個人。

給打工仔的建議：千萬不要介紹認識的朋友去同一間公司做嘢。

Jackey

性別：男性

年齡：18 – 24歲

行業：批發

職位：代理

我係一個新人，同期仲有四個人，我哋都跟咗一個好好嘅上司。就算佢有自己嘅業績要追都好，都會好樂意抽時間去教我哋。但係有次同期嘅同事因為自己業績做得差，就去老細嗰到打小報告話上司為咗業績而減價賣出去同佢搶生意。

睇法：發現有呢啲同事就要及早預防。

給打工仔的建議：教新人係一件好事，但係都要睇清楚係咩人先。

牛牛

性別：女性

年齡：25 – 34歲

行業：零售

職位：售貨員

我同A同事平時有講有笑，有一次一齊做一件工作，當時我已經覺得今次做得唔好一定會踩屎，果然不出所料老細真係叫咗我哋入去照肺，要我哋解釋點解會做得咁差，畀唔到解釋就兩個都冇晒獎金，之後A同事就將所有責任推晒落我到。我心諗平時我對你都唔差呀，而你就為咗獎金推卸責任。

睇法：喺職場上面，就算有個同你好好嘅朋友都唔一定係真心。

給打工仔的建議：唔好輕易信人。

花花

性別：女性

年齡：18 – 24歲

行業：法律

職位：顧問助理

有次開會A同事係負責通知全公司嘅同事，但B同事去咗廁所唔知要開會。而B同事平時又懶又鐘意玩分化，嗰次開嘅會佢就冇去到。之後經理問B同事攞報告嘅時候B同事話上次A同事冇叫佢去開會所以B同事根本唔知要做報告。A同事咁啱入咗經理房聽到B同事講嘅嘢就即刻解釋話當時B同事唔喺位到，所以有微信B同事，而B同事亦有覆微信話佢知道要開會。

睇法：你係唔會知意外幾時會嚟，所以平時要做好自己唔好畀人有位入。

給打工仔的建議：隨時保持警惕，保護好自己，多個心眼，唔好咁易信人。

結語

「知人口面不知心」常常都會出現在我們的生活中，我們習慣以自己過往的經歷作決定，以致容易對人產生偏見。所以，《哈囉好工週刊》希望各位讀者緊記——光看外表是無法了解別人的思想，唯有多觀察、從多角度思考及客觀分析事情，才能做出精明的決定。我們亦應常對人保持開明、正面的心態，樂於接受其他人的意見，以及尊重彼此間的差異。

查閱更多《哈囉好工週刊》內容：http://weekly.hello-jobs.com/