News Category 
Hot Tags
News Detail
《疫情後的我們》醒覺從沒太遲 | 07月20號哈囉好工週刊
- 2020-07-23
相信新冠肺炎疫情會成為大家2020年最難忘嘅回憶。病毒嘅快速擴散除咗導致全球多國地區人民感染及死亡，仲令到不少打工仔失業、收入減少、生意倒閉。今次新冠肺炎提醒我哋生命係有幾咁脆弱，宇宙中嘅事物係有幾咁渺小，一個病毒足以令我哋人心惶惶，全球經濟急挫。今期《哈囉好工週刊》讀者分享佢哋喺疫情期間所經歷，學到嘅一點一滴，希望各位可以喺分享當中有所領悟。
極危險
最擔心疫情一直延續，經濟幾時可以復甦。因爲疫情嘅原因，我父母已經冇工開，而家靠我每月畀嘅家用過日子，但我本身出咗社會做得幾年嘢，月薪又唔高，存款唔多，我自己都好吃力。
對你嚟講今次疫情爆發最正面嘅影響係：
我覺得對我最正面嘅事係我同我屋企人更加接近。之前因爲我公司離屋企遠，所以自己係公司附近租屋住，而家因爲疫情，經濟差為契機，我退咗租，搬返屋企住。所以我多咗時間陪父母，照顧佢哋，畢竟佢哋年紀大，身體多少有啲唔係咁好，我而家搬返同佢哋住，日日見到佢哋自己都會安心啲。
今次疫情你認為你學到啲咩？
我最深刻學到嘅係孝順父母。以前未出社會做嘢，同父母一齊生活，總係父母照顧我多，一出社會就從屋企搬出嚟，而家再搬番屋企，真係覺得父母老咗好多，覺得自己好似呢幾年冇點孝順過父母，照顧過佢哋，而家終於意識到，并且身體力行去做。
疫情爆發前後對你最大嘅改變係咩？
i. 以前我鍾意去實體店買嘢，食嘢都鍾意出街食，而家轉喺網上購物。如果想食某間餐廳嘅話，我都會用 app 叫餐，唔會堂食。
ii. 以前上網都係睇啲娛樂新聞，明星花邊新聞，而家我會特登去留意新聞，留意政府防疫消息。
iii. 以前係賺幾多，洗幾多，但而家我覺得係時候存錢，為自己同父母未來打算，有個保障。
壓力山大
最負面係我覺得人與人之間距離變得遙遠。因爲響應政府呼籲，留喺屋企，冇聚集，所以好耐都冇見過父母同女朋友，雖然可以打電話或視頻通話，但始終都有一種疏遠感。而且變得有啲神經質，一旦聽到附近有人咳，自己就好緊張，好敏感，好驚畀人傳染。有時自己覺得有啲頭痛，喉嚨唔舒服，我就開始疑神疑鬼，覺得自己中招，好擔憂，成日喺到自己嚇自己。
對你嚟講今次疫情爆發最正面嘅影響係：
最正面嘅事係從此對醫護人員、消防員、警察嘅睇法改變。以前聽聽埋埋其他人對佢哋嘅謠言同傳聞，對佢哋冇咩好感。但從抗疫過程中，睇到警察、消防員、醫護人員堅守崗位，特別係醫護嘅無私奉獻精神，好感動，覺得佢哋好偉大！
今次疫情你認為你學到啲咩？
學到口罩嘅正確戴法同衛生常識。以前一直以爲如果有感冒，口罩白色面戴裏面，有顔色個面係外面；如果冇感冒，白色戴外面，有顔色戴裏面。唔係疫情都唔知原來自己一直都戴錯，今次政府嘅宣傳片力度好好。
疫情爆發前後對你最大嘅改變係咩？
i. 少出咗街；疫情期間都冇出去買餸，成日叫外賣，搞到而家都習慣咗淨係食外賣。
ii. 由於成日喺屋企，冇乜走動加上又冇咩做運動，幾個月暴漲咗5kg。
瘋狂大師
最負面就係成日睇新聞見到世界各地相繼爆發新冠肺炎，而且確診病例數字同死亡數字不斷增加，我覺得好焦慮，感覺好似世界末日，人類大災難。而且肺炎除咗帶嚟病毒，仲帶嚟經濟危機。好多國家，行業因爲疫情影響，經濟受挫，仲要唔知道幾時先可以經濟復蘇，因爲一日疫情唔緩解唔停，經濟就一直受挫落去。
對你嚟講今次疫情爆發最正面嘅影響係：
最正面就係當疫情啱啱喺澳門爆發嘅時候，市面真係一罩難求，就算有都炒到好貴，呢個時候，澳門政府推出嘅口罩供應計劃，令澳門人人都有口罩用，而且唔使挨貴價口罩，雪中送炭，而且口罩供應計劃一直持續十幾期，真心佩服政府。
今次疫情你認為你學到啲咩？
學識珍惜眼前人，珍惜可以擁有平靜嘅生活。睇到外國嘅死亡數字，一啲患者嘅病況影片，覺得生命好無常，脆弱。諗起以前澳門嘅平淡生活，而家變得非常可貴，好有感觸，我會珍惜而家健康平淡嘅生活，健康平淡就足夠，感恩一切。
疫情爆發前後對你最大嘅改變係咩？
i. 而家會好勤力清潔屋企，以前都係一個星期請鐘點上屋企搞一次清潔，而家因爲怕鐘點姐姐接觸得太多人，高風險，自己落手去搞清潔，仲要每個星期3次。
ii. 以前工作太忙，冇咩時間睇新聞，對政府發放咩政策都冇咩留意，而家留意多咗新聞，特別政府每日嘅新聞發佈會，有時間一定睇直播，就算錯過咗都一樣會睇返新聞報道。
iii. 少咗出街，每個星期除咗返工，其他時候都係留喺屋企，費事接觸咁多人。
美妝達人
對我最負面嘅事係要日日戴口罩出門，以前唔使戴口罩，自由輕鬆！之前戴咗咁耐口罩，搞到我皮膚好差，出咗好多痘痘，好醜樣。而本身職業對外貌係有要求，好怕啲痘痘不停咁生，留唒啲「青春印」。咁差市道再繼續生我真係怕連份工都冇埋，而家日日睇住我臉啲痘痘就好唔開心。
對你嚟講今次疫情爆發最正面嘅影響係：
我覺得最正面嘅事係睇到世界好多地方嘅環境污染有所緩解。因爲疫情嘅爆發，世界好多地方都停工，地球就有咗休息嘅時間，連地球嘅臭氧層破洞都因為呢次疫情而修復緊，我好開心見到地球喺度自己修復，畢竟之前地球嘅損耗同污染實在太嚴重。
今次疫情你認為你學到啲咩？
最深刻係學到點樣喺戴口罩嘅時候又可以 keep 住自己個妝唔會花。因爲職業需要，我返工一定要化妝。之前每次化完個妝戴口罩，過一陣除落嚟我個妝基本唔見得人。由於宜家返工都要戴口罩，雖然多數時間我只會露隻眼，但難免中午食飯嘅時候要除口罩。上網學咗啲網紅點樣戴口罩都保持到個妝後，真係方便好多，我仲周圍分享畀我啲同事添。
疫情爆發前後對你最大嘅改變係咩？
i. 以前返工就日日行街，而家雖然出邊好多嘢都特價，但其實我仲有陰影，冇乜嘢都冇出街。
ii. 以前我覺得公司無論大定細，反正人工高，或者自己鍾意就得。疫情爆發後，我覺得打工要揾啲大公司，穩陣啲，起碼公司抗壓能力高啲，唔會因爲生意受幾個月影響就營運唔落去，或者直接炒人。
iii. 我而家買保養品多過化妝品。化妝只為工作需要，唔使返工我就直接出門口，寧願用啲錢令自己健康啲。
地獄黑仔王
對你嚟講今次疫情爆發最負面嘅影響係：
最慘係我本來諗著今年年頭轉工，離開目前公司，因爲而家間公司啲同事好可怕，有難事就推畀你做，出咗事嘅責任又推畀你。而且唔單止同事極品，老闆都極品，老闆 cut 咗一半同事，而將 cut 咗一半嘅同事嘅工作量畀埋而家嘅同事身上，仲好似驚員工太得閑，開始各種天馬行空諗各種 project 叫員工做。我本來以爲我今年年初就可以辭職，離開地獄。但因爲疫情爆發，經濟唔好，我都唔敢轉工，驚轉咗工揾唔到下一份工，做失業大軍。
對你嚟講今次疫情爆發最正面嘅影響係：
最正面嘅事係發覺澳門人好團結，好自覺。當初政府呼籲要多留喺家中抗疫，真係見到身邊好多朋友屋企無論老一輩定年輕一輩，都好自覺留喺家中，而且大家都有戴好口罩，仲互相監督，積極抗疫。
今次疫情你認為你學到啲咩？
學到點樣揀有質量嘅醫療口罩。以前對口罩冇任何認識，以爲種種都差唔多，原來有好多學問同分好多種，而家我對口罩好執著，如果戴住啲薄嘅口罩出門口個心都唔安樂。
疫情爆發前後對你最大嘅改變係咩？
i.以前屋企只會有啲感冒藥，鐵打酒要嚟看門口，而家就算冇乜事我都會入定一盒口罩放喺屋企，口罩已經變成生活必須品之一，經歷過呢次疫情，好怕突然冇口罩用個種彷徨。
ii. 以前喺公司工作，疫情後，公司安排員工屋企做嘢。以前開會就面對面喺公司會議室開會，如果人數太多就會用遠程視頻開會。
iii. 以前自己同老婆係「無飯夫婦」，一般出街食或者叫外賣。而家多咗時間喺屋企，同老婆一齊煮飯，鍛煉廚藝，少咗出街食飯。
好爸爸
對你嚟講今次疫情爆發最負面嘅影響係：
最差就係令到我面臨經濟危機。因爲疫情，公司生意少咗起碼6成。公司少咗生意，少咗生意接，令到有啲同事就冇嘢做，佢哋就畀公司安排放冇薪假，而我就係其中一個！我呢啲有家庭，一份糧幾個人洗，生活真係好艱難，自己就去7仔做兼職，揾得幾多得幾多。我唔食，我嘅小朋友都要食。
對你嚟講今次疫情爆發最正面嘅影響係：
多咗親子時間。以前工作太忙，做 IT 好多時都 OT，返到屋企嘅時候，我嘅小朋友已經訓咗，佢起身嘅時候我又去咗返工。因爲疫情原因，幼稚園停學，我又停工，我終於有時間陪我小朋友，陪下佢玩，多啲照顧佢，唔使我老婆咁辛苦。
今次疫情你認為你學到啲咩？
明白到塞翁失馬，焉知非福。起初畀公司安排停薪留職感覺好沮喪，唔知道點算。後來自己揾份兼職做住先去渡過呢段時期，而且我更開心係我多咗好多時間陪伴我嘅小朋友同老婆。以前工作太忙，忽略咗佢哋，忽略咗老婆嘅辛苦，忽略咗小朋友嘅成長點滴，停薪留職時候，發覺親子時間同陪老婆嘅時間真係無價。
疫情爆發前後對你最大嘅改變係咩？
i. 疫情爆發後，我少咗衝動購物。之前喺公司只要聽到同事話有咩小朋友用品好，我都毫無考慮咁買買買。而家老婆教落，要諗下啱唔啱用先買，唔好衝動購物。
ii. 以前工作太忙冇時間照顧老婆同小朋友，而家好注重咗親子時間，陪伴係非常重要。
iii.以前一直覺得份工好穩陣，但而家要停薪留職，以前未做過7仔或者任何服務業，為咗維持生計點就算自己唔熟悉都要做住先。
一名經人
行業：金融
職位：基層職員
性別：男性
年齡：25－34歲
對你嚟講今次疫情爆發最負面嘅影響係：
公司生意差，少咗好多生意，成個澳門百業蕭條，搞到我自己業績又達唔到 KPI，連續幾個月得份低薪過日子，日子真係好難挨。而且之前公司又要我哋輪住休無薪假，簡直雪上加霜，連底薪都攞唔足，得返一半低薪。自己又要租樓，衣食住行都要自已搞掂，我就快連飯都冇得開。
對你嚟講今次疫情爆發最正面嘅影響係：
最正面嘅事係我覺得政府好可靠。疫情爆發嘅時候，我同屋企人都好慌張，忙著去撲口罩，好驚買唔到，行咗幾間藥房都話斷貨。好在第二日政府就話政府就推出口罩供應計劃，即刻覺得自己身爲澳門人好幸運，好幸福，有個反應咁快，急市民所急嘅政府！
今次疫情你認為你學到啲咩？
學識注意個人衛生，戴好口罩保護自己。以前就算病都唔戴口罩，覺得戴口罩好難睇，好似話畀人聽自己有病咁。而家知道戴口罩除咗係保護自己，仲要保護人哋。
疫情爆發前後對你最大嘅改變係咩？
i. 個人衛生習慣改變。而家出入戴口罩，酒精搓手液隨身攜帶，每次摸到其他嘢，即刻用消毒酒精搓手液清潔雙手，得閒就攞出嚟用。
ii. 以前覺得每個月出夠糧係好平常嘅事，經歴過疫情而家覺得出夠糧係好值得感恩。
iii. 以前好鍾意留係屋企 hea，疫情嗰陣留喺屋企太耐，而家成日好想出街，覺得出街好舒服。
宅女厨神
年齡：25－34歲
對你嚟講今次疫情爆發最負面嘅影響係：
最嚴重就係搞到我冇工開。因爲疫情原因，好多event 都停咗，公司少咗生意，我哋班員工就輪流放假。我本來係一個宅女，但宅得太耐自己都 頂唔順，啱啱開始一兩個星期，已經開始唔記得今日係星期幾。日日迷迷糊糊，好似係度虛度日子咁。
對你嚟講今次疫情爆發最正面嘅影響係：
最正面嘅事係雖然公司少咗好多生意，員工輪流放假，但公司都冇炒人，冇逼員工停薪留職。我覺得經過大事後，覺得公司都幾有良心。
今次疫情你認為你學到啲咩？
學識整好多甜品。我輪休嘅時候，百無聊賴嘅某日上網見到人哋喺屋企整嘢食，我自己又試下。前前後後上網學整咗十幾款甜品同蛋糕，仲因為咁上網識咗幾個志同道合嘅朋友！
疫情爆發前後對你最大嘅改變係咩？
i. 我覺得我嘅生活節奏改變咗。以前我生活節奏好快，成日因爲有 event 就搞到三更半夜先返屋企，冇點照顧過自己；而家腳步放慢咗，仲揾到自己新嘅興趣。
ii. 對金錢管理嘅觀念改變。以前我係個及時行樂嘅人，冇咩刻意去儲錢。疫情爆發後，我發覺冇錢真係會搞到好冇安全感，搞到自己好唔安樂。
iii. 我開始食多咗好多保健品，營養素之類。以前我從來都唔食，冇咩動力食。疫情爆發之後，我開始買各種保健品、營養素食，感覺自己健康咗。雖然食咗唔會百病不侵，但感覺抵抗力好咗。
記得新冠肺炎帶畀我哋傷害嘅同時，亦請大家記住呢個寶貴嘅一課。每件事嘅好與壞，其實都係取決於我哋點樣好好利用呢個機會去反思同改變自己嘅思維同生活方式，從而令到世界變得更加美好。除此之外，呢次經歷都令我哋注意到人與人，甚至係國家與國家之間係需要互相依靠同信賴。亦請你記住，就因為呢幾個月嘅「禁足令」，大氣層因為污染減少而開始修復，動物都重返城市。疫情可以令大家學習乜嘢係最低限度嘅生活方式，大部分嘅附加品其實都只不過係我哋嘅慾望同浪費。請緊記美好嘅環境係要有所有人齊心協力先可以做到，大家一齊努力啦。
Back 