News Category 
Hot Tags
News Detail
《狗男女》︱7月15號哈囉好工週刊火熱登場
- 2019-07-17
2019.7.15• 周一
導讀：每日至少有三分一時間都和同事相處，日久生情，辦公室戀情總是難避免。和所有戀情一樣，一段好的戀情能互相扶持、令雙方成長，但如果這是一段不當的戀情，結局便會截然不同。今期《哈囉好工週刊》會和大家分享不當的辦公室戀情會如何影響公司及同事。希望你不會成為別人口中的「狗男女」……
巴辣香G
行業：廣告/傳媒
職位：基層職員
性別：女性
年齡：25 – 34歲
公司有個女同事初嚟公司唔係好耐，已經見佢成日黐埋個經理度，唔知佢搏咩。中午lunch又一齊、返工放工又一齊，真係差在去廁所未一齊，幾個月之後經理仲同我哋公開埋佢哋兩個拍拖嘅事。咁新年放假前我哋都收到風，年假後公司會有一個升職機會，睇下邊位同事表現同業績最好就會升邊個。講業績其實大家都差唔多，但係我哋都知冇得同佢鬥，經理一定會出面幫佢女朋友講好說話，喺老闆面前美言幾句。果然不出所料，出消息話佢今年內會升職，就算功勞再多，幫公司搵到再大嘅生意，都係徒勞無功。永遠有關係比起有實力更加重要，最後個經理仲開聲叫晒我哋一班同事一齊慶祝佢女朋友升職。我真係恭喜你呀！
這件事對你的公司帶來甚麼影響？
短暫嚟講對公司嘅影響唔會太明顥，但係長遠嚟講就唔知啦。
請問你能接受公司存在着這種關係嗎？為甚麼？
唔接受，因為感覺冇咩晉升機會同好唔公平，最後我都受唔到咁嘅工作環境我就主動辭咗職。
0
能迴避嗎？我怕了當那電燈膽
行業：娛樂博彩
職位：基層職員
性別：男性
年齡：25 – 34歲
公司同事邊個結咗婚大家都一定知，近期公司熱話莫過於公司對「新情侶」，佢哋特別唔同嘅係，佢哋兩個都有老婆仔女，都唔知點解佢哋咁都夠膽行埋一齊，可能覺得出軌偷食夠刺激掛。重點係佢哋完全唔介意畀其他同事知，佢哋就好似其他熱戀期情侶咁，個男成日喺個女啊頭面前走嚟走去，又送花送上門，佢係咪以為公司啲女仔會羨慕，其實大家只會覺得好尷尬。不過真係冇得解，鬼叫個男仔生得靚仔，有啲混血feel，都明白點解個女上司忍唔住嘅。不過上個星期佢哋兩個都收到大信封。詳情我都唔係好知，聽同事講話係個男嘅成日開埋晒啲唔知咩嘅數，女上司又同佢批晒。應該係唔知邊個知情同事頂唔順向大老闆告密。不過我覺得最慘都係佢哋兩個嘅另一半，一份工冇咗可以再搵過，家庭話重新組織唔係咁容易，更何況仲要欺騙自己另一半。離哂大譜！
這件事對你的公司帶來甚麼影響？
公司經濟上損失一定有啦，不過公司關係複雜嘅情侶其實有好多，不過做到呢個程度嘅我諗應該唔多。
請問你能接受公司存在着這種關係嗎？為甚麼？
工作上接受到，眼睛上接受唔到，雖然唔想睇，但佢哋一搞埋呢啲嘢就會自動望咗埋去，阻住我做嘢！
可憐蟲
行業：銀行和金融
職位：基層職員
性別：女性
年齡：18 – 24歲
我前男友係開舖頭嘅。開始籌劃嗰陣，佢聲稱係同佢個好兄弟開，咁我都冇多問，直到一齊出嚟傾，我先知佢個好兄弟原來係女嚟嘅。當時我只覺得男同女邊有可能會有純友誼，但係佢嗰陣堅持話冇嘢，只係大學朋友，講多兩句又會嘈交，所以之後我選擇相信佢。但事實證明我真係太蠢，當時佢話我銀行做得好，同埋怕佢周轉不靈，需要我幫手，叫我繼續留喺銀行。佢同佢「兄弟」睇住間鋪頭就得。唔知點解我嗰陣可以蠢到話OK。就正因為咁佢哋多咗好多見面時間，成日都話遲返屋企要傾鋪頭條數。咁嗰陣時我都好擔心佢，有次就帶住啲湯水落鋪頭搵佢，點知等咗一個鐘都唔見佢哋，我開始覺得唔妥，就企咗去佢朋友屋企門口等。最後等多咗半個鐘，見到佢哋兩個走出嚟，我見到佢多咗啲「印」，詳細我都唔想再講，只能勸大家唔好好似我咁蠢。我覺得分手冇乜嘢，最慘係我貼錢畀佢同其他女人，到而家都覺得好委屈。
這件事對你的公司帶來甚麼影響？
我公司肯定冇嘢啦，不過有啲同事知道咗都搞到我覺得好冇面。
請問你能接受公司存在着這種關係嗎？為甚麼？
呢件事其實搞到我有陰影，見到公司有其他曖昧男女我都覺得嘔心。
0
萬里望花生
行業：廣告/傳媒
職位：基層職員
性別：男性
年齡：25 – 34歲
如果你話狗男女，我公司嗰三個人絕對係模範經典。我冇講錯係三個人，當初我個男同事對我哋部門個女秘書㗳晒糖。咁當時我哋都同個秘書唔係好熟，所以都冇乜意見。但自從佢開始落力追個秘書，佢個人開始慢慢咁變：變得小心眼，八婆咗，係嗰段時間佢同好多同事關係都差咗。漸漸佢就變成咗女秘書隻天眼。咁當時佢哋都未係一齊，後來有一日男同事好明顯冇再同女秘書聯絡，我哋同事之間開始八卦，先知道原來男同事其實只係一隻兵，同女秘書有關係嘅係我哋偉大嘅經理。我估應該係男同事講經理壞話或者表白衰咗，導致強制退役。唉，同事關係差哂，兵又冇得做，只能講如果我係你我就辭職啦。
這件事對你的公司帶來甚麼影響？
冇乜影響，只不過係一個普通男同事同我哋啲關係差晒，經理係咩人我哋一直都知，所以成件事發生對公司嚟講根本冇分別。
請問你能接受公司存在着這種關係嗎？為甚麼？
冇咩接唔接受，根本就唔關我事。做嘢唔好搞到我就得。其實佢哋咁樣我完全冇所謂，間唔中有啲花生都係一種娛樂，哈哈！
0
高天鷲
行業：專業人員
職位：基層職員
性別：男性
年齡：25 – 34歲
我哋公司老闆之前批准可以請新員工，入嚟跟住啲資深經理接手新業務。咁我哋公司本身嘅環境都唔錯，人工對比同行都唔算低，福利又多，但公司暫時預計只請一個人，仲要只請女仔。雖然係咁依然都好多人遞咗CV過嚟，甚至連男仔都有幾份。唔知係咪因為咁搶手，而且開個價錢OK，我哋個HR男同事就諗住走後門，介紹佢女朋友入嚟。最後佢女朋友成功入咗嚟公司，仲日日喺我哋面前晒恩愛。講到最難頂就係佢成日喺度扮可愛，講疊字，咩叫做我要飲水水啊，放過我哋……同埋有時公司會搞啲活動，報名人數多數得幾個，佢哋兩個每次都會搶住報名，話畀啲機會佢哋拍拖，難為有啲同事每一次想去都去唔到。佢哋兩個咁樣長期無視公司其他同事，雖然唔係好直接影響公司，但係長時期見到咁樣心入邊都覺得好難頂！
這件事對你的公司帶來甚麼影響？
走後門都算啦，但係太高調會搞到我哋不爽囉，公司都希望全部員工可以和和氣氣，將時間集中喺工作度。
請問你能接受公司存在着這種關係嗎？為甚麼？
我係冇所謂，但我覺得返工就返工啦，喺度晒咩恩愛啫，冇人想聽你哋尋日食過咩做過啲咩。最重要係我覺得千萬唔好搔擾到人。
宇宙腦魔
行業：專業人員
職位：基層職員
性別：男性
年齡：25 – 34歲
我係負責跟一啲兼職做調查同問卷嘅。咁我一直都有幾個熟手幫我出去做問卷，可以話係順風順水。直到有一次公司要做大型調查，請多咗好多人，咁就出事啦。入邊其中一個新人女仔，做嘢唔算勤力，但係電力就十足，成日喺度對啲男仔放生電。我其中一個熟手咁就畀佢攻陷咗。開頭都覺得佢哋冇乜嘢，拍拖啫。後來發現個女仔有蠱惑，一直喺度造假數據，自己衰都算啦，仲要教我個熟手同流合污。最後兩個畀我喺麥當勞捉到佢哋兩個喺度㩒問卷，搞到我要忍痛炒埋個熟手，紅顏禍水啊！
這件事對你的公司帶來甚麼影響？
公司應該覺得冇乜嘢，始終都係兼職。但站係我嘅角度嚟諗，冇咗一個熟手係一件非常麻煩嘅事，工作上會麻煩好多。
請問你能接受公司存在着這種關係嗎？為甚麼？
拍拖其實係好正常嘅事，但返工還返工，就算係單身，都唔可以違規！同埋你自己衰，真係唔好教衰埋其他人，人哋本身可能有志向，就咁樣畀你搞到衰哂！
0
人在做，天在看
行業：資訊科技
職位：基層職員
性別：女性
年齡：25 – 34歲
我哋公司有對「天造地設」嘅情侶，我諗佢哋都唔會搵到另外一個更加夾嘅。佢哋基本上性格一樣，就係衰格。女嗰位係Senior，成日喺度搞屎棍，所有嘢只要係佢負責都會特別難完成，每日都瘋狂打倒上1秒嘅自己，佢啲準則一時一樣！男嗰個就係經理經常性扮好人，點解我哋咁肯定佢係扮，只要你做過一年以上就知，咁耐以嚟都見唔到有人喺佢手上升職，除咗女主角。全部都係頂唔順辭職，然後就換新血，年終評審啲分大家全部都好低。我自己都準備走，只可以祝呢間公司好運。佢哋兩個一人仲喺度，公司注定冇前途。
這件事對你的公司帶來甚麼影響？
其實只要大家做咗一陣都會知佢哋兩個係啲咩人，都只能怪我哋冇膽同大老闆講，有得佢哋兩個呼風喚雨。佢哋兩個留喺度就係公司最大嘅經濟損失。
請問你能接受公司存在着這種關係嗎？為甚麼？
點解升職唔係靠工作表現，而係靠關係上位，兩個仲要喺度搞屎棍，所以絕對唔會認同呢段關係。
你要做公司的「模範情侶」還是「狗男女」？
看過讀者們的分享，假若男/女朋友也在同公司的你，會不會感到擔憂？其實辦公室戀愛本身不是一件壞事，若在工作環境中多注一點，盡量避免做一些讓人誤解的事，辦公室戀愛也可以是好好的，看看我們以下的分享的注意事項，希望你可以了解更多：
1. 別把私事帶到公司
情侶之間有爭吵絕對少不免。但千萬別把爭吵內容帶到工作裏面。一來欠缺公正，二來招人話柄，甚至影響雙方和同事的業績。
2. 處事保持客觀理性
若你們是上司和下屬的關係，作為上司的你，必須要一視同仁。如果情人和其他同事犯一樣錯時，必須按照規定解決，雖然比較難作出決定，但如果不公事公辦的話，以後可能也很難讓人信服。
3. 別讓關係影響效率
在同一間公司工作會讓你們有更多的話題，但遇到什麼好的壞的都討論一番的話，不但影響工作效率，如果在討論期間產生分歧的話，還會影響你們的關係。
4. 不要過分張揚
辦公室戀情打得火熱時，自己的愚蠢很容易讓大家一覽無遺。若不想成為別人的茶餘飯後話題，甚至攻擊對象。盡量把你們的濃烈情感收好，公然放閃只會招致同事的反感。
5. 如非必要避免公開
有時候就算你們雙方都懂得克制，好好做事，也總有一些看你們不順眼的同事說三道四。考慮到太壓迫自己會影響戀情，自然地讓關係曝光會是比較建議的辦法。
結語
雖然說日久生情，但日久亦見人心。世界在變人也會變，有時變的是別人，也可能是自己。無論如何變遷，也希望是好的變遷。色字頭上一把刀，只會對他人造成傷害。
Back 