《流水年華》人生短暫，珍惜當下 | 12月07號哈囉好工週刊

「一分耕耘，一分收穫」。喺打工仔嘅職業生涯入邊，大家用咗好多時間喺工作上邊去贏取事業上嘅競爭，不斷攀升。呢啲努力可能令我哋忘記或者放棄咗一啲對自己好重要嘅嘢。今期《哈囉好工週刊》讀者會分享佢哋嘅職業生涯中嘅得失，希望大家鍾意。

化名：富哥
行業：餐飲
職位：老闆
性別：男
年齡：35 – 44歲

職業生涯當中你最大嘅遺憾係咩？
冇注重自己嘅家人，痛失咗自己嘅骨肉。嗰陣啱啱開始創業，老婆懷孕，我曾經同老婆講過唔好要BB住，我想專注目前嘅事業，搞好盤生意先，嗰陣大家仲後生，以後大把機會。老婆聽到好唔開心，同我嘈咗一排；後來發展到我阿爸阿媽，我岳父岳母都一齊反對我。而我老婆都日日同我嘈到底要唔要個BB，大家心情都好抑鬱。之後有一日又係度嘈嗰陣，老婆下體突然流血，作流產。嗰個時候，我先突然意識到我要失去BB嘅徬徨同不捨。最後可能係個天比我嘅懲罰，個BB真係保唔住，我痛失咗自己嘅骨肉。

職業生涯當中你最大嘅收穫係咩？
我職業生涯中，最大收穫係自己一手一腳創立咗而家嘅公司。而家公司已經基本算穩定，上咗軌道，對屋企人嘅生活質素有咗保障，雖然唔係話大富大貴，但起碼唔使節衣縮食，老婆鍾意啲咩，我都會買，唔使諗。

如果時光可以倒流，你會做同樣嘅決定嗎？
如果可以倒流，或者我未必會有而家呢間公司，BB到而家都係我心中嘅一條刺。

對於啱啱開始職業生涯嘅打工仔，你有咩建議畀佢哋？
當人生規劃同職場事業規劃有衝突嘅時候，唔好輕易放棄人生規劃。事業唔係一切，人生規劃更重要。唔好好似我咁因為事業同人生規劃有衝突就諗都唔諗放棄自己嘅親生骨肉。

1

化名：Jackson
行業：酒店營運
職位：中層管理者
性別：男
年齡：35 – 44歲

職業生涯當中你最大嘅遺憾係咩？
以前細個未畢業就開始投身社會，家境清貧，好想快啲揾錢供養父母，所以當啲大學同學都係度玩，周圍去旅遊，吃喝玩樂嘅時候，我就去做兼職，而且大四實習嘅時候就已經揾到份full time，一畢業冇休息過就直接踏入正職生涯。投身職場嘅時候，為咗上位，博命OT，週末都返公司做嘢。由於大部分時間都係為咗工作，導致冇時間認識朋友，識女仔，更加冇拍拖。我好遺憾自己錯過咗好多青春同姻緣。

職業生涯當中你最大嘅收穫係咩？
職業生涯中最大嘅收穫係經過自己嘅努力同付出，終於升到今時今日嘅地位。唔使再點樣睇其他人面色，輪到人哋睇我面色。而且有可觀嘅收入，幫父母屋企裝修，添置好多便利、方便老人家嘅傢俱同設計，得閒請父母去世界各地旅遊，帶佢哋睇世界。

如果時光可以倒流，你會做同樣嘅決定嗎？
雖然錯過好多青春，但如果時光倒流，我都會做同樣嘅決定，最少我而家報答到屋企人嘅栽培。更何況就算我唔努力工作我都未必可能得到女朋友，所以而家都算唔錯。

對於啱啱開始職業生涯嘅打工仔，你有咩建議畀佢哋？
喺兼顧工作嘅同時，要兼顧正常嘅社交生活，做好work life balance，因為職場生涯雖然要做好，但人生規劃一樣要做好，事業只係整個人生嘅一部分，唔好為工作而浪費自己所有嘅青春。
化名：微塵
行業：博彩娛樂
職位：基層職員
性別：男
年齡：35 – 44歲

職業生涯當中你最大嘅遺憾係咩？
最大嘅遺憾就係自己錯失咗升職機會。曾經有一次，我上司揾我傾，話睇好我，覺得我有前途，想推薦我上位升職，但自己當時好似鬼上身定癡咗線，好唔識諗，覺得目前幾好，唔想作改變，留返喺舒適圈好過去冒險，我竟然好傻咁婉拒咗上司，然後眼白白睇住個機會畀咗其他人。後來自己不斷反思，好後悔，每次諗起都覺得自己好蠢，錯失咗好嘅發展機會，如果當初把握機會，事業就絕對唔止得目前咁嘅成果。

職業生涯當中你最大嘅收穫係咩？
一路以來，喺每一間公司嘅工作都好好彩，識到好多朋友。好多人都話，職場好多競爭對手，爾虞我詐。但我好幸運，好多同事都同我傾得埋，好friend。而且離職之後，都可以keep住聯絡，得閒出嚟見個面，吹下水。每一份工都收穫到一班好朋友。

如果時光可以倒流，你會做同樣嘅決定嗎？
如果時光可以倒流，我會選擇做答應上司嘅升職邀請，雖然而家生活都唔錯，但都會想睇吓改變咗嘅自己會變成點。

對於啱啱開始職業生涯嘅打工仔，你有咩建議畀佢哋？
係職場生涯裡面，總會遇上一兩次機會。假如你遇到呢啲機會，一定要果斷，勇敢咁捉住機會。機會唔係成日都有，轉眼即逝，而且你唔把握住，機會就會畀咗其他人，到時冇後悔藥食。

化名：Ken
行業：資訊科技
職位：基層職員
性別：男
年齡：35 – 44歲

職業生涯當中你最大嘅遺憾係咩？
好後悔為一間公司仆心仆命咁多年。自己多年嚟一直都好努力咁付出，上司睇唔到其實都冇問題，最多唔升職。但上司信埋佢身邊啲小人嘅說話，一直屈我砌我生豬肉，真係覺得好失望。講真嗰句自己開公司都未必有咁勤力，認真做嘅嘢一句都冇讚，小小嘅錯處就放大嚟講。所以最後見到身邊啲同事有幾衰幾差都冇所謂啦，上司只重用小人，就由佢信落去啦，唯一係覺得自己白費一番心機去幫公司做好條數。繼而犧牲咗自己嘅健康同埋娛樂。

職業生涯當中你最大嘅收穫係咩？
經驗囉，好多人做到退休都未必有呢啲經驗，喺一間公司就吸收到咁多經驗都算係唔錯，以後防備小人能力會好啲。

如果時光可以倒流，你會做同樣嘅決定嗎？
都唔會嘅，就算返去以前都會咁努力做，努力都係代表着自己人格，就算上司幾衰，最多係失望同唔再為佢免費加班，返工時間繼續努力囉。

對於啱啱開始職業生涯嘅打工仔，你有咩建議畀佢哋？
要適當選擇去付出。如果上司對你好，呢啲嘢雙向嘅，你都可以盡力為佢做嘢。如果唔係，就睇你自己造化，一係轉公司，一係唔好好似我咁仆心仆命囉，人生中值得仆心仆命嘅嘢仲有好多。化名：Loser
行業：娛樂博彩
職位：中層管理者
性別：男
年齡：35 – 44歲

職業生涯當中你最大嘅遺憾係咩？
以前幼稚唔識諗，喺職場中亂搞男女關係，最後導致斷送自己前途同婚姻。本來有個美滿嘅婚姻，但自己衰花心同貪心，同公司有個女同事日對夜對，對出感情，發展地下情，搞婚外情。自己得一想二，最後東窗事發，公司其他同事發現咗，我老婆都發現我出軌嘅事，搞到喺屋企公司都冇面見人。最後自己辭職，放棄咗本來好有發展潛力嘅工作。而我老婆都因為我出軌，同我離婚。一切都挽回唔到，包括我嘅工作，我嘅名聲，我嘅家庭。

職業生涯當中你最大嘅收穫係咩？
收穫就係我從出軌一事得到教訓，開始生性做人，學識自律。雖然自己離過婚，我都洗心革面，修心養性，重新出發，希望可以再次同自己愛嘅人組織家庭。

如果時光可以倒流，你會做同樣嘅決定嗎？
一定會改啦，錯失嘅實在太多啦。

對於啱啱開始職業生涯嘅打工仔，你有咩建議畀佢哋？
我建議佢哋點都好，唔好搞職場戀愛，無論有冇結果，拍拖定結婚，身邊嘅同事都會指指點點。如果結婚，好結果都算，如果分手或離婚收場，個個同事好似食花生咁睇你啲家事，搞到公私不分，影響工作。澳門好細㗎咋，轉公司之後啲同事都唔知點解會知道呢件事。

化名：Hihi
行業：廣告/傳媒
職位：老闆
性別：男
年齡：54- 65歲

職業生涯當中你最大嘅遺憾係咩？
好後悔話走咗幾個得力助手，呢件事直到我而家準備退休都刻骨銘心。以前因為覺得佢哋唔夠聰明，日日鬧佢哋，自己嗰陣後生又好火，講嘢都唔留情，嗰陣應該傷咗佢哋好多，而家佢哋喺街見到我都掉頭走。講真自己嗰陣都冇乜後悔，直到後嚟請極啲人雖然聰明啲，但係睇得出一啲都唔用心，唔會幫你諗嗰種。而家都只係想請佢哋飲餐茶，傾吓以前。不過我諗佢哋都唔想見到我。

職業生涯當中你最大嘅收穫係咩？
想當年有一班同事幫我打江山，雖然喺澳門唔算出名，但最少公司生意都一直唔錯，自己同屋企人都生活得唔錯。同埋請過咁多個員工，其實對我嚟講都係一個好大嘅經驗。而家就算請到唔好嘅員工都唔會太計較，因為強求唔到，學識隨緣。

如果時光可以倒流，你會做同樣嘅決定嗎？
會做唔同嘅決定，始終自己嗰陣把口太差，點都係自己唔啱。

對於啱啱開始職業生涯嘅打工仔，你有咩建議畀佢哋？
得饒人處且饒人，同事有時做錯嘢，佢自己未必係想嘅。而且可能因為太忙先做錯。同埋要學識體諒，因為自己都有機會忙有機會做錯，長期用鬧人去解決只會搞到公司氣氛好負面。
化名：阿陳
行業：物流運輸
職位：基層職員
性別：男
年齡：45 – 54歲

職業生涯當中你最大嘅遺憾係咩？
人生最後悔就係以前好幼稚掛住玩亂咁辭職。以前啱啱畢業，聽住同期同學講，趁後生周圍玩，唔係到時老咗就冇能力玩。日日大癲大廢，工作有咩唔順心就即刻辭職。到咗而家定咗落嚟開始想努力，發現張履歷表畀自己整到花晒，而家好後悔自己當初亂咁嚟，想轉公司都冇人請。

職業生涯當中你最大嘅收穫係咩？
而家喺我職業生涯中，最大嘅收穫係金錢。我賺嘅全部都系汗水錢、辛苦錢。不過經過咁多年好似蜜蜂咁勤力做嘢，我終於買到樓。以前個個月租一間好細嘅單位一家四口住，後來終於買到dream house, 擁有自己嘅單位，唔使再寄人籬下，擔心屋主加租或要逼遷。

如果時光可以倒流，你會做同樣嘅決定嗎？
如果時光倒流，我會做唔同嘅事，做唔同嘅決定。

對於啱啱開始職業生涯嘅打工仔，你有咩建議畀佢哋？
我會建議佢哋腳踏實地做嘢，唔好投機取巧，唔好怕辛苦。唔辛苦邊度得世間財。天道酬勤，上天會對勤力嘅人畀相應嘅回報。

 
化名：Yan
行業：廣告/傳媒
職位：老闆
性別：女
年齡：34 – 44 歲

職業生涯當中你最大嘅遺憾係咩？
最大嘅遺憾就係自己冇聽屋企人勸，自己辭咗職，走去開咗間廣告公司。以前啱啱出嚟做嘢，覺得好辛苦，覺得公司有好多不公，換咗幾間公司都做唔長，最後自己決定開公司。當時屋企人好反對，覺得我太年輕，諗得太簡單，我自己仲要周圍問朋友借錢開公司。但當真係開咗公司，發現自己能力不足，仲衰過打工，打份工起碼每個月有糧出，而家公司回唔到本，唔知道可以撐幾耐，公司關門又負資產，唔關門又負資產。

職業生涯當中你最大嘅收穫係咩？
最大嘅收穫係學會創業嘅艱辛，學到好多廣告之外嘅技能，例如財務記帳，銷售，行政等。而且意識到打工唔係要人哋迎合你，而係自己要融入環境。真心覺得打工好過自己做老闆。

如果時光可以倒流，你會做同樣嘅決定嗎？
如果時光倒流，我一定唔會開公司，老實講真係超出自己能力範圍。

對於啱啱開始職業生涯嘅打工仔，你有咩建議畀佢哋？
我覺得打工仔應該腳踏實地，唔好以為換過幾份工，或者受咗上司氣，就覺得自己做老闆係解脫。其實做老闆唔簡單，壓力仲大過打工。如果一定要自己做老闆嘅話，建議打多幾年工先，累積經驗，同身邊同事，上司學習下，以後自己做老闆都可以運用到。

結語
每一件事物或者方向嘅價值，喺每一個人心目中都有所不同，每個人嘅心目中都有唔同嘅目標。但可以肯定嘅係，去到最後，唔同嘅目標同方向都會成為我哋嘅記憶，帶嚟唔同嘅情感。希望今期《哈囉好工週刊》嘅內容，推動你繼續為自己同家人創造美好嘅回憶。