新聞內容 
《望子成龍，望女成鳳》| 06月22號哈囉好工週刊
- 2020-06-29
世上有邊個父母會唔希望自己嘅仔女一切順利，甚至生活得比自己更好？今期《哈囉好工週刊》會有讀者分享佢哋對自己仔女有咩期望，一齊睇吓啦！
受訪職場父母認為自己係一個望子成龍，望女成鳳嘅家長嗎？
受訪職場父母對仔女有咩期望？
學歷
① 學會一技之長，養活自己
② 考到想入嘅大學，畢業揾份好工
③ 出國留學
事業
① 做嘢負責任、對公司忠誠、尊敬上司、愛護下屬
② 冇所謂，做得開心就得
③ 做到高層，工資同權力都高
姻緣
① 彼此相愛，生活美滿就可以
② 有擔當，努力照顧佢嘅家庭
③ 娶/嫁個有錢人，下半世唔洗憂
人生
① 做人善良安分，為別人著想
② 身體健康，開心快樂就好
③ 冇咩期望，自己自由發展
唔難想像，大部份受訪者都希望自己嘅仔女可以成龍成鳳，出人頭地。而值得慶幸受訪者嘅期望都相對「貼地」，冇成為其他人口中嘅「怪獸家長」，要記住父母嘅角色係輔助仔女成長，過分嘅迫壓只會得不償失。
受訪職場父母會希望仔女去達成佢哋達唔到嘅願望？
唔希望嘅原因係：
希望嘅原因係：
無論希望達成與否，受訪者嘅出發點都非常好。76%嘅人表示尊重仔女嘅自由，唔希望強加個人意願到仔女身上。即使希望達成都係因為佢哋嘅願望出發點係好，希望仔女可以達成。父母嘅愛非常偉大，照顧仔女已經非常費心，仲要辛苦返工賺錢，希望大家繼續睇後邊職場父母同打工仔嘅分享，了解父母嘅愛同期望。
職場仔女留言站
女皇BB
子女：暫無
行業：行政/辦公室助理
職位：基層職員
性別：女
年齡：18 – 24歲
你覺得擁有同達到啲咩先算成功？
以我嘅價值觀，我覺得擁有財富同社會地位先算成功，有財富同社會地位先可以畀我一個自主嘅人生，可以想要咩就買咩，唔會有經濟負擔，而且可以提早退休，唔使睇公司上司同老闆嘅眉毛眼額。再講，有社會地位之後，可以好有面子，成為成功人士，上流社會人士。
你覺得你達到你父母對你嘅期望嗎？
未，因為喺我父母心目中，自己嘅仔女永遠都唔會長大，父母永遠都覺得我唔夠成熟。所以我父母一直都覺得我咩事都做唔好，成對黑白天鵝咁，「日哦夜哦」，喺度話教我做人處事要點樣做，成日都好似唔滿意我咁。所以我好肯定我達唔到父母嘅期望。
窮果龍
子女：暫無
行業：地產
職位：基層職員
性別：男
年齡：25 – 34歲
你覺得擁有同達到啲咩先算成功？
就我嚟講，我覺得擁有自己嘅公司而且公司成為收入盈利穩定嘅企業先算喺成功。因為我自己啱啱發展咗一個副業：一間網上服裝店。自己創業做老闆，等網上服裝店穩定咗後，到時我可以辭職，專心搞服裝店，然後公司可以發大嚟搞。
你覺得你達到你父母對你嘅期望嗎？
我覺得我達到啦，因為父母對我嘅期望只係想我可以自給自足，養活自己，然後可以開心快樂咁生活就可以。我覺得宜家過得好滿足、好開心、好充實，而且事業都過得去。我父母都好放心我，而且好滿意我嘅成就，所以我覺得我已經達到咗父母對我嘅期望。
Jacky仔
子女：暫無
行業：零售/批發
職位：基層職員
性別：男
年齡：25 – 34歲
你覺得擁有同達到啲咩先算成功？
我認為擁有幸福家庭同可以令到屋企人無憂無慮咁生活先算成功。因為我從小喺破碎家庭長大，由細個開始一直渴望自己可以組成一個幸福家庭，然後同屋企人可以開心健康咁生活落去。人生可以有個好家庭，工作嗰啲都係其次。
你覺得你達到你父母對你嘅期望嗎？
我覺得未達到，因為父母好期望我可以成家立室，然後生個孫畀佢，但我其實好想同我老婆二人世界，而且現階段冇錢，暫時唔想生BB住，所以父母成日喺度催我生B，係咁對我進行「思想教育」，不斷灌輸我要仔女趁嫩生，成日話趁佢哋仲有力氣幫手凑BB，就快啲生。
職場父母留言站
Auntie花
子女：一個30歲嘅女
行業：廣告/傳媒
職位：中層管理者
性別：女
年齡：65歲或以上
你覺得擁有同達到啲咩先算成功？
我覺得我個女開心，快樂，可以按照自己嘅意願，自由自在咁生活，成為一個獨立嘅女人就算成功。其實我對我個女冇咩要求，最緊要佢可以平平安安就可以。女人唔一定要結婚，唔一定要男人照顧同依靠男人，最緊要自己可以獨立，照顧到自己，過啲自己想過嘅生活，就叫成功。
你覺得你子女達到你嘅期望嗎？
我覺得我個女已經達到我嘅期望，因為我個女已經成為一個獨立嘅女人，佢工作上已經做到經理，帶領團隊，受到老闆嘅認可同信任。放工後，佢自己去參加好多活動，有時又去健身，生活多姿多彩，冇家庭同子女嘅負擔，過得都好開心。
呀叔
子女：一個25歲嘅仔
行業：銀行和金融
職位：中層管理者
性別：男
年齡：55- 64歲
你覺得擁有同達到啲咩先算成功？
我覺得結到婚買到樓就算係成功。因為我覺得伴侶對一個人嘅人生至關重要，因為父母唔可以陪伴你一輩子，只有你自己嘅家庭，先可以陪伴到你一輩子，所以組成自己嘅家庭先叫完整嘅人生。然後自己有經濟能力買到樓，唔使挨貴租，寄人籬下，同屋企人住係屬於自己嘅安樂窩，咁就係成功人生。
你覺得你子女達到你嘅期望嗎？
個仔仲未達到我嘅期望，因為我個仔仲係單身，女朋友都未見影，都唔知道幾時先可以結婚。而且我個仔唔上進，讀書唔上進，揾工又唔上進，工作又唔上進，份工都做唔夠半年就辭職唔做，冇離定性，好靠唔住，所以好擔心佢日後嘅日子，連自己都養唔到，唔好話養屋企人。
魚柳包走醬
子女：一個10歲嘅女
行業：公務員
職位：基層職員
性別：男
年齡：35 – 44歲
你覺得擁有同達到啲咩先算成功？
而家嘅目標變哂，慢慢向自已小朋友方向發展，只要我嘅小朋友擁有善良嘅心，能夠成為對社會有貢獻嘅人就算成功。因為我覺得做一個善良嘅人最重要，如果失去善良嘅心，外在嘅嘢幾成功都冇用。而且我同屋企人都係做紀律部隊，會覺得自己應該對社會有一份責任感同正義感，希望做到好榜樣畀自已小朋友睇啦。
你覺得你子女達到你嘅期望嗎？
我嘅小朋友仲細，未來係點未知道，但我覺得目前我嘅小朋友已經達到我現階段嘅期望。因為我希望我小朋友學識彈鋼琴，而家我小朋友已經鋼琴評核考到6級，我已經好恩惠。
子承父業？順其自然！
●受訪職場父母會希望仔女做一樣嘅職業嗎？
59% 順其自然
22% 唔知道，冇諗過
13% 唔希望
6% 希望
●希望嘅原因係：
56% 我可以用前輩嘅身份幫佢哋，令佢哋有更好嘅發展
22% 我嘅職業好賺錢，我想仔女入行
11% 咁樣就可以多啲共同話題
11% 我嘅職業工作壓力唔大
●唔希望嘅原因係：
53% 想佢哋有更好嘅發展
26% 想佢哋走同我唔一樣嘅路
16% 我嘅職業太辛苦，唔想佢哋受苦
5% 我嘅職業賺得小，唔想佢哋窮
●會介意仔女做嘅工同自己唔一樣嗎？
40% 唔會，尊重佢哋嘅決定
30% 唔會，我嘅職業未必適合
26% 會，但冇辦法，我唔會控制佢哋
4% 會，我會好唔開心
職場父母嘅憂慮
為咗仔女可以成龍成鳳，受訪職場父母會：
63% 仔女有咩物質需求，都盡力滿足
51% 畀仔女上興趣班，培養興趣同技能
30% 經常同仔女談心，關注佢哋身心健康
21% 帶仔女去各種補習班，力求成績拔尖
17% 經常陪伴，照顧起居飲食，如有需要會辭工
10% 為咗讀到名校，搬屋，甚至移民都可以
有冇幫仔女計劃過畢業後做咩工作？
68% 有計劃
19% 冇計劃
13% 唔知道
會唔會用自己嘅人際關係幫仔女搵工？
69% 會，幫到就一定會幫
16% 會，擔心仔女搵唔到工
15% 唔會，想仔女靠自己能力搵
最唔希望仔女去做啲咩行業？
Top 1 監控/保安
Top 2 餐飲
Top 3 交通運輸
Top 4 地產
Top 5 批發及零售
總括而然，仔女點先稱得上叫成功？
59% 做人有擔當，照顧到自己同身邊嘅人
50% 身體健康，開心快樂
48% 會一技之長，善用專長養活自己
43% 獨當一面，喺社會做個有用嘅人
16% 做到專業人士，賺好多錢，生活無憂
返回 