新聞內容 
《我的心酸你不知》老闆訴苦記︱6月3號哈囉好工週刊火熱登場
- 2019-06-04
- https://mp.weixin.qq.com/s/spWsr_SUI4Vb5yru8cDKQg
2019.6.3 • 周一
導讀：不難發現，絕大部份公司的階級管理都是呈金字塔狀：階級越高，人數越少。上級一般都是總裁，經理和主管，然後才到普通職員。我們經常都會聽到普通職員對上級的不滿，在我們《哈囉好工週刊》亦分享過。但我們往往很難聽到自己老闆的感受。今期《哈囉好工週刊》分享老闆們的告白，讓你嘗試了解他們的世界。
化名：誰能體諒我的雨天
行業：銀行和金融
職位：高層管理者
性別：女性
年齡：35 – 44歲
身為老闆，準時返工放工可以話係冇可能，因為好多時都要做晒啲嘢先可以走。啲大客搵你，就算你幾唔舒服都係要覆。好多時候仲要面對員工犯嘅錯，小錯就算，大錯仲要去幫員工補鑊。雖然有時佢哋都唔想犯錯，但係有時佢哋犯啲好低級嘅錯誤真係好難頂，明明都教咗咁多次唔知點解可以都成日犯。佢哋如果有咩唔滿意就可以圍威喂講我壞話，咁佢哋成日錯埋晒啲無謂嘢，我又可以向邊個發洩？唉……
後來，員工知道了這事嗎？你認為這事員工知道和不知道有分別嗎？
唔會知，不過就算知同唔知都冇分別，佢哋都唔會體諒老闆嘅苦況。
0
化名：強總
行業：批發及零售
職位：高層管理者
性別：男性
年齡：35 – 44歲
之前畀兩個客拖咗條數拖咗成年，搞到公司嘅資金流動有啲問題。不過就算咁艱難我都堅持頂住間公司，用盡辦法唔使炒任何一位員工，因為我都明白公司每一位員工都有好好咁為公司拼搏。當時我幾乎用晒自己啲存款，連親戚甚至外母都搵齊晒。呢啲事員工唔會體諒其實我會明白，但係有時聽到佢哋連咖啡換咗牌子都埋怨真係好心痛。
後來，員工知道了這事嗎？你認為這事員工知道和不知道有分別嗎？
應該有啲人會知，不過其實知都冇用，根本冇分別，佢哋都係打份工啫。
化名：六畜無害
行業：娛樂博彩
職位：高層管理者
性別：男性
年齡：35 – 44歲
做老闆其中一樣最慘就係無啦啦畀人鬧咗都唔知。基層員工有時想要啲咩，我哋係完全唔知。有時可能係理由太無稽，又或者係某部門嘅上司要整靚條數。基層員工嘅想法要去到我嗰邊其實要經過好多個人。然而我每次知道呢啲消息都係喺廁所入邊，聽到佢哋喺出邊講我壞話，有時鬧到好陰毒添。不過我明白佢哋係受苦嗰一層，有時真係啲主管太待薄佢哋。而我做到嘅事就係畀啲同事沮咒完話完，再諗辦法對佢哋好啲。
後來，員工知道了這事嗎？你認為這事員工知道和不知道有分別嗎？
梗係唔知啦，知嘅話我都唔會繼續畀人鬧，真係哭笑不得。
0
化名：F
行業：酒店營運
職位：高層管理者
性別：男性
年齡：45 – 54歲
我係部門入邊最大嘅，樓下的確係有好多同事。雖然係好多人嘅老闆，但其實大老闆有啲咩方案，我哋都係要跟。我嘅角色只係將老闆嘅意見發揮得最好。但其實你哋話老闆經常令到你哋有壓力，你哋嘅壓力來源都只係單方面。我哋首先要受大老闆氣，假如下屬做唔到成績，點樣畀大老闆怪責只有我知；一啲決策出咗嚟，我嘅角色只係頒布，但係下屬全部都會覺得係我冇嘢搵嘢嚟做，有咩不滿都係話我，苦不堪言；仲有就係同其他部門對立，一啲部門上嘅決策，可能會大量增加其他部門嘅工作量，令到其他部門不滿。我嘅角色就係要同其他部門協調，用最少嘅人力物力去解決大老闆嘅需求。其實就算係我，做得唔好都係會畀人炒，所以唔好以為高職位就好輕鬆。能力越大，責任越大。
後來，員工知道了這事嗎？你認為這事員工知道和不知道有分別嗎？
冇可能知，正常見到我都有壓力，唔會係我面前講真話。希望你哋喺呢度睇到啦。
0
化名：蔡小姐
行業：會議展覽
職位：高層管理者
性別：女性
年齡：35 – 44歲
作為老細，公司基本上就會同你二為一體。就算你係去旅行，你個電話都係會不停咁響。基於職位同責任，我一有時間就會馬上覆佢哋，基本上都係好似返緊工咁，不斷回覆啲客同埋下屬，只不過係工作地點變咗。最記得有一次親戚過咗身，咁啱嗰陣跟緊大客啲嘢。儀式進行緊嗰陣我都要不斷復電話，最後親戚屋企人都畀晒說話我聽。我返到去忍唔住喊咗出嚟，其實我都好大壓力㗎……
後來，員工知道了這事嗎？你認為這事員工知道和不知道有分別嗎？
佢哋知㗎，不過有啲決策上嘅嘢，或者同大客溝通，佢哋有心冇力，只可以自己辛苦搞掂佢。
化名：Kirin
行業：行政／辦公室助理
職位：高層管理者
性別：女性
年齡：55 – 64歲
公司規模越嚟越大，就打算安排一個經理位置整頓公司。本來冇打算喺出邊請，諗住內部調升嘅。但係我觀察完一輪公司嘅高層員工，我認為佢哋嘅工作態度同盡責度都唔適合，升咗上去只會一樣咁亂，甚至更差。所以最後喺外面請咗個返嚟。點知啲高層老員工喺度怨聲載道，個個都話我不近人情，唔重用佢哋，做嘢越嚟越唔積極，越嚟越懶，仲畀面色我睇，行過我面前招呼都唔打個。
後來，員工知道了這事嗎？你認為這事員工知道和不知道有分別嗎？
我諗知道都冇分別，因為佢哋個心已經覺得我係唔重用佢哋，只會覺得係藉口。
0
化名：壞人
行業：批發及零售
職位：高層管理者
性別：男性
年齡：35 – 44歲
之前有兩個員工互相包庇，定期偷公司啲貨返屋企，搞到公司損失咗好多，去到我最後發現已經太遲。呢件事搞到公司蝕咗好多錢，不過都只可以怪自己睇漏眼，揀錯人。就因為嗰一年蝕咁多錢，第二年我就喺公司推行舉報制，凡舉報者都會有獎勵。雖然效果好好，但係就搞到啲同事返工提心吊膽，冇咗以前嗰種溫暖嘅味道。搞到我自己好似做咗衰人，想喺公司搞風搞雨咁。唉，老闆難做啊……
後來，員工知道了這事嗎？你認為這事員工知道和不知道有分別嗎？
唔知佢哋知唔知，反正佢哋點都會覺得我係衰人。
0
化名：牛奶仔
行業：餐飲
職位：高層管理者
性別：男性
年齡：35 – 44歲
之前天鴿颱風令到我鋪頭損失慘重，好多嘢都唔要得，細菌又多又臭，清潔完仲要重新裝修。其實當時候我諗住直接執咗佢，但睇住有啲員工啱啱先組織家庭，仲有啲老員工由我老竇嗰一代開始就已經係餐廳幫手，直到我接手間餐廳之後佢哋都唔吝惜咁教我做嘢，所以為咗個招牌同埋班出心出力嘅員工，就算唔係個個月賺錢我都繼續撐落去，直到佢上年又嚟多個山竹，真係頂唔住，最後都係做唔落去。為咗保住自己嘅員工搞到自己蝕咗好多錢。
後來，員工知道了這事嗎？你認為這事員工知道和不知道有分別嗎？
知，其實佢哋都知道我撐得好辛苦，知道我嘅難處。
0
化名：Car Car
行業：批發及零售
職位：高層管理者
性別：男性
年齡：35 – 44歲
做老細嘅，當然希望所有嘢都做到最好。但同時我都會明白個極限去到邊，唔會想做死班員工。無奈嘅係，同事嘅底線永遠都唔會同你一樣。當你為咗佢哋降低條底線，佢哋同時會再降低自己條底線。好似我咁，就成日畀班同事背後話我吹毛求疵，雞蛋裏挑骨頭。佢哋唔會明白你有好多嘢其實發現到都冇講。同埋做得越耐，係會越嚟越討厭聽到人哋講對唔住。其實呢句野冇用㗎，講完下次又做錯，明明所有事都有晒SOP，不如用呢啲時間反省下，唔好話極都做錯，然後就畀個衰人角色我做。唔話就不斷做錯，話佢哋一句都會覺得我嚴苛，無奈……
後來，員工知道了這事嗎？你認為這事員工知道和不知道有分別嗎？
知道㗎，但係冇分別，反正都係繼續不斷做錯。
化名：霞姨
行業：餐飲
職位：高層管理者
性別：女性
年齡：35 – 44歲
其實好希望有時員工可以一齊共同進退，為多啲公司諗下。好似我哋做餐飲，成日都會遇到啲好麻煩嘅客人。好似上個月咁有個客人訂咗我哋50個飯盒，我費事啲員工埋怨，為咗呢張單自己一早返嚟準備，準備好飯盒準備送過去嗰時個客先打嚟話活動取消唔要啲飯盒。咁我哋就話唔可以咁，因為已經準備晒，點知佢直接cut我電話就失咗蹤。非常無奈，只可以硬食。因為嗰一款飯唔可以放得超過一個鐘，搞到要迫所有員工幫手一齊平價sell啲飯盒出去。做完之後員工又埋怨我，嗰日嘅業績係連成本都追唔返，員工放工又有面色睇，究竟我錯咗啲咩……
後來，員工知道了這事嗎？你認為這事員工知道和不知道有分別嗎？
大家都知呀，但係覺得唔關佢哋事咋嘛……
0
化名：BB
行業：廣告／傳媒
職位：高層管理者
性別：女性
年齡：35 – 44歲
成日都會聽到啲朋友話我開店賺大錢，出名嗰陣佢哋會覺得你只係好彩，而啱啱開始創業嗰陣幾辛苦佢哋根本唔會知。開始創業嗰個階段，日日係咁追客，追到發高燒都唔可以抖，因為你約咗個客開會你就點都要到場，好多時候都覺得自己做唔掂，好想放棄，都諗過自己係唔適合創業，點解自己咁失敗。舖位、人工、燈油火蠟樣樣都係錢，但生意就得咁少，好大壓力，心好灰，好彩我哋兩公婆大家理念相同，一直努力捱落去，先做到而家咁有少少名氣。希望大家唔好忽略咗老闆開拓嗰部份，唔係咁易㗎。
後來，員工知道了這事嗎？你認為這事員工知道和不知道有分別嗎？
唔知道，因為我從來都唔會同佢哋講創業嘅辛酸。
0
化名：晶晶
行業：批發及零售
職位：高層管理者
性別：女性
年齡：35 – 44歲
之前下屬購買物資嗰陣竟然用次貨充好貨，當我發現嗰陣啲貨已經流咗一半出去，然後當然要回收批貨啦！好彩啲店舖未開始出售嗰批次貨，最後都攞得返晒返嚟銷毀。只係睇漏一次，我就冇咗一個人手，一大批貨，同埋好多客戶嘅信任。做老闆其實唯一好處只係唔使受上司氣，其他任何嘢都唔好，做嘅所有嘢風險都好大，所以唔好以為老闆好好做，淨係喺度鬧人，背後做咗好多嘢唔話你聽啫。
後來，員工知道了這事嗎？你認為這事員工知道和不知道有分別嗎？
我啲員工唔會知道我嘅努力，只係知道我啲火有幾大。
結語
我們希望以上的分享讓你們能夠了解管理者和上司都有他們的煩惱和壓力。因為職級的關係，他們只能用最短的時間解決問題而無法作任何投訴或者沉思。我們希望今期的內容能夠修補員工和老闆之間的分歧，讓更多的員工能夠了解一下他們的老闆，從而改善工作環境。
返回 