《平生不作虧心事 夜半敲門也不驚(2)》| 08月31號哈囉好工週刊

歡迎嚟到第二屆嘅《哈囉好工週刊》鬼故特輯，希望今期嘅內容可以令你更了解澳門呢個小城，聽吓令你嚇破膽嘅鬼故事，帶畀你一個有趣嘅農曆七月！一齊睇吓喇喂~

化名：萍姐怕怕

行業：行政/辦公室助理
職位：基層職員
性別：女
年齡：25-34歲

我哋公司一層有三個單位，咁我哋只租咗兩個單位作使用，而剩底嘅單位最近就搬遷，咁就吉咗出嚟。我同事係做前台嘅，個位剛好睇到對面吉咗嘅單位門口。嗰日咁啱有好多文件要整理，咁我同事好專心咁做，一直做到好夜，然後眼尾係咁見到有人行過，佢開頭以為有人嚟睇 office，仲自己心諗覺得隔離個 office 做咩咁受歡迎，咁夜都有人嚟睇。話時話，過咗成個鐘，佢都唔見有人出嚟就好奇行去出望吓對面門口，發現裡面完全冇人，亦完全冇開燈，但隱約聽到有啲跑步嘅聲音。佢即刻嚇到衝返入自己公司，嗱嗱臨擺番好啲嘢，即刻衝出公司。第二日番嚟見到佢黑眼圈好大，睇嚟驚咗成晚。

你相信呢件事嗎？
我信。因為我有信仰，我信有神同鬼。而且後嚟聽其他同事講，原來隔離單位之前有個員工同老闆吵大鑊，個員工本來有啲抑鬱，諗唔開，工作壓力太大，自殺死咗。然後個老闆唔知點解即刻將公司結業，用咗一日嘅時間就火速搬走咗。我更加相信我同事見到啲唔應該見到嘅嘢。

化名：膽生毛

行業：廣告/傳媒
職位：基層職員
性別：男
年齡：25-34歲

我聽我上司講，佢之前夜晚見完客，返屋企途中瀨咗嘢。話說佢自己見完客後，就好似平時咁，揸車返屋企。唯一唔同嘅係，佢嗰晚傾夜咗，成11點幾先出發。我上司當時開車有啲走神，回過神發現前面有人，但嚟唔切剎制，直接撞咗埋去。但上司感覺唔到自己撞到人，佢落車睇吓發生咩事，但咩都見唔到。佢當刻就知道自己時運低，好似撞到啲「兄弟姊妹」，就講咗句有怪莫怪就上返車諗住走，但部車無端端打唔著火。我上司唯有 call 車拖走，自己打電話叫的士。正當等緊撥通電話叫的士嘅時候，佢聽到電話有聲「你做咩撞到我？好痛」。佢嚇到快瀨尿。第2日我上司就 sick leave，大病一場。

你相信呢件事嗎？
我信上述呢件事，我上司男人老狗平時都唔講依啲嘢，佢講返件事出嚟嘅時候好似仲有心理陰影咁。而且依啲嘢唔好唔信，要敬畏鬼神。撞到人哋，打擾到人哋生活，一定博命道歉！我諗上司冇誠心道歉先中招。
化名：灰甲王

行業：交通運輸
職位：基層職員
性別：男
年齡：35-44歲

我哋做物流嘅，平時經常出入貨倉工廠。老實講其實夜晚返去真係幾恐怖，平時已經陰風陣陣，如果撞到嗰啲嘢真係好恐怖。話說以前有個同事，本身已經好似特別吸引陰間啲嘢，個人仲要勁細膽，有次話自己腳步沉沉畀鬼上身，其實只係踩到香口膠……佢啲舉動搞到啲同事成日都好似周身唔聚財。不過呢個同事冇幾耐就辭職冇做。問題就係佢辭職之後我哋都發覺公司好似真係有嗰啲嘢。有次喺倉執嘢，一邊做一邊好似有把女聲叫救命，盞燈仲要好死唔死嗰陣先嚟閃下閃下。我懷疑係咪怪錯我同事，以前係搞佢，而家唔喺度就搞我哋……

你相信呢件事嗎？
非常信，不過唔想信。搞到返工都冇晒心情都算，返屋企仲要瞓唔着！

化名：窮果龍

行業：監控/保安
職位：基層職員
性別：男
年齡：18-24歲

有一晚凌晨三四點，突然有人困電梯call管理處，有個同事唔覺意訓著咗都突然被驚醒，同事就即刻睇睇CCTV，見到有個女人係1號電梯度。咁同事即刻 call 整電梯公司過嚟整，同時同困電梯嘅人講返個情況，大家一直都有對答。終於整電梯公司到，當整電梯人員打開部電梯門嘅時候，裏面竟然冇人！整電梯公司嘅人同我同事對望咗一眼，大家都好似知道發生咩事，當冇事發生走人。寫番報告話電梯故障而冇「人」困電梯。

你相信呢件事嗎？
我相信上述嘅事，因為同時多於一個人見到，唔會有假。不過我本身唔怕鬼，咁鬼都會困電梯㗎嗎！係咪？

化名：弱雞

行業：酒店營運
職位：基層職員
性別：男
年齡：35-44歲

我哋公司嘅酒店前臺同事有一晚夜更接到一個投訴電話，話自己係xx號房嘅房客，佢間嘅房花灑壞咗，接到電話嘅同事覺得好奇怪，因為咁啱嗰晚個間房所在嘅樓層都冇人入住。前臺嘅同事以為有客講錯房間後，再三確認，再睇埋來電顯示，真係嗰間房。前臺同事有啲心驚驚，諗住當冇接過個電話。但隔咗十分鐘又打嚟，繼續投訴同一件事。無奈之下，前臺嘅同事唯有派個勇猛男同事上去睇下咩情況。個男同事按咗個門鐘，然後度門輕輕開咗，裏面一個人都冇。個男同事去檢查個花灑，又真係壞咗……地下又有水……佢快快手換咗個花灑頭然後衝出間房。第二日個男同事向公司申請寧願賺少啲錢都唔要返夜更。

你相信呢件事嗎？
我相信上面嘅事，因為聽講幾個同事返夜更都遇到過，所以我覺得一定係真嘅。而且申請扣人工都唔番都好難係假……

化名：馬小玲

行業：零售/批發
職位：基層職員
性別：女
年齡：35-44歲

記得上年7月，公司有個同事因為趕出單，OT 到深夜。第二日返到公司黑眼圈勁重，仲好似心事重重，仲要話自己想辭職，唔想留喺宜家間公司。大家同事就同佢去食 lunch 關心下佢，本來以為佢可能琴晚趕唔切啲單畀老闆話唔開心啫。點知，原來琴晚佢自己一個人喺公司做嘢嘅時候，部 printer 不定時出一啲紙，而 print 出嚟嘅紙係黑色嘅。起初佢以為自己唔覺意按錯制就冇理，繼續做。但 printer 出嘅黑色紙越嚟越頻密，每隔十分鐘出一張全黑嘅紙，個同事嚇到即刻係座位度企起身，環視周圍，確認真係得自己一個人，然後默默咁閂電腦，連 office 嘅燈都冇關，跑出公司。

你相信呢件事嗎？
我相信上述件事，令我諗起確實以前公司有個「老屎忽」，離職之前同我講，唔好 OT 到咁夜，就算 OT都唔好留喺公司做，費事打擾到人哋。我以前一直唔知道「老屎忽」講咩人哋，宜家我終於知道。

化名：林俊傑

行業：零售/批發
職位：中層管理者
性別：男
年齡：35-44歲

我有個朋友，佢媽咪以前係做零售店嘅 sales 嘅，佢哋鋪頭生意都幾好，不過佢媽咪嘅同事就唔多好啦，唔係講緊佢哋性格衰，係運氣……每次佢媽咪嘅同事準備要升職嘅時候都賴嘢，有出車禍嘅，有急症入院嘅，有又跌爛電話唔見銀包嘅。真係好邪。最後佢媽咪就辭職唔撈，自己出嚟開咗間小士多，都算開得順風順水啦。後來之前間零售店搬鋪，八到原來喺貨倉隱蔽嘅角落畀人收埋咗好多嘢，有符，有詭異嘅公仔，冥幣，衣紙仲有幾件講唔出係咩嘅嘢，其中有啲物品仲寫住我朋友媽咪同事個名。懷疑唔知道邊個揾「好朋友」去搞我朋友媽咪啲同事。

你相信呢件事嗎？
其實唔係好信，可能某啲人係想玩詛咒，但其實成唔成功又係一件事。

化名：世界女

行業：旅遊服務
職位：基層職員
性別：女
年齡：35-44歲

曾經我朋友入職過一間外資公司做 finance，面試嘅時候要求提供八字，話合適先安排面試。我朋友入咗去之後發現公司 finance 嗰邊嘅位置有特別設計過，佢聽講其他同事嘅生肖同性別全部都係老細特別揀過。我朋友自己本身都唔多信依啲嘢嘅。不過入咗公司之後，身體越嚟越差，成日發燒啦，精神狀態都唔好，仲成日發惡夢，試過被鬼壓床！做咗半年之後終於頂唔順啦，佢諗住命仔緊要，就辭職啦。後來離職後聽返之前嘅同事講，老闆喺公司養鬼仔，氣場比較弱嘅同事容易被附身，或者跟埋返屋企。後來朋友喺屋企休養咗2個月，身體先好翻啲。

你相信呢件事嗎？
我唔係好信鬼神，但朋友經歷過莫名其妙嘅事，搞到我半信半疑，不過就算我唔信都好，我覺得公司養鬼仔都係好痴線！三十六計走為上計！

化名：小绵羊

行業：教育
職位：基層職員
性別：女
年齡：18-24歲

我朋友入咗去一間補習社做，間補習社附近係墳場。間補習社嗰邊嘅小朋友缺席率好高，成日病，有返去補習社嘅小朋友就成日喊。而我朋友做咗兩個月，都差唔多每隔兩個星期病一次。而佢嘅同事好多都好新，個個做幾日就唔做，而有一兩個做得最長嘅同事，日日返工穿到成身紅色：紅衫，紅褲，紅鞋，而且好陰沉，唔同其他人交流，只會自己自言自語。我朋友最後都頂唔順，未過試用期就辭職唔做，怕自己繼續做嘅話冇命享。

你相信呢件事嗎？
老實講我還好，反而覺得會唔會係間補習社嘅衛生有問題，或者抽風系統唔好。咁病唔番都正常啊！唔好諗咁多！冇錢慘過撞鬼！見到隻鬼又點？或者做鬼其實都唔係得閒！啲同事誇大咗搞到成個環境恐怖啫。

1

化名：糧生

行業：銀行和金融
職位：基層職員
性別：男
年齡：18-24歲

有一次值夜班，我個保安同事行到上去財務部嘅時候，裡面黑麻麻，咩人都冇。正準備走嘅時候，聽到突然部驗鈔機響，然後不停聽到啲數錢聲。佢諗住行過去睇有咩異常，定係邊個同事返咗嚟冇開燈，佢就順手開咗燈，環視四周，一個人都冇，但部驗鈔機依然喺度運作緊，佢行到埋去部驗鈔機，差啲嚇到瀨屎！地下有成套制服喺度，擺法好似係個人瞓咗係到咁，痴線邊個玩啲咁嘅嘢！佢諗都冇諗就沖咗出去啦！

你相信呢件事嗎？
我相信上述嘅事。因為我同事撞完嘢，驚魂未定就即刻打畀我求安慰，未見過我個保安同事咁大隻，咁man，講嘢嘅時候驚到口震震。如果係我，我會首先講幾句粗口先，因為聽人講，啲污糟嘢怕男人講粗口，然後邊講粗口邊走佬。
化名：豬寶寶

行業：行政/辦公室助理
職位：基層職員
性別：女
年齡：25-34歲

有次同事食完飯話減肥，成班同事一齊行樓梯番上公司，途中我哋發現其中一層有隻毛公仔喺度。咁嗰陣大家話係垃圾就冇理到，但係唔知點解自己一直都好在意。間唔中放工就會行落去睇吓隻公仔喺咪度，望嘅次數仲越嚟越密，而呢隻公仔都一直留喺度。奇怪嘅係，我留意到某一層有罐汽水罐喺度，過咗半個月已經鋪晒塵，但係隻毛公仔我望足兩個月，都好似好新淨。直到有一次要加班，做完嘢之後都想睇下佢，我發覺佢好似想同我講嘢咁，啲面部表情好似唔同咗，成身起晒雞皮！仲要明明後樓梯係好鬼焗，嗰晚唔知點解行得好涼爽，就喺嗰晚我返到去就病咗。嗰晚我決心同自己講唔再去「探」佢，其實到而家都心思思想去望吓隻公仔，我同事都懷疑我係咪撞邪……

你相信呢件事嗎？
自己中招當然好信啦，我覺得有我同隻公仔接觸嗰日，其他同事唔理佢，我理咗。隻公仔就好似吸引過我每日同佢見……

1

化名：勇者仁傑

行業：娛樂博彩
職位：基層職員
性別：女
年齡：35-44歲

之前有一次返夜更，同我孖更嘅同事成晚好似心不在焉，神色凝重，問佢咩事又唔講。過咗一個星期我哋一齊返早更，同佢孖更喎，問返佢嗰日發生咩事，原來嗰日佢返工嘅時候，佢入