新聞內容 
《天網恢恢 疏而不漏》︱11月12號哈囉好工週刊火熱登場
- 2018-11-12
- https://mp.weixin.qq.com/s/joR_Vj24qR5e35AJktQsLA
天網恢恢 疏而不漏
導讀：法律本來就是用來保障市民，所以各個企業中也有明確的制度去保障員工，及限制他們的行為。但很多時候，有些「老屎忽」會因為太熟悉公司規則，便會在工作上開始「走精面」。使工作變得省力又省時間，的確令很多打工仔為之心動，特別是當一個人多次「走精面」又沒被捉到之際，更容易令人有繼續犯事的衝動。今期《哈囉好工週刊》會同大家分享真實故事—上班一族犯罪檔案。
Gigi
性別：女性
年齡：25 – 34歲
行業：批發及零
職位：基層職員
澳門明文規定公司嘅後樓梯係禁止食煙，但永遠都有班同事唔顧安全同法例成日喺後樓梯食煙，搞到公司後樓梯好臭，又多垃圾，搞到後樓梯烏煙瘴氣，本身已經想打畀控煙辦。有一次佢哋如常好似班「小學雞」咁組隊走去後樓梯食煙，唔知咩原因同其他層嘅職員嘈起上嚟，仲搞到啲煙頭燒着咗後樓梯雜物，搞到最後連消防都嚟埋。
對同事或公司帶來嘅影響：
控煙辦出咗封信罰公司錢；而且因為雜物着火，搞到同事要返去協助調查。人力金錢都損失。
可以如何避免：
公司應該入職嗰一刻就要講解清楚任何違法事情嘅嚴重性，如果捉到有咩懲罰等等。
0
Combo
性別：女性
年齡：35 – 44歲
行業：行政／辦公室助理
職位：基層職員
有個同事每隔一段時間都會喺公司攞文具、紙巾返自己屋企，佢以為同事都唔知佢有攞公司資源走，仲越攞越多。過咗段時間有同事睇唔過眼叫佢唔好攞，但佢收斂咗一排又繼續，仲越嚟越大膽。有一次喺公司走廊執到一個客嘅電話，佢自己就袋咗據為己有。點知道個客報警，有警察上嚟查，睇到閉路電視，重點調查佢，佢開始嗰陣仲死口唔認，後來同事勸佢，佢先同警察坦白。
對同事或公司帶來嘅影響：
呢件事導致我哋對呢位同事好反感，而且覺得喺公司會好冇安全感，覺得自己啲嘢會畀人偷。而且警察上嚟嗰日，全公司同事都逼住停工。最重要係搞到客人認為我哋公司形象好差，冇咗單生意。
可以如何避免：
針對文具被偷走，可以整個表出嚟記低每位同事咩時候攞同攞咗幾多；而針對執咗個客嘅財物唔上報，公司可以喺當眼位置列舉出嚟，而且要清楚列明後果。
ORZ
性別：男性
年齡：35 – 44歲
行業：建築及工程
職位：中層管理者
有個同事只要見到公司有咩job需要外判工程，佢就會馬上自動請纓介紹一啲公司畀同事。但實際上佢同嗰啲公司係識嘅，佢就從中食差價。我哋公司因為咁仲畀額外獎金呢位同事，而且相熟公司仲會畀介紹費畀佢，多謝佢介紹工作。但佢自己唔知食「兩家茶飯」其實已經係犯法。最後老細知道咗就將佢「送官辦理」。
對同事或公司帶來嘅影響：
影響公司決策，洗多咗錢嘅同時仲要未必有好嘅服務。
可以如何避免：
同事嘅建議只可以作參考或者當作多一個選擇，攞咗唔同公司嘅報價再畀老闆決定。
0
大燈
性別：女性
年齡：25 – 34歲
行業：行政／辦公室助理
職位：基層職員
公司嘅人事部同事，唔多唔少都會有老細或者其他同事嘅資料。唔知佢係咪嗰陣想夠數買啲乜嘢定點。佢竟然夠膽冒充老闆同同事，攞晒佢哋啲個人資料去申請，最後老細發現咗之後大發雷霆，報警之餘仲話一定要告佢告到底。
對同事或公司帶來嘅影響：
對公司冇乜影響，但對同事就好大影響，就算唔係啲咩非法嘢，我覺得私隱完全被侵犯，有個同事仲要因為咁轉工。
可以如何避免：
個人資料需要加密，而且每次最少兩人以上先可以開啟檔案。
0
Norton
性別：男性
年齡：18 – 24歲
行業：批發及零售
職位：基層職員
收銀嘅同事每次數錢嘅時候都會少咗幾十蚊。佢就係覺得老闆唔為意，金額唔多就會當冇事，因為大家都會明白做收銀唔多唔少都會有出入。但事實就係呢位同事每次都係特登抽起咗幾十蚊放喺袋，博老闆唔知。成功咗第一次，自自然然就會有第二三次，嗰位同事變得越嚟越得戚。直到去上年打風，鋪頭啲電器都壞晒，攝像頭都壞埋。點知佢竟然夠膽死講話因為幫忙清理垃圾，無睇實收銀機，啲錢唔見晒。我哋睇唔過眼同老細講咗，最後結果就係送佢去差館。
對同事或公司帶來嘅影響：
公司財務損失，雖然每次幾十蚊，但積少成多，金額都唔少。最後嗰次個金額仲要相當大。
可以如何避免：
要請有信用嘅人做收銀，安裝攝像頭對住收銀位置。
MM
性別：男性
年齡：25 – 34歲
行業：娛樂博彩
職位：基層職員
有一個同事見到個客張 VIP card 有好多積分，咁個客好耐冇過嚟，而且多數客人都唔會記得自己有幾多積分，所以個同事就心生邪念就偷用咗個客嘅積分。但好死唔死，個客突然一個星期後出現咗，而且發現自己積分少咗好多，係場度大吵大鬧，個同事見事態嚴重，最後自己向公司自首。
對同事或公司帶來嘅影響：
其他客人聽到，影響公司聲譽，而且對其他同事亦都好麻煩，規矩嚴咗好多。
可以如何避免：
要定期改善公司內部系統，減少漏洞；建立一啲機制去防止內部員工偷客人積分。
0
Tim
性別：男性
年齡：35 – 44歲
行業：娛樂博彩
職位：基層職員
之前有一個荷官，佢將籌碼放喺鞋底，以為無人發覺，一直陸陸續續咁偷咗百幾萬之後，但都唔識收手，繼續偷籌碼。但上得山多終遇虎，有一次終於畀佢同事發現咗，同事講咗比經理知，之後就報埋警，搞到警察嚟晒又拉又鎖咁。
對同事或公司帶來嘅影響：
叫晒警察真係會好影響公司聲譽。
可以如何避免：
加強監管員工表現，特別公司監察部要加強力度，舉報作案者可以獲得獎賞。
0
雪
性別：女性
年齡：35 – 44歲
行業：地產
職位：基層職員
之前有個同事辭咗職。同事清理佢個位嗰陣，發覺佢部電腦一個文件都冇，當時同事覺得佢部電腦可能放咗好多佢嘅個人資料，所以佢先清空。搞到佢同部門嘅同事要通咗幾晚頂先整理返好本身啲資料。呢樣未算過份，最過分係佢原來去咗對手公司度做。佢將之前嘅客人資料攞晒去新公司，搶晒之前啲客人。
對同事或公司帶來嘅影響：
嚴重影響公司聲譽和業績，報警同埋錄口供都晒咗好多時間。
可以如何避免：
員工離職嗰陣要睇清楚啲，佢哋會做咩真係無人知。
柴犬
性別：男性
年齡：25 – 34歲
行業：批發及零售
職位：基層職員
以前公司經理用自己兄弟嘅公司承包材料。但當時老細仲有幾間公司選擇，所以一直未應承。唔知佢係貪錢定等錢洗，佢竟然夠膽襯同老細去飲酒，飲到醉晒，就話佢應承咗，仲夠膽冒佢簽名。去到財務部嗰邊，好彩財務部經理同老細熟，所以問一問老細點解揀嗰間，老細知道之後勁嬲，報警拉咗位同事。
對同事或公司帶來嘅影響：
好彩截得切，如果唔係公司出咗啲咩事都唔知點算，佢兄弟分分鐘會畀次貨再賺一筆。
可以如何避免：
任何簽名都要小心！
0
嫦娥
性別：女性
年齡：25 – 34歲
行業：教育
職位：文員
朋友間公司個主管成日性騷擾班女同事，乘乘機機摸啲女同事隻手，把口仲一直講啲令人唔舒服嘅說話。佢持住自己職位高，見到又靚又後生嘅女同事，得閒冇事就入佢房，仲成日借啲意請食飯。唔知係咪有一個特別靚女，主管終於忍唔住，詳情我都唔知佢做咗啲咩，淨係知有警察帶咗佢走，同埋畀人炒咗。
對同事或公司帶來嘅影響：
會令女同事工作好不安，因為唔知幾時佢又會做啲令人唔舒服嘅嘢。
可以如何避免：
遇到性騷擾一定要發匿名信舉報畀大老細，保護自己權益同人生安全。
0
YY
性別：女性
年齡：25 – 35歲
行業：批發及零售
職位：基層職員
之前有對夫婦一齊喺公司度做，老婆係一個口才好好嘅人，所以有好多生意，但個老公以為佢老婆用不正當手段接單，接「床單」。有一次佢老婆又傾成咗單大生意，佢老公就嬲到衝去公司，係眾目睽睽之下攞住把刀想劈佢老婆。如果唔係班同事拑住佢，佢老婆應該會被佢劈死，不過佢老婆都傷得幾嚴重。
對同事或公司帶來嘅影響：
咁暴力嘅同事邊個想同佢做同事，畀客人知道都唔好。
可以如何避免：
一家唔知一家事，清官難審家庭事，管唔到亦理唔到。
0
FD
性別：男性
年齡：35 – 44歲
行業：娛樂博彩
職位：基層職員
某個娛樂場中場同事成日喺返工時做啲令人噁心嘅猥褻自慰行為，完全冇理隔離女同事嘅感受，好彩平時AM一見到都會即刻阻止。呢位同事平時道貌岸然，自我感覺良好，平時仲好串，話人事部有佢嘅人，唔驚投訴。中場同事個個都唔鐘意佢，怨聲載道，怒不敢言。直到有一次佢唔知對一個大肚同事做埋哂啲猥褻嘢，佢老公知道咗報警拉咗佢。
對同事或公司帶來嘅影響：
影響公司運作，而且搞到同事成日都提心吊膽。
可以如何避免：
多啲聽下普通員工嘅聲音，增加匿名舉報。
0
結語
命裡有時終須有，命裡無時莫强求。
0
返回 