《天有不測風雲，人有旦夕禍福》︱5月6號哈囉好工週刊火熱登場

2019.5.6 • 周一

導讀：意外，就係意料之外。人無論如何都無法預計自己一天會遇到怎樣的事。作為打工仔，手停口停，如果你不幸遇到什麼不好的事，大部份時間都在上班的你，又會怎樣渡過這些難關？今期《哈囉好工週刊》和你分享打工仔們的意外日子，看看他們如何渡過傷心經歷。如果你現在正處於不幸，希望讀者們的分享幫助到你解決難關！

毛毛

行業：銀行和金融

職位：基層職員

性別：男姓

年齡：35 – 44歲

我係自己一個住嘅，我爸爸媽媽早兩年都過咗身。佢哋過身前送咗隻金毛尋回犬畀我，等佢可以陪住我，狗狗可以講係我唯一嘅家人。佢每晚都好期待咁等我收工，聞到我嘅氣味，聽到我攞鎖匙開大門嘅聲音，佢就會喺大門後面等我返嚟，一見到我就會沖向我同舔我。嗰一日我返工畀老細鬧咗一個朝早，明明係食死貓仲要收一封警告信，搞到成日都好唔開心。返到屋企開門之後，感覺好安靜，狗狗都冇喺門後等我，我就即刻去搵，發現佢已經奄奄一息，懷疑吞咗啲化學嘢中毒，我即刻車佢去動物醫院，等左一日最後都救唔番，直到而家個心都仲係好痛。

最後你是怎麼熬過這段傷心難過的經歷？

親戚唔多，感覺自己最後一位家人都冇埋。幸好呢段日子有女朋友陪喺我身邊，又同我出外散心、傾訴，我先冇咁難過。

詩詩

行業：資訊科技

職位：中層管理者

性別：女性

年齡：35 – 44歲

諗返起嗰日工作一直都唔係幾順利，突然電話響起，唔知點解未聽電話已經有啲不安嘅預感，媽咪打畀我話爸爸出咗車禍入咗院，叫我即刻嚟醫院，我即時好想請假去睇我爸爸，但老闆叫我快啲準備手頭上啲文件，緊急嘅要我一齊見個大客，好重要好重要，見完之後你即刻走。我以爲爸爸應該冇咩大礙，跟住老闆又畀好大壓力我，又話會好快完成，咁我就見埋個客先去醫院睇爸爸。喺見客嘅時候，我電話不停咁震，miss咗好多個call，到見完個客就即刻趕去睇爸爸，點知，媽咪話爸爸已經走咗……

最後你是怎麼熬過這段傷心難過的經歷？

好後悔因爲工作而見唔到屋企人最後一面。屋企走咗一個人，返工嗰陣真係點都笑唔出，只可以慢慢用忙碌平復心情。不過無論點都好，呢件事永遠都刺喺我心口，我會內疚一世。而家只可以做嘅就係陪多啲媽咪，各位記住工作唔係唯一。

桃姐

行業：餐飲

職位：基層職員

性別：女性

年齡：35 – 44歲

之前經理做錯咗件事，想搵人去揹鑊然後自己置身事外，咁因為我係新人，經理就卸咗個鑊畀我，然後老闆即刻鬧我點解咁唔小心，但其實我諗緊點解我要受啲咁嘅氣，嬲嬲吓就反駁返老闆，話佢請人無能，有鑊就搵人揹，老闆聽完，完全冇理到件事究竟係邊個錯，就即時炒咗我。屋企人去咗旅行，第二朝諗住落街食早餐嗰陣樓上跌咗個花盆落嚟，啲碎片整親我個頭同塊面，搞到爆缸入院。因為係頭部整親搞到住院一段時間，畀人炒咗又唔屬於係工傷，之前又冇買保險，住院費就變咗我嘅負擔，屋企人又唔喺度，男朋友又去咗外地公幹，要半個月先返。

最後你是怎麼熬過這段傷心難過的經歷？

個個都唔喺度，冇人可以依靠，好彩仲有兩個朋友，暫時解決到住院費問題，同埋好多謝佢哋經常探我，因為自己一個嗰陣好唔開心，佢哋幫到我唔使諗咁多。

波波

行業：保險/金融業

職位：基層職員

性別：女性

年齡：25 – 34歲

咁我屋企都算係小康家庭，屋企人都唔等住我呢份糧去開飯，返呢份工都係想體驗吓。之前公司識咗個男仔，後尾我哋一齊咗。呢個男仔唔係幾有錢，咁我都唔介意每一餐飯都係我請，但係我真係估唔到佢竟然會咁對我。當我覺得佢幾好，想開始同佢深交嗰陣，話咗畀佢聽我有遺傳病，好容易暈低，嗰一刻佢話會照顧好我同我份工。我當時好感動！有一次我朝早去定期檢查，早睇完醫生早啲返去，竟然見到佢同個女同事搞曖昧，我嗰吓真係嬲到暈咗。就喺我入咗院嗰陣，佢同同事講佢幫手照顧我啲客，但其實就係搶我啲客，簽晒單就即刻同我電話講分手……我怕諗起呢件事會影響我健康，我就辭職唔做啦。

最後你是怎麼熬過這段傷心難過的經歷？

當攞個教訓囉，以後要帶眼識人。屋企人全部都對我好好，又照顧我鼓勵我。唔會再喺職場上選擇伴侶啦，怕會諗返起呢段唔好嘅回憶。

婉君表妹

行業：會計業

職位：辦公室助理

性別：女性

年齡：25 – 34歲

平時公司加班好嚴重，仲要冇得補錢。成個生活非常頹廢，夜晚經常淨係食杯麵。好啦，之前一直捱終於完咗個Peak，可以準時返放工。我記得就係完peak第一日，臨放工嗰陣大老細有文件要，叫我幫手送去佢度。咁我見咁近都冇乜嘢，但就係差唔多去到佢到嘅前一個街口，有部私家車高速沖紅燈直撞我前座門，我扭傷咗條頸同腰骨，胸同手都有骨折，仲諗住終於有時間食返餐好嘅，點知而家成個月喺醫院同屋企食粥，仲要痛咗好耐，不過慶幸人仍然在生，一班公司同事都過咗嚟慰問我，老闆又同我講，公司嘅事唔洗擔心住，好好休息完再返嚟拼搏。

最後你是怎麼熬過這段傷心難過的經歷？

發覺人生真的好無常，唔會知道自己下一秒會發生咩事。人生可以好短暫，而家就係希望可以完全好返，怕將來影響自己生小朋友。

KOI

行業：旅遊服務

職位：基層職員

性別：女性

年齡：35 – 44歲

人衰行路打倒褪，呢句話絕對係非常正確。我做領隊負責帶團嘅，有一次帶東南亞地方，咁我出發前已經feel到有少少唔舒服，咁我冇理到諗住自己仲頂到。點知飛到去嗰邊，越嚟越唔舒服，去啲景點又多人又焗，然後我就突然暈咗喺街度，醒返已經喺當地醫院，仲要留院多兩日，咁由於呢個原因，我班團友就唔係好滿意，之後收到啲投訴意見之類嘅嘢，咁呢啲我都預咗，只可以同佢哋道歉。但最慘係嗰時個女發緊高燒，燒到四十度，又唔得即刻飛返嚟，只能靠佢嫲嫲一個人帶去醫院，嫲嫲年紀都唔細，嗰刻我好擔心佢哋兩嫲孫，好無助，因為嗰時我已經離咗婚，要靠自己一個撐起所有。咁多壓力加埋一齊最後逼到我嗰時係醫院到大喊左出嚟。

最後你是怎麼熬過這段傷心難過的經歷？

都有啲好嘅團友過嚟問候我，問我有冇事，雖然阻到佢哋嘅行程。後來我去咗睇心理醫生，有慢慢輔導我嘅負面情緒，所以我都勸大家精神負擔唔到要去睇吓心理醫生，唔好逃避。

K

行業：酒店營運

職位：基層職員

性別：男性

年齡：25 – 34歲

之前因為同老爹鬧交就自己一個人走咗去外國讀書。其間佢cut晒我所有資產，希望我認低威返嚟澳門讀書。但我志不在讀酒店管理嗰方面，我只想做設計，所以冇理到佢哋自己走咗去外國。直到我就嚟畢業，阿媽都係一直不斷催我返嚟。聽到我想喺嗰邊打工，仲同我講老爹入咗醫院，快啲返嚟。我以為只係阿媽耍手段，所以冇理到佢，留喺嗰邊發展。嗰時啱啱讀完大學出嚟，以為設計會有人buy， 點知現實狠狠咁打咗我一巴，畀公司炒咗。返到嚟之後，阿媽亦都狠狠咁打咗我一巴，老爹就喺我返嚟前一個星期離開咗。雖然返到澳門，卻見唔切佢最後一面。

最後你是怎麼熬過這段傷心難過的經歷？

我後悔咗好耐，覺得當時嘅自己非常幼稚，如果自己有聽屋企人講，結局就唔會係咁。而家只可以對阿媽好一啲，令到自己冇咁內疚……

阿力

行業：建築行業

職位：基層職員

性別：男性

年齡：25 -34歲

而家講返起呢件事都仲係好深刻。呢件事算係一單工業意外，我本身係泥水工人，嗰次喺地盤八樓做緊嘢，點知有條差唔多一呎長嘅木方突然跌落嚟，擊中咗我頭部。我跌落七樓平台，當場昏迷。我冇晒知覺意識，同事報警，即刻送我入院搶救。我記得稍微有意識嘅時候，就諗起自己屋企14歲嘅大仔自己一個喺內地讀書，細仔先啱啱滿一歲，自己雖然爛命一條，冇咗都冇乜所謂，但係全家只係靠我一個搵錢，我唔可以畀自己有事，好彩後尾做咗幾次手術，都好成功，好感恩仲活喺呢個世界，畀我睇住屋企人長大，努力照顧佢哋。

最後你是怎麼熬過這段傷心難過的經歷？

真係天有不測風雲，意外隨時都發生喺自己身邊，要好好珍惜眼前人。唔需要忘記呢段經歷，好好繼續生存落去就可以。

記得忘記

行業：通訊行業

職位：技術員

性別：女性

年齡：25 – 34歲

我自細就同婆婆兩個相依為命。父母走得早，所以咩都要靠自己去爭取。正因為咁，細個讀書成績都好好，畢業出到嚟好快就搵到份工。但係入咗職場先發現，冇嘢係乞人憎得過老闆呢種物種。無論做咩都喺到單單打打，攞住雞毛當令箭。咁嗰日我都唔知佢做咩事，又喺度發火，鬧咗好耐都唔停，但佢鬧到最後先知自己係鬧錯人，因為件事唔係我處理，咁算啦有啲死貓係要食吓架啦，返到埋位先睇到好多個未接來電，原來屋企棟大廈火燭。婆婆好彩畀好心鄰居即時帶埋出去，淨係嚇親同擦傷咗少少。不過正因為呢件事，令我知道乜嘢係重要，我明明就坐係老闆房出邊，我乜嘢都冇講，直接離開咗公司去醫院搵婆婆。我相信任何好嘅老闆，都會明白員工。唔明嘅話我喺度都冇意義。

最後你是怎麼熬過這段傷心難過的經歷？

婆婆好返之後經常陪佢去佢想去嘅地方行街，喺每一個地方都傾吓計散吓心，等婆婆每一日都開心。

發仔

行業：運輸行業

職位：基層職員

性別：男性

年齡：35 – 44歲

咁我係做司機嘅，平時就係接送吓老闆出入。不過其實份工都好危險，相信大家揸車都知道，澳門街啲「馬路三寶」好恐怖。有一次我車老細同佢啲朋友返屋企食飯，嗰日天氣超級差，又行雷又落雨。我已經盡量揸車小心，因為老細車住朋友，有大有細，成㗎車滿晒人，有咩事我都唔掂。點知返去途中，有個「馬路三寶」應該睇錯燈，直接衝紅燈撞落我哋到，好彩老細佢哋淨係撞親吓，但係返到去竟然畀老細話我點解咁都避唔切，其實我已經盡量小心，我都好擔心大家嘅安全，破財唔緊要，我自己咁少人工，就算叫我陪都冇問題，但係咁樣比人話，自己都撞傷咗，都唔知為乜。

最後你是怎麼熬過這段傷心難過的經歷？

只好繼續努力工作，揸車小心啲，唔好再發生意外。揀老細呢啲，只可以靠運氣。

結語

大家看過讀者分享的意外故事之後，是感同身受，還是慶幸自己到現在還是很幸運？無論如何，我們這期都想讓大家知道，讀者還會告訴我們這些故事，是因為他們已經克服了，無論遇到多大的「風雲」，最重要的是我們要想想如何去正面面對。不要經常負面地想自己是最不幸的。不幸的人多的是，他們能夠保持開懷是因為他們懂得克服。希望大家看過這些讀者的經歷也能有所啟發。

查閱更多《哈囉好工週刊》內容：http://weekly.hello-jobs.com/