《君子報仇，十年未晚》| 08月17號哈囉好工週刊

「君子報仇，十年未晚」–究竟係咪大部份打工仔都會長期忍受對同事嘅仇恨，靜待報仇機會。今期《哈囉好工週刊》，讀者分享咗佢哋喺工作中發生呢類型事件嘅經驗，一齊睇睇喇！

化名：低調的人
行業：娛樂博彩
職位：基層職員
性別：女
年齡：25 – 34歲

我有個好朋友，佢學生時候畀甲君搶咗女朋友，成個人頹咗半年。後來我好朋友出社會，踏入職場，冤家路窄同甲君做同事，而甲君依然同當年搶走嘅女朋友一起，聽講仲話準備結婚。某日咁啱中午放飯，我朋友見到甲君同公司某位女同事一齊食中午，仲要好親密咁拖住手一齊行。我好朋友毫不猶疑咁影相，報仇嘅機會嚟啦！我好朋友將啲相發甲君嘅女朋友。最後甲君同佢女朋友分手收場，結唔成婚，之前訂嘅酒席，影結婚相嘅訂金都浪費晒。「共佢相識3000天，你無名無姓~」爽！

你贊成上述嘅報仇行為嗎？

我贊成以上嘅行為。因為畀人搶咗女朋友，戴綠帽係男人最痛，分分鐘有心理陰影！所以報復到返對方喺某程度上嚟講都係對自己嘅解脫，可以真正放低。更何況係人哋衰，做錯事先畀人捉到正。

如果有人傷害你，你會報仇嗎？

我唔一定會報仇，我自已本身唔鐘意你害我，我害你。我覺得好攰，我懶得報仇。

化名：娜姐
行業：建築及工程
職位：基層職員
性別：女
年齡：45 – 54歲

我上司份人都幾衰下，好鍾意搶人功勞。之前有一次，我哋組同另外一組人一齊合作，兩組開會嘅時候，明明好多時候係人哋組諗到橋，我上司淨係喺度齋聽。但到咗大會嘅時候，喺經理面前，我上司爭住講嘢，基本上佢講晒咁制，畀人感覺好似全部橋都係佢諗咁，搞到人哋組嘅老大面都黑晒。到後來，我哋兩組又再一次合作，人哋組老大有備而來，喺開大會之前就已經發咗份計劃書畀經理，而且將我哋上司嘅衰橋都畀埋經理。經理見到上司啲橋，係度發曬脾氣，狂插我上司。哈哈，雖然佢係我上司，但我實在覺得我上司係抵死。

你贊成上述嘅報仇行為嗎？

我贊成！因為我嘅上司實在好衰，我雖然同佢同組，但作為人，我都睇唔過眼！更何況我上司平時都對我哋班下屬唔係人，出事就揾我哋班細負責，功勞就自己領晒。所以當佢畀隔離組報仇，我都好開心，感覺好似人哋幫我報咗仇咁。

如果有人傷害你，你會報仇嗎？

唔會，其實我都算幾隨和而且唔理世事嘅人。如果人哋傷害咗我，我都唔會主動或者一定報仇，當然如果人哋幫我報埋仇就最好啦。

之前聽隔離部門銷售同事講，有一個極品客，不斷咁壓我哋價，要我哋成本價畀佢，簡直不可理喻。最後我哋銷售同事冇賣畀佢。但個極品客竟然到處唱衰我哋，話我哋服務差，睇唔起佢哋公司。銷售同事當時真係含冤受屈。多年後，有個大客同個銷售同事好熟，問佢意見，話自己公司揾某某公司做某個服務，唔知道好唔好，準備簽約。而嗰間某某公司就係當年唱衰我哋嘅個間公司。銷售同事就毫不猶疑咁，講咗好多關於嗰間公司嘅負面嘢，個大客聽完後，最後冇用到嗰間公司，自己衰咗都唔知咩事。

你贊成上述嘅報仇行為嗎？

我贊成上述嘅行為，因為對方誣陷在先，我同事只不過係以其人之道，還其人之身。係對方出口術亂講傷害我哋公司，而我哋同事都只係講事實啫。

如果有人傷害你，你會報仇嗎？

如果有人傷害咗我，我未必會報仇，因為我覺得報仇好煩，我唔想煩。人生已經好多煩事，唔想晒心思去諗點樣報仇。人生仲有好多重要嘅事需要我去做，唔好浪費時間喺一啲唔開心嘅事上面。

化名：默默無聞
行業：公務員
職位：基層職員
性別：男
年齡：25 – 34歲

我聽我同事講，佢之前曾經喺某餐廳做文職。有一次佢落餐廳度，發現餐廳廚房衛生條件好差，而且貨源唔新鮮，就同老闆反映問題。老闆就好客氣咁同佢講多謝佢嘅意見，佢會同負責嘅同事講同處理。但幾個月後，同事發現問題依然存在，仲要畀佢發現老闆其實一早就知道，佢又同老闆反映問題嘅嚴重性，但點知老闆惱羞成怒，話佢多事，依啲問題唔到佢管，直接炒咗佢。佢當時就好唔開心，覺得自己係好心提點，仲要畀老闆鬧兼炒魷魚。之後風水輪流轉，佢做咗我同事，上級話要查牌，查衛生，我同事第一時間提出查嗰間餐廳。因為咁，間餐廳被罰咗唔少錢。

你贊成上述嘅報仇行為嗎？

我贊成！因為唔啱嘅事，違反法律嘅事唔可以姑息，應該要揭發，特別當自己有相應嘅能力同權利嘅時候，更應該將違法嘅事撥亂反正。

如果有人傷害你，你會報仇嗎？

如果有人傷害我，我就一定會報仇。人不犯我，我不犯人；人若犯我，我必犯人！我接受唔到其他人傷害我，我一定會以牙還牙，咁樣先唔會畀人蝦。

如果而家冇機會報仇，你會耐心等候報仇機會嗎？

如果而家冇機會報仇，我會耐心等待報仇嘅個日，內心記住當日嘅帳，只要有一日我報到仇，揾到時機，我就會報仇。

之前聽講有個同事，成日畀佢上司折磨，係又鬧，唔係又鬧；做錯又鬧，做啱又鬧；對事唔對人，係度玩針對。搞到嗰位同事就快神經衰弱、精神分裂、壓力大到要去睇心理醫生。嗰位同事一直忍，因為佢覺得要養成頭家，唔敢反抗上司，怕遭到報復，自己又唔敢輕易辭職，怕搵唔條件相當嘅工作。嗰位同事忍咗三年，終於搵到個更好嘅發展機會，即刻遞辭職信。嗰位同事離職後，就向原先公司告發上司各種衰事，例如職場霸凌、同供應商一齊黑箱操作等等。最後原先公司高層處分咗佢上司。

你贊成上述嘅報仇行為嗎？

我讚成上訴嘅報仇行為，畀人傷害咗，去報復係好正常嘅事。

如果有人傷害你，你會報仇嗎？

如果有人傷害咗我，我一定會報仇，因為我覺得報酬係一種情感宣洩，如果受到傷害，剩係識得啞忍，一方面對方會繼續傷害自己，另一方面，自己容易會有情緒問題。

如果而家冇機會報仇，你會耐心等候報仇機會嗎？

我會耐心等待報仇機會。一日報唔到仇，我一日都記住，直到我大仇已報，我先會安心。
化名：旅遊小王子
行業：旅遊服務
職位：基層職員
性別：男
年齡：25 – 34歲

以前公司有兩個同事，佢哋係同組嘅，少不了有摩擦，有一次甲被乙告發遲到，搞到甲被扣咗當月嘅全勤獎金，之後甲就一直懷恨在心。之後乙辭咗職，當時辭職嘅原因係幫屋企人照顧生意。但就咁啱甲偶然機會知道咗乙辭職嘅真正原因其實係揾到第二份工。過咗半年，聽聞乙又返嚟做，因為之前份新工唔好做，甲就同老闆講乙一直講大話，老闆嬲到取消咗乙嘅 offer，最後乙冇得食「回頭草」。

你贊成上述嘅報仇行為嗎？

我唔贊成上述嘅報仇行為。喺職場上互相傷害同報仇嘅事只會影響工作。因為發生呢種事後，同事間肯定會失去信任，大家會互相猜疑，導致同事間難以團結，影響工作效率同質量。

如果有人傷害你，你會報仇嗎？

如果有人傷害咗我，我諗我應該唔會報仇。最好的「報復」，就係運用嗰股不平之氣，令自己邁向成功，放開胸懷，對待你當年的敵人，且把敵人變成朋友。

化名：佛系人生
行業：酒店營運
職位：基層職員
性別：男
年齡：25 – 34歲

有個同事叫啊洋，人人都憎佢，因為佢成日冼人，唔會錯過任何機會去推卸責任。有一次啊洋人正常發揮，冼同事呀肥，將自己嘅錯卸攞同事呀肥度，搞到呀肥有苦說不出，畀公司出咗警告信，之後啊洋同呀肥就好少接觸。半年後，啊洋同呀肥又因為公事上要交手，呀肥先下手為強，重複當年啊洋嘅手段，冼返佢轉頭，而且同上司投訴舉報啊洋各種唔遵守公司SOP嘅事，就因為咁，啊洋被公司降職。啊洋得知自己被降職就諗著搵相熟同事幫手，想拉攏人心幫自己上位，但鬼叫佢平時得罪人多，好多同事都乘機報酬，落井下石，對啊洋視而不見。

你贊成上述嘅報仇行為嗎？

唔贊成。冤冤相報何時了。你報完仇後，人哋下次又繼續暗算你，最後吃虧嘅咪又係自己。

如果有人傷害你，你會報仇嗎？

如果有人傷害咗我，我唔會報仇。因為我冇報仇嘅習慣，我本身就睇唔慣報仇嘅行為，有得嗰啲人自然消失就算啦。

結語

除咗「君子報仇，十年未晚」呢句說話，相信大家都聽過「冤冤相報何時了」。不斷嘅以眼還眼，只會令大家都變得盲目，當你承受着憤怒同仇恨嘅時候，最終背負着呢啲重擔嘅人只會係你自己，而唔係其他人。希望我哋今期嘅分享，可以令讀者透過重新選擇一個幸福而充滿愛嘅生活，從而令自己嘅情感、身體同精神都變得更好更健康。