《下屬如果我是你》︱9月2號哈囉好工週刊火熱登場

2019.9.2 • 周一

導讀：下屬不滿上司的事情我們聽得多，但其實下屬有時候也會令到上司很「勞氣」！今期《哈囉好工週刊》會與讀者分享老闆上司覺得下屬令他們很惱怒的故事，站在他們的角度聽聽他們的想法以及對下屬的期望。

化名：問題天天都多

行業：酒店營運

職位：中層管理者

性別：女性

年齡：35 – 44歲

我一個月前就交低咗份報告要我下屬做，期間自己都好多嘢做，忙到差miss咗個timeline。咁我就即刻問下屬進度到邊，點知佢咩都答唔出，然後話份報告太難，唔知道點開始。我聽到之後真係晴天霹靂，嬲到連面部表情都管理唔好，聽佢咁講份報告應該都係零進度。我話我交低份嘢畀佢嗰陣，有同你講清楚如果唔明白可以即刻問我㗎嘛，點解唔識唔問我唔匯報畀我知，如果我唔問嘅話係唔係永遠都唔會做？點知我下屬竟然話以為我只係隨便講下，而且佢話個報告太難做佢都肯定唔識做，所以諗住等起我問嗰陣先講……

換轉是你面對同樣的事件，你會怎麼處理？

有咩唔明會盡早問，如果唔識都會畀人鬧。拖到最後肯定畀人鬧得仲勁。何必呢⋯⋯

為甚麼你會這樣做呢？

因為冇可能因為唔明白就唔做㗎嘛，遇到問題就解決問題，公司請你都係為咗解決問題，每次都逃避問題要你做乜？到而家都唔明白點解可以唔出聲。

化名：歪理博士

行業：批發及零售

職位：中層管理者

性別：男性

年齡：25 – 34歲

我部門入邊有個極度玻璃心嘅女同事。所以我就算見到佢工作能力唔係特別好，做嘢又唔上心，我都唔會喺公眾場合鬧佢，只係叫佢入房傾兩句。我真係只係傾兩句，唔係鬧兩句，我自問嗰時語氣係好好，但係嗰位女同事竟然可以對我發脾氣，一時駁嘴一時眼濕濕。同佢講完仲見佢周圍搵同事訴苦，唔使問肯定有講我壞話，搞到啲同事覺得我成日鬧到佢好慘，攞同事出氣。其實好無奈，咁佢做錯嘢作為上司一定要糾正佢，唔係只會一錯再錯。同埋我啲語氣都好好，有時喺度諗我自己究竟做錯乜嘢……

換轉是你面對同樣的事件，你會怎麼處理？

如果我做錯我唔會用發脾氣嚟解決，完全解決唔到問題根本，咁樣點可以進步？大家成年人，成熟啲好冇？我唔想用爸爸嘅角色教你，記住你做好啲嘢係基本條件！

為甚麼你會這樣做呢？

因為發脾氣真係解決唔到問題，你對老細發脾氣，只會令到老細覺得你態度好有問題，離炒魷魚不遠矣！

化名：地盤仔 

行業：建築及工程

職位：中層管理者

性別：男性

年齡：35 – 44歲

其中一個下屬成日都喺我面前搏表現，明明自己又唔係做得特別好，成日都講到好似自己啲report經歷過幾十年OT先搞掂。同埋佢係好鍾意擦鞋，可能佢以為同事發覺唔到佢成日擦我鞋，做得唔算明顯，其實大家都知囉。而且我聽落去都唔覺得好開心，唔係個個上司都鍾意擦鞋仔，起碼我唔鍾意。其實我唔需要你擦鞋，你做得好唔使我執手尾先係我最大嘅希望！但問題你又做唔好，又急住領功，其實討好我冇用架喎，份嘢係唔得就唔得架啦，實力先係最重要。

換轉是你面對同樣的事件，你會怎麼處理？

先做好自己嘢，唔好急住擦鞋，就算我對自己嘅report非常有信心都唔會急於領功，因為有啲錯誤係要有經驗嘅人先一眼睇到！

為甚麼你會這樣做呢？

因為自己覺得好，但老細未必咁認為㗎嘛，到真係做得好個功唔洗領都係你嘅。職場上，會擦鞋同時都需要有實力，就算升咗職，人哋發現你剩係識擦鞋，你咪一樣落返去。

化名：福星大嘴鳥

行業：廣告/傳媒

職位：中層管理者

性別：女性

年齡：35 – 44歲

我個下屬好鐘意打斷人哋講嘢，有次開會咁大家坐晒係度，集思廣益睇下點去推廣，點知另一個同事都未表達完自己意見，佢就不停係咁攻擊人哋嘅創意，咁樣真係好冇禮貌，到佢自己發表意見嗰陣，我又唔覺得佢係比人哋好，而且人哋講佢個plan嘅缺點嗰陣，即刻黑晒面，講嘢仲要單單打打。其實大家開會係要畀一個好嘅結論同方案，淨係數人哋嘅缺點，又唔講好嘅解決辦法，其實冇任何意義，因為每樣嘢都一定有有缺點。所以其實唔使嘥時間，有建設啲好！

換轉是你面對同樣的事件，你會怎麼處理？

首先會同其他同事講完，先再開始講，而且畀comment係會講齊優缺點，再睇下自己有冇改善方法，咁樣先夠尊重同事同埋做嘢有效率。

為甚麼你會這樣做呢？

聽多啲人哋嘅意見，因為每個人長處不同，而且同事之間要尊重對方係基本概念。

化名：Who am I

行業：娛樂博彩

職位：中層管理者

性別：女性

年齡：25 – 34歲

我親愛嘅小朋友唔知點形容佢，可以話佢大意唔小心，可以話佢三魂唔見七魄，經常都可以犯啲勁低級嘅錯誤。最新鮮嘅係，每次都可以犯唔同種類嘅錯，就以一份文件為例，一時搞錯日期、一時打錯客人個名、有時搞錯格式，最勁嘅喺搞錯電郵，佢連每日經過嘅玻璃門都可以直接撞埋去。我真係唔知點話佢，教過嘅嘢佢又真係冇犯錯第二次，但係做嘢太過唔上心或者太過大意，我真係唔知道點解決。我只可以奉勸你，如果你繼續咁樣，你應該只可以成世做呢嗰職級。

換轉是你面對同樣的事件，你會怎麼處理？

如果真係咁樣，我會起碼對五六次啲資料先交上去，一份野其實已經可以代表自己嘅價值。

為甚麼你會這樣做呢？

其實都已經唔使講，一份簡單嘅文件其實唔應該要上司去Double check，好多時間咩⋯⋯

化名：史太林

行業：行政/辦公室助理

職位：高層管理者

性別：男性

年齡：35 – 44歲

我下屬能力係有，但係心地就係太過軟林林。名校畢業，佢咩都好快上手，但可能亦都係佢太過fresh，所以任何人叫佢做咩佢都唔會托手踭。人哋叫佢幫手整表格，佢又走去做。連啲完全唔關佢部門嘅事都幫手做埋。見情況嚴重我都忍唔住話過佢，我同佢講話我先係你嘅上司，只需要做我要求做嘅嘢，同事畀嘢你做，搞到你自己又做唔晒，最後都係害咗你自己，而且冇人會可憐你。咁我以為同佢講完佢會明白，佢就同我講返話同事有難應該互相幫忙，所以佢希望自己取平衡，儘量大家開心。我唔識答佢，希望佢頂到。

換轉是你面對同樣的事件，你會怎麼處理？

首先做好自己啲嘢，真係有時間嘅話先處理同事嘅請求。先後次序一定要有，你幫同事其實我唔會話你，不過要有適當分寸。

為甚麼你會這樣做呢？

因為幫同事太多其實係害咗佢，你咁樣做會令到人哋進步唔到。

化名：冷靜軍師

行業：銀行和金融

職位：中層管理者    

性別：男性

年齡：35 – 44歲

其實我唔係好鍾意我個下屬，經常性發放負能量。日日喺度怨天怨地，我明白有時返工好攰，或者你唔滿意安排咁多工作量。其實你怨咁多我已經有考慮過，但其實呢啲都係你能力範圍內嘅嘢，而且工作量係你工作時間內正常會做得完嘅份量。你OT嘅原因其實我係有觀察過，就係你經常做一陣就抖一陣，搵藉口畀自己偷懶，我明白做嘢也要有適當時間休息，但絕對唔係半個鐘頭一次。已經唔直接話你，但你就左耳入右耳出，其實好多人都唔會畀機會，真係唔要你就直接講拜拜，而你又經常犯錯，其實真係好易就炒咗你。唉，冇眼睇。

換轉是你面對同樣的事件，你會怎麼處理？

首先經常發放負能量已經好乞人憎，公司士氣都畀你搞衰晒，有冇諗過冇人想聽？而且成日蛇王大家係有眼睇㗎，唔好當其他人傻。

為甚麼你會這樣做呢？

所有嘢有因必有果，你有啲嘢唔去做，結果只會害到自己。

化名：別卡潮

行業：批發及零售

職位：中層管理者

性別：男性

年齡：25 – 34歲

其實做嘢一定要小心，一次大錯已經可以另上司對你完全改觀。公司入咗一批貨，點知出到嚟少咗好多。咁作為上司其實都接納下屬做錯，人無完人，不過我覺得應該要承認錯誤。發生件事問你原因，你先推畀廠商，搞到我要去問廠商，同廠商對過冇問題，你就推畀同事；我再信你去問同事，都發覺冇問題，直到最後叫你開電郵畀我睇紀錄，先知道兇手根本就係你！你除咗唔肯承認錯誤仲要浪費上司時間。本身覺得你冇乜嘢，而家只可以講徹底失望！

換轉是你面對同樣的事件，你會怎麼處理？

我先唔會推畀任何人，記錄冇得呃人，有問題就馬上同上司匯報，再諗最快嘅問題去解決！

為甚麼你會這樣做呢？

因為出事就應該諗辦法去解決，並唔係推卸責任，因為咁樣係解決唔到問題。

化名：暖男不好當

行業：娛樂博彩

職位：中層管理者

性別：男性

年齡：35 – 44歲

我個下屬有個壞習慣，就係好鍾意隱瞞，問題發生咗，永遠唔話畀上頭知。佢會第一時間遮住個問題，唔畀任何人知，然後嘗試自己補鑊。重點係佢「補鑊」能力唔算強，有時仲整到越嚟越衰，越搞越大鑊。每次畀我發現之後，我都叫佢坦白同我講，唔好搞到件事最差先同我講。當然佢冇聽我講，繼續犯錯。後期我嘗試問其他同事，先知道佢應該好驚我。但係就奇怪啦，如果驚我，應該等件事仲可以補救到嗰陣就要同我講，最後件事搞唔掂我畀大老闆話，咁我咪仲嬲？希望你見到嘅話可以諗下，其實你咁樣做對公司對你自己都係好大損失。

換轉是你面對同樣的事件，你會怎麼處理？

如果係冇關痛癢嘅錯可以補到飛就唔講啦，但係如果真係好大嘅錯，真係要及時匯報畀上司知，大家一齊去解決。

為甚麼你會這樣做呢？

因為唔及時講，可能真係造成損失，到時個損失邊個去承擔先。

化名：盜墓者蘿拉

行業：酒店營運

職位：中層管理者

性別：女性

年齡：25 – 34歲

我覺得我係完全請錯人，之前嘅下屬，無論問佢乜嘢，佢永遠都會話「ok」，「冇問題」，「完全明白」。因為佢入嚟嗰期人手短缺，所以都好信佢。但後期開始有時間檢查佢啲嘢，先發覺好多都係錯嘅。我問返佢點解最後問你你話OK，佢都堅持係冇問題。就算係我認為係大問題嘅嘢，佢都覺得係好小事。我都明白呢一個我自己都要佔一部份嘅錯，自己冇好好教導下屬，但我覺得下屬最基本係要幫助上司解決問題，有任何問題都要同上司講清楚，而唔係自己決定問題嘅嚴重程度。溝通係好重要，其實上司係信你先放心畀你做，有問題就一齊解決，但係你要我自己發現到咁多問題，可以講已經對你失去信心，不過都多謝你令我進步。

換轉是你面對同樣的事件，你會怎麼處理？

肯定確定清楚先話明白，「明白」係一個承諾，而唔係口頭禪，信口開河完全會影響你工作升遷。

為甚麼你會這樣做呢？

其實大家都係想搞好件事，早啲收工，而唔係鬧嚟鬧去。

結語

職場上有千百種不同的人，一個領導人如果能夠針對下屬不同的性格給予栽培、遇到下屬令人「勞氣」的事時用心教導、帶領他們達到公司期望的工作表現，必定能打造更優質的工作團隊！對工作有熱情，肯學肯做和肯負責任都是好下屬的特質，如果你的下屬做到這幾點就值得你好好栽培了！

查閱更多《哈囉好工週刊》內容：http://weekly.hello-jobs.com/