《三歲定八十》性格嬴在起跑線？ | 10月12號哈囉好工週刊

相信大家都有接觸過一啲同家庭同背景長大嘅人，但佢哋嘅性格、興趣同價值觀都有好大嘅差別。中國有句老話叫「三歲定八十」，今期《哈囉好工週刊》讀者會分享佢哋同事具有啲咩嘢特徵，呢啲特徵有幾根深蒂固，令讀者覺得同事從小已經被設定好，希望大家鍾意以下分享。返來囉
行業：建築及工程
職位：中層管理者
性別：女
年齡：45 – 54 歲
意見：不同意

以我個人嘅人生經驗，我唔同意「三歲定八十」，因為人會因為好多因素，例如接觸唔同嘅人，唔同嘅環境而改變。之前公司有一個同事，本來佢一直都好斯文，溫柔咁對所有同事。後來有幾個新同事入職，我嗰位同事就群埋嗰幾個新同事度。而嗰幾個新同事好粗魯，基本每句說話都帶粗口。唔駛兩個月，我嗰個本來斯斯文文、溫柔嘅同事好似換咗一個人咁，變到好似嗰幾個新同事咁，粗口爛舌，行為又粗鄙，對人又冇禮貌，叫人稱呼都冇句，直接喂喂聲。我真心覺得宜家嘅佢好陌生。老實講我希望可以三歲定八十，咁樣當佢一遠離嗰幾位同事，就會變返原本乖乖斯文嘅佢。

你認為最影響人嘅性格同行為會係乜嘢？
我覺得最影響到人嘅性格同行為係身邊嘅環境，例如家庭，朋友同同事影響最大。而人嘅行為最終係受自己嘅性格影響，唔同嘅性格會面對同一件事作出唔同嘅行為同反應。

 1

湯帽
行業：酒店營運
職位：基層職員
性別：男
年齡：25 – 34 歲
意見：同意

「三歲定八十」係鐵定。因為以前一直以嚟嘅習慣，之後就會伴隨住你嘅人生，會一直維持，亦難改變。我有一個同事，啱啱入職嘅時候，我已經覺得佢做嘢好急，一接到上司安排嘅任務，諗都唔諗就即刻做，結果梗係做錯哂啦。後來我私人提醒我同事，當接到任務之後要先思考下，諗清楚，唔好太心急。同事同我講自己控制唔到，改唔到，依然好心急咁去做每一件事。佢已經入職7年，依然都係咁嘅辦事風格。同佢同期嘅同事已經升咗職，就係因為佢咁嘅辦事風格，阻礙佢嘅前途。

你認為最影響人嘅性格同行為會係乜嘢？
我覺得人嘅性格同行為最受家庭影響。因為家庭灌輸各種觀念同世界觀，家庭嘅氛圍會影響到性格同行為嘅形成。一個家庭氛圍好、溫馨，喺呢種家庭生活嘅人會溫柔啲；如果一個家庭氛圍唔和諧，喺呢種家庭生活嘅人性格自然比較粗暴。 朋友甲
行業：博彩娛樂
職位：專業人士
性別：男
年齡：35 – 44 歲
意見：同意

同意「三歲定八十」呢個概念。因為一個人早期嘅性格會影響日後整個人格嘅形成，以致影響整個人生嘅決定同行為。我公司有個同事兼好朋友，大家都係啱啱畢業就入咗嚟呢間公司做同事，同佢熟咗之後就知道佢係有選擇困難症。平時私底下出去食飯，佢睇完成個餐牌，都揀唔掂要叫咩食，有時仲要我幫佢揀埋；去買衫，得兩隻顏色，都要猶豫揀邊隻顏色好，揀成半粒鐘！喺職場，大家都已經入職10年，正常應該變得更成熟，但佢猶豫不定嘅性格，依然冇變。由於佢嘅性格，做佢嘅下屬好慘，決策方向模糊，搖擺不定，好多時今日用方案A行，第二日就改用方案B。但點解話佢「三歲定八十」呢？就係大家食lunch嗰陣，撞到佢中學Miss，問佢：「而家有冇成熟啲，唔好再好似以前咁1516！」我哋喺後邊忍笑忍得好辛苦，哈哈！

你認為最影響人嘅性格同行為會係乜嘢？
我覺得最影響人嘅性格同行為係習慣，因為平時習慣做咩，下意識就會做返咩出嚟，從而成為一個人嘅性格好難改！

1
Sun歧視慘
行業：銀行和金融
職位：基層職員
性別：男
年齡：25 – 34 歲
意見：不同意

我唔同意「三歲定八十」，我覺得所有嘢都可以改變。我有個同事，以前佢新入職嘅時候被安排同我同一Team。有一次我哋一齊見客，發現佢原來好內向，同客戶講嘢都面紅，唔敢直視客人嘅眼，講嘢仲要口窒窒，未開始同客講嘢就開始手心滴汗，成頭汗，超級容易緊張。佢話自己其實一直以嚟都係好容易緊張，控制唔到自己。後來佢去進修，上關於銷售嘅課程，仲有上一啲心理課程。我真係見到佢嘅變化，佢慢慢變得幾健談同外向，對住客唔再超級緊張，變到好淡定，連口窒窒都冇埋，我真係見證到靠學習可以改變一個人。

你認為最影響人嘅性格同行為會係乜嘢？
我覺得人嘅性格受教育影響最大，因為可以從教育裏面吸取知識同觀念，良好嘅教育會造就健全嘅性格。人嘅行為都一樣，因為教育所吸收嘅知識同觀念會令人對世界認知不一樣，而不同嘅認知，會做出不一樣嘅行為。

1

面咪媽
行業：娛樂博彩
職位：基層職員
性別：女
年齡：25 – 34 歲
意見：同意

我同意「三歲定八十」。因為我自己就係依個例子。我由學生時代開始就已經好粗心大意，成日大小考試都因為粗心扣咗好多唔應該扣嘅分數。最誇張係有一次考試，寫錯咗考試號碼，當時想死嘅心都有……大個咗之後，自己粗心大意嘅性格，導致我職業生涯好痛苦。自己嘅工作有好多文字編輯同處理好多表格同數據，所以，我粗心大意嘅性格搞到我工作一塌糊塗，最慘係連我自己double check嘅時候都check唔到錯，真係叫哂救命。我諗過好多方法去改，但都改變唔到自己粗心大意嘅性格。無奈之下，返工嘅時候，所有工作我都比其他人用更多時間去完成，人哋一份嘢可以check一次就保證啱哂，我起碼要check三次先可以保證啱晒，真心累……

你認為最影響人嘅性格同行為會係乜嘢？
我覺得人嘅性格受習慣影響最大，因為我細個嘅時候，就係形成咗馬虎嘅習慣，事事都求求其其，是是但但，日後就形成咗粗心大意嘅性格。令自己就算認真去做一啲事，但最後嘅結果都係錯嘅。
諸葛亮食豬腳
行業：酒店營運
職位：基層職員
性別：男
年齡：25 – 34 歲
意見：同意

我認同「三歲定八十」。因為我父母從我細個就開始教育我，做人要誠實，唔好為咗某啲原住或利益去做壞事。我父母從細嘅教育一直影響住我嘅人生，令我成為一個誠實嘅人。記得喺公司發生過一件事，有一次同另外一個同事去清理客人房間嘅時候，發現有一個客人喺酒店房嘅垃圾桶丟咗一沓錢，估計起碼都有1萬蚊以上，我同我同事都見到，我同事就即刻攞起沓錢話佢負責去通報經理。第二日，我問起主管要唔要根據公司SOP報告番自己琴日做咗啲咩，主管當時好詫異，佢話完全唔知道依件事，我即刻反應到琴日嗰位同事自己攞咗啲錢，我就好誠實咁同主管匯報琴日件事。

你認為最影響人嘅性格同行為會係乜嘢？
我覺得人嘅性格同行為最受家庭教育嘅影響。因為點樣嘅家庭教育，就會教出點樣嘅人。父母身教好重要，令我往後都誠實咁生活，如果父母教育我做一個狡猾嘅人，我覺得我一樣做事好狡猾。

1

醉愛C餐
行業：餐飲
職位：專業人士
性別：女
年齡：35 – 44 歲
意見：同意

「三歲定八十」係啱嘅，因為我有個好朋友，以前識佢嘅時候就知道佢脾氣暴躁，火爆底，少少嘢就容易辣著佢，例如同人講講下嘢，大家有少少意見不合就可以開始嘈。喺職場上，我朋友因為咁嘅性格食咗唔少苦。我朋友有次同部門主管同幾個同事一齊開會，開開下會，同幾個同事意見唔啱，佢居然當住主管面前同幾個同事嘈起身。自此以後，主管再冇揾過佢一齊開會，主管對佢嘅工作評價係做事衝動，缺乏情緒管理能力，個file花哂，以後想升職都難。

你認為最影響人嘅性格同行為會係乜嘢？
我覺得人嘅性格最受習慣影響，我朋友平時就係習慣做事衝動，無論咩事都做咗先算，唔會諗後果。而人嘅行為最終係受情緒影響，我朋友情商比較低，情緒起伏大，難以控制情緒，所以情緒一到，行為失控就開始同人嘈交。

1

神經刀
行業：批發及零售
職位：基層職員
性別：女
年齡：25 – 34 歲
意見：不同意

「三歲定八十」只係懶嘅藉口，因為我自己以前就對數字冇咩概念，對錢銀好模糊，真係對住一堆數字就頭痛，簡單運算我都一定要用計數機。後來，因為我工作必須對數字敏感，并且要有會計知識，本來諗住我依個數字白癡應該做唔嚟。但我自己下定決心，一定要攻破數字領域，所以自己報讀咗啲會計課程，不斷進修自己。隨住自己嘅不斷進修，我宜家已經轉埋部門，入咗會計部，人工又高咗，工作又唔再需要長期企喺度。

你認為最影響人嘅性格同行為會係乜嘢？
我覺得人嘅性格同行為最受家庭影響。對於我自己，我對數字唔敏感、對金錢模糊係因為我父母由我細個開始就將最好嘅嘢畀哂我，令我生活無休，從來唔使花心思去諗錢嘅問題，所以從細個就開始對數字唔敏感，對金錢唔關心。
我·美極
行業：旅遊服務
職位：專業人士
性別：女
年齡：35 – 44 歲
意見：同意

我buy「三歲定八十」，因為我由細到大都好鍾意幫人。喺職場上，同事或下屬一遇到咩事，我就會去幫佢哋，雖然我對其他同事嚟講係前輩，對下屬嚟講係上司，但我唔介意身份地位，我覺得同事有困難就應該去幫助佢哋。因為我鍾意幫人嘅性格，令到我喺公司上下都獲得唔少嘅人心，唔係賣花讚花香，好多同事都心甘情願咁幫我做嘢。因為我樂於助人嘅性格同唔擺架子，令到我喺職場上順風順水。

你認為最影響人嘅性格同行為會係乜嘢？
我覺得人嘅性格最受家庭教育影響。因為我父母教我做人一定要善良，如果見到人哋需要幫助，就一定要去幫。而且對人要有禮貌，互相尊重，不卑不亢。喺咁嘅家庭教育下，養成咗我樂於助人嘅性格。

1
青青河邊草
行業：地產
職位：中層管理者
性別：女
年齡：45 – 54 歲
意見：同意

我好同意「三歲定八十」。我有個閨蜜，睇住佢一畢業就入到心怡公司，好快就喺公司揾到人生嘅另一半，然後升職，之後結婚，仲生埋BB，我唔係想話佢好命，而係佢嗰種積極主動嘅性格，由細開始就搏殺。老實講佢唔聰明，佢係靠勤力搭救，讀書時期全班頭三名。出到嚟做嘢，靠實力入公司實至名歸；見到鍾意嘅男仔，主動自己追。我真心佩服佢，不過佢屋企人功勞都唔細，佢兩老性格同佢完全一樣。

你認為最影響人嘅性格同行為會係乜嘢？
我覺得影響人嘅性格同行為係屋企人。我個閨蜜有佢哋教導，先可以咁積極主動。好似我父母，對我一啲都唔嚴厲，雖然有個開心童年，但而家前途同佢比真係差好遠。

結語
有冇喺以上分享搵到任何同自己相似嘅地方？從故事當中有冇了解到自己以前忽略咗一啲根深蒂固嘅行為？我哋希望以上分享可以令大家了解到認識自己嘅重要性，了解清楚自己先可以尋找解決方法去改善同增值自己，希望今期嘅分享對大家有幫助。