《一山還有一山高》最離譜員工分享︱6月24號哈囉好工週刊火熱登場

2019.6.24• 周一

導讀：在職場打滾多年，當你覺得你已經有足夠情商去應付職場上的人事時，總會有那麼幾個同事令你「出乎意料」，需要你運用更多的智慧去應對。今期《哈囉好工週刊》會同大家分享職場上的離譜同事如何為打工仔帶給「驚喜」。所謂一山還有一山高，沒有最糟糕，只有更糟糕！

化名：其實我都索

行業：娛樂博彩

職位：基層職員

性別：女性

年齡：25 – 34歲

我個部門有個雙面嬌娃，外表的確係唔錯，清清純純，係一般男仔都會鍾意嘅類型。基本上佢一開口，其他男同事都會幫佢手，咁一個願打一個願捱我哋都冇咩所謂。但係有次畀我見到佢真實一面，唔知係咪某位同事得罪咗佢，佢趁大家出咗去飲茶，佢走咗過去佢個位攞起咗份文件拎咗去碎紙機。到個同事返嚟喺度搵，佢就即刻變臉扮nice，仲問同事使唔使幫手。而家我每次一見到佢笑得好燦爛，個心都會寒咗一吓。

你有什麼建議給這位同事？

只想大家早啲識穿你，其實對你嚟講都好，我諗你畀人捉到就會開始知錯。

化名：前人種伏後人中伏

行業：辦公室助理

職位：基層職員

性別：女性

年齡：25 – 34歲

上一間公司接我手嘅同事，簡直係衰到冇人有。咁我嗰陣準備走，雖然係咁都想留返個好印象畀上司。咁我就寫好晒啲注意事項同工作內容細節，甚至連上司鍾意啲乜要注意啲乜都同佢講到好清楚，等個新人做嘢唔使等上司擔心。點知呢個新人搞我一鑊：上司問佢有冇嘢唔明，佢話唔明，話因為我冇乜點教，佢自己學習多。上司問咁教咗啲咩嘢，佢就話我講佢壞話，簡直係無中生有。佢呢啲諗住踩住人哋上嘅方法我絕對唔會令佢好過。到走之前最後一日我都唔出聲，直到最後一日上司請我食飯，我將所有記錄，同埋我寫嗰啲心得，send哂畀我上司，叫佢小心啲個新人。

你有什麼建議給這位同事？

本身寫啲建議畀你寫得咁好，你跟住做都肯定有得你升職，點解你要做啲咁過分嘅事？先學吓點做人再學做嘢啦。

化名：我們都一樣

行業：酒店營運

職位：基層職員

性別：男性

年齡：35 – 44歲

我覺得職場最乞人憎最離譜嘅，唔係啲直接針對你嘅同事，而係嗰啲唔出聲背後篤你背脊嘅同事。我喺公司一直嘅信念就係「做好自己份工」，冇諗住搞其他人，但係唔知點解，總有啲人會主動搞你，甚至係你畀人搞完，畀老闆話咗一大輪，你都唔知邊個同事背後攻擊你。只可以講如果係講緊事實嘅冇所謂，但係吹水嗰啲就真係好過份。我對上一份工就係因為遇到兩位呢啲類型嘅同事先辭職走。

你有什麼建議給這位同事？

用多啲時間學習，淨係掛住做啲小人嘢。你永遠都只會有同一高度。

0

化名：小丸子又有心事

行業：餐飲

職位：基層職員

性別：女性

年齡：25 – 34歲

我哋係一間小型餐飲店，我同我老公本身唔算有啲咩開舖經驗，結果就請到個好離譜嘅夥計。而家我對住佢都唔知好嬲定好笑，我覺得我同佢而家嘅關係已經唔係僱主雇員，而係母女關係。每日都要我打電話叫佢起身，唔打畀佢嘅話就一定會遲到，甚至唔出現。最搞笑我哋仲要遷就埋佢啲心情，如果佢唔開心，仲叫我哋體諒佢畀佢放一日假。究竟我老公請咗個咩員工返嚟？唉……

你有什麼建議給這位同事？

希望你知道自己有啲咁嘅問題，話你你又會喊，我哋唔炒你其實係想教好你，如果你再係咁成世都冇公司會請你。

0

化名：你真識玩

行業：批發及零售

職位：基層職員

性別：男性

年齡：35 – 44歲

公司嘅財務部位置一直缺，我估係因為老細開嘅價錢太低，所以一直都請唔到人。過咗一段時間有個大肚婆嚟in，我諗因為太難搵嘅關係，老細明知佢就生都請佢。點知好啦，佢返咗嚟應該得一個星期，經常都用唔同原因去睇醫生，咁呢樣都冇嘢嘅。最正就係佢之後連埋產假，放到差唔多最後準備返工嗰陣打電話嚟話唔做，老細都唔知講咩好，最慘就係嗰班財務部嘅同事，畀呢個同事攞咗個quota，嘢做多咗，又唔可以請人。

你有什麼建議給這位同事？

其實咁樣做係人都知你有意，其實澳門真係好細，無謂整花自己履歷。

化名：飯腳C

行業：批發及零售

職位：基層職員

性別：女性

年齡：25 – 34歲

我哋公司基本上都會請新入職嘅同事食飯，正常都係食飯直落。有次我哋帶咗個靚女新人食飯，我個同事離譜到博命灌佢飲，我見個女仔又唔好意思推搪，最後都飲到好醉。我個同事見到咁嘅情況就話送個新同事返屋企，我諗全世界都知道佢嘅企圖，死都唔畀佢送個女仔返屋企。我諗如果佢嗰日成功，佢同公司都有可能會上報紙頭條。

你有什麼建議給這位同事？

改過自新，之後轉公司啦，你喺呢度個底已經花哂，好好轉公司重新做人。

0

化名：水瓶女

行業：銀行和金融

職位：基層職員

性別：女性

年齡：25 – 34歲

公司有個同事可以話係乞人憎到極點，自己平時表現差，咁因為我哋公司係按個人表現畀花紅嘅，可能佢知道自己一定冇，就想喺度玩「攬炒」。周圍喺度搞火頭，邊啲同事唔順眼，就喺度整古做怪，搞到出咗事經理正常無論點都好，對兩個印象都會差，佢就係用呢啲咁嘅招數嚟玩我哋。都唔知點解，寧願畀全公司嘅人憎晒，都唔肯努力啲做嘢，有問題！

你有什麼建議給這位同事？

引咎辭職，改過自新，重新上路。完。

化名：職場大雄

行業：酒店營運

職位：基層職員

性別：男性

年齡：35 – 44歲

啱啱畢業入到嚟呢間公司，真心學識咗好多嘢。尤其係職場上嘅宮心計。一入嚟公司，已經見識到某位同事啲單單打打，只要你畀佢感覺唔係同路人，佢就會用各種手段搞你，甚至搞埋你啲同事，等佢哋都會想你快啲走，而唔使再受罪。我完全唔明公司點解其他同事都怕佢，或者佢可能做得耐，又或者同老細熟。我入嚟呢間公司只不過係想學嘢，我以為呢啲嘢只會中學先有，估唔到去到咁大個出嚟做嘢仲有人搞分化玩陷害，我真係無言以對，只可以當係職場學習一部份。

你有什麼建議給這位同事？

其實有啲咩唔滿意咪講出嚟囉，係都要做埋曬啲咁小家嘅嘢。如果我係嗰位同事，我會踏實啲做人，人在做天在看。

0

化名：凡高

行業：資訊科技

職位：基層職員

性別：男性

年齡：35 – 44歲

正所謂好男不與女鬥，咁我都有堅守住呢個宗旨，不過都有個前同事差啲迫到我破戒。佢好勁㗎，明明佢個部門唔算得閒，但係基本上都冇見佢做嘢，成日喺度傾電話大聲笑；佢另外最經典就係成日都「戀愛病」上身。只要佢見到有一對男女傾計，佢就會覺得人哋有啲嘢，周圍傳人哋有嘢。咁當然我同佢唔熟唔會理佢，聽下就算。但後期搞得太多人，成班同事投訴佢，老細就幫啲同事出氣，了解完件事之後就即日炒咗佢，以防佢搞公司啲嘢，執好咗啲嘢就唔畀佢返自己位，淨係叫清潔阿姨攞張凳放喺公司個角落頭叫佢坐足一日，仲要連插蘇位叉電都冇，簡直大快人心。

你有什麼建議給這位同事？

建議少說話多做事，準確啲係少廢話多做事。

其實離譜同事無處不在，但我們週刊仍建議大家千萬別「以其人之道，還治其人之身」，小不忍則亂大謀，我們以下會分享應對不同離譜同事的方法，希望大家可以受用：

應付反面無情的同事

這種同事的特徵就是忘恩記仇，一旦你把他激怒了，你的狀況變得非常危險。應付這種同事，如果見到他有把柄必須記錄下來。這個記錄不是要來害他，至少讓他知道這種手段對你是沒有用

應付愛擦鞋的同事

愛擦鞋本身對你沒有傷害。但這種同事千萬不要得罪他，否則他極有可能把你當作踏腳石，用你的不是當作是他向上爬的動力。

應付尖酸刻薄的同事

尖酸刻薄的同事，無可厚非是公司其中一種最不受歡迎的類型。冷嘲熱諷別人時不留餘地，他能夠生存只不過是因為別人怕他，不想理他。當大家都不理他，有一天他得罪同事，他後果定必很慘。

應付陰險嘅同事

這種同事相處，能不做同一件工作，儘量避開不要跟他合作。如果避不開，萬事都要保留紀錄，甚至錄音。保障好自己安全。

應付挑撥離間的同事

挑撥離間的同事很容易把公司搞得亂七八糟，使同事們都人心惶惶。除了對他謹言慎行之外，最好和你相熟的同事都溝通好，建立同盟，把他孤立起來，把他的傷害力降到最低。

0

結語

    可能你現在看週刊的故事分享會覺得很有趣，但若事情真實發生在你身邊時卻是一點也不可笑。所以，希望各位打工仔看過今期分享後，明白這些同事究竟有多糟糕，從而學會避免自己成為他們的一分子。

查閱更多《哈囉好工週刊》內容：http://weekly.hello-jobs.com/