News Category

Hot Tags

A股拖累 港股倒跌一點   跨工區宜轉型免稅商貿區

Latest News

News Detail

若要人不知，除非己莫為2︱7月30號哈囉好工週刊火熱登場

  • 2018-07-30
  • https://mp.weixin.qq.com/s/E7uqd1LY9ysezPUpdo2kxw

 

若要人不知，除非己莫為2
導讀：為響應各位讀者對第一輯「若要人不知，除非己莫為」的熱烈支持，今期《哈囉好工週刊》推出第二輯專題故事。非常感謝大家對我們的支持，希望你也會喜歡以下的故事分享。

若要人不知，除非己莫為2

 

Joanna
性別：女性
行業：零售
職位：客戶服務員
職場秘聞：公司本身有員工折扣呢個福利，買自己公司嘅產品會有優惠。而有位同事私下同客人聯絡用咗自己嘅員工折扣價買貨然後用返正價賣返比個客人，佢自己從中就賺咗一大筆差價。你知呢啲一開始咗就好難金盆洗手㗎喇，直到人事部開始懷疑佢嘅時候佢依然「膽生毛」，當佢做下一單「大茶飯」嘅時候公司就cut咗佢個員工優惠，個同事仲夠膽問人事部發生咩事，仲狡辯堅持話班客人係佢嘅親戚。最後佢就梗係俾人炒咗啦！
 
雷爺
性別：男性
行業：教育
職位：老師
職場秘聞：隔離部門有個單身嘅男同事，猛烈追求同佢同部門嘅女同事。但好似係「襄王有意，神女無心」，個女同事同個男同事完全唔到電，已經當面拒絕過。點知男同事越戰越勇，追求更加激烈，誓要「非卿不娶」，每日喺公司樓下等個女同事放工話要送佢返屋企，每日早上亦喺女同事屋企樓下話要送女同事返工。搞到個女同事心驚驚，最後搞到要高層出面調和先平息到成件事。

Fiona
性別：女性
行業：酒店營運
職位：排班員
職場秘聞：我上司次次都係last minute先通知我哋話有新order，永遠都唔會提早同我哋講，而且明明佢就一早收到新order都遲遲唔講。成日都有意無意咁打亂我哋工作上嘅行程，本身約好嘅客又要改時間，有次班客投訴又係搵我哋鬧。最後有次真係趕唔切deadline出咗事，然後佢將責任推比佢嘅下屬揾佢「祭旗」，然後啪啪pat pat當冇事發生。最後嗰個同事「食死貓」後頂唔住就辭咗職……
 
Bay
性別：女性
行業：娛樂博彩
職位：廚師
職場秘聞：經理講過比客人食嘅食物我哋員工係唔可以食。有一次當值經理叫我幫手攞食物比佢，佢話係比個客食，點知轉個頭見到佢自己食緊，太過份！然後我特登敲門入去問經理味道點樣需唔需要改進，佢見到我嚇到成個人彈咗起身，仲搞到成個嘴都係醬汁。
 
 Jim
性別：男性
行業：花藝
職位：插花師
職場秘聞:民間傳統有話紅白兩事盡量唔好同一段時間進行，但係我老闆為咗賺錢真係咩都做得出！有個客人佢好注重習俗，佢指明佢辦喜事唔可以同其他帛事一齊做，老細為咗接呢單大生意，佢竟然呃個客話呢段時間冇接過帛事，好笑就好笑在佢係同一個月接過一單帛事，有標我哋花店嘅名亦都係網上做過宣傳。佢係咪真係當個客係傻。
 
May
性別：女性
行業：酒店營運
職位：電視房監控員
職場秘聞:有個同事次次有波睇嗰晚佢一返工就會用支cam照住樓上嘅電視睇波，個個都忙到死佢自己就好安逸咁䟴䟴腳睇波，主任一經過嗰陣佢就會扮睇住個場，有時仲過份到叫埋其他同事一齊睇波。有次經理巡房嗰陣撞到正一正，但班同事睇波睇得太入神連經理敲門都冇反應，最後佢哋咪一人一封warning letter。

Pauline
性別：女性
行業：美容
職位：專業美容師
職場秘聞：同幾個朋友夾份開咗間美容院，其中一個大股東平時一覺得員工唔順眼就會炒佢魷魚，然後又同我哋班細股東講其實唔需要咁多人手唔洗再請人，但往往第二日就會有新人頂替，而且佢哋都係大股東佢自己嘅親朋好友。佢仲規定我哋班細股東要公私分明，所以我哋嘅親朋好友係唔可以入職。最搞笑就係佢所謂嘅親朋好友個個都好食懶飛，仲好容易同大股東起口角，真係比錢買氣受。
   
Ray
性別：男性
行業：博彩娛樂
職位：調酒師
職場秘聞：之前有個客人點咗份蛋治，整好嗰陣水吧師傅唔小心將個蛋治整跌咗落地下。我見師傅就咁徒手喺地下執返份蛋治落隻碟到，再叫樓面嘅同事攞比個客人食。我明白呢類事情喺茶餐廳好多時都會發生，但估唔到連五星級酒店都係咁，個地板有冇擦乾淨同佢到底有冇洗手都係一個謎……
 
Tom
性別：男性
行業：行政
職位：行政助理
職場秘聞：我經理成日都話自己好忙好多嘢做又有好多report要交。講真嗰句啦，有幾次我經過嗰陣係見佢望住個電腦，以為佢真係忙緊啦，但當我再次經過佢間房，見到佢部電腦又係電腦桌面，就知佢其實喺到發緊吽逗！之後有個同事入去比份文件經理覆查，我見住佢目不轉睛咁對住個桌面講佢仲忙緊，之後繼續睇……冇人知道佢其實睇住個桌面忙緊啲咩。
 
Lucas
性別：男性
行業：酒店餐飲
職位：烘焙師
職場秘聞：我做間店可以將收工前賣唔晒嘅西餅同生日蛋糕都分比員工帶走，但我哋個經理過份到成日都明目張膽咁收起一個一磅半嘅蛋糕，想順理成章咁當個蛋糕賣唔出去就可以攞走。有次經理嘅屋企人生日，向我哋訂咗個生日蛋糕仲要幾貴下但冇比過錢，最後先知佢嘅生日蛋糕入咗VIP客人嘅數，因為我哋酒店會送蛋糕比VIP客人。
Mar
性別：男性
行業：零售
職位：銷售員
職場秘聞:記得有次同事抹緊A錶嘅時候整花咗錶面，但同事冇同經理講返就收返埋喺倉庫。之後有個客人睇中咗A錶嘅display（我哋一般唔賣display），然後客人埋單嘅時候個同事就入倉庫將上次錶面整花咗嘅A錶賣咗比個客人。隔咗一個星期個客人返黎投訴話我哋極唔專業，經理知道係嗰位同事做嘅「傑作」之後，規定佢以後抹錶一定要企起地毯上面抹，但我哋鋪頭唯一嘅地毯得A5 size咁大把，所以以後嗰位同事都要係半跪式咁抹錶 。
 
Vincent
性別：男性
行業：餐飲
職位：侍應生
職場秘聞：上頭有指示，任何過咗期嘅食品都唔要得，必須要掉。有啲啱啱出爐冇耐就因為客人唔要，客人完全冇掂過嘅都要全部放落垃圾桶，寧願全部倒晒都唔比自己嘅員工食，勁浪費！之後有次收工主管同經理一齊坐電梯，經理就聞到一陣陣新出爐嘅麵包香，就係呢次先知原來主管成日自己偷偷袋埋好多自己攞走。經理因為呢件事又開會警告大家唔好再攞食物走，話係公司財產喎……
 
大B
性別：男性
行業：批發及零售
職位：手機維修員
職場秘聞：我老細經常入手一堆水貨機然後攞返嚟賣比班客仔。班客仔唔知係水貨機所以都照買，佢同班客仔講係行貨。平時賣行貨一部賺幾十蚊，依家賣水貨就賺成幾百蚊一部。有次佢老婆想要部新出嘅手機，老細就攞咗部水貨手機送比佢老婆，我哋見到嗰刻都心驚驚佢老婆知道咗會唔會發脾氣。
    

結語

正直的人在任何時候都會行為端正，是因為他們有著道德規範和懂得自我約束。其實每個人最難戰勝的，都是自己，所以才會有「平生不做虧心事，半夜敲門也不驚」這個說法。在此希望大家都能努力成為一個懂得自我約束、做事端正的人，從而營造一個更好的工作環境。

 

查閱更多《哈囉好工週刊》內容：http://weekly.hello-jobs.com/

Back