有病好醫﹗恐怖上司嘅10個病徵

為咗令大家避之則吉，我哋綜合咗外國專家同埋本地打工仔意見，得出阿頭11個恐怖特質，等大家都一齊幫自己上司測試吓，叫佢有病好搵藥醫…

1. 逗號唔順眼

擅長雞蛋裏挑骨頭，連一個逗號都睇唔順眼，搵人重新執過份文件。

2. 入夜寂寞凍

單身上司最鍾意管人，要你隨傳隨到伸hand hand，又成日問你今晚有乜做，咪陪男朋友囉﹗其實佢內心，好寂寞。

3. 黑面金剛

黑面神，鍾意批評人，但接受唔到人哋批評，畀意見都會黑面。

4. 自覺好L勁

覺得自己好L勁，乜L都要問，一邊話信你，但又一邊要跟進你進度，唔會真心信班手下。不過對住大老細假到爆，講到自己好L廢，都係老細你領導有方。

5. 燥底達人

經常狂燥爆seed鬧人，成Team人一日被鬧幾次係等閒事，當眾鬧你一個先慘。

6. 完美特警

由工作安排到Office佈置，自己行路嘅嗒嗒聲，甚至你張Memo紙上面啲字，全部佢都非常講究，問你點解份文件，條線隔得咁樣衰。

7. 時間崩壞

上司意識唔到現實世界個地球係轉緊，以為5PM先係開始返工兼OT，又要你3粒鐘內做晒人哋一星期嘅嘢。佢隻錶唔係自己睇，係畀人睇。

8. 心入面爆粗嘅ban友

成日Ban人。佢會笑嘅先係創意，佢唔BUY嘅，就係屎橋，笑你XX怕你嬲。佢生命中不能承受任何錯誤。

9. 上司愛老點

不時出現選擇困難，決定唔到邊樣最好，一時一樣，難為班下屬畀人老點。唔知自己常點嘅上司最恐怖，你嘅事業，隨時沉船。

10. 獨食上司

最愛自己嘅上司，係唔會有嘢益你，例如問佢19幾次都會答「No」，係因為行事過分謹慎，唔希望自己冒險。有嘢食有功勞領，一定係佢食先。